Яшчэ трошкі пра мінскі дызайн. Мясцовая ЖКГ паведаміла, што ў сталіцы заменяць 10 018 адрасных аншлагаў на 5 453 жылых дамах.

«Макеты аншлагаў змяшчаюць лагатып раёна, назву вуліцы на беларускай мове і нумар дома і ўзгоднены з упраўленнямі архітэктуры і будаўніцтва адміністрацый раёнаў г.Мінска».

Узгаднілі, бо больш ніякіх варыянтаў не падавалі?

Таму што прабачце, але гэта люты калгас, які робіць выгляд, што ён сучасны і стылёвы. Я не дызайнер, але ў мяне шмат пытанняў.

💩 Па-першае, навошта тып вуліцы і яе назва падкрэслены??? Гэта змяншае чытэльнасць і так невялікіх літар і не мае ніякай візуальнай патрэбы. Лінія магла б аддзяляць лічбу ад тэксту - гэта было б візуальна абгрунтавана, але гэта не той выпадак.

💩 Па-другое, дэбільнае выраўноўванне тэксту. Думаю, што ў дызайнераў, якія пабачылі аншлаг вуліцы Ляўкова павыцякалі вочы. "Ляўкова" адцэнтравана па цэнтры, а "вуліца" - прывязана да правага краю і палічкай "вісіць" над "Ляўкова". А на "Варанянскага" іншая праблема - аказваецца ў назвы і слова "вуліца" розная прывязка да правага краю. 😫

Вас што, ва ўніверсітэце не дручылі за "рваныя" радкі дакладаў, не прымушалі "выраўняць па шырыні", аднолькавых водступаў не патрабавалі??? У студэнцкі час бясілі гэтыя дробязі, але выпрацавалі рэфлекс да візуальнай чысціні тэксту.

💩 Па-трэцяе, уласна пра шырыню. Бог якой канфесіі забараніў павялічыць інтэрвалы паміж літарамі ў тым жа "Ляўкова", каб тэкст лепш чытаўся? Літары ліпнуць адна да адной, зліваючыся ў белую паласу, а побач пустое месца.

І мне вельмі цікава, як плануюць змяшчаць доўгія назвы. Сёння назвы вуліц у гонар асоб прысвойваюцца ў выглядзе "Поўнае імя + Прозвішча". Магчыма, імя скароцяць да ініцыяла. А што рабіць з вуліцамі Архітэктара Заборскага, Генерала Антонава, Лейтэнанта Кіжаватава? Арх. Заборскага, Ген. Антонава? Ці не расшыфруюць іх тады як Архіпа Заборскага і Генадзя Антонава? А Дуніна-Марцінкевіча, Кірыла і Мяфодзія, Герояў Сталінграда і Герояў 120 Дывізіі? Гэта яшчэ пашчасціла, што няма дамоў па набярэжнай Воінаў-інтэрнацыяналістаў.

💩 Па-чацвёрае, праблемы з цэнтроўкай выкліканы з'яўленнем НУ ВЕЛЬМІ неабходнага на аншлагу элемента, без якога хуткая дапамога заедзе кудысьці ў Брагін — лагатыпа раёна! Вы ведалі, што ў вашага раёна ёсць лагатып? Абсалютна безгустоўныя вінегрэты са стужак, цягнікоў і кветачак, выкананыя, як і школьныя гербы, у стылістыцы "у нас у 2000-х з'явіўся кампукцер і мы кінуліся ствараць". У паменшаным памеры, як на гэтых аншлагах, такая сімволіка не чытаецца. Не чытаецца і псуе тэкст. Дык навошта яна там?

Слухайце, для простага квадрата з двума словамі і лічбай дзікіх візуальных памылак занадта шмат. Няўжо складана заплаціць пару тысяч рублёў дызайнеру, каб ён пафіксіў гэтыя праблемы і на вуліцах з'явіліся 10 тысяч аб'ектаў, за якія не было б сорамна?

#Мінск #тапаніміка #дызайн

Малюнак беларускага графіка Ібрагіма Гембіцкага, створаны ў 1920 годзе. Паколькі Гембіцкі з мінскіх татараў, то верагодна (але не факт), што намалявана нешта сталічнае. На пярэднім пане брама барочных абрысаў, на заднім - будынак з паўкруглай апсідай(?).

Можа хто-небудзь пазнае месца?

Крыніца
#загадкі