🎤 ALLOH BILAN KIFOYALANGAN KISHIGA ALLOHNING OʻZI KIFOYADIR

Ibn Umar roziyallohu anhudan rivoyat qilinadi:

«Kim Alloh bilan kifoyalansa, unga Allohning Oʻzi kifoya qiladi. Kim Allohdan boshqa birovga bogʻlansa, koʻzi koʻr boʻladi. Kim dunyodagi oz narsaga ham toʻymasa, yigʻib-tergan koʻp molidan ham unga foyda boʻlmaydi.

Shunday ekan, dunyodan yetarli miqdori bilan kifoyalan. Oʻzingni iffat va poklikka majbur qil. Xiyonat va harom yoʻl bilan mol toʻplashni tark et. Chunki ertaga uning hisobi uzoq boʻladi».

🔖 «Az-Zuhdul-kabir»

✍️ @toliblarga_nasihat

Solih amal

📜"Mol-mulk, bola-chaqa dunyo hayotining ziynatidir.
Boqiy qoluvchi solih amallar Robbing huzurida savob va umid jihatidan yaxshiroqdir".

Kahf surasi, 46 - oyat.

▫️Izoh: Ha, molu mulk, bola-chaqa bu dunyoning ziynatidir, ammo qiymati emasdir. Islomda ziynatga ham halol-pok boʻlish sharti ila izn berilgan.
Ammo ziynatlar hayot qadrini oʻlchovchi qiymatga aylantirilmagan. Ziynatga ziynat deb qaralgan. Islomda boqiy qoluvchi solih amallar qiymat sanaladi. Insonga uning iymoni va yaxshi amaliga qarab qiymat beriladi.

✍️ @toliblarga_nasihat

Imom Aʼmash rahimahulloh: «Shunday insonlarni koʻrdimki, kishi oʻz birodarini bir yoki ikki oylab koʻrishmas edi. Keyin koʻrishib qolsa ham, ortiqcha gap-soʻzlarsiz faqat «ahvoling qanday?» «yaxshimisan?» deb soʻrashardi, xolos. Lekin (bir kuni kelib) oʻsha birodari undan mol-mulkining yarmini soʻrasa, (zarracha ikkilanmay) albatta berib yuborar edi.
Soʻngra boshqa bir (keyingi) avlodni koʻrdimki, ulardan biri oʻz birodarini biror kun koʻrmay qolsa, hatto uyidagi tovugʻigacha surishtirib, hol soʻragan boʻladi. Ammo undan mol-mulkidan arzimas bir don soʻrasa, albatta man qiladi, bermaydi!» dedilar.

Zamaxshariyning «Rabiʼul abror» asaridan.

✍️ @toliblarga_nasihat

Kunimizda bazilarga kerak bo’lgan odoblar!

📱Telefonda soʻzlashish odoblari

1. Qoʻngʻiroq qilish vaqtini inobatga olish:
Qoʻngʻiroq qilish uchun munosib vaqtni tanlash lozim. Odamlar, odatda, oʻz muhim ishlari bilan band boʻladigan yoki dam oladigan (uxlaydigan) vaqtlarda qoʻngʻiroq qilinmaydi.

2. Qoʻngʻiroq qilishda me’yorga rioya qilish:
Qoʻngʻiroqlar sonida moʻtadillik va me’yorga amal qilish lozim. Qoʻngʻiroqni bezovta qiladigan darajada uzoq davom ettirmaslik, ortiqcha turib olmaslik va haddan oshmaslik kerak.

3. Qoʻngʻiroq qiluvchining oʻz ismini aniq aytishi (oʻzini tanishtirishi):
Jobir roziyallohu anhu aytadi: «Otamning zimmasidagi qarzi xususida Nabiy sollallohu alayhi vasallamning oldilariga kelib, eshik qoqdim. U zot: «Kim bu?» dedilar. «Men», dedim. Shunda u zot buni yoqtirmagandek: «Men, men», dedilar». Imom Buxoriy rivoyati.

4. Qoʻngʻiroq qiluvchining suhbat boshida va oxirida salom berishi:
Paygʻambar sollallohu alayhi vasallam aytdilar: «Sizlardan birortangiz bir majlisga kelsa, salom bersin, qaytmoqchi boʻlsa, yana salom bersin. Birinchi salom ikkinchisidan haqli emas». Abu Dovud va Termiziy rivoyati.

5. Ovoz balandligini me’yorda saqlash:
Bezovta qiluvchi baland ovozsiz yoki maqsadni ifoda eta olmaydigan darajada past ovozsiz, eshitilarli odatiy me’yorda soʻzlashish lozim. Shuningdek, me’yordan ortiq shoshqaloqlikka yoki haddan tashqari sekinlikka yoʻl qoʻymaslik kerak.

✍️ @toliblarga_nasihat

​🌿 HAQIQIY TAVOZE’ VA BUYUK QALB SINOVI

​«Kim senga yomonlik qilsa-yu, soʻngra qilgan yomonligidan uzr soʻrab kelsa, chin tavozeʼ uning uzrini — xoh u rost boʻlsin, xoh yolgʻon boʻlsin — qabul qilishingni va uning ichki sirini (niyatini) Alloh taoloning Oʻziga topshirishingni vojib qiladi».

​— Ibn al-Qayyim rohimahulloh
🔖 «Madorijus-solikiyn»

​Kimdir dilingizni ogʻritib, keyin uzr soʻrab kelsa, uning samimiyligini taftish qilishga kirishmang.

Uzrni qabul qiling-da, qalbini Qalblarni biluvchi Zotga topshiring. Chin xotirjamlik va yuksak axloq aynan mana shundadir.

✍️ @toliblarga_nasihat

🚪Oʻylab koʻr, ey inson.

​Sen har doim xatar ichidasan. Chunki oʻlimning bizga maʼlum boʻlgan aniq bir vaqti yoʻq:

​Inson uydan chiqib ketishi va ortiga qaytib kelmasligi mumkin.

​Ish stoli qarshisida oʻtirishi va oʻrnidan boshqa qayta turmasligi mumkin.

​Oʻz toʻshagiga yotishi, biroq toʻshagidan toʻgʻri gʻusl (yuvish) taxtasiga koʻtarilib ketishi mumkin...

​Bu haqiqat barchamizdan umr berilgan ushbu gʻanimat fursatni Alloh taologa tavba qilish bilan oʻtkazishimizni taqozo etadi.

Inson doimo oʻzini Allohga tavba qiluvchi, Unga qaytuvchi va boʻysunuvchi ekanini his qilib yashashi lozim. Toki ajal kelganida u eng goʻzal va xayrli holatda boʻlsin.

✍️ @toliblarga_nasihat

Ilm

📜Abdulloh ibn Muborak: «Ilmning birinchi manfaati — bir-biringizga (ilmingizdan) foyda yetkazishingizdir», dedi.

“Tarixi Dimashq” asaridan.

✍️ @toliblarga_nasihat

Ular(solih salaflar)dan oʻrganaylik
Ularning har biri birodariga oʻziga ravo koʻrgan narsani yaxshi koʻrar edi. Agar oralaridan biri koʻrinmay qolsa, uni izlashar, agar kasal boʻlsa, borib koʻrishar edi. Agar birortalari kambagʻal boʻlib qolsa, yordam berishar, agar ehtiyoji boʻlsa, koʻmaklashar edilar.
Agar boshiga biror musibat tushsa, unga taʼziya bildirib, dardiga sherik boʻlishardi. Ularning dini nasihat (samimiyat, yaxshilik sogʻinish), xulqlari esa — amru maʼruf va nahyi munkar (yaxshilikka buyurish va yomonlikdan qaytarish) edi...
Shunday ekan, ular nima ustida ham tortishib, xusumatlashsin?!

✍️ @toliblarga_nasihat

🔗Qurtubiy rahimahulloh aytadilar:

​«Alloh salafi solihlarni Oʻz rahmatiga olsin! Ular har bir sogʻlom aql egasiga nasihat qilishda qattiq taʼkidlab, shunday degan edilar:
​«Nima bilan oʻynashsang ham oʻynashgin-u, lekin zinhor va zinhor dining bilan oʻynashma»

​🔖 «Al-Jomiʼ li-ahkomil Qurʼon»

✍️ @toliblarga_nasihat

📌Qalb qattiqligining davosi bormi❓

​Albatta, uning eng katta davosi — Qurʼoni karimni koʻp oʻqishdir.

​Bunga dalil Alloh taoloning ushbu soʻzidir:

​«Agar Biz ushbu Qurʼonni toqqa tushirganimizda edi, uning Allohdan qoʻrqqanidan boʻyin egib, parchalanib ketganini koʻrar eding»
(Hashr surasi, 21-oyat)

✍️ @toliblarga_nasihat

Imom Ibn Qayyim rahimahulloh aytadi:

«Odamlar Qurʼonni tadabbur bilan qiroat qilish qanday ulugʻ amal ekanini bilganlarida edi, hamma ishlarini tashlab, faqat shu ish bilan mashgʻul boʻlar edilar».

📚 «Miftohu doris saodat», 1-j., 187-b.

✍️ @toliblarga_nasihat

Foruq Umar ibn Xattob roziyallohu anhu: “Albatta, sizlar dushmaningiz ustidan (odamlaringizning) adadi koʻpligi yoki qurol-aslaha bilan gʻolib boʻlmaysizlar. Balki ular ustidan mana shu din (iymonning kuchi) bilan gʻolib boʻlasizlar.
  Bas, agar sizlar ham, dushmaningiz ham gunoh ishlarda tenglashib qolsangiz, u holda gʻoliblik ular tomonida boʻladi», dedi.

Ibn Abdur Robbah Andalusiyning «Aqdul farid» asaridan.

✍️ @toliblarga_nasihat

Nuʼmon ibn Bashir roziyallohu anhu: “Halokatning eng katta koʻrinishi — balo-ofatlar(musibat) davrida gunoh-maʼsiyatlarga qoʻl urishdir», dedi.

✍️ @toliblarga_nasihat

Bakr ibn Abdulloh al-Muzaniy rohimahulloh aytadilar:

“Ey odam bolasi , kim ham sendek sharafga ega ? Istagan vaqtingda tahorat olib mehrob(namoz)ga kirasan, sen bilan Allohning oʻrtasida tarjimon yoʻq holda (toʻgʻridan toʻgʻri) u bilan muloqot qilasan!”

(Sifatus-sofvah)

✍️ @toliblarga_nasihat

Allohning marhamatiga eng yaqin kishi koʻproq istigʻfor aytib, tavba qiladigan kishidir. Alloh taolo dedi:

 لَوۡلَا تَسۡتَغۡفِرُونَ ٱللَّهَ لَعَلَّكُمۡ تُرۡحَمُونَ

«Marhamatiga erishishingiz uchun Allohdan magʻfirat soʻrasangiz boʻlmaydimi?!» (Naml, 46).

Shayx Abdulaziz Torifiy

✍️ @toliblarga_nasihat