Հայր Սուրբն իր քարոզի սկզբին, անդրադառնալով Համբարձման տօնի խորհրդին ասաց.-«Քրիստոսի հրաշափառ համբարձումից հարիւրաւոր տարիներ առաջ, Դաւիթ մարգարէի որդի եւ Երուսաղէմում Իսրայէլի թագաւոր Ժողովող Իմաստունը Յիսուսի համբարձման մասին մարգարէանալով ասել է.- «Արեգակը ծագում, արեգակը մայր է մտնում եւ վերադառնում է իր տեղը, որտեղից ծագել է» (Ժղ 1.5): Հայ Առաքելական Ս. Եկեղեցին իր շարականների, աղօթքների եւ սուրբ հայրերի գրականութեան ճամբով, Քրիստոսի կոչում է «արդարութեան արեգակ», իսկ Սրբուհի Կոյս Աստւածածնին՝ «գերարփի արեւելք»: Հետեւաբար, այսօրւայ բնաբանում յիշւած արեգակը Քրիստոսն է, որ ծագեց արեւելքից՝ Սրբուհի Կոյս Մարիամից: Նա արտորաց այս աշխարհի վրայ, այսինքն՝ իր երկրաւոր առաքելութիւնը եւ փրկագործական ծրագիրը կատարեց, ապա մայր մտաւ, այլ խօսքով՝ համբարձւեց, վերադարձաւ երկինք, որտեղից ծագել էր»:

Հայր Սուրբն իր քարոզի միւս բաժնում ասաց,-«Սիրելի հաւատացեալներ, Քրիստոսով սիրելի քոյրեր եւ եղբայրներ, Յիսուսի երկրաւոր կեանքի աւարտը, համբարձումը, մեր իսկական կեանքի սկիզբն է: Քրիստոսի համբարձումով մեր փրկութեան պատմութիւնը չաւարտւեց, այլ նո՛ր սկսեց: Քրիստոս իր համբարձումով վերջ դրեց այս ժամանակաւոր, աւարտ ունեցող, անցողիկ եւ գնայուն կեանքին, ու մեր առջեւ բացաւ անժամանակ կեանքը, յաւիտենական, իսկական եւ ճշմարիտ կեանքը: Քրիստոս մարդկային մարմնով համբարձւեց, որպէսզի մարդկութիւնը վեր բարձրաձնէր, երկինք բարձրաձնէր եւ ինչպէս Պօղոս առաքեալն է ասում, մարդուն երկնաքաղաքացի դարձնէր: Քրիստոս համբարձւեց, որպէսզի մեր համար երկնքում տեղ պատրաստէր: Յովհաննու աւետարանում Յիսուս ասում է.- «Իմ Հօր տան մէջ շատ տեղ կայ, եթէ այդպէս չլինէր, չէի ասի ձեզ, թէ գնում եմ եւ ձեզ համար տեղ կը պատրաստեմ: Եւ երբ գնամ եւ ձեզ համար տեղ պատրաստեմ, դարձեալ կը գամ եւ ձեզ կը վերցնեմ Ինձ մօտ, որպէսզի, որտեղ որ Ես եմ գտնւում, դուք եւս լինէք այնտեղ» (Յհ 14.2-3): Քրիստոս իր համբարձումով մեր առջեւ բացաւ երկնքի ճանապարհը»:

Հայր Սուրբն իր քարոզի աւարտին ասաց.-«Քրիստոս համբարձւեց, որպէսզի իրականցնէր իր հետեւեալ խոստումը. «Ես ձեզ հետը կը լինեմ միշտ՝ մինչեւ աշխարհի վախճանը» (Մտ 28.20): Յիսուս չհամբարձւեց, որպէսզի մեզանից հեռանայ, այլ նա երկինք գնաց, որպէսզի երկնքի ճամբով մուտք գործէր մեզանից իւրաքանչիւրի հոգում, սրտում եւ մտքում: Յիսուս Նազովրեցին իր մարդկային մարմնով չէր կարող յաւիտենապէս մեզ հետ լինել: Իր մարդկային մարմնի պատճառով, նրա ազդեցութիւնը սահմանափակ էր: Նա կարող էր միայն որոշ թւով մարդկանց հետ մի վայրում լինել, կարող էր միայն 12 առաքեալների, 72 աշակերտների եւ որոշ թւով բազմութեան հետ լինել, բայց չէր կարող ամբողջ աշխարհի հետ խօսել, բոլոր ժամանակներում, աշխարհի բոլոր վայրերում: Ուրեմն, Քրիստոս համաբարձւեց, որպէսզի համայն մարդկութեան հետ լինէր. որեւէ վայրում, որեւէ ժամանակում, որեւէ օրւայ ընթացքում:
Հետեւաբար, սիրելի հաւատացեալներ, Քրիստոսով սիրելի քոյրեր եւ եղբայրներ, համբարձման խորհուրդով լուսաւորւած եւ զօրացած, փառք տանք Տիրոջ իր համբարձման համար եւ աղօթենք, ասելով.- «Փա՜ռք հրաշափառ Քո համբարձմանը, ո՜վ Տէր, Քո օրհնեալ եւ փառաւորեալ, յաղթական եւ հրաշալի համբարձումն ենք օրհնում եւ փառաւորում: Մարդասէ՛ր Տէր, յանուն քո անարատ եւ Սրբուհի Մօր եւ կոյսի եւ յանուն Քո պատւական խաչի, ընդունի՛ր մեր աղաչանքները եւ փրկի՛ր մեզ»: Այժմ եւ միշտ եւ յաւիտեանս յաւիտենից: Ամէն»:

Թեմիս եկեղեցիներում կրօնական արարողութեանը ներկայ էին Ի. Իսլ. Խորհրդարանում Թեհրանի եւ հիւսիսային իրանահայութեան Պատգամաւորը, Պատգամաւորական ժողովի, Թեմական խորհրդի, Ազգ. մարմինների եւ Եկեղեցական խորհուրդների ներկայացուցիչները եւ հաւատացեալներ:

Ազգային Առաջնորդարանի Հանրային Կապ

@tehranprelacy

ՀԱՆՐԱՊԵՏԱԿԱՆ ՄԱՂԹԱՆՔ՝ ՀԱՅԱՍՏԱՆԻ ԱՌԱՋԻՆ ՀԱՆՐԱՊԵՏՈՒԹԵԱՆ 108-ՐԴ ՏԱՐԵԴԱՐՁԻ ԱՌԻԹՈՎ

Այսու Թեհրանի թեմի մեր սիրելի ժողովրդի զաւակներին յայտնում ենք, որ հովանաւորութեամբ Թեմիս Առաջնորդ Գերշ. Տ. Սեպուհ Ս. Արք. Սարգսեանի՝ ուրբաթ, 29 Մայիս 2026 թւականի առաւօտեան Թեհրանի բոլոր եկեղեցիներում յընթացս Ս. Պատարագի, տեղի է ունենալու Հանրապետական մաղթանք եւ դրօշի օրհնութիւն Հայաստանի Առաջին Հանրապետութեան հիմնադրութեան 108-րդ տարեդարձի առիթով:

Իսկ յաւարտ Ս. Պատարագի կը կատարւի հոգեհանգստեան յատուկ արարողութիւն Ղարաքիլիսէյի, Բաշ Ապարանի, Սարդարապատի եւ այլ վայրերում տեղի ունեցող ճակատամարտերում զոհւած նահատակների հոգու խաղաղութեան համար։

Մեր ժողովրդի զաւակներին հրաւիրում ենք ներկայ լինելու կրօնական արարողութեանց եւ հաղորդւելու հայրենիքի ազատութեան համար նահատակւած հայորդիների նահատակութեան խորհուրդով:

ԴԻՒԱՆ ԿՐՕՆԱԿԱՆ ԽՈՐՀՐԴԻ
ԹԵՀՐԱՆԻ ՀԱՅՈՑ ԹԵՄԻ

@tehranprelacy