Бүгін – Саяси қуғын-сүргін және ашаршылық құрбандарын еске алу күні. Бұл – зұлмат жылдарда құрбан болған жандардың рухына тағзым ететін және тарихтан тағылым алатын маңызды дата.

Жалпы, тарихтың ақтаңдақ беттерін ашып, оны объективті зерделеу, бірінші кезекте, Тәуелсіздіктің қадірін түсіну және бүгін мен болашақ туралы дұрыс пайым жасау үшін қажет. Сондықтан кейінгі жылдарда Президентіміз Қасым-Жомарт Кемелұлы Тоқаевтың бастамасымен бұл бағытта ауқымды жұмыс атқарылуда.

Соның аясында Саяси қуғын-сүргін құрбандарын толық ақтау жөніндегі мемлекеттік комиссия құрылып, архив құжаттары зерттеліп, бұрын құпия болған көптеген дерек ғылыми айналымға енгізілді. Бұл – ұлтымыздың тарихи санасын жаңғырту және Мемлекет басшысы айтқан әділетті қоғам қалыптастыру жолындағы аса маңызды қадам.

Төл шежірені түгендеу – өткенге оралу емес. Басты мақсат – халқымыздың басына түскен қасіретті кезеңдерден сабақ алып, оның қайталануына жол бермеу. Бұл – ата-бабалар мен келер ұрпақ алдындағы қастерлі міндет.

Ұлт тағдыры сынға түскен ондай зобалаң енді ешқашан қайталанбасын! Әрдайым еліміз аман, жұртымыз тыныш болсын!