Men o‘limdan qo‘rqmayman, axir,
Har qadamim tahlika, urush.
Biroq mingta o‘limdan og‘ir
Sizni boshqa birovga berish

©️Joʻrabek Ramazon

Nomi yo‘q tuyg‘ular...
Ajib bir savdo,
Hayrat, ehtiroslar girdobidamiz.
Men Yerman, va yoki Oydirman, balki,
Siz esa mutlaqo boshqa bir Yulduz.

Mening o‘z o‘qim bor, aylanishim shart,
Siz ham boshqa bir sayyora sodiq yo‘ldoshi.
Faqat kuydirmoqda ikkalamizni,
Bitta Koinotning bitta Quyoshi!

Bizning oramizda million chaqirim,
Abad ayrolikda yashamoq qismat.
Bir qadam siljisak muqarrar o‘lim,
Bizlar birlashgan kun so‘zsiz Qiyomat.

Ikki musofirmiz ikki vatanda
Menda tun, sizdachi tonglar otibdi.
Siz Bahor labidan bol tatiganda,
Mening muzliklarim erib yotibdi...

Falak qonunlarin buzmaylik, keling,
Koinot sirlari sirlikcha qolsin.
Minglab masofada ikkalamizga,
Mangu yonib yashash muborak bo‘lsin!

©️Malika Tavfiq

Tark etmoq xayoli naqadar jozib,
Qalbni uyg’oq tutar bu xil ishtiyoq.
Yillarni yashadim aqldan ozib,
Men qora odamman, boshqalar oppoq.

“Ket” deb sado berar har bir hujayram,
Yo’limni buraman, ochaman so’qmoq.
Kimningdir ishqida yongan chog’im ham,
Ayrilmoq istayman, undan ayrilmoq.

Hijrondan tug’ilgan tuyg’u ulkandir,
Ulg’aytsa, ayriliq ulg’aytar ko’proq.
Ba’zida kibrimga bo’laman bandi,
Ba’zida boshimdan sochaman tuproq.

Daraxtga o’xshayman shamolga oshiq,
Fasllar ishqimga qo’shar harorat.
Kun kelar, turg’unlik qiynamas ortiq,
Kun kelar, osmonni quchaman xushbaxt.

Dardga toqat qilar yuragim – sabiy,
Umrimni yasharman hayratga to’lib.
Otamdan, onamdan ketganim kabi,
Dunyodan ketarman suyukli bo’lib.

Ungacha tark etmoq xayoli g’olib,
Ungacha umrimni qurshaydi farah,
Ungacha men uni sevaman yonib,
Ungacha shamolga aylanar daraxt.

©️MehrNoz

Bulutlar kiftida etdim sayohat,
Osmondan yergacha yo‘lni taradim.
Uchib derazangga yetdim nihoyat,
Men – yomg‘ir! Qaragin, jonim, qaragin!
Derazangni chertdim – berilib chaldi
Kuzning bayotini ho‘l barmoqlarim.
Kuzak – g‘am yaratar bahaybat cholg‘u,
Gulxanida yondi, voh, oyoqlarim.
Derazangni cherdim. G‘ussalaring mo‘l –
Seni asragaylar dunyodan uzib.
Tashqariga qara, yonoqlari ho‘l –
Oynaga yuz bosmish sog‘ingchning yuzi.
To‘rt devor ichinda mendan mosuvo,
Yashaysan bir sirni yurakka yutib:
Mendan yashirinding shift tagiga, o –
Derazaga hayron pardalar tutib.
Tashqariga qara! Tengman tuproqqa –
Hijron bilan og‘ir bahslarga tushdim.
Samoni unutdim – keldim so‘roqlab –
Qanday osmonlardan pastlarga tushdim!
Meni eshitmaslik mumkinmas... Oxir
Eshiging ochildi – ko‘rdim ko‘zingni.
Ammo sen junjikib, entikib og‘ir
Soyabon tagiga olding o‘zingni.
Sen meni sevmaysan... Yomg‘irman nochor –
Soyabon sathida bekor urindim.
Goho etagingga yetdim beozor,
Goho etigingga bebaxt surindim.
Sening liboslaring qanday chiroyli,
Ufurar bo‘yningda qanday atirlar:
Borasan – go‘yoki bir go‘zal oyni
Avaylab chulg‘amish harir abrlar.
Yozlik surgunimda – dillarim pora –
Sog‘indim men seni – yuragim taqir.
So‘ra, mayda qolgan maysadan so‘ra –
Men ham yomon yomg‘ir emasdim, axir.
Endi kuz sevgimni soldi qo‘shiqqa,
Hajringda vujudim tobora ravshan...
Manzilga yetasan. Nogoh eshikda
Meni soyabondan silkib tashlaysan.
Seni ostonada quchadi birov.
Gul kabi hidlaydi seni – to‘ymaydi.
Yog‘aman, yog‘aman – ravishim yig‘lov –
Bundan ketay desam sog‘inch qo‘ymaydi.
Ko‘chada izg‘irin bo‘ldi alaming!
Olam – g‘aming to‘la bir baytulxazan.
Derazani tutdi tumanli tanim,
Derazani chertdim:
– Seni sevaman!
Oq uchqun tanimni o‘tdi oralab,
Muzlagan labimga biri qo‘ndi jim:
Taqdir shu kechda yetdi oralab –
Fojea yetishdi chog‘i, sevgilim!
Umrim tugayapti – yo‘qdir daraging,
Sensiz vujudimda qancha toqat bor?
...Tongda derazani ochding. Qarading –
Tashqarida qordir, tashqarida qor....

©️Usmon Azim

1
O‘zingni qaraysan nigohlarimdan,
topdingmi,
topmading...
bilmadim, bu sir.
"Men seni sevaman!" dedim va qayta,
meni erinmasdan yaratdi taqdir.
Lablarimdan portlab chiqqan har so‘zdan,
izlading o‘zingni, shuncha so‘z kammi?
"Ha, borsan, sen borsan, yolg‘iz sen borsan,
bormiding, bormisan, bor bo‘lasanmi?!"
Seni hafa qildim, ma'zur tut endi,
yomonman, bo‘lmasmi tilimni tiysam.
Baxt ufurgan she’rlar men haqdami, deb,
she’rlarimni qayta-qayta o‘qiysan...
O‘zingni qidirding, toldingmi, afsus,
savollar miyangga sanchiladi - o‘q.
Har yerdan izlading o‘zingni, nega,
hamon yuragimdan izlaganing yo‘q?!

2
Qo‘llaring qaltirar, pichirlar labing,
to‘kilib ketadi tuyg‘ular mayda.
So‘ng qayrilib mahzun qaraysan,
endi
xuddi qaytib kelmaydiganday...
Biroz ezilganman, unut bo‘ladi,
barchasi singgadi faqat shu she’rga.
Hech neni o‘ylama, qiyomat qadar,
Biz birga,
biz birga,
biz birga...
Tinchman, mendan olma aslo xavotir,
o‘zingni asragin, joningni sog‘ tut.
Mayli, meni bunda sevmasang, sevma,
ammo uni butunlay unut...
Meni kechir, faqat seni sevaman,
xotirjam bo‘l sevgim, xotira - raqib.
She’r meni qiynadi...
Bo‘ldi, yetar, bas,
bir parcha qiynoqni tashlayman yoqib...

©️Rahmat Bobojon

Qaysidir inson seni uch kun ichida yaqindan bilib oladi. Yillar davomida yoningda yashagan odam esa yoqtirgan rangingni bilmasligi ham mumkin.

©️Remark

Siz tomonda qor
Yog‘ayotganmish...
Chiroylidir, oppoqdir yo‘llar?
Qorxatlarni yozayotganmish,
Ko‘rishmoqqa mushtoq ko‘ngillar.

Sog‘insangiz shivirlang sekin,
Sevaman deb bir maktub yozing...
Derazaga bir "kuh" deng, keyin,
"Yurakcha"ning rasmini chizing.

O‘rtasidan o‘q tortmang faqat,
Rahm qiling, mushtdek yurakka.
Bir bo‘lakka ismingiz yozing,
Mening ismim boshqa bo‘lakka.

Sovuq bo‘lsa chiqmang ko‘chaga,
Qo‘lqopingiz yo‘qdir bilaman.
Siz tomonga yo‘llarim tushsa,
Bir juft qo‘lqop sovg‘a qilaman.

Bizga hamroh shirin xayol va
Achchiq kofe, ikki dona qand.
Buncha olis yaralgan, ey voh,
Siz tomon va ko‘hna Samarqand..

©️

Unutib borasan ismimni sekin
Eshitmaysan yurak urishlarimni
Ertaga
mabodo yoʻqolib qolsam
Qaydan topmoqchisan kulishlarimni?

Roʻyolarga singib boraman jonim,
Koʻzlaringni yumsang, koʻzlarim tirik.
Bilmadim, chamamda hech qaysi oshiq
Tushlarda yashashni bilmasa kerak.

Anglaganim:
Sevgi birga boʻlishmas,
Va yoki diydorga, ishqqa toʻyishing.
Sevgi — unutmaslik,
Sevgi bir kuni :
Qizingga ismimni qoʻyib qoʻyishing…

©️DI

Uyg‘onib ketaman yarim kechasi,
Yulduzlar uyg‘onar, ko‘z ochar o‘lim.
Sizni qo‘msamayman, lekin negadir
Sochingizni qo‘msab yulqinar qo‘lim,

Uyg‘onib ketaman yarim kechasi,
Tars-tars yoriladi tashna tomog‘im.
Sizga borgim kelmas, lekin negadir
Ko‘changizni izlab borar oyog‘im.

Uyg‘onib ketaman yarim kechasi.
Tun. Aflok jonimga bermagay to‘zim.
Sizni ko‘rgim kelmas, lekin negadir
Bir ko‘ray deb yum-yum yig‘laydir ko‘zim.

Uyg‘onib ketaman yarim kechasi,
O‘z dilim o‘zimga o‘tkazar zulm.
Mening aytgim kelmas, lekin negadir
Ismingizga do‘nib borgaydir tilim.

Qovjirab-qovjirab qulog‘im yonar,
To‘g‘onday buzilib ketar lablarim.
Siz g‘oyat baxtdorsiz meni unutib,
Sizga eshitilmas yolg‘on gaplarim.

Uyg‘onib ketaman yarim kechasi,
Burkanib shuhrat-u shonu sharafga
Menga kerakmassiz...
Sizni sog‘inib,
To‘rt mucham ketadi to‘rtta tarafga.

©️Salim Ashur

Qimmat tushdi seni sevmoqlik,
Sening bilan yolg‘izman, biram...
Sening bilan mushkul kulmoqlik,
Haqqim yo‘qdir yig‘lamoqqa ham!..

©️Farida Afro‘z

Osmon – ulkan ko’zgu.
Sindi nogahon –
mayda va sanoqsiz shisha qoldig’i
boshimizga yog’di qitirlab.
Besh battar qon qildim bag’rimni shu tob
seni xotirlab…

Men bir xayol edim
qush ham yetmagan.
Kelding – chaqmoq urdi oppoq xayolni.
Norasida edim–ko’zimni ochding,
tug’dirding sevgini, ishqni, savolni…

Savollar ulg’aydi, sevgilar o’sdi,
tobora kichraydim, tomchiga do’ndim.
oshiqdek yashashga kuch-chidam qayda,
ma’shuq bo’lmoqlikka qolmadi quntim.

Men olov yasabman tuyg’ularimdan,
Seskandim– nigohing naqadar sovuq.
Yomg’irdan go’zalroq hislarim bilan
senga singmoqchiydim– arziganing yo’q…

Osmon– ulkan ko’zgu. Sindi, yaxshiyam…

©️MehrNoz

Nahotki unutding,
Ko'nding bariga?
Meni eslatsalar yonmasmi iching?
Yuragim — tanamning devorlariga
O'zing yopishtirib ketgan maktubing.

Unda rozlaring bor, toshbitiklarga
bitilgan o'tmishday qadim va sirli.
Meni arzitmading muhabbatingga
Azizim, ne topding endi arzirli?!

Yuragim — maktubdir, sening maktubing.
Yondirsam yurakdan bo'laman judo.
Sensiz hech o'tmaydi kunim deganding
Azizim, kunlarning egasi — xudo.

Agarda bizniki bo'lsaydi kunlar,
Agarda boshqara bilsaydik uni,
Azizim, kunlarning ichidan, albat,
Yulib otar edim sen ketgan kunni.

©️Gulrux Xudoyorova