✔️‼️‼️‼️✅✅✅✅
“MA’RIFAT ULASHIB” — ADABIY UCHRASHUVLAR, KITOB TUHFALARI VA “YASHIL MAKON” TASHABBUSI

Toshkent shahri Sergeli tumanidagi 322- va 237-sonli umumta’lim maktablarida hamda Toshkent to‘qimachilik va yengil sanoat institutida “Ma’rifat ulashib” loyihasi doirasida taniqli adiblar ishtirokida ijodiy uchrashuvlar va davra suhbatlari tashkil etildi.

Tadbirlarda Toshkent to‘qimachilik va yengil sanoat instituti birinchi prorektori, professor Baxtiyor Nasimov, institut professor-o‘qituvchilari, maktab o‘quvchilari hamda talaba-yoshlar ishtirok etdilar.

Uchrashuvlar mehmonlari — O‘zbekiston Yozuvchilar uyushmasi a’zosi, “Do‘stlik” ordeni sohibi, “Sharq yulduzi” jurnali bosh muharriri o‘rinbosari Aziz Said, O‘zbekiston xalq yozuvchisi, O‘zbekistonda xizmat ko‘rsatgan madaniyat xodimi Isajon Sulton hamda Zulfiya nomidagi Davlat mukofoti sohibasi Guli Nigor bo‘ldi.

Samimiy muloqotlar davomida adabiyot va kitobxonlikning yoshlar ma’naviy kamolotidagi o‘rni, ijodga mehr uyg‘otish, milliy qadriyatlar va vatanparvarlik ruhini mustahkamlash masalalariga e’tibor qaratildi.

Tadbirlar doirasida maktablarning faol o‘quvchilari, mahallaning tashabbuskor yoshlari hamda institutning faol talabalari adiblarning dastxati tushirilgan kitoblar bilan taqdirlandi. Shuningdek, ijodkorlarga institutning esdalik sovg‘alari topshirildi.

“Ma’rifat ulashib” tadbirlarining mantiqiy davomi sifatida institut hududida “Yashil makon” loyihasi doirasida ko‘chat ekish marosimi ham o‘tkazildi. Adiblar, professor-o‘qituvchilar va talaba-yoshlar ishtirokida amalga oshirilgan ushbu ezgu tashabbus tabiatni asrash, ekologik madaniyatni yuksaltirish hamda kelajak avlod uchun yashil muhit yaratishga qaratildi.

#TTYSI #TITLI #ТИТЛП

🌍🌍🌍🌍🌍🌍
Instagram|Web-site|Facebook|YouTube