Ko‘rganimdan seni hayot bilan teng
Hayotimni ko‘rdim sen bilan baham.
Peshonam keng mening, bardoshim ham keng.
Lekin sig‘may qolding ikkisiga ham.

Sog‘inish bu — asov dardlar uyuri,
Borlig‘imni tinmay yulqilar toptab.
Bor-yo‘g‘i bir lahza tashrif buyurib,
Umrimni qoldirding so‘ngsiz azobda.

Yuragimda yo‘qdir, axir, po‘lat zirx,
Bardosh berolmadim bunday zarblarga.
Lekin men quduqqa so‘ylamadim sir,
Seni aytdim faqat jimjit harflarga.

Halovatga keldi shundan so‘ng qahat,
Muqaddas telbalik boshlandi so‘ngra.
Yashadim, ismingni otib qahqaha,
Yashadim, ismingni men ho‘ngrab-ho‘ngrab.

Yo‘l ko‘rdimmi, tamom, tikaverdim ko‘z,
Mushtoqlikdan boshqa e’tiqodim yo‘q.
Menga shafqat qilma, aytilgan ey so‘z,
Menga shafqat qilma, otilgan ey o‘q.

Men seni na do‘st, na g‘animga aytdim,
Ravo ko‘rganim yo‘q har kim-har kimga.
Aytsam, seni men o‘z sha’nimga aytdim,
Otsam, seni otdim o‘z yuragimga!

💙Matnazar Abdulhakim

Tun olib kirganda jonsiz uyquni,
Oʻrindiq halovat bermay qoʻygan zum.
Bahor jim-jitgina olgancha jonim
Koʻzimga sanchadir iliq nigohing.

Lek, nafas urmadi toʻzgʻigan sochga
Boʻshliqlar toʻlmadi kaftlarim aro
Sen...
Sekin tushimga kirayotirsan
Uyquda yashashga izn ber menga.

©️Sabrina Rashidova

Siqiq tuyuladi osmonday shahar
Boʻgʻilib ketasan nafas olishdan.
Qoʻlimdan nima ham kelar, azizim,
Nimani eplayman
yigʻlashdan boshqa?!

Oʻychan xayollarning yakuni — hechlik
Bosgan qadamingda yechilmas tugun.
Bir kuni charchadim desam,
iltimos,
Iiiindamay
yelkangni keltirgin...

💙DI

Ayol 40 ga kirsa ham, farzandli bo'lsa ham, u — bola.
Shunday ekan barcha ayollarni va qizlarni bugungi bayram bilan tabriklayman 🙂‍↔️💙

Men yomg'irpo'shingni sog'indim,
Betizgin hislarim shohidi.
Bir olis, bir munis, bir qadim
Ko'zingni qumsayman gohida.

Men yomg'irpo'shingni sog'indim
O... o'sha bahoriy nasimlar.
Bir mayin, bir ajib, bir go'zal
Labingdan quyilgan nazmlar...

Men yomg'irpo'shingni sog'indim
Bir og'ir, bir hazin, bir jallod
Sendan so'ng hech kimsa boshimni
Yomg'irdan qilmadi ehtiyot...

Men yomg'irpoʻshingni sog'indim

©️Majnuna

Qayerdaliging, nima qilayotganing yoki kim bilan ekanliging umuman ahamiyatsiz. Men seni har doim vijdonan, chin dildan, butunlay sevaman....

©️Love, Rosie

Sen orzularingga yetishishingga yordam beradigan va qo'rquvlaringdan himoya qiladigan biriga muhtojsan. Senga hurmat bilan munosabat qiladigan, sening har bir boʻlagingni, ayniqsa kamchiliklaringni sevadigan inson kerak. Sen seni xursand qila oladigan, senga haqiqiy baxtni his qila oldiradigan bir inson bilan birga bo'lishing kerak.💙

💙Love, Rosie

Bir vaqtlar

Bir vaqtlar otalar qizlarini
Bir qop jo‘xoriga alishgan.
Balki shuning uchun
Tovaga tushgan jo‘xoriday
Portlagim keladi.

Bir vaqtlar otalar qizlarini
Bir qop unga alishgan.
Balki shuning uchun
Tog‘oradagi xamirday
Haddimdan oshgim keladi.

Bir vaqtlar otalar qizlarini
Bir tanob yerga alishgan.
Ammo negadir yer bo‘lgim kelmas,
O‘sha janoblarning
Tanobini tortgim keladi.

Otalar balki hozir ham
Qizlarini juda arzon baholagani uchun
Senga juda qimmatga tushgim keladi,
Kechir meni, sevgilim!

🥥Kumush Abdusalomova

...yuzlab kitoblarni oʻqib tashladim, yarim kechagacha boshimni koʻtarmasdan kitob oʻqirdim, chunki sen kitobni yaxshi koʻrishingni bilardim.

🥥"Nomaʼlum ayol maktubi"

Turk adabiyoti haqida ikki og'iz

Bu haqida gapirishim qanchalik to'g'ri bilmadim. Umuman bu mavzuning menga aloqasi ham yo'q. 1-2 yil balki undan ham ko'proq vaqt davomida turk adabiyoti kuchli tanqid ostiga olinyapti.

Esimda, menimcha 12-13 yoshlar chamasi edim. Kutubxonadan Elchin Safarlining "Qaytaganimda uyda bo'l" asarini olib, bir kunga qolmay tugatganim yodimda. Aynan shu asardan keyin kitob oʻqishga mukkasidan ketgandim. U paytda turk adabiyoti trendning cho'qqisiga chiqqandi. Keyin "Dengiz haqida so'zlab ber menga"ni olgandim. Yana Omina Shenlikoʻgʻli, Mehmet Olaqosh, Rashod Nuri Guntekin va shu kabi bir qancha turk adabiyoti asarlarini yotib olib mutolaa qilganim yodimda. U paytda umuman kitob tanlamasdim, 400 betlik kitob 4 kunda tugardi. Shu darajada kitobga berilib ketgandimki, qoʻlimdagi qaysi kitob, bu kitobdan nimani oldim deyarli tushunmasdim, tahlil qilmasdim ham. Vaqt o'tgani sayin qahramonlar ismi ham yodimdan o'chib ketardi. U paytda faqatgina kitob ichida yashashni oʻylardim, xuddi serial koʻrgandek) 3-4 yildan keyin bu orada Jorj Oruell, Jeyn Ostin asarlarini, Garri Potterning 5-qismidan tashqari (butun shaharni aylanib topolmagandim) hammasini va shunga oʻxshash taniqli asarlarni o‘qib bo'lgandan keyin chamasi 15-16 yoshlarimda kitob tanlashni, ularni solishtirishni boshladim. Bu orada ba’zi o'zimga yoqqan kitoblarni ikkinchi bor o‘qidim, yoqtirmadim. Ba'zilarini ikkinchi bor o'qigandan keyin yanada yaxshiroq tushundim, nimanidir kashf etdim. Xullas, endi menda solishtirish, qiyoslash paydo bo'ldi va aynan shu oraliqda turk adabiyotidan voz kechdim. Keyinchalik Remarkni kashf etdim.❤️

Aytmoqchi bo'lganim, men Dostoyevskiyning birorta kitobini oʻqimaganim yoki "Martin Iden"ning menga yoqmagani hech narsani o'zgartirmaydi. Ular bestseller asarligicha qolaveradi. "Martin Iden"ni yoqtirmagan bo'lsam, "Buyuk Getsbi"ni yoqtirganman, Dostoyevskiydan oʻqimagan bo'lsam, Remarkni qayta-qayta oʻqiganman. Aytmoqchi bo'lganim, kitob haqida hammada har xil "did" mavjud. Ba’zilar ehtimol mening boshlang'ich darajamdadir va balki ular uchun turk adabiyoti qiziqroq, soddaroqdir. Ushbu asarlardan hech narsa ololmas ehtimol ular, hech bo'lmasa to'g'ri yozishni o'rganishadi. Vaqti kelib, solishtirish bosqichiga yetishganda, o'zlari xohlab "bestseller"larni mutolaa qilishar balki.

Aytmoqchi bo'lganim, insonni qanday kitob o'qiyotganiga ko'ra tanqidga olmaslik kerak. Dostoyevskiygacha hali bordir ularga, ehtimol. Balki menga o'xshab shunchaki yoqtirishmas. Fikrlarimni qanchalik yetkazib bera oldim bilmayman, muhimi nimani o'qish emas, nimadir o'qish va o'ziga kerakli bo'lgan nimanidir asarning ichidan ola bilish. Va endi kitob o'qishni boshlagan yangi kitobxonlarni kitob o'qigani uchun tanqid ostiga olmaslik kerak.

P.s: hozir esa o'zimning eng oxirgi ya'ni faqat she'riy kitoblar o'qish bosqichimdaman!💙

Har gal bir bo‘shliq istayman,
hech kimsiz, hech narsasiz bir bo‘shliq.
Keyin, u bo‘shliqni to‘ldirmoq istayman...

Ekranlarni to‘ldirib, baxt va baxtsizlik, ishqsizlik oqibatlari haqida gapiraman...
Qaytayotib, taksiga o‘tirib kulaman,
O‘zimning ustimdan, albatta...

Ishga boraman,
Majlislarda o‘tiradi suvratim.
Cho‘kib borayotganim haqida
eslagisi kelmas suvratimning ham...

To‘yga boraman,
Kimning to‘yi edi?
Ketayotib eslashga urinaman.
Boraman, kimning to‘yi ekanining nima farqi bor aslida...
O‘zim baxtga ishonmasamda,
baxt tilayman,
hammaga jo‘r bo‘lib.
Qo‘llarimni baland ko‘tarib o‘ynayman,
Uchgim, uchib ketgim kelayotganini yashiraman o‘zimcha.

O‘zimcha,
allaqachonlar sevganlarim yodidan o‘chganimni,
Endi avvalgidek sevilmasligimni,
Hech qachon hech kimga suyana olmaganimni,
Va o‘z taqdirimni yashamayotganimni,
Aslida taqdirim yo‘q ekanini,
Yolg‘izlik hammasidan yaxshiligini,
Hamma-hammasini yashirmoqchi bo‘laman.

Baxtli ayollar raqsga tusholmaydilar, ishoning!
Meni to‘yingizga ayting,
Raqsga tushib beraman.

💙Guljamol Asqarova

Ikkimiz
Bir-birimizga
Shunchalik o‘xshash edikki,
Agar farzandimiz bo‘lsa
Va undan so‘rashsa:
Kimga o‘xshaysan, deb
U qiynalmay:
Ikkisiga, ular zotan
Bir-biriga o‘xshash edi, deb
javob bergan
Bo‘lardi...

💙Ahmad Ali

Oliy ma'lumot, to'rtta chop etilgan kitob, yuzlab maqolalar, lekin haligacha o'qiganda xato qilaman.
Sen "Xayrli tong" deb yozasan, men esa "Men sizni sevaman" deb o'qiyman.

🥥Mahmud Darvish