⚡️ «Аға, бізді алып кетіңіз»: заңгер Мейрман Шекеев Путинге хат жазды

Астанадағы СІМ ғимаратының алдында ұлдары соғыс аймағында қалған қазақстандықтардың аналары әлі де биліктен жауап күтуде. Әйелдер бірнеше күннен бері ұлдарымен дұрыс байланыса алмай отырғанын айтады. Оларға заңгер Мейрман Шекеев те қосылды.

МӘН-ЖАЙЫ

Шекеев журналистерге жас жігіттермен байланыста екенін айтты. Оның сөзінше, олар Қазақстан билігінің Ресей тарапымен келіссөздер жүргізіп жатқаны туралы мәлімдемелерінен кейін нақты әрекет күтуде.

«Төрт күн болды. Бүкіл Қазақстанға “келісімге қол қойылды, оларды алып кетеміз” деп мәлімдеді. Ең болмаса жігіттерге қоңырау шалып, үміттендірсін. Олар өмірге деген үмітін жоғалтып барады. Мемлекеттің артында тұрғанын сезбейді. Біз қоңырау шалып, “шыдаңдар” деп жұбатамыз. Төрт күн – олар үшін өте ұзақ уақыт», – деді Шекеев.

Заңгердің айтуынша, оған жаңа отбасылар әлі де хабарласып жатыр. Сондықтан қазір белгілі болып отырған 21 адаммен бұл жағдай шектелмеуі мүмкін. Шекеев консул орынбасарымен байланыста екенін, алайда әзірге нақты жауап ала алмағанын айтты.

Заңгер жігіттердің құжаттарын зерттегенін жеткізді. Оның нұсқасына сәйкес, олардың ешқайсысы соғысқа саналы түрде баруға келіспеген. Кейбіріне күзет жұмысы ұсынылған. Ал жігіттердің бір бөлігі орыс тілін нашар меңгергендіктен, нақты қандай құжатқа қол қойғанын түсінбеген.

Шекеевтің айтуынша, байланысқа шыққан жігіттердің басым бөлігі қазір Луганскте.

«Маған қоңырау шалған сайын жүрегім ауырады. Не деп жауап берерімді білмеймін. “Аға, бізді алып кетіңіз”, – дейді. СІМ-де қалай тыныш ұйықтап жатқандарын білмеймін. Олар сонда болуы керек. Бұл – біздің азаматтарымыз. Конституцияға сәйкес, Қазақстан азаматтарының құқығын шетелде де қорғауы тиіс», – деді заңгер.

Шекеев Ресей президенті Владимир Путинге де үндеу жолдағанын хабарлады. Оның айтуынша, хаттың адресатқа қашан жететіні және жауап бола ма, жоқ па – әзірге белгісіз.

https://t.me/ulysmedia

⚡️ «Ұлымды бөтен ел үшін дүниеге әкелген жоқпын»: қазақстандықтардың аналары балаларын елге қайтаруды сұрап, жылап отыр

Астанадағы Сыртқы істер министрлігі ғимаратының алдында соғыс аймағында жүрген қазақстандықтардың аналары балалары туралы айтып, көз жасына ерік берді. Бірі ұлының тірі-тірі еместігін білмейді, енді бірі баласынан көмек сұраған қоңыраулар қабылдап отыр. Әйелдер биліктен ұлдарын елге қайтаруды сұрайды.

Бір жылдан астам уақыттан бері ұлының тірі-тірі еместігін білмейді

Айымгүл Солтабаева немересі Арап Қуанышұлының 2006 жылы туғанын айтты. Ол Ресейге жұмыс іздеп кеткен. Тамыз айына дейін отбасымен байланыста болған. Әйелдің сөзінше, немересі алғашында құрылысқа жұмысқа барғанын, кейін шошқа соятын кәсіпорынға жұмысқа жіберілгенін айтқан. Алайда екі ай бойы жалақы алмаған. Құрылыс алаңында бір апта жұмыс істегеннен кейін оны соғысқа алып кеткен.

«Бір жыл бір ай болды, одан хабар жоқ. Тірі ме, қаза тапты ма – білмейміз», – деді Айымгүл Солтабаева.

Тағы бір әйел ұлының ондағы жағдайы өте ауыр екенін айтты. Оның сөзінше, жастар суықтап ауырып жатыр, жылы киімдері де жоқ.

«Құдай үшін, балаларымызды ол жерден алып шығыңыздаршы! Күн сайын өлім. Олардың еш кінәсі жоқ. Егер балам қаза болса, өзім де сол жаққа барып, баламмен бірге өлгенім артық. Мен оны бөтен ел үшін дүниеге әкелген жоқпын. Біз мұнда күртеше киіп жүрміз, ал олар жұқа арнайы киіммен жүр. Бәрі жөтеліп жатыр. Ең болмаса, оларды арнайы қабылдау орнына жіберуге болмай ма?» – дейді ана.

Тағы бір ана ұлын төрт айдан бері елге қайтаруға тырысып жүргенін айтты. Ол Ресейге екі рет барғанымен, көмек ала алмаған.

«Жалғыз ұлым төрт ай бұрын кетіп қалды. Ол маған: “Мама, мен жараландым. Мені кешір. Үйге қайтқым келеді, көмектесші”, – деп жалынды. Ресейге екі рет бардым, бірақ ол жақта ешкім көмектеспеді. Енді сіздерден көмек сұраймын. eGov арқылы 25 рет өтініш бердім. Маған тек “күтіңіз” дейді. Басқа ештеңе жоқ. Оның жасы 20-да, орыс тілін білмейді. Оны алдап кеткен», – деді анасы.

https://t.me/ulysmedia