ІІІ Акадэмія жаночага палітычнага лідарства прайшла ў Празе

З 13 па 18 верасня ў Празе прайшла ІІІ Акадэмія жаночага палітычнага лідарства, арганізаваная Офісам дэмакратычных сіл Беларусі ў Чэшскай Рэспубліцы ў супрацоўніцтве з Офісам Святланы Ціханоўскай і пры падтрымцы чэшскага прадстаўніцтва фонду Rosa Luxemburg Stiftung (RLS). У праграме ўзялі ўдзел 11 беларускіх жанчын з Польшчы, Літвы і Германіі, пры гэтым конкурс сёлета склаў 5 чалавек на месца.

Акадэмія накіравана на падрыхтоўку жанчын з палітычным досведам да больш актыўнага ўдзелу ў грамадскіх працэсах і прадстаўлення беларускай дэмакратычнай супольнасці на нацыянальным і міжнародным узроўнях.

Праграма ўлучала тэарэтычны блок па паліталогіі, канфлікталогіі і будаванні супольнасцяў, практычныя заняткі па адвакацыі, публічных выступах, асабістым брэндзе і пратаколе, а таксама сустрэчы з замежнымі дыпламаткамі і чэшскімі палітыкесамі. Сярод іх — былая віцэ-прэзідэнтка Еўрапейскай Камісіі Вэра Ёурава, былая кандыдатка на прэзідэнтку Славакіі Магда Вашарыява, дэпутаткі чэшскага парламента Катэрына Дэмэтрашвілі і Габрыэла Свараўска. Удзельніцы таксама наведалі МЗС Чэхіі, амбасаду Германіі, Амерыканскі цэнтр у Празе і штаб-кватэру Радыё Свабода.

Акадэмія таксама дала ўдзельніцам рэальны інструментарый для далейшай працы: разуменне палітычных працэсаў, навыкі работы з медыя і фарміраванне асабістага брэнду. Сустрэчы з еўрапейскімі і чэшскімі палітыкесамі і дыпламатычным корпусам далі ўдзельніцам наўпроставыя кантакты, якія могуць стаць асновай для будучага міжнароднага супрацоўніцтва. 

Акадэмія ўжо другі год рэалізуецца дзякуючы супольнай працы Офіса дэмакратычных сіл Беларусі ў Чэшскай Рэспубліцы, Офіса Святланы Ціханоўскай і чэшскага прадстаўніцтва фонду Rosa Luxemburg Stiftung.

Трэці дзень Святланы Ціханоўскай на Генасамблеі ААН у Нью-Ёрку 

У трэці дзень на палях Генеральнай асамблеі ААН Святлана Ціханоўская правяла дзясяткі сустрэчаў з палітычнымі лідарамі, прадстаўнікамі ўрадаў, міжнародных арганізацыяў і бізнесу.

З прэзідэнтам Румыніі Нікушарам Данам гаварылі пра падтрымку беларусаў, вызваленне палітвязняў і месца Беларусі ў еўрапейскім парадку дня. Ён запрасіў Святлану Ціханоўскую ў Бухарэст.

З прэм’ер-міністрам Славеніі Янезам Яншам абмеркавалі бяспеку Беларусі і рэгіёна, залежнасць рэжыму Лукашэнкі ад Расіі, вызваленне палітвязняў і падтрымку тых, хто выйшаў з турмаў. Ціханоўская прапанавала Славеніі далучыцца да Міжнароднага гуманітарнага фонду і развіваць праграмы рэабілітацыі для былых палітвязняў і іх сем’яў.

На Clinton Global Initiative Святлана Ціханоўская гаварыла пра тое, да чаго беларусы рыхтуюцца ўжо цяпер — да будучых пераменаў. Пра інстытуты, людзей, рэформы і механізмы пераходнага перыяду.

«Дыктатуры могуць здавацца вечнымі — пакуль раптам не падаюць. Наша задача — не прадказаць дакладную дату пераменаў, а зрабіць так, каб Беларусь была да іх гатовая».

Асобна Ціханоўская сустрэлася з Білам Клінтанам. Праз 32 гады пасля яго гістарычнага візіту ў Беларусь яны гаварылі пра тое, што змянілася за гэты час, пра беларусаў унутры краіны і неабходнасць не губляць міжнародную ўвагу да Беларусі.

З Майкам Пампеа абмеркавалі ўрокі 2020 года, незалежнасць Беларусі і тое, як рэжым Лукашэнкі пасля рэпрэсій стаў яшчэ больш залежным ад Расіі.

А на Atlantic Council Global Citizen Awards Ціханоўская размаўляла з кіраўнікамі дзяржаў, прадстаўнікамі ўрадаў і міжнароднага бізнесу — пра палітвязняў, сітуацыю ў Беларусі і будучыя магчымасці для краіны.

Галоўнае — Беларусь застаецца ў міжнародным парадку дня. І размова ідзе не толькі пра сённяшнія праблемы, але і пра будучую незалежную Беларусь.