Խօսքի այլ բաժնում անդրադառնալով Սփիւռքի կարեւորութեանը ընդգծւել էր. «Այսօր Սփիւռքը իր հայապահպանման ու հայեցի դաստիարակութեան վերաբերեալ ծաւալած աշխատանքներին զուգընթաց պարտաւոր է իր համայնքներին յատուկ աշխարհագրական, քաղաքական եւ մի խօսքով տեղայնական պայմաններին ի տես ստանձնել յաւելեալ դերակատարութիւն ոչ միայն Հայոց Ցեղասպանութեան միջազգային ճանաչեցման գործընթացում, այլ Ցեղասպանութիւնը կանխելու ուղղութեամբ եւ հետամուտ լինելու Արցախի ազատագրման դատի պահանջատիրութեան»:

Օրւայ գեղարւեստական յայտագիրը յագեցած էր ազգային-յեղափոխական երգերի կատարմամբ, օրւան յարիր հայկական հեզաճկուն պարերի ներկայացմամբ եւ ասմունքային կատարմամբ: Գեղարւեստական յայտագիր, որը մեծ խանդավառութիւն եւ միաժամանակ յուզում առաջացրեց դահլիճում:

Գեղարւեստական միջոցառումը եկաւ ապացուցելու հայ ժողովրդի անկոտռում կամքը իր պահանջատիրական երթը շարունակելու առումով: Երգերի եւ նւագարանների կատարմամբ հանդէս եկան՝ երգիչ Ռոմիկ Ազիզեանը, հարւածային գործիքի կատարմամբ Արմէն Աւանէսեանը, էլեկտրական գիտառով Հենրիկ Տէր Պօղոսեանը, բաս գիտառով Զարեհ Բեգիջանեանը եւ ստեղպնաշարային գործիքով Սեւան Սարգսեանը: Իր «Դելէ Եաման» ասմունքային կատարումով եւ երգով հանդիսատեսի սրտերում յուզում առաջացրեց Մելանի Աղանեանսը:

Պարային կատարումները իրականացրեցին Հ. Մ. Մ. «Նայիրի» միութեան «Նայիրի» պարախմբի սաները, իրենց պարացանկը նւիրելով Հայոց Ցեղասպանութեան Սրբադասւած Նահատակների անմեռ յիշատակին: Պարախմբի պարուսոյց Թինա Անտոն:

Օրւայ ծրագրին հրաւիրւեց խօսք փոխանցելու Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանը: Հայր Սուրբը իր ոգեշնչող ելոյթի սկզբում փոխանցելով թեմի առաջնորդի ողջոյնները եւ գնահատելով միութեան Արւեստից բաժանմունքի նախաձեռնութիւնը ընդգծեց. «Ազգային յեղափոխական երգերի, պարերի եւ ասմունքի միջոցով այսօր մեզ փոխանցւեցին պահանջատիրութեան անմեռ ոգին եւ ազգային վառ ապրումները: Այսօրերին երբ ապրում ենք մի աշխարհում, որտեղ վերիվայրումները եւ իրադարձութիւնները արագ են եւ յաջորդական, կարող է մի պահ մեզ թւալ թէ՝ այս պայմաններում դժւար է շարունակել մեր պահանջատիրութիւնը, սակայն մէկ բան պէտք է լաւ իմանալ, որը այսօրւայ միջոցառմամբ փոխանցւեց, թէ՝ ժամանակի ընթացքում պահանջատիրութեան ձեւերը, միջոցները եւ ճանապարհները կարող են փոխւել, սակայն ոգին պէտք է մնայ նոյնը եւ այսօր այդ ոգին էր, որ բոլորիս համախմբեց այստեղ եւ երբ այդ ոգին մեր մէջ արթուն է, անոր միջոցով մենք յիշում ենք Արցախը, եկեղեցին, մեր պատմական Հայաստանը եւ մեր մէկուկէս միլիոն Սրբադասւած Նահատակներին եւ դա ոչ մի ճամբով, եւ ոչ ոք չի կարող դուրս բերել մեր սրտից ու մեր հոգուց»:

Միջոցառմանը ներկայ էին՝ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, «Ալիք» հաստատութեան ներկայացուցիչ Գառօ Յովհաննիսեանը, Իրանում ՀՀ դեսպանութեան ներկայացուցիչներ, Իրանի Հայ Աւետարանական եկեղեցու համայնքապետ-հովիւ վերապատւելի դոկտ. Միշէլ Աղամալեանը, Թ. Հ. Թ. Պատգամաւորական ժողովի ատենադպիրներ՝ Արփի Ալավերդեանը եւ Արտոյտ Զոհրաբեանը, Թեմական խորհրդի ատենադպիր՝ Հայրիկ Աղանեանը, Հայոց Ցեղասպանութեան 111-ամեակի Կենտրոնական յանձնախմբի ատենապետ Մհեր Անդրէասեանը, քահանայ հայրեր, ազգային իշխանութեան, մարմինների, միութիւնների, եկեղեցու Եկեղեցական խորհուրդների ներկայացուցիչներ եւ մեծ թւով հայրենակիցներ:

Ապա հրաւիրւեց միութեան վարչութեան նախագահ Ֆրէդ Աշուղեանը, ով գնահատելով գեղարւեստական յայտագիրը նշեց, որ հայ ժողովրդի յեղափոխական երգերը մեր ժողովրդի զոհաբերութեան, նւիրումի պատմութիւնն են, որոնցից պէտք է դասեր քաղել եւ մէջբերում կատարելով երջանկայիշատակ Ամենայն հայոց Վազգէն Կաթողիկոսին նշեց. «Իր պատմութիւնը չիմացող ազգը՝ յիշողութիւնը կորցրած մարդու է նման»: Նա աւելացրեց. «Մենք իրաւունք չունենք մեր պատմութիւնը մոռանալ, իրաւունք չունենք մեր Բիւրաւոր Նահատակների կտակը չյիշել, իրաւունք չունենք Արցախի ազատամարտիկների յեղած արիւնը մեր Սուրբ Հայրենի հողի վրայ չյիշել, նրանք փակել են ուրացման ճամբան եւ այդ զոհերը իրենց արեամբ, մեզ համար մէկ ուղի են ճշտել յարատեւ պայքար մինչեւ Հայ ժողովրդի արդար Դատի լուծումը»:

Թղթակցութիւնը՝
ԿԱՐԻՆԷ ԴԱՒԹԵԱՆԻ

Հայոց Ցեղասպանութեան 111-ամեակին նւիրւած միջոցառում Հ. Ուս. «Չհարմահալ» միութեան Կենտրոնական վարչութեան նախաձեռնութեամբ

«Ալիք»,- Հայոց Ցեղասպանութեան 111-ամեակին նւիրւած գեղարւեստական-բանախօսական երեկոյ էր կազամկերպւել Հ. Ուս. «Չհարմահալ» միութեան Կենտրոնական վարչութեան նախաձեռնութեամբ՝ ապրիլի 30-ին միութեան «Յովհաննէս Թումանեան» դահլիճում:

«Տէր Ողորմեա»-ով մեկնարկած ծրագրի բացման խօսքով եւ հաղորդավարութեամբ հանդէս եկաւ Լորեթա Ղեւոնդեանը, ընդգծելով. «111 տարի անց Հայոց Ցեղասպանութեան օրերից, նախնիների կտակը կրելով մեր ուսերին, ուժ ենք ստանում եւ քայլում հայոց արդար Դատի լուծման ճանապարհով:... Պահանջատէրն ենք փոխհատուցման, անկոտրում ենք մնալու մեր դիրքերում, որպէս իրական ժառանգորդը մեր արդար Դատի ու դարաւոր պատմութեան»:

Ոգեկոչման ծրագրին օրւայ բանախօս էր հրաւիրւել Տ. Արիստակէս քհնյ. Շահմիրեանը: Իր ելոյթի ընթացում տէր հայրը քննադատական հայեացքով անդրադարձաւ անտարբերութեան քայքայիչ երեւոյթին եւ ընդգծեց մեր կորցրած արժէքները, Արցախը եւ հայրենի տարածքները վերադարձնելու համար անհրաժեշտ է թօթափել անտարբերութիւնը եւ պայքարել յանուն հայ ժողովրդի արդար Դատի իրականացման: Տէր հայրը ընդգծեց. «Այսօր ցաւօք անտարբերութիւնը հայի մօտ սերմանում է Հայրենի ղեկավարութիւնը, երբ փորձում է հայի ստից ու մտքից հանել Արարատ լեռը, Արցախը, հայոց եկեղեցին, մեր ազգային արժէքները եւ հային յետ մղում իր արդար պայքարից, որն է՝ Հայ Դատի պահանջատիրութեան ու հետապնդման արդար իրաւունքը»: Նա ընդգծեց, որ եթէ նոյնանման ընթացք լինէր 1918 թւականին մենք այսօր չունէինք Հայաստանի Հանրապետութիւն: Նա դիմեց երիտասարդութեանը, որպէսզի անտարբեր չլինեն ազգային արժէքների նկատմամբ, որպէսզի չիրականացւի մեր թշնամու դարաւոր փափագը՝ մէկ հայ թողնել եւ այն էլ թանգարանում եւ պայքարեն յանուն մեր դարաւոր իղձերի իրականցման:

Միջոցառման գեղարւեստան յայտագիրը յագեցած էր ազգային երգերով, ասմունքներով, դաշնամուրի կատարմամբ եւ Հայոց Ցեղասպանութիւն ու վերածնունդ խորհրդանշող պարային կատարումներով: Մեներգերով եւ զուգերգերով հանդէս եկան Արլէթ Սիմոնեանը, Եօլանդա Մանսուրեանը, Ֆրէդ Մաւաթեանը եւ Զօրիկ Ֆարհադեանը: Դաշնամուրային կատարումներով թէ՛ մեներգիչների հետ, եւ թէ՛ անհատապէս ելոյթով հանդէս եկաւ միութեան «Ուրարտու» երգչախմբի խմբավար Սերժիկ Միրզայեանը: Ոգեշունչ առանձին ասմունքներով հանդէս եկան Անայիս Աբնուսին, եւ Իրինա Մանսուրեանը, ով ներկայացրեց իր գրչին պատկանող «Դար» բանաստեղծական ասմունքը: Հայկական հեզաճկուն պարերով ելոյթ ունեցան «Կակաչ» պարախմբի սաները, գեղարւեստական ղեկավար՝ Արուս Աւագեան, բեմադրիչ, պարուսոյց եւ փորձավար Արմինէ Աւագեան: «Ակունք» պարային համոյթի պարախմբի սաները բեմադրիչ եւ գեղարւեստական ղեկավար Կարինէ Մանուչերեան:

Միջոցառմանը հրաւիրւեց խօսք փոխանցելու Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանը: Հայր Սուրբը փոխանցելով Սրբազան Հօր ողջոյնները ընդգծեց. «Այս երգերի, ասմունքների եւ պարերի միջոցով այսօր մշակութային ծաղիկների մի փունջ հրամցւեց: Եթէ Հայոց Ցեղասպանութիւնից յետոյ նայենք մեր մշակութային կտորներին, պիտի տեսնենք, որ այդտեղ միշտ սկզբում ցաւ կայ, տանջանք ու խեղդւած ձայն կայ, բայց վերջում կայ՝ սակայն, կրկին եւ դարձեալ բառերը, որոնք մեզ տալիս են յոյս եւ կեանքը շարունակելու կամք»: Հայր Սուրբը նշեց, որ թէեւ հայ ժողովուրդը ունի եւ ունեցել է դժւար պայմաններ ու կորուստներ բայց երբեք չի կարելի կորցնել յոյսը եւ պահանջատիրութեան կամքը, քանզի մենք իրաւունք չունենք մոռանալու մեր մէկուկէս միլիոն Սրբադասւած Նահատակներին, Արարատ լեռը, Արցախը եւ մեր պատմական Հայաստանը, քանզի դրանք ժամանակաւոր
են բռնագրաււել:

Միջոցառմանը ներկայ էին Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը եւ անդամներ, քահանայ հայրեր, Հայոց Ցեղասպանութեան 111-ամեակը ոգեկոչող Կենտրոնական յանձնախմբի նախագահ Մհեր Անդրէասեանը եւ անդամներ, ազգային մարմինների ու միութիւնների ներկայացուցիչներ եւ հայրենակիցներ:

Վերջում միութեան Կենտրոնական վարչութեան նախագահ Սերժիկ Հաքեանը, իր
գնահատանքը յայտնեց՝ օրւայ բանախօսին, երկու պարախմբերին եւ ղեկավարներին, միութեան Գրական խմբին, «Ուրարտու» երգչախմբին, մեներգիչներին, ասմունքողներին եւ Կանանց միաւորին միջոցառումը կազմակերպելու համար եւ բոլոր ներկաներին: Նա ընդգծեց, որ աւարտին կազմակերպւել է յուշերեկոյ վաստակաւոր միութենական Յովիկ Անդրէասեանի 40 օրեակի յիշակատին:

Թղթակցութիւնը՝
ԿԱՐԻՆԷ ԴԱՒԹԵԱՆԻ

Հայր Սուրբը բարձր գնահատելով պարախմբի սաների կատարումները յաւելեց, որ ներկայացման առանցքում խօսում էր՝ ե՛ւ յոյսը ապագային նկատմամբ, ե՛ւ հայ մշակոյթը, ե՛ւ ազգի երբեք չմարող իրական երազանքը՝ հայրենիքը միաւորւած տեսնելը եւ կորցրածը յետ վերադարձնելը, ինչը- նրա խօսքով, այնքան ոգեւորիչ էր, որ «... շատ բան պիտի ասէի, բայց ոգեւորութիւնից մոռացայ...Այս սերունդը նոյն ոգով կարող է նաեւ Արցախը վերազատագրւած տեսնել»:

Հետաքրքրական գիտելիքներ խաչի մասին

Սիրելի ընթերցող, գիտէի՞ր թէ...
- Հայկական «Ծաղկեալ խաչ»-ը իր իւրայատուկ կազմւածքով յայտնում է հայ քրիստոնեայի դիտանկիւնից խաչի խորհուրդի հասկացողութիւնը: Մենք խաչին մէջ յարութիւնն ենք տեսնում, դրա համար հայկական խաչին վրայ խաչեալ Քրիստոսի պատկերը չկայ: «Ծաղկեալ խաչ»-ով մենք հաստատում ենք, թէ խաչը մեր համար մահւան գործիք չէ, այլ կեանքի ու յաղթանակի խորհրդանիշ:

Ծաղիկներով զարդարւած հայկական խաչը մեզ յուշում է Դրախտում գտնւող Կեանքի Ծառը (Ծն 2.9), որը նշան է յաւիտենական կեանքի եւ անմահութեան: «Ծաղկեալ խաչ»-ով յայտարարւում է նաեւ մեր հայկական ինքնութիւնը, որովհետեւ խաչի այս տեսակը յատուկ է միայն Հայ Առաքելական Ս. Եկեղեցուն: Այս առումով, որոշ գրական աղբիւրներ երբեմն «Ծաղկեալ խաչ» անւան փոխարէն օգտագործել են «Ազգային խաչ» անունը:

- «Դուք Խաչապաշտեր էք»: Վստահաբար այս մեղադրանքը լսել ես աղանդաւորական շարժումների հետեւորդների կողմից, որոնք կիսատ փաստերով փորձում են քեզ համոզել, թէ հայ ժողովուրդը խաչապաշտ է: Քա՛ւ լիցի, որ մենք խաչապաշտ լինենք: Մենք խաչը չենք պաշտում, մենք խաչեալի՛ն ենք պաշտում: Այս հաստատումը կարելի է բացատրել հետեւեալ օրինակով. ենթադրենք, թէ մեր մօտ մեր մօր լուսանկարը ունենք: Յանկարծ մի անծանօթ մարդ այդ լուսանկարը առնելով, պատռում է կամ ոտնակոխան է անում: Ի՞նչ զգացում կունենանք: Վստահաբար կը նեղանանք, նոյնիսկ կարող է որ այդ անձին ծեծենք իր կատարած արարքի համար: Ինչո՞ւ: Որովհետեւ ճիշդ է թէ այդ լուսանկարը մեր մայրը չէ, բայց այն մեզ մեր մօրն է յուշում: Նոյնն է պարագան նաեւ խաչին. խաչը Քրիստոսը չէ, բայց այն մեզ Քրիստոսին է յուշում: Ուստի, ինչ որ Քրիստոսի հետ կապ ունի, ինչ որ մեզ Քրիստոսին է յուշում. այն մեզ համար սուրբ է եւ նւիրական: Ս. Գրիգոր Տաթեւացին ասում է.- «Ուր որ է խաչը, այնտեղ է նաեւ Խաչեալը (Քրիստոսը)»:
Հետեւաբար, մենք խաչին մէջ նիւթը չենք տեսնում, այլ Քրիստոսի՛ն ենք տեսնում:

- Խաչի չորս թեւերից իւրաքանչիւր իր իմաստը ունի: Ս. Գրիգոր Տաթեւացին ասում է.- «Իր քառաթեւ ձեւով խաչը փրկութիւն է մեզ համար, քանզի խորհրդանշում է Քրիստոսի չորս բարերարութիւնները: Խաչի վերին մասը ցոյց է տալիս Երկնքի Արքայութեան բացւելը, ստորին մասը՝ Դժոխքի աւերումը, աջը՝ շնորհների բաշխումը, իսկ ձախը՝ մեղքերի թողութիւնը» (Ս. Գրիգոր Տաթեւացի, Քարոզ Սուրբ Խաչի մասին, Երեւան, 1995, էջ 6):

- Ի՞նչ նշանակութիւն ունի խաչակնքումը: Խաչակնքման գործողութեան ընթացքին, երեք մատները միացնում ենք իրար որպէս Ամենասուրբ Երրորդութեան երեք անձերի՝ Հօր, Որդու եւ Ս. Հոգու խորհրդանիշ: Միւս երկու մատները սեղմում ենք ափին որպէս Քրիստոսի Աստւածային եւ մարդկային բնութիւնների միութեան նշան: Խաչակնքելով խոստովանում ենք մեր ուղղափառ դաւանանքը, ասելով.- «Յանուն Հօր եւ Որդւոյ եւ Հոգւոյն Սրբոյ: Ամէն»: Այսպիսով մենք դաւանում ենք, թէ Քրիստոս Հօր Աստծոյ կողմից ուղարկւեց աշխարհ: Աշխարհում Նա քարոզեց, բժշկեց, հրաշագործեց, դատապարտւեց, չարչարւեց, խաչւեց, յարութիւն առաւ, ապա համբարձաւ եւ նստեց Հօր Աստծոյ աջ կողմը: Որից յետոյ ուղարկեց Ս. Հոգուն, որպէսզի առաջնորդի եկեղեցու կեանքը, մինչեւ որ Ինք դարձեալ գայ եւ դատի աշխարհը: Վերջում ասում ենք «Ամէն»: «Ամէն» բառը երեք իմաստ ունի. Ա) թող այդպէս լինի, Բ) ճշմարիտ է եւ Գ) Աստւած ճշմարիտ արքայ է:

- Հայ եկեղեցին խաչի նւիրւած չորս տօներ ունի, նրանք են. Ա) Երեւման Խաչի, Բ) Խաչվերացի կամ խաչի վերացման, Գ) Վարագայ Ս. խաչի եւ Դ) Գիւտ խաչի տօները:

Կազմեց՝
ԱՌԱՔԵԼ ԱԲՂ. ԳԱՏԵՀՃԵԱՆԸ

Թեհրանի հայոց թեմի ազգային իշխանութիւնը գնահատել է Հայոց Ցեղասպանութեան 111-ամեակի միջոցառումներին երիտասարդութեան եւ աշակերտութեան ներգրաււածութիւնը

«Ալիք», Կ. Դ.- Հայոց Ցեղասպանութեան 111-ամեակի առիթով Թեհրանի հայոց թեմի Թեմական խորհրդի կողմից կեանքի կոչւած Կենտրոնական յանձնախումբը այս տարի թէ՝ Ապրիլի 24-ին առաւօտեան Ս. Սարգիս եկեղեցու շրջափակում կազմակերպւած միջոցառման եւ թէ ՀՈՒՍԿ հաստատութեան նախաձեռնութեամբ Հ.Մ.Ա.Կ.-ի «Կոմիտաս» սրահում Կենտրոնական ծրագրի ընթացքում մեծ դերակատարութիւն էր տւել հայոց դպրոցների հայ աշակերտութեանը եւ երիտասարդներին:

Միջոցառումները աւարտւելով կատարւած աշխատանքները հանրագումարի բերելով ազգային առաջնորդարանի դահլիճում զրոյց էր կազմակերպւել Թ. Հ. Թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանի, Թ. Հ. Թ. Թեմական խորհրդի ատենապետ Վարուժ Յովհաննիսեանի, 111-ամեակի ոգեկոչման Կենտրոնական յանձնախմբի ատենապետ Մհեր Անդրէասեանի եւ յանձնախմբի անդամ եւ միջոցառումներին երիտասարդների հարցերով պատասխանատուների հետ:

Զրոյցի ընթացքում Հայր Սուրբը անդրադառնալով աշակերտների, պատանիների եւ երիտասարդների ներգրաււածութեանը Ապրիլեան միջոցառումներին ընդգծեց, որ համայնքում ունենալով գիտակից ազգային իշխանութիւն, յանձնառու ուսուցիչներ եւ գիտակից ծնողներ ու ջանասէր աշակերտներ, նաեւ ազգասէր ու հետամուտ երիտասարդներ, որոնց արեան մէջ է Ապրիլի 24-ի ոգին, իրապէս նման ներգրաււածութիւնը յոյժ կարեւոր է: Հայր Սուրբը նաեւ գնահատանքով անդրադարձաւ հայ երիտասարդի մօտ պահանջատիրական ոգու առկայութեան մասին:

Թ. Հ. Թ. Թեմական խորհրդի ատենապետ Վարուժ Յովհաննիսեանը եւս իր գնահատանքը յայտնեց թէ՛ Կենտորնական յանձնախմբին, թէ՛ Կրթական խորհրդին եւ բոլոր նրանց որոնց ջանքերի շնորհիւ հնարաւոր դարձաւ երկրում տիրող պատերազմական իրավիճակնում նշել Սրբադասւած նահատակների յիշատակի մեծարման միջոցառումները:

Թ. Հ. Թ. Թեմական խորհրդի կողմից Հայոց Ցեղասպանութեան 111-ամեակի առիթով կեանքի կոչւած Կենտրոնական յանձնախմբի ատենապետ Մհեր Անդրէասեանը անդրադառնալով թեմային ընդգծեց, որ յանձնախումբը հէնց առաջին նիստում որոշեց, որ այս տարի առաւել պէտք է ներգրաււել երիտասարդութեանը եւ աշակերտութեանը կազմակերպւող միջոցառումներին, որպէսզի իրենք եւս իրենց մասնակից համարելով ծրագրերին աւելիով ներկայութիւն ունենան: Նա նշեց, որ թէեւ իւրաքանչիւր տարի ՀՈՒՍԿ հաստատութիւնն էր նախաձեռնում նկարչութիւնների ստացման պրոցեսը համագործակցութեամբ Թ. Հ. Թ. Կրթական խորհրդի, սակայն այս տարի ելնելով երկրի իրավիճակից եւ դպրոցները փակ լինելով ուղղակի դիմեցինք Կրթական խորհրդին եւ խորհուրդը անմիջական կապ հաստատեց դպրոցների տեսուչների ու փոխտեսուչների հետ եւ անմիջապէս կազմակերպեց այս աշխատանքը եւ տեղի ունեցաւ աշակերտական նկարչութեան ցուցահանդէսը: Իսկ սկաուտների պարագային եւս գնահատելի աշխատանք դրսեւորւեց:

Թ. Հ. Թ. Կրթական խորհրդի անդամ եւ Կենտրոնական յանձնախմբի կապ Մարիա Ղազարեանը նշեց որ Կրթական խորհուրդը անսալով յանձնախմբի որոշմանը եւ ելնելով այն հանգամանքից, որ մեր սիրելի աշակերտները իրենց մասնակցութիւնը բերեն աշխատանքներին, դիմեց հայոց դպրոցների տեսուչներին, փոխտեսուչներին եւ ուսուցիչներին, եւ նրանք յանձնարարեցին տարրական եւ միջնակարգ օղակի աշակերտութեանը, որպէսզի նոյն օրը իրենց հետ բերեն նկարչութիւնները եւ յանձնեն Կրթական խորհրդին, եւ անմիջապէս նկարները հէնց առաւօտեան դասաւորւեցին եւ ամրացւեցին Ցեղասպանութեան Յուշարձանին յարող տարածքում պատերի վրայ: Նկարչութիւնների թիւը աւելի քան 350 էր: Գնահատելի է դպրոցների տեսչական եւ ուսուցչական կազմերի, Ծնողական խորհուրդների եւ ծնողների համագործակցութիւնը եւ մեր շատ սիրելի աշակերտների աշխատանքները:

Յանձնախմբի անդամ Ժորժ Աղայեանը անդրադառնալով Ապրիլի 24-ի առաւօտեան Ս. Սարգիս եկեղեցու շրջափակում եւ երեկոյեան ՀՈՒՍԿ-ի նախաձեռնութեամբ, Հ.Մ.Ա.Կ.-ի կենտրոնատեղի «Կոմիտաս» համերգասրահում կազմակերպւած միջոցառումներին սկաուտների եւ երիտասարդների ներգրաււածութեանը նշեց, որ քանի որ հայ սկաուտը միշտ պատրաստ է, ուստի կապ հաստատեցինք մեր միութիւնների սկաուտապետերի հետ եւ Հ. Մ. «Արարատ» Կ.-ի, Հ. Մ. «Սիփան», Հ. Մ. Մ. «Նայիրի» միութիւնների եւ Հայ Բարեգործական Ընդհանուր միութեան սկաուտները ընդհանուր թւով մօտաւորապէս 150 սկաուտներ առաւօտեան արարողութեանը, իսկ երեկոյեան Կենտրոնական ծրագրին կազմակերպւած երդման եւ ջահերի արարողութեանը մասնակցել էին 50 սկաուտներ նշւած միութիւններից եւ 15 երիտասարդներ «Ռոստոմ» Երիտասարդական միութիւնից:
Այսպիսով հայ սկաուտը եւ երիտասարդը ապացուցեց, որ միշտ պատրաստ է ու պահանջատէրը իր ժողովրդի արդար Դատին:

Նա այսպէս շարունակեց. «Այս տարւայ ծրագիրը իւրայատուկ է քանի, որ ՀԲԸՄ-ի «Նւարդ Գիւլբենգեան» դպրոցի սաները իրենց մասնակցութիւնն են բերել «Ոչ մշակութային ջարդին» հինգերորդ ցուցահանդէսին, «Խաչքարեր» խորագրով»:

Նշենք, որ ցուցահանդէսը շարունակւեց ուրբաթ մայիսի 8-ին:
Բացման խօսքից յետոյ մէկը միւսն յաջորդեց «Ամարաս» խմբի սաների ազգային երգերի կատարման շարանը, ինչու չէ նաեւ երաժշտական գործիքներով կատարումները:

Հոգեպարար երաժշտական կատարումներից յետոյ հրաւիրւեց իր խօսքը փոխանցելու Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբեղայ Գատեհճեանը: Հայր Սուրբը փոխանցելով Սրբազան Հօր ողջոյնները, իր խօսքի ընթացքում գնահատանքով անդրադարձաւ «Ամարաս» խմբի կատարումներին եւ միջոցառմանը իրենց դերակատարութիւնը ցուցաբերած երիտասարդներին:
Իր խօսքերի ընթացքում Հայր Սուրբը ընդգծեց. «Սա «Ամարաս»-ի երկրորդ ելոյթն է եւ կարելի է ասել երկրորդ յաջողութիւնը: Որեւէ ժողովրդի հարստութիւնը իր հաւատքից, հայրենիքից եւ հերոսներից յետոյ իր նոր սերունդն է: Այս երկու շաբաթների ընթացքում եւ այսօր երբ մեր հայմանքի տարբեր բեմերի վրայ տեսայ մեր նոր սերունդի կատարումները, ես համոզւեցի թէ որքան հարուստ է մեր ժողովուրդը, հարուստ է այնպիսի նոր սերունդով, որ հայրենասէր է, ազգասէր է եւ Աստւածասէր: Սերունդ, որ ապրում է Արցախով, ապրում է պատմական Հայաստանով, ապրում է մեր մէկուկէս միլիոն Սրբադասւած նահատակների յիշատակով»: Հայր Սուրբը ընդգծեց. «Երգն ու երաժշտութիւնը կարող են ազդելու թէ՛ կատարողի, եւ թէ՛ ունկնդրողների վրայ, որտեղ բառերից եւ եղանակից անկախ, հոգին է, որ խօսում է եւ այսօր մեր սիրելի երիտասարդներն ու պատանիները իրենց հրաշալի կատարումների միջոցով մեզ փոխանցեցին իրենց հոգիներում գտնւող ազգային ապրումները»:

Միջոցառմանը ներկայ էին՝ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, ՀՅԴ Բիւրոյի անդամ Սեւան Դանիէլեանը, «Ալիք» հաստատութեան ներկայացուցիչ Ալեքս Կարապետեանը, Իրանի Հայ Աւետարանական եկեղեցու Համայնքապետ-հովիւ Վեր. դոկտ. Միշէլ Աղամալեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը եւ անդամներ, Պատգամաւորական ժողովի անդամներ, Հայոց Ցեղասպանութեան 111-ամեակի Կենտրոնական յանձնախմբի ատենապետ Մհեր Անդրէասեանը եւ անդամներ, ազգային մարմինների ու միութիւնների ներկայացուցիչներ, քահանայ հայրեր եւ մեծ թւով հայրենակիցներ:

ՅԱՅՏԱՐԱՐՈՒԹԻՒՆ

Այսու Թեհրանի մեր հաւատացեալ ժողովրդի զաւակներին յայտնում ենք, որ հովանաւորութեամբ Թեմիս Առաջնորդ Գերշ. Տ. Սեպուհ Ս. Արք. Սարգսեանի՝ *հինգշաբթի, 14 մայիս 2026 թւականին, ՏԵԱՌՆ ՄԵՐՈՅ ՅԻՍՈՒՍԻ ՔՐԻՍՏՈՍԻ ՀԱՄԲԱՐՁՄԱՆ* տօնի առիթով Թեհրանի բոլոր եկեղեցիներում մատուցւելու է հանդիսաւոր Ս. եւ Անմահ Պատարագ:

Ս. Սարգիս եկեղեցում պատարագելու եւ օրւայ առիթով քարոզելու է Թեմակալ Առաջնորդի օգնական՝ Հոգշ. Տ. Առաքել Աբղ. Գատեհճեանը:

Սկիզբ ժամերգութեան ժամը 9.30-ին
Ս. Պատարագ ժամը 10.00-ին
Քարոզ ժամը 11.00-ին

Մեր ժողովրդի զաւակներին հրաւիրում ենք ներկայ լինելու Ս. Պատարագին եւ հաղորդւելու մեր Տիրոջ Յիսուս Քրիստոսի Համբարձման խորհուրդով:

ԴԻՒԱՆ ԿՐՕՆԱԿԱՆ ԽՈՐՀՐԴԻ
ԹԵՀՐԱՆԻ ՀԱՅՈՑ ԹԵՄԻ

@tehranprelacy

ՇՆՈՐՀԱՒՈՐ ՏԵԱՌՆ ՄԵՐՈՅ ՅԻՍՈՒՍԻ ՔՐԻՍՏՈՍԻ ՀԱՄԲԱՐՁՄԱՆ ՏՕՆԸ

@tehranprelacy