Esimda lahzalik baxtiyor hayot
Va bizni baxtiyor qilolmagan qish.
Baribir o‘zimga pichirlayman bot:
"Sizni kutish kerak, kutish va kutish!.."

Balki bisotimda qolmagan najot,
Balki erishganim barchasi erish.
Baribir o‘zimga pichirlayman bot:
"Sizni sevish kerak,
sevish va sevish!.."


©️Jo'rabek Ramazon

Mag‘rur ketayapsan, tevarak mulzam,
Ko‘ngilga ayni dam sakinat marg‘ub.
(Ingrab yuboraman sharaqlab kulsang)
Ortingdan ergashgan soyang-da mag‘rur.

Sochlaring – qashqirni hurkitar changak,
Kiprik dorlarida titramas qo‘rquv.
Ketyapsan jafokor yonidan dangal,
G‘olib sarkardadek chalgancha burg‘u...

Bir telba oqimning nahriga tushdik,
Chirpirab jununning bag‘riga tushdik.
To‘lg‘anib to‘rdagi baliqlar misol,
Qafasdan qutulgan telbavor qushdek

Havoda yonma-yon yo‘laklar chizib,
Jazbadan qorishib lazzatli terga.
Bir zumda yetti qat samoni kezib,
Shu zahot quladik yetti qat yerga.

Og‘ir xo‘rsiniqlar, hansirash aro,
Bazo‘r olib qochdik ko‘zlarni ko‘zdan.
Sal burun ko‘ngilda yashnardi bahor
Va mana, qovjirab turibmiz kuzday.

Siltanib chiqding-u quchog‘im – to‘rdan,
Eshikka yo‘nalding, tashqari – sohil.
Men – hayrat xanjari sanchilgan murda,
Ortingdan kuzatib qoldi nigohim.

Axir kir oqimning nahriga tushding,
Chirpirab jununning bag‘riga tushding.
Nahot nafratni ham qizg‘ansang, sachra!
Nahot tugilmasa bejirim mushting?

Mag‘rur ketayapsan, o ruhing tetik,
Na uzr kutarsan tuban zolimdan.
Ilk bora muhabbat boshini egib,
Mag‘lubman yo Tangrim, g‘olib holimda.

Ortingdan ergashgan soyang-da mag‘rur...

🥥Jontemir

​​Bilasanmi, tush ko'rdim seni,
Esda qoldi ko'zlaring faqat.
Ko'rsatmoqchi bo'lib ko'zingni
Olib ketdi yo'llar beshafqat.

Seni topdim. Labingda titroq,
Shivirlading: "Tinchimni buzding…"
O'rtamizda qiynaldi chiroq,
Uyqusirab yig'ladi qizing.

Sen bo'shliqqa tikib ko'zingni
Shivirlading ohista, karaxt:
"Bilasanmi, tush ko'rdim seni,
Esda qoldi ko'zlaring faqat"

©️Xurshid Davron

Maktub

Men seni unuta olmadim!
Tamom...
Boshqa biror so'zga Hojat yo'q erkam...
Odam o'z vujudin a'zolarini —
Unutmog'i mumkin og'rimagan dam,
Sen mening yaramsan, yaramsan,
Yaram.

💙Jamol Sirojiddin

- Qo'llari qo'llaringizni ushlab yuradigan insonni emas, qo'llari sizni deb duoga ochilgan insonni seving.🌕

Biz birga ichmasmiz bitta idishdan
Eng shirin mayni-da, suvni-da hecham.
Biz emas sahardan chanqab o‘pishgan,
Biz emas darchadan shomga boqqan ham.
Sen quyosh o‘g‘lisan, men oyning qizi,
Lekin bitta sevgi mast qilar bizni.

Sodiq-u mehribon do‘stim — men bilan,
Sen bilan sho‘x yoring doimo birga.
Biroq ohlarimning sababi sensan,
Men sabab ko‘zingda berkingan sirga.
Qisqa uchrashuvlar doim omonat,
Shu taxlit nomlarni qo‘riqlar qismat.

Yashaydi she’ringda qalbim shivirlab,
She’rimga jon berar sen olgan nafas.
Biroq bir gulxan bor, yonar gurillab,
Uni vaqt-u qo‘rquv o‘chira olmas.
Bilsang, oh qanchalar qadrli bugun
Quruq va pushtirang labing men uchun!

©️Anna Axmatova

​​​​Agar yig'lamoqchi bo'lsang
Menga qo'ng'iroq qil...
Men seni kuldirishga va'da berolmayman
Biroq sen bilan birga yig'lashim mumkin.

Agar kunlardan bir kun butun dunyodan qochib ketmoqchi bo'lsang.
Menga qo'ng'iroq qil...
Men seni qolishingga ko'ndiraman deb va'da bermayman...
Biroq sen bilan birga qochib keta olaman.

Agarda bir kun sen butkul hech kimni ko’rishni yoki eshitishni istamay qolgudek bo’lsang
Yana menga qo'ng'iroq qil...
Men sening yoningga albatta kelaman, bunga va'da beraman.

Va yoningda jimgina sukut saqlayman
Lekin kunlardan bir kun sen menga qo'ng'iroq qilsang-u, men javob bermasam...
Iltimos, mening huzurimga shoshil!
Shamoldek uch! Ehtimol, o’sha vaqtda men senga rostan ham juda muhtoj bo’lishim mumkin.

🥥Gabriel Garsia Markes

Bu ishq edi...
girdob bagʻrida
pichirlardi bir oyat labi...
Poyoni yoʻq tugʻyon qa’rida
qoldim uryon dengizchi kabi...
Meni yondir...
sovuq soʻngaklar
qarsillasin chaqin urgandek...
va dahshatga tushsin yuraklar
Ishq qonini ichib koʻrgandek...
Men ichdim bu olovli xunni
Bu — Ishq edi...
Bu — Ishq eding sen!..
Agar gado boʻlsam bir kuni
Faqat seni tilanaman men...

💙Asqar Mahkam

Bu tun uxlamadim, alla aytmading,
Tunlarning tushini kezdim, sezdirmay.
Va hijron atalmish bir asov hisning,
Tutqichidan tutdim, ishqdan bezdirmay!

Chopdim, olislarga ketdim, izimdan,
Armongul chechaklar ochildi harir.
Gullarni husniga to'ymoq izmida,
Qarorim orqaga qaytmoq, azizim!

Shamollar qarshilik ko'rsatarlar, oh,
Qaytarar, boshlanar  endi tafovut.
Ko'zimdan yumalab tushadi, sevgi,
(Bir yig'i bahona qo'llarimdan tut..)

G'ururning  so'zini ikki qil, mayli,
Kibrga yo'l berma, bermagin, tushun.
Men ahir nomusman, orman, kimningdir,
Hech qachon hushiga kelmagan tushi.

Bu tun uxlamadim, alla aytmading.
Tunlarning tushida kezdim, sarsari...

©️Durdona Ubaydullayeva

Ko'zlar —
yurakdagilarni issiq ifodalash
qobiliyatiga ega, hayot atalmish yo'lda
kimnidir
yaxshi ko'rsang.

©️