Hafta kitobi - Mahmudjon Qozoqboyevning O‘zbekxon asari (tarixiy roman). O‘qigan bo‘lsangiz izohlarda fikrlaringizni kutamiz. Asarning davomi shu yil chiqishi kutilmoqda.

Kitobni Chorsu kitob rastalaridan topish mumkin!

Strategic Focus: Central Asia

Miyangizni foydali oziqlantiring (Feed Your Mind Better)

Ingliz tilida: “You are what you eat” degan gap bor. Siz nima yesangiz, o‘shani o‘zisiz.

Internetda ham xuddi shu. Siz nima iste’mol qilsangiz, shuning o‘zisiz.

Har kuni miyamizni postlar, videolar, fikrlar, shov-shuvlar, soxta dolzarblik va shunchaki shovqin bilan to‘ldiramiz. Keyin esa nega diqqatimiz tarqoq, boshimiz charchagan yoki rivojlanmayotgandek his qilamiz.

Bugun axborot cheksiz. Diqqat esa cheklangan.

Informatsiya toshqinida qolgan davrdamiz.

Siz foydalanadigan har bir platforma bu sizning tanlagan diyetangiz. Postlar esa ovqat menyusi. Obunalaringiz miyangizga kirayotgan “ovqatlar”.

O‘zingizga oddiy qoida qilib oling.

Agar biror odam, kanal yoki akkaunt (aslida yaxshi kontent qoʻyadigan odam boʻlsa ham) oxirgi 1 yoki 2 oy ichida hayotingizga real foyda bermagan bo‘lsa, obunadan chiqing (xususan shu kanaldan ham). O‘chiring. Kuzatishni to‘xtating. Hech qanday izohsiz. Tamom.

O‘zingizdan rostakamiga so‘rang. Bu menga nimadir o‘rgatdimi? Fikrlashimni yaxshiladimi? Harakat qilishimga, o‘sishimga yoki yaxshiroq bo‘lishimga yordam berdimi?

Filtrlab bo‘lib ham yana qarang. Faqat o‘zingiz uchun foydali akkauntlar qolsin. Vaqtingizni hurmat qiladigan, amaliy bilim beradigan, shunchaki shov-shuv emas, ko‘nikma beradiganlar.

Yuzlab postlarni baribir oʻqib chiqishga imkon va vaqt boʻlmaydi. Shunchaki overload (ogʻir yuk) boʻlib, hammasini birgalikda oʻqimay qoʻyasiz.

Miya ham tana kabi ishlaydi. “Garbage in, garbage out.” Musor kirsa, musor chiqadi.

Axborot sog‘lig‘ingizga katta ta’sir etadi.

Keraksiz odamlarni kuzatmang. Kuzatadigan odamlaringiz esa sizga rostdan foyda bersin.

Ko‘proq UNSUBSCRIBE qiling!

Oxford, UK
26 Jan 2026
Telegram | YouTube | Telegram AI

O‘zbekiston Respublikasi tashqi ishlar vaziri o‘rinbosari Olimjon Abdullayev Rossiya Federatsiyasining O‘zbekiston Respublikasidagi Favqulodda va Muxtor Elchisi Aleksey Yerxov bilan uchrashuv o‘tkazdi.

Uchrashuv davomida tomonlar Rossiya Federatsiyasi hududida mehnat faoliyatini amalga oshirayotgan O‘zbekiston Respublikasi fuqarolarining huquqlari va qonuniy manfaatlarini himoya qilishga doir dolzarb masalalarni batafsil muhokama qildi.

Muhokamalarda O‘zbekiston tomonidan Rossiya Federatsiyasining hududlarida faoliyat yuritayotgan O‘zbekiston Respublikasi bosh konsullari ishtirok etdi. Bu esa joylardagi amaliy ish tajribasini inobatga olgan holda ko‘tarilgan masalalarni aniq va atroflicha ko‘rib chiqish imkonini berdi. Rossiya tomonidan esa diplomatik vakolatxonaning konsullik bo‘limi rahbariyati, migratsiya masalalari bo‘yicha mas’ul xodimlar hamda huquqni muhofaza qiluvchi organlar vakillari qatnashdi.

O‘zbekiston tomoni migratsiya tekshiruvlari va reyd tadbirlari o‘tkazilayotgan jarayonda O‘zbekiston Respublikasi fuqarolarining – ham qonunga rioya qilayotgan, ham migratsiya qonunini buzgan fuqarolarning – huquqlari va insoniy qadr-qimmatini kamsitishning har qanday shakliga yo‘l qo‘yilmasligi prinsipial ahamiyatga ega ekanini alohida ta’kidladi.

Uchrashuv tomonlarning migratsiya jarayonlarini tartibga solish, shuningdek Rossiya Federatsiyasida O‘zbekiston Respublikasi fuqarolarining qonuniy mehnat faoliyati uchun qulay shart-sharoitlar yaratishga qaratilgan pragmatik va o‘zaro hurmatga asoslangan muloqotni rivojlantirishga intilishini tasdiqladi.

Shuningdek, tomonlar amaliy hamkorlikni doimiy ravishda takomillashtirish va hamkorlikni mustahkamlash maqsadida muntazam konsullik maslahatlashuvlari hamda ikki tomonlama uchrashuvlar o‘tkazish zarurligini ta’kidladi.

@TIVmatbuot

Акмал Шукуров ишида адолатсиз қарор чиқарган судьяларга нисбатан эҳтиёт чораси қўллаб қамоққа олинишди. Агар судья адолатсиз ҳукм чиқарди деб ҳисобланса, одатда, юқори турувчи инстанцияга мурожаат қилинади ва адолат тикланарди. 4 нафар судьялар масаласида адвокат Муҳсинжон Мадаминов билан суҳбатлашдик.

Бугун соат 20:20 да ушбу подкастнинг тўлиғини Ютуб каналимизда томоша қилинг.

Каналга уланиш👇

Telegram | YouTube

Propagandist Sergey Mixeev tomonidan aytilgan gaplar Rossiya ichki auditoriyasi uchun mo‘ljallangan siyosiy tomoshaning bir qismi, xolos. Iqtisodiy qiyinchiliklar, urushdan charchash va ichki muammolar kuchaygan sharoitda, ayrim siyosiy doiralar jamiyatdagi bosimni yengillashtirish maqsadida keskin ritorikadan foydalanishmoqda. Aynan shuning uchun bu kabi tahdidli bayonotlarni siyosiy pozitsiya emas, balki ichki bosimni yashirish va ommani vaqtincha tinchlantirishga qaratilgan psixologik kompensatsiya vositasi sifatida baholash kerak.

Fikrimizcha, bunday bayonotlarga TIV tomonidan ochiqcha va rasmiy javob berilishi maqsadga muvofiqmas. Chunki propagandaga munosabat bildirish uni real siyosiy jarayonlar darajasiga ko‘taradi va unga mavjud bo‘lmagan siyosiy vaznni sun’iy ravishda beradi. Bu esa aynan shu turdagi ritorikaning maqsadiga xizmat qiladi.

Toshkentning hozirgi pozitsiyasi (ya’ni bunday chiqishlarni e’tiborsiz qoldirish) puxta o‘ylangan, ongli va strategik tanlovdir. Buni zaiflik sifatida qabul qilish kerak emas! Bu yondashuv imperiyaviy mantiqni tan olmaslikni, uni legitimlashtirmaslikni anglatadi. Davlat tashqi siyosatini tok-shoular va propagandistik bayonotlar emas, balki real manfaatlar va uzoq muddatli strategiya belgilashi kerak.

Amaliy jihatdan eng to‘g‘ri yo‘l - shovqinli ritorikaga javob berish emas, balki o‘z siyosiy yo‘lini izchil davom ettirishdir. Aynan shunday yondashuv suveren davlat pozitsiyasini mustahkamlaydi va uni begona diskurslarga bog‘lab qo‘ymaslikka xizmat qiladi.

Strategic Focus: Central Asia

Fors ko‘rfazi davlatlari va AQSh – Eron qarama-qarshiligi: ehtiyotkorlik, yashirin diplomatiya va mo‘rt muvozanat
 
AQSh va Eron o‘rtasidagi keskinlik fonida Fors ko‘rfazi davlatlari o‘zlarini ehtiyotkor va muvozanatli tutishga urinmoqda. Ularning asosiy maqsadi – 1) mintaqada keng ko‘lamli harbiy eskalatsiyaga yo‘l qo‘ymaslik, 2) AQSh bilan strategik hamkorlikni saqlab qolish va 3) Eron bilan ochiq to‘qnashuvdan qochishdir.
 
26-yanvar kuni BAA o‘z hududi, havo makoni va suvlaridan Eronga qarshi harbiy harakatlar uchun foydalanishga yo‘l qo‘ymasligini rasman tasdiqladi. Bu bayonot ikki maqsadga xizmat qiladi: birinchidan, Eron tomonidan bo‘lishi mumkin bo‘lgan javob zarbalarining oldini olish; ikkinchidan, Tehron bilan diplomatik kanallarni ochiq holda saqlab qolish. Bu pozitsiyaning ahamiyati shundaki, BAA hududida AQShning strategik harbiy infratuzilmasi – Abu-Dabidan janubda joylashgan Al-Dhafra aviabazasi mavjud bo‘lib, u AQShning mintaqadagi razvedka faoliyati hamda IShIDga qarshi amaliyotlarida muhim tayanch vazifasini bajaradi.
 
Ommaviy bayonotlardan tashqari, Saudiya Arabistoni, Ummon va Qatar AQShni Eronga qarshi to‘g‘ridan-to‘g‘ri harbiy zarbadan qaytarishga qaratilgan “yashirin” diplomatiyani kuchaytirmoqda. Bu diplomatiya mintaqaviy xavfsizlik mashqlari bilan uyg‘unlashtirilmoqda.
Qatarda o‘tkazilayotgan Arabian Gulf Security 4 mashqlari va Saudiya–Ummon o‘rtasidagi Winds of Peace 2026 dengiz mashqlari shundan dalolat beradiki, Ko‘rfaz davlatlari eskalatsiyaga tayyor turib, bir vaqtning o‘zida uni oldini olishga harakat qilmoqda. Asosiy xavotir shuki, agar harbiy zarba berilsa, u butun Fors ko‘rfazi hududini xavf ostida qoldirishi mumkin: energetika obyektlari va muhim dengiz yo‘llari, ayniqsa Ho‘rmuz bo‘g‘ozi, Eronning oldindan aytib bo‘lmaydigan javob harakatlari nishoniga aylanishi ehtimoli bor.
 
AQShning USS Abraham Lincoln aviatashuvchi zarba guruhi mintaqaga kirib kelishi, qo‘shimcha F-15 eskadrilyalari, shuningdek THAAD va Patriot havo mudofaa tizimlarining joylashtirilishi Vashingtonning harbiy bosimni kuchaytirayotganini ko‘rsatadi. Shu bilan birga, D.Tramp Eron “keskinlikni kamaytirish va kelishuvga tayyor” ekanini ham aytmoqda. Bu qarama-qarshi signallar – bir tomondan harbiy kuchni tayyor holda ushlab turish, ikkinchi tomondan esa diplomatik bayonotlar – Ko‘rfaz davlatlari uchun vaziyatni yanada noaniq qilib qo‘ymoqda. AQSh Markaziy qo‘mondonligi havo kuchlarining keng ko‘lamli mashqlari esa mintaqada turli ehtimoliy ssenariylarga jiddiy va amaliy tayyorgarlik olib borilayotganini ko‘rsatadi.
 
Eron AQSh yoki Isroil tomonidan bo‘ladigan har qanday hujumga o‘tgan yildagidan ham og‘riqliroq javob berishini ochiq ogohlantirmoqda. Nishon sifatida AQSh bazalari, mintaqaviy ittifoqchilar va Ho‘rmuz bo‘g‘ozidagi kemalar tilga olinmoqda. Bundan tashqari, Yamandagi husiylar Qizil dengizda hujumlarni qayta boshlashi mumkinligini bildirmoqda. Bu esa global yuk tashish tizimi, sug‘urta bozorlari va energiya narxlariga bevosita xavf tug‘diradi.
 
Xulosa qilib aytganda, Fors ko‘rfazi davlatlari uchun Eronni harbiy jihatdan tiyib turish muhim vazifa bo‘lsa-da, keng ko‘lamli zarba mintaqadagi nisbatan qulay, ammo mo‘rt muvozanatni buzib yuborishi mumkin. Zaiflashgan Eron va cheklangan ta’sirga ega Isroil fonida shakllangan hozirgi vaziyat Ko‘rfaz davlatlari uchun strategik jihatdan nisbatan qulay hisoblanadi. Shu sababli ular keskinlikni pasaytirish, diplomatiyani saqlab qolish va eskalatsiyadan qochishni ustuvor yo‘nalish sifatida ko‘rmoqda.

Strategic Focus: Middle East and North Africa

Oʻzbekiston Respublikasi Prezidenti Shavkat Mirziyoyev Turkiya Respublikasi Prezidenti Rejep Tayyip Erdogʻanning taklifiga binoan 29-yanvar kuni rasmiy tashrif bilan ushbu mamlakatda boʻladi.
—
Президент Республики Узбекистан Шавкат Мирзиёев по приглашению Президента Турецкой Республики Реджепа Тайипа Эрдогана 29 января посетит эту страну с официальным визитом.

#Mirziyoyev #tashrif #Turkiya #hamkorlik

Prezident.uz|Facebook|Instagram|YouTube|X

Radikal chaqiriqlar va “xavfsizlik” bahonasi: Markaziy Osiyo barqarorligi kimga yoqmayapti?

Jaxongir Xakimov

Kobul yaqinidagi Guldara shahrida bo‘lib o‘tgan dafn marosimida “Tolibon”ga aloqador diniy shaxsning O‘zbekiston, Tojikiston, Qirg‘iziston va Pokistonga qarshi ochiqdan-ochiq “jihod”ga chaqirishi shunchaki ekstremistik ritorika sifatida baholanmasligi kerak. Mazkur bayonot Markaziy Osiyo xavfsizligiga qaratilgan bevosita siyosiy signal hisoblanadi. Mintaqa davlatlarini “kofir tuzumlar” sifatida ta’riflash va ularni qurolli yo‘l bilan ag‘darishga da’vat qilish Afg‘oniston omili hanuz mintaqa barqarorligiga bosim vositasi sifatida ishlatilayotganini ko‘rsatadi.

E’tiborga molik jihat shundaki, aynan shu radikal ritorika fonida Kollektiv xavfsizlik shartnomasi tashkiloti Tojikiston va Afg‘oniston o‘rtasidagi chegarani mustahkamlashni “mintaqaviy ustuvor vazifa” sifatida belgiladi. Harbiy texnika yetkazib berish, qurollanish va muvofiqlashtirish choralarining faollashuvi xavf kuchaygani haqidagi narrativni institutsional darajada mustahkamlab bermoqda.

Bu xavf tasodifiymi yoki geosiyosiy instrument sifatida shakllantirilmoqdami, degan savol o‘rinli.

Bir tomondan, “Tolibon”ga aloqador shaxslar Markaziy Osiyoga qarshi ochiq radikal chaqiriqlar bilan chiqmoqda. Ikkinchi tomondan esa, ayni shu kuch bilan bog‘liq siyosiy tuzilmaning elchisi 15-yanvar kuni Kremlga tashrif buyurib, Vladimir Putinga ishonch yorlig‘ini topshirmoqda. Bu holat maydonda ekstremistik ritorika kuchaygan bir vaqtda diplomatik darajada “normallashtirish” jarayoni davom etayotganini anglatadi.

Mazkur paradoks tasodifiy emas. Tarixiy tajriba shuni ko‘rsatadiki, xavf kuchaytirilgan hududlarda unga parallel ravishda “barqarorlik”, “himoya” va “xavfsizlik kafolatlari” takliflari ham faol ilgari suriladi. Afg‘oniston omili bu kontekstda real tahdid bilan birga siyosiy instrument vazifasini ham bajarmoqda. Natijada Markaziy Osiyoni tashqi xavfsizlik mexanizmlariga yanada bog‘lash uchun qulay sharoit shakllanmoqda.

Asosiy tahdid faqat radikal chiqishlarning o‘zida emas. Bunday ritorikalar mustaqillikning ilk yillaridan buyon turli shakllarda kuzatib kelinmoqda. Eng xavfli jihat shundaki, xavf geosiyosiy maqsadga xizmat qiladigan vositaga aylantirilmoqda. Ya’ni, Afg‘onistondan kelayotgan ekstremistik signallar bir vaqtning o‘zida mintaqada harbiy-siyosiy ishtirokni kengaytirish va ta’sir doirasini mustahkamlashga xizmat qilmoqda.

Bugungi vaziyat shuni ko‘rsatadiki, Markaziy Osiyo uchun asosiy masala radikal chaqiriqlarning mavjudligi emas, balki ular atrofida shakllanayotgan siyosiy va xavfsizlik arxitekturasidir. Afg‘oniston tomondan vaqti-vaqti bilan yangrayotgan ekstremistik ritorika real xavf omili bo‘lib qolmoqda, biroq u tashqi kuchlar tomonidan mintaqada harbiy-siyosiy ta’sirni kuchaytirish uchun qulay instrument sifatida ham qo‘llanilmoqda.

Shu nuqtai nazardan, O‘zbekistonning Afg‘oniston bilan iqtisodiy hamkorlik, savdo va tadbirkorlikka asoslangan pragmatik siyosati muhim signal sifatida namoyon bo‘lmoqda. Ushbu yondashuv barqarorlikni faqat harbiy choralar orqali emas, balki iqtisodiy manfaatlar uyg‘unligi va o‘zaro bog‘liqlik orqali ham ta’minlash mumkinligini ko‘rsatadi. Mintaqa davlatlari xavfni inkor etmagan holda, uni bahona qilib taklif etilayotgan tayyor “xavfsizlik formulalari”ga tanqidiy va mustaqil yondashishi lozim.

Xulosa qilib aytganda, masala kim tahdid solayotgani emas, balki kim bu tahdiddan foyda ko‘rayotgani va Markaziy Osiyo ushbu jarayonda mustaqil qaror qabul qiluvchi subyekt sifatida qola oladimi, degan savoldan iboratdir.

Strategic Focus: Central Asia

Sherali Rizoyon, siyosatshunos olim (Tojikiston):

Mintaqaning ijtimoiy tarmoqlarida qiziq bir tendensiya kuzatilmoqda. Negadir hamma bir-biriga nimanidir da’vo qilayapti, nimanidir isbotlashga urinayapti va “assimetrik choralar” ko‘rish bilan po‘pisa qilayapti. Go‘yo 5–7 yil avvalgina zo‘rg‘a voz kechilgan, allaqachon chang bosib stol ostida qolgan eski metodichkalar yana qayta chiqarilgandek. Afsuski, bu holat 2000-yillarni eslatadi va bularning bari yaxshilik alomati emas.

Eng g‘alati tomoni shundaki, bularning barchasi mintaqa aynan birlashishi zarur bo‘lgan pallada — o‘z realliklarida yashab, hatto o‘z mamlakatlarida nimalar bo‘layotganini ham tushunmaydigan targ‘ibotchilar va qog‘ozdagi “ekspertlar”ning bayonotlari fonida kuchaymoqda.

Ushbu targ‘ibotchilar hamda qog‘ozdagi va televideniyedagi “ekspertlar”ning Markaziy Osiyo davlatlarining suvereniteti va hududiy yaxlitligiga daxl qilishga urinishi ekspertlar va media hamjamiyatining yanada kuchli konsolidatsiyasini talab etadi. Biroq buning o‘rniga biz da’volar va “jangovar” narrativning shakllantirilayotganini ko‘ryapmiz. Bularning bari yaxshilikka olib kelmaydi.

Strategic Focus: Central Asia

Axborot shovqini ortida: Rossiya ritorikasi va Markaziy Osiyo realligi

Ro‘zimurodov Jamoliddin, mustaqil ekspert

Oxirgi paytlarda Rossiya mediasida bir qator siyosatshunoslar tomonidan sobiq sovet davlatlarida harbiy operatsiyalar o‘tkazish kerakligi yoki Markaziy Osiyoda joylashgan davlatlarning mustaqilligi aslida mavjud emasligi haqidagi o‘xshash propagandaviy fikrlar tarqatildi. Bizning mediada ham bu fikrlarga nisbatan jiddiy qarshilik bildirildi. Ushbu propagandaning sabablari sifatida turli xil fikrlar ilgari surildi: jumladan, bu Kreml tomonidan berilgan vazifa ekani aytildi yoki Moskvaning kelajakdagi rejalariga oldindan tayyorgarlik jarayoni sifatida talqin qilindi.

Shaxsan men bu jarayonni hozirgi global o‘zgarishlar bilan bog‘lagan bo‘lardim. AQSh olib borayotgan siyosat Rossiyadagi siyosatshunoslarni ham “ilhomlantirayotgani” tabiiy. Ya’ni kuchli davlatlar o‘z kuchidan foydalanib, o‘z manfaatlarini kengaytirishga urinayotgan davr boshlangandek. Bu jarayon ichida millatchilik tuyg‘ulari saqlanib qolgan Rossiyadagi ayrim shaxslarga o‘sha g‘oyalarni oshkora aytish uchun imkoniyat yaratildi. Qisqacha aytganda, bu gaplar ko‘proq alam bilan aytilayotgandek tuyuladi.

Bizdagi ko‘plab medialar ham ushbu bayonotlarni juda ko‘p tahlil qildi, meningcha, hatto haddan ziyod e’tibor berildi. Hatto siyosiy muloqotlar olib boradigan mashhur kanallar ham bu fikrlarga qarshi munosabat bildirish uchun bir nechta ko‘rsatuvlar ajratdi. Ko‘plab taniqli siyosatshunoslar aynan shu mavzu bilan ovora bo‘lib qoldi. Ba’zilar esa “hozir axborot urushi ketmoqda, shuning uchun bunday har bir nutqqa alohida javob berishimiz kerak”, degan argumentlarni ilgari surdi.

Fikrimcha, bizning olimlarimiz va siyosatshunoslarimiz ko‘proq muhim masalalar bilan shug‘ullanishi kerak - masalan, aniq va chuqur tahlillar qilish, jamiyat uchun zarur bo‘lgan bilimlarni tarqatish bilan. To‘g‘ri, bu suverenitet masalasi, ammo har bir bayonotga alohida e’tibor berib, doimiy javob qaytara boshlasak, ulardan qanday farqimiz qoladi? Bundan tashqari, agar Rossiyada bizga nisbatan millatchilik kayfiyatlari kuchayayotganini ko‘rsak, endi amaliy xulosalar chiqarib, istiqbol haqida o‘ylashni davom ettirishimiz kerak.

Men “axborot urushi” degan tushunchaga ham to‘liq qo‘shilmayman - bunday hollarda shunchaki e’tibor bermaslik (ignore qilish) eng to‘g‘ri yechim bo‘lishi mumkin. Biz ko‘proq o‘z ishlarimiz bilan shug‘ullanishimiz kerak, axir bizning vazifamiz ruslar bilan bahslashish emas. Aks holda, o‘zimiz jamiyat ichida bo‘linish va millatchilik kayfiyatlarini kuchaytirib yuborishimiz mumkin. Mamlakatimizda ko‘plab rus millatiga mansub fuqarolar yashaydi, bundan tashqari Rossiyaga nisbatan simpatiyasi yuqori bo‘lgan shaxslar ham bor. Ular bilan yangi shakllanayotgan avlodlar o‘rtasida ziddiyatlar yuzaga kelishi ehtimoli mavjud.

Strategic Focus: Central Asia

Davomi

Xo‘sh, agar bu holatni haqiqatan ham Kremlning rejasi deb hisoblasak, Rossiyaning Markaziy Osiyoga bostirib kirish ehtimoli qanaqa? Shaxsan men bu ehtimolni deyarli nolga teng deb hisoblayman.

Birinchidan, Rossiya Ukrainaning o‘zini to‘liq bosib olishga ham kuchi yetmayapti. Markaziy Osiyodagi besh davlatni bir vaqtning o‘zida bosib olish esa nihoyatda murakkab masala.

Ikkinchidan, agar shunday qadam tashlansa, Rossiya ittifoqchilarsiz qoladi. Avvalo, Markaziy Osiyo davlatlari Rossiya uchun raqibga aylanadi. Xitoyning hozir Rossiyaga ma’lum darajada yordam berishiga sabab — Rossiyaning G‘arbga qarshi urush olib borayotgani va G‘arb qanchalik charchasa, bu Xitoyning strategik manfaatlariga shunchalik mos kelishidir. Ammo Markaziy Osiyodagi besh davlat Xitoyning muhim iqtisodiy hamkorlari hisoblanadi va Xitoy, tabiiyki, bu hamkorlardan ayrilib qolishni istamaydi. Bundan tashqari, hozirgi global sharoitda har qanday davlat istagan paytda boshqa bir davlatga urush e’lon qilishi mumkin degan signal Moskva bilan hamkorlik qilayotgan davlatlarni undan uzoqlashtirishi aniq (agar bunday hamkorlar umuman qolsa).

Xulosa qilib aytganda, yuqoridagi omillar Rossiyaning Markaziy Osiyoga hujum qila olmasligiga sabab bo‘luvchi omillarning faqat bir qismidir. Shunday ekan, eski kommunistik umidlar bilan yashayotgan yoki Rossiyani hanuz “buyuk davlat” deb hisoblayotgan bir-ikki siyosatshunosning reallikka mos kelmaydigan propagandaviy bayonotlariga ortiqcha e’tibor qaratishdan ko‘ra, istiqbol sari harakat qilish ancha maqsadga muvofiqdir.

Strategic Focus: Central Asia

Hafta kitobi - Ulug‘bek Hamdamning To‘rtko‘cha romani. Asardagi voqealar O‘zbekistonning zamonaviy tarixi (1991-2016 yillar) bilan bog‘liq. O‘qigan bo‘lsangiz izohlarda fikrlaringizni kutamiz.

Strategic Focus: Central Asia