Boraman.
Bizni adashtirgan yillar oralab
Jingalak sochimga taqasan yalpiz.
So‘ng ortga qaytaman...
Kimni qoralab
Yolg‘iz.

Men takror boraman
Bu ne jasorat...
O‘tmishga sudrayman vaqt millarini.
O‘g‘irlab qaytaman...
Derazangdagi
Baxt gullarini.

O yana boraman
Bu qanday tahqir...
Ko‘zimdagi bari tomchilar ozod.
Nogoh qo‘llarimdan tutadi taqdir
Kishanband etadi jismimni hayot.

Baribir boraman
Hech bo‘lmaganda
Ruhimni don kabi yutganda bir qush.
Sen titroq kaftingda ushoq tutasan
So‘ng uchib ketaman
Qaygadir sarhush.

©️Madina Norchayeva

qaytib kelaverding.
jilmayding
oʻpding
ming bor koʻz yumildi ketishlaringga
men chaqaga qimmat umrimga qo’shib
bor-budimni koʻmdim kulgichlaringga

bir senga ataldi kuzlar bahorlar
qoq ikki boʻlindi olaming, tanang
bir yoqda men hamda bechora sevgim
bir yoqda ayoling va ikki bolang

qiz koʻngil nelarni etmaydi havas?
yarim baxt izlagan kimsa yoʻq zotan…
– jonim, yana qachon kelasan?
– bilmam.
– taxminan?
– bilmadim.
– mayli, kutaman.

yashadim tarkingdan tashrifinggacha
aldoqchi tushlarda kechildi umr.
hushyor oqshomlardan sarmast tonggacha
sharob qadahlarda ichildi umr.

minglab orzularning oʻtdim bahridan
tamakiga qo’shib jonim tutatdim
o’rnim topmay yerning hech bir shahridan
men bevatan seni uyga kuzatdim

vafosiz joningga etib shukurlar
baxt quvib, armongga kelaverdim duch.
men yondim.
tepamda yosh toʻkdi hurlar;
ma'budani yoqdi ikkita kulgich.

©️Hanifa

Toʻqnashmaydi endi nigohlar,
Yomgʻirdan shikoyat etmaysiz menga,
Soyabon ostida,
Quyosh tigʻida
Qoʻllarimga tegib ketmas qoʻlingiz.
(Ustun kelmas aqldan yurak)
Meni qizgʻanmaysiz qancha istamay,
Qancha kutmay
hatto adashib
Raqamimni termaysiz, beshak…

Men qirgʻoqda qolgan baliqday
Pichirlayman
osmonga,
suvga,
yerga…
Don socharkan kabutarlarga
Yuragimni qoʻymaysiz tergab.
Nahot endi sizni yigʻlatgan,
Kitoblarni yoqmam, farishtam?!
Siz duoga ochmagaysiz qoʻl
Soʻz tilanib menga Arshdan…

Birga yulduz sanab, uchirib,
Oyning fonusini oʻchirib,
Samarqand-u Buxorolarni
Sayr etarkan tanho kechalar,
Goʻyo amir edim oʻshanda
Va qismatimga oʻzim ega…
Qayta guvoh boʻla olmaymiz
Istasak-da,
istamasak-da
Tun shu qadar qisqaligiga.

Kezarkansiz xiyobonlarni
Qoʻlimdan ortiq jasorat kutmassiz,
Xayolan she’rlarim xirgoyi etmassiz,
bitta boʻlsa ham ikki jahon,
Oʻqib bering yana bir marta,
Deya yalinmaysiz
endi hech qachon…

Yana Xudo biladi, jonim,
yana Xudo biladi…

©️Rashid Xoʻjamov

Ranglimidi dunyo o‘shanda?
Muhabbatli... Yana kim bilsin...
Bizdek baxtli tuyulmas edi
Ikkimizdan boshqa hech kimsa...

Oq-qoradir endi bor taraf,
Sen menga kam... Men senga kamman...
Nega baxtli tuyular endi
Ikkimizdan tashqari hamma?

🥥Iroda Rahmonaliyeva

kimdir "Bahor" dedi.
shoshdim
yugurdim
oynamdan hovliqib boqdim koʻchaga
oʻyladim :
men,
(balki sen ham hoynahoy)
sevib ardoqlagan oʻrik gullagan

yoʻq.
gullar yoʻq edi.
na barg na yaproq
qup quruq daraxtlar savlat toʻkardi…
soatlar, haftalar oʻtdi
keyinroq
koʻchamda maysalar, barglar koʻkardi

men qumsardim nafis oʻrik gulini
tutar edi hushboʻy isin humori
axir u sen eding.
bahor sen eding
sening ising edi bahor ifori

nastarin tutdilar qoʻlimga
evoh
men hamon oynadan hayron boqardim
bu nima bedodlik,
ajab, bu ne hol
axir menga oʻrik guli yoqardi

chinorlarga toʻla soʻqmoqqa boqib
men aslida seni kutardim betin
men faqat oʻzimni aldardim.
axir
bizning koʻchamizda oʻrik yoʻq edi

©️Oʻktamoy

yomg'irlar osmondan to'kilgan g'ussа
men esa o'zimni qilmay ehtiyot,
sensiz
soyabonsiz
osmonga o'xshab
faqat yig'lab o'tdim, jonim, umrbod.

shom payti qizarib botgan quyoshga
osilib ufqqa ham cho'kmoq istadim
vaqt esa doimo shoshgani shoshgan
gohi mangulikka uchmoq istadim

yillar kemirdilar rangsiz umrimni
egik boshim silab o'tdi shum qismat
men umr kechirdim, seni sog'inib,
yo'lingga ko'z tikib, yig'ladim faqat.

menda muhabbatdan aziz nima bor?
kulrang mavhumlikka etiblar ta’zim, -
oh, jonim, bu dunyo so’nggi yoʻq qimor -
oʻzimni qoʻyganman unda yutqazib….

💙Oʻktamoy

Kelib ko'zlarimdan tavbalar tergin,
Cho'g'langan yuragim hovurini bos.
Hech yo'q gunohlaring to'kkani kelgin
Og'ir yelkalardan bo'lasan xalos.

Ayt, endi unutib bo'ladi qanday?!
Axir qismatimda toleying kulgan.
Shukr, xotiramdan isming chiqarmay
Yaxshiyam Xudo bor eslatib turgan.

🥥Durdona Bahodirova

Men koʻkdan tushaman bir kuni,
Poyingga poyandoz bo’lishga.
Ko’zlaring qa’riga cho’kib jim,
Lablaring taftida o’lishga.
Men ko’kdan tushaman bir kuni...

Ishongil, hammasi o’tkinchi,
Bu dardlar...
Bu hijron...
Bu hasrat...
Barisi tan berar taqdirga,
Abadiy ishq yashar, ishq faqat!
Qolgani barisi o’tkinchi.

Diydamda tosh qotdi bu sog’inch,
Yig’ladim, lek, senga bormadim.
Oynalarga chertib o’ksidi yomg’ir,
Ungada ko’nglimni yormadim.
Diydamda tosh qotdi bu sog’inch...

Ufqqa Quyosh botar har kun betinim,
Qanchalik azob - jim kuzatmoq.
Sen - yerda, men - ko’kda har kuni,
Sog’inchni tunlarga uzatmoq.
Sog’inch bo’lib botar Quyosh betinim!

Sezyapman, bormog’im tayindir,
Faqat... Yetarmikan sendagi sabr.
Axir, sen g’ururi ko’kdagi qizga,
Qalbingning tubidan qazgansan qabr.
Sezyapman... Bormog’im tayindir!...

Sen faqat kut meni!..
Kutgin...
Kutaqol!..

💙Go'zal Roʻziyeva

Kutasan.
Kelmayman.
Kelolmayman goh,
Keyin tushlaringda so'rayman uzr.
O’rtada mung’ayib turadi gunoh,
Ko’nglimni dog’laydi shu adashgan sir.
Kutasan.
Kelaman.
Diydorlashamiz,
Ko’zlaringda yonar hayrat va uchqun.
Gunoh-u sirlarga to’lgan ishqimiz
Uch yashar bolaning baxtidek mavzun.
Kulaman.
Kulasan.
Qalbim yorishar,
Haqdan ikkimizga so’rayman insof.
Ishq deb ko’zimizdan to’kilgan yoshlar
Uch yashar go’dakning kulgisidek sof.
Ketaman.
Kuyasan, sarg’ayar ochun
Termular qismatning ko’zlari ma’yus.
Har lahza hajringda o'lmaslik uchun
Sening ko'zlaringda o'ldim, Yashilko'z!

🥥Marhabo Shodmonova

Sen topilgach bari yo'qoldi —
qo‘rquv, turg'unlik, jimlik
(qayda uchrading sen?)

Ichimda sas berdi
nimadir
o'sha — men doim zanjirband qilgan
hislar uyg'ondi
bosh ko'tardi
tik qaradi
ko'zimga.

Qo'llaring-la
yuzimga tegib
silading va
yulqib olding jilmaygan
niqobimni.

Niqob ortidagi ayanchli,
abgor — menga boqding
quchding: ketdik...

His yulqidi meni
diqqinafas ofisdan,
avtolar shovqinidan,
yumush to'la uydan.

Olib ketdi o'z olamiga
erk isi ufurib turgan
balandliklarga.

Sen bilan men barini yo'qotdim —
hayot va o'lim orasida
sarson bo'lgan nomsiz tuyg'ularimni.

Sen kimsan?
Nimasan?
Qandaysan?

💙Anif

Yomg'ir va do'l yog'di ustimga
sovuq xazin shamol esdi
qoldi faqat qarg'alar
ular qo'llarimni kesdi
ular o'chirdi ko'zimdagi
yongan olovni
ichimga sham yoq, azizim.

Esingdami, bir kuni
marhumlar qabri ustiga
sham yoqqanlari haqida
so'zlab berganding menga
bu vujuddan nima ham qoldi
ruhim o'lgan
ichimga sham yoq, azizim.

Cho'kyapman tobora chuqur
qo'rqamanki, yer yutsa meni
faqat taskin berib turardi
yuragimda sen qoldirgan cho'g' tushunsang-chi, kutyapman seni
intiq qilma
ichimga sham yoq, azizim
ichimga sham yoq.

🥥Anif