Біздің осы телеграмда бөліскен нәрсемізбен инстада айтқан уағыздарымыздың ақыретте пайдасы тиеді ме екен? Яғни бір адам болсын осы телеграмдағы жазба арқылы есімді жиып, өзімді дұрыс жолға бағыттауға тырыстым деп, мен үшін Алла Тағаланың алдында болысады ма екен?

Алла Тағала бізді танитын тақуа жандарды бізге шапағатшы етсін. Әмин🤲

✍️Олжас Ханафин ұстаз(рахимаһулла)

Алдыңғы апта 209 бет кітап оқыппын.

Әр аптаның есебін осылай дүйсенбі жазып отыратынмын.

Нәтижелеріңді қадағалап отыру стимул береді. Шамаңды анықтап, одан да ары қарай жақсаруға әрекеттенесің.

Осы бір кішігірім тұрақтылығымыз себепті мен нақты білетін бірнеше адам әсерленді, кітапты тұрақты оқуға кірісті.

Пайдасы бар.

#ой_түймекке

Бірінші үйренген шеттілім қандай болды?

Мен әрдайым орыс тілі деп айтам, себебі, шынында, бөтен тіл ғой. Орыс мектебінде оқып, кейін қазақ мектебіне ауысқан кезде өз ана тілімді қайтадан оқу процесінен өткем.

6 жасымда бірінші сыныпқа бардым, орысша екі ауыз ғана сөз білдім. Яғни, жаңа бір тілді 0-ден бастап үйрену жолынан өттім. Бір қызық детальдар есімде. Сенесіздер ме, сол кезде Олеся Павловна (сынып жетекшім) Адам и Еваның оқиғаларын айтып берген бүкіл сыныпқа. Библия нұсқасында, әрине. Сана тап-таза кездер ғой. Айқын-айқын бірнеше фрагменттер есімде.

Руслан, Шыңғыс, Берік, Серік деген достарым болған. Бірақ ғасыр өтті, кімнің кім екенін, қайда екенін қазір білмеймін де.

Ол жекеменшік мектеп болатын.

9 жасымда туған ағам мен әпкем оқитын қазақ мектебіне ауыстырды. Қазақша отбасыммен сөйлесіп жүрсем де, кітап тілі бөтен еді. 9 жасымда ана тілім жаңа тілдей ашылып, қайта оқу процесінен өттім.

Бэкграунд, халфия ғой. Кейінгі жылдары да жаңа тілдер үйрену оңай соқты, себебі негіз бар еді. Тіл үйрену процесінен бір мәрте өткен адам, кейін де қадамдай алады. Яғни, қазіргі басымыздан өтіп жатқан қандай да бір жайттар текке емес, ертеңімізге әсері бар, ізін қалдырады.

#ой_түймекке

Шейх Мұхаммед Аууама (حفظه الله) айтып еді:

Әр таңда осы дұғаны қалдырмай айтып жүріңдер, әсіресе, білім жолындағы жандар!

اللَّهُمَّ إِنِّي أَسْأَلُكَ عِلْمًا نَافِعًا، وَرِزْقًا طَيِّبًا، وَعَمَلًا مُتَقَبَّلًا

Мағынасы:

Аллаһым! Мен, шынында, Сенен пайдалы білім, жақсы ризық, қабыл болатын амал сұраймын!

#дұға_қару

Автобан. Трассада кетіп барам. Жолда жанармай бекетіне тоқтадым.

Көліктен түспей, маңызды шаруаларды телефон арқылы шешіп жаттым. Бір мезетте жаныма үлкен жүк көлігінің жүргізушісі кеп, тереземді қақты. Не болды екен деп есікті аштым. Қанша күн жолда жүргенін айтты, қалтасында ақша қалмаған, бір тамақ алатын қаражат сұрады.

Тас боп кеткенбіз ғой мына қоғамда, қолма-қол ақша жоқ еді деп ары қарай жұмысымды жасай бердім…

Терезеден көрініп тұр, жаңағы кісі басқа бір көлікке барып тура осындай өтініш білдірді. Ол көліктегі ер азамат түсіп, қолынан жетектеп, жанармай бекетінің тамақтанатын жеріне кіргізіп, бір сендвич пен шай әперді.

Мен тек сол сәтте ғана түсіндім, сол кезде ғана жетті, сол кезде барып оянғандай болдым.

Ақпарат толқынының көптігінен шын мұқтаж бен “кәсіпкерді” айыру қиын боп қапты… Оңайы — ешкімге сенбеу дегенге бекініппін... Алайда соның әсерінен бірте-бірте бізді адам қып тұрған нәрседен айырылып баратқандай күйге ендім…

Жанармайымды құйып болған соң жаңағы кісіге өз атымнан тамақ әперіп, арқасын қағып, сәтті сапар тіледім де, ары қарай жолымды жалғадым. Сол кезде тағы да бір есейгендей болдым.

Бірінші келген кезіндегідей сауап болмаған шығар, бірақ сабақ болды.

#ой_түймекке

Жағдайым белгілі. Денем иықтан төмен қимылдамайды. Сезбейді. Оңай емес, әрине.

Кейде мынадай ой келеді: ақыры осылай жату тағдырыма жазылған болса, неге ес білмейтін бала күнімде құламадым екен?

Тағдырға наразылығым емес. Бұлай қалау, тіпті ойлаудың өзі қате екенін білем. Бірақ сол ойдың түбінде не жатқанын осы жазбамда түсіндіргім келеді.

Адам қартайғанда өткенін көп еске алса, жастық шағын жиі ойласа, баяғы күш-қайратын сағынса – қартаюы ауырлау өтеді дейді. Өйткені ол бұрынғыдай жүре алмайтынын іштей мойындағысы келмейді. Кейде өзін-өзі жейді. Бірақ айналасына қарайды: өзі қатарлы адамдар да әлсіреген, бәрі де қартаяды. Өмір заңы сол екенін көреді. Сабыр етеді. Шүкір айтады.

Менің жағдайым ше?

Мен уақытпен бірге баяулаған жоқпын. Қиыны – осы. Он сегіз жасымда бір күннің ішінде тоқтадым да, қимылсыз қалдым.

Оған дейін денсаулық мәселе болмаған. Футбол ойнағанда ішкен асымызды жерге қоя салатынбыз. Ештеңеден қорықпайтынбыз. Дене мықты, сынбайтын нәрсе сияқты көрінетін. Гол соққан сәттер… Доп торға тигендегі дыбыс, балалардың айқайы, иықтан қағып, құшақтап жатқан достар… Кеудеге сыймай кететін қуаныш болатын.

Қызбен танысқанда да ешқайсысы “сізді тек аға ретінде көрем” деп сырғытып жібермейтін)) Жассың, еркінсің, алдыңда тұтас өмір тұрғандай сезілетін. Кез келген қызды қаратып алуға қауқарың жететіндей…

Ал таңғы жүгірістер – бөлек әңгіме.

Жүгіру мейнстрим болмай тұрған кезде, 16-17 жыл бұрын таңғы бесте оянып жүгіруге шығатынмын. Ешқандай орта жоқ. Ешқандай қолдау жоқ. Жалғыз өзім.

Үй футболкасы мен спортивка. 1500 теңгелік әмбебап көк кеды. Арнайы жолақ емес, көлік жүретін трасса. Шагомер де жоқ, пульс өлшегіш те жоқ. Интернет жоқ, әлеуметтік желіге салатын мүмкіндік те жоқ.

ШымКТЛ-ден төмен түсіп, Фиркан арқылы өтіп, Көктемді айналып, Востокқа түсіп, Северден асып, Евразияға қарай бұрылып, қаланы бір айналып келетінмін. Шымкенттің таңғы салқын ауасын кеудем толтыра жұтып, жалғыз жүгіретінмін. Ешкім көрмейді. Ешкім бағаламайды. Өзің үшін жасалған таза еңбек болатын.

Жатқханаға қайтып кіргендегі сезімді айтып жеткізу қиын. Денең шаршап тұрса да, ішіңде бір жарық жанады. Күнің жақсы өтетінін алдын ала сезесің. Жай ғана жүгіріп келгенің үшін өзіңе деген сенім артады.

Сол сезімдер жадымда сақталған ғой.

Айтпағым, мен қозғалыстың өзін емес, сол сәттердегі күйді, сезімдерді сағынамын. Гол соққандағы жеңіс дәмін, жанында жүрген сүйген қыздың жылы тынысын, жүгірістен кейінгі бойды кернеген сергектік пен энергияны аңсаймын.

Қайталағым келеді. Бірақ қолымнан келмейді.

Сосын еріксіз 30–35 жастағы жігіттерге қарайсың.. Олар жүріп барады, жүгіріп барады, әдемі өмір сүруде. Өзіңді солармен салыстырасың. Сағыныш оянады. Көңіл бір сәтке түсіп кетеді.

Сондағы ой:
егер бала кезде жарақат алсам, бәлкім бұл сезімдердің бәрін білмес едім. Сағынбас едім.
Жүгірудің ләззатын, футболдың қуанышын да сезбес едім.

Бірақ бұл ойдың өзі уақытша ғана. Өйткені дәл осы естеліктер – байлығым. Мен өмірді сезініп үлгердім. Жүгіріп те көрдім. Жеңіп те көрдім. Сүйіп те көрдім. Әлі де сезінудемін.

Қазір разылықпен өмір сүруге тырысамын. Бұл хәлдің де өз сабақтары бар. Денсаулықтың қадірін түсіндім.

Бір күні Жәннатта өз аяғыммен жүрем деген үміт бар. Со күні әр қадам мен үшін шексіз қуаныш болады. Сол кезде, бәлкім, ең бақытты адамдардың қатарында болармыз.

Әмин.

Алланың берген берекесімен, алдыңғы апта 320 бет кітап оқи алдым. Студенттік шақта бұдан да көп оқитынбыз. Алайда ол уақытта бұлай нәтижемді тіркеп отпайтынмын.

Уақыт өтеді, өсеміз, жауапкершіліктер көбейеді...

Сол себепті де студенттік шақты (жалпы жастау кезді) кеңінен сол кеңдігімен пайдаланып қалу керек. Сол себепті де "Студентке кеңес" деген кітап шығардық.

Кейде біздің парасат-танымымыз жетпей тұратын жерлер болады. Оны уақытпен, соны сүрумен ғана көре аласың, біле аласың. Уақытында дұрыс адамның дұрыс ақылын тыңдау арқылы, соған амал етумен біраз нәрсені еңсерген-дік.

Енді біздің кезек. Біз де мейлінше өзімізден кейінгілерге дұрыс бағыт-бағдар беріп қалсақ дейміз.

Бүгінгі оқыған әрбір әріп, әрбір бет - ертеңімізге жасалған инвестиция. Үлкен дивиденд әкеледі, сөзсіз. "Иқро" үмметіміз! Құдайдың ең алғашқы әмірі - "Оқы" болды.

#ой_түймекке

Біз әдетте адамдарға "Болмағанда маған дұға етші" деп жатамыз. Шынында, дұға - "Болмағанда" дейтін нәрсе емес, керісінше, көмек үшін жасалатын ең ұлы амалдардан.

Әрдайым дұға етіп жүретін адамның уайымы да аз, стресс көрсеткіші де төмен дейді.

Себебі ол адам уайымын төге біледі, дұға арқылы сыр шертеді, ішін ақтарады.

Осындай маңызды амалды күнделікті әдетке айналдыра білу маңызды. Күн ішіндегі бір сәт. Тіпті бір күнде 5 минут ғана уақытыңыз кетуі мүмкін.

Руханият - өзге де өмірлік аспектілердің бәріне әсер етеді.

Рухани сау адам отбасында, қызметінде, достармен қарым-қатынасында болсын тығырыққа тірелгенде шығатын жолды біледі, мәмілеге келеді.

Сол рухани саулықтың ажырамас бөлігі - дұрыс дұға ете білу.

#дұға_қару

Мен өзім тұрақты оқитын екі дұға кітабы бар:

1. Хизбуль Ағзам (Мулла Әли Қари)
2. Дәләил Хайрат (Имам Жәзули)

Алла ғалымдарды рақымына алсын! 🤲

Екеуі де апта күндеріне бөлінген. Яғни, дүйсенбі күні тек сол дүйсенбі бөлімін оқисың, сейсенбі күні тек сейсенбі бөлігін ж/е т.с.с.

Практикалық тұрғыдан өте ыңғайлы. Бастау нүктесін және аяқтау нүктесін білесің, уақытыңды жоспарлай аласың. Тұрақты оқып жүрсең, уақыт интервалын да есептеп қоясың.

Соның бәрінде маңыздысы - ықылас. Бір бетінің өзін, тіпті бір дұғаның өзін ықыласпен оқысаң, бүкіл күніңе күш береді.

Ол жерде сенім мәселесі. Мен таңертең үйден әлемдердің Раббысынан қажетімді сұрап шықтым, болды, гарантия деген сенім ғой. Сол сенім күніңе әр береді.

#дұға_қару

Хизбты да, Дәләилді де өздеріңіз оқи алатындай деңгейге жетерсіздер. Осындайда енді түрлі адамдар шығады, қазақша дұға ете берсе болмай ма дегендей...

Ешкім жоқ демейді ғой, осыған дейін қазақша дұға етпе деген бір ұстаз жоқ. Қазақша дұға ететін адам олай өзгелерді сынап, мін іздеп те отпайды.

Арабша дұға етудегі мақсат - Пайғамбарымыз (Алланың игілігі мен сәлемі болсын) дұға еткендей, үйреткендей дұға ету. Себебі ол сөздердің терең мағынасы бар, бүкіл қажеттіліктер қамтылған. Құранда келген дұғалар бар. Алла Тағаланың өзі үйреткен дұғалар келеді. Оны мағыналық тұрғыдан қазақша да айта бер, ешқандай қиындық жоқ. Бірақ оригинал дұғада біз білмейтін, алайда өзіміз үшін хайырлы мағыналар да жасырынған.

Басқа қажеттіліктерімізді онсыз да өзіміздің ана тілімізде сұраймыз. Екеуі бөлек-бөлек тақырып қой, асылында.

#дұға_қару

Құран курсына орын толды. Кейде төлем чектерін, алып жатқан адамдардың жіберген түбіртегін көрсетеміз "Міне, білімге ақша жұмсай алатын адамдар бар" деген мысалмен және орындардың кетіп жатқанын дәлелдеу үшін.

Ертең алғашқы тарауық оқимыз ғой, иә?!

Берекелі Рамазан тіледім баршаға! 🌙

Адам өмірі сынақтардан тұрады. 100% сынақсыз адам жоқ. Кез келген адамның өзіне жараса, өз деңгейіндегі сынақтары болады.

Шынында, сынақ адамды жасыту үшін емес, келесі деңгейге шығару үшін қажет.

Қазақ даналығындағы негізгі қағида өзіме қатты ұнайды:

"Бөрі арығын білдірмес, итке жүнін қомпайтар".

Яғни, әлсіздігін көрсетпейді, бәрі жақсы деп жүре береді.

Бүгінгі қоғамда жылану сәнге айналып кеткендей. Шағымдану, разы болмау, "жаман-жаман" дей беру...

#ой_түймекке

Шымкент. Самал. Халифа Омар мешіті.

Алаштықтардың жолымен мен де бала күнімде араби хат танып, Самал молдасынан дәріс алғам. 😅

Алғашқы тәлім берген ұстазым — Нұрғали ұстаз.

Медресе көрмедік, бірақ өз ішкі ынтамызбен алғашқы аят-хадисті де сол мешіттің қабырғасында жүріп жаттаппыз.

Сонда жаттаған дүниелер әлі есте ғой, шіркін. Жас 15-те. Және бұл бастама саналы қадам еді.

2014-2015 жылдары “Сирияға кеткен қазақтар” деген тақырып өте қатты өршіп тұрған. Содан ата-анамыз мешітке баруымызға да қарсы болды.

Дінге деген ынтызарлық — іштегі бір рухани аштықты толтыру үшін, орнын басқа ештеңе жаба алмайтын болғандықтан туды.

Мынанша зікір етсең, мынанша ризық келеді деген жарнамалар болған жоқ, намаз оқып, хижаб кию мейнстримді нәрсе емес-тін.

Сол кезде намазға келгендердің романтикасы бөлек-ақ.

#ой_түймекке

Рамазан аяқталғанша, күн сайын сәрсі н/е таң намазы уақыттарында 1 дұғадан бөлісіп отырайын.

“Мощь” сезіммен күні бойы жүруге үлкен септігін тигізеді, маған да, сіздерге де.

Бүгінгі дұға:

اللَّهُمَّ آتِنِي أَفْضَلَ مَا تُؤْتِى عِبَادَكَ الصَّالِحِينَ

Аллаһым, мен Өзіңнен салиқалы құлдарыңа беретін нәрселеріңнің ең жақсысын сұраймын!

P.s. “Мощь” қой, иә?! Әлем мағына сыйғызып тұр ғой бір дұғаның ішіне. 😮‍💨

#дұға_қару

Алдыңғы апта 312 бет кітап оқыдым.

16-17 жасымда оқиын деп жатқан кітаптың бет санына қарайтынмын. Аз бетті кітаптарды тез-тез оқып тастап, “Сен осынша кітап оқыдың” деп өзіме ішкі мотивация бергім келетін. Көмектесетін.

Уақыт өте кітаптың бет санына қарамайтын болдым, ал. 😁

2000 беттік кітаптарды көрген соң 700 беттіктер ойнамай қалды.

“Иқро” үмметіміз. Ең алғашқы түскен аят — “Оқы!” болды.

Миды дамытуға жасай алатын, қайтарымы мол инвестиция түрі — кітап оқу.

#ой_түймекке

Бүгінгі дұға:

اللَّهُمَّ أَغْنِنِي بالعِلْمِ وَزَيِّنِِّي بِالحِلْمِ وَأَكْرِمْنِي بِالتَّقْوَى وَجَمِّلْنِي بِالعَافِيَةِ

Аллаһым, мені біліммен байыт, ақыл тоқтатқандықпен, жұмсақтықпен мені әсемде, маған тақуалық беріп нығметтендір және де өмірлік күш пен береке беріп көркемде.

P.s. Арабшасында бір сөздің мағыналары өте көп, кеңінен адам өмірінің көп аспектісін қамтып кете береді.

#дұға_қару

Реті келсе, осы курстардағы сабақтардың толық мазмұнын, тақырыптарын да тізіп саламыз.

Бағаның қолжетімдігі оның құндылығының төмендігін білдірмейді.

Былтырғы Рамазанда 1626 адамға сатқан екенбіз осы бағада. Енді ойлаңызшы, сол адамдардың кемінде 20%-ы оқып, шын нәтижеге жетсе — үлкен жеңіс.

Біздің курстардың бір ерекшелігі бар. Бұл мақтанғандық емес, жай хабардар ету: бір курсымызды алған адам, басқа да курстарымызды алуға ниетті болады. Тап осындай кейстар жетерлік.

Әрине, тарихымызда біздің форматты ұнатпағандар да болды. Нақтырақ біреуі есімде. Сабақтардың ұзақтығы аз екен деді.

Бір видео-дәріс ұзақтығы бізде 10-15 мин арасын құрайды. Арасында 20 минуттан асып кеткен сабақтар да бар, алайда созбауға тырысамыз.

Жалпы әлемдік статистика бар, адамның орта есептік фокусын ескердік.

Университет лекцияларында да алғашқы 10-15 минут екен, сол уақытта ұстаз тақырыпты ашып, оқушыларды қызықтырып, ұстап қалу қажет.

Ары қарай қайталау, бекіту, қорыту деген сынды өрбиді де бір лекция аяқталады.

#ой_түймекке

Қазір адамдар “жаман отзыв” жазам деп қорқытатын болған көрінеді.

Қоғам боп бар жеткен биігіміз, тредс дейтін нәрсенің үйреткен шыңы сол болған секілді.

Әл.желіде адамдардың бір-бірін солай қаралайтынын біліп қайран қалдым. Содан да тредс деген нәрседе дұрыс адам отырады деп есептемеймін. Тек өсек пен төсек ғана секілді.

Жарнама жасаймын, кәсіп жүргізем деген пайдасынан, манағындай зияны көп сынды.

Танымал адамдар кірсе “отменять” етіп тастайды екен, өздерінше приватизация жасап алған бір мекен бопты.

Қарынның ашқанынан емес, қадірдің қашқанынан жылаймын деген ғой.

Жақында әйелім тредсті удалить еттім деді, қатты қуандым. Алдында тура солай өз қалауымен тик-токты өшірген.

Болашағына алаңдайтын адамның отыратын жері емес.

Қазақтар пікір жазуды өлтіреді деген хит қой. Ол да бір мақтанатын биік емес.

Бос әуренің соңынан жүрген бір қоғам болдық.

Муминун сүресінде мұсылман адамның болмысы сипатталады, сонда 3-аятта “Олар – бос сөз, пайдасыз істен іргесін аулақ салатындар” - деп келеді.

Осы Рамазан айында ой түйіп, аздап болсын пікірлеуге тұрарлық тақырып деп ойлаймын.

Басқа бір Құран аятында “Қайда бара жатсыңдар?” делінеді. Расында, қайда бара жатырмыз?

#ой_түймекке

Раббым, Сенен осы және кейінгі күннің берекесін сұраймын;

Сенен осы және кейінгі күннің жамандығынан пана тілеймін;

Раббым, Өзіңнен жалқаулықтан және жаман қарттықтан пана сұраймын;

Раббым, тозақтың отынан және қабірдің азабынан пана сұраймын.

#дұға_қару