Уашингтондағы конференцияда сөз сөйлеген ҚР СІМ бастығы Ермек Көшербаев бүйдеді:

- АҚШ Геологиялық барлауы тізіміндегі ең қажетті деген 60 түрлі сирек металлдың кемі 20-сы біздің Қазақстанда бар, - деді.

О, НЕ ДЕЙДІ ТАҒЫ?!

Бүгін Белбасы Лукашенко Қазақстан Мәжілісінің төрағасы Ерлан Қошановты қабылдапты. Сол отырыста:

- Сіздер өз елдеріңізде Конституция жазып жатқандарыңызды білеміз. Егер көмек керек болса, біз көмектесуге дайынбыз. Бізде де мықты заңгерлер бар, - депті.

Апам марқұм: "Көкем, айналайындар, біреуге пайдаларың тимесе қойсын, кесірлерің тимесінші", - деп.

Тура сол сөзді Қошанов мырза Белбасыға дипломатия мәдениетімен айтып кетті деп сенеміз...

ҚАЙДА ЖҮРСЕ ДЕ КЕСІР

The Financial Times гәзеті: "Ресеймен тікелей байланысты хакерлер Италиядағы Олимпиада ойындарының инфрақұрылымына шабуыл жасады", - деп жазады.

Ресеймен тікелей байланысы бар "NoName 057" дейтін хакерлік топ Милан мен Кортинадағы Қысқы Олимпиада ойындарының сайттары мен қонақ үйлердің сайттарына DDoS шабуыл жасаған.

Бұл туралы Италияның СІМ бастығы Антонио Таяни айтты. Оның айтуынша, хакерлер Италия СІМ-і мен Уашингтондағы Италия елшілігінің сайттарына да шабуыл жасаған.

Алматыда 2029 жылғы қысқы Азия ойындары өтеді...

2026 жылғы Олимпиаданы қабылдайтын қалалардың бірі Миланда 2029 жылғы қысқы Азия ойындарын Алматыда өткізу туралы келісімге ресми қол қою рәсімі өтті.

Келісімге Қазақстанның Ұлттық Олимпиада комитеті мен Азия Олимпиадалық кеңесі қол қойды.

ТРАМП және ЖҰМАҚ

АҚШ президенті Трамп бүгін бүйдеді:

- Мынау The New York Times гәзеті бас бетіне: "Дональд Трамп өз өмірі мен өмірінің мәніне күмәндана ма?" деп мақала жариялапты.

Шын мәнінде мен өзімнің жұмаққа кіретініме бек сенемін. Мен ең кіршіксіз үміткер емеспін, әрине. Бірақ, мен көп жақсы істер жасадым деп есептеймін, - дейді.

- Жалпы Құдайға сенетін адам қалай демократтарға дауыс береді, осы? Мен осыны түсіне алмай-ақ қойдым, - дейді.

💥Трамп та қызды-қыздымен сойып қалатын адам ғой…

Бүгін бүйдеп жазды: “Мен үш бірдей ядролық соғыстың алдын алдым. Үндістан мен Пәкістан арасындағы, Иран мен Израиль арасындағы және Ресей мен Украина арасындағы ядролық қақтығысты болдырмадым”, - деді.

Алғашқы екеуіне қатысты айтқанын қиып-қиып қисынға келтіруге болар. Ал Украинада 1996 жылдан бері Ядролық қару жоқ емес пе?! АҚШ пен Ресейдің өздері кепілдік беріп, Будапешт келісімі арқылы Украина өзіндегі ядролық қаруды Ресейге тапсырып бергенін 79-дағы Трамп ұмытып қалған-ау)

Қазақстанда Конституция төңірегіндегі әңгіме қағаз жүзінде қалып қойған жоқ — ол нақты қоғамдық талқылауға шықты.

Қазақстанның Азаматтық альянсы «ҰСТАНЫМ» ұлттық пікірталас клубында «Конституция – Қазақстанның тарихи таңдауының айнасы» деген атаумен маңызды отырыс өткізді. Бұл — кезекті жиын емес, елдің ертеңіне тікелей әсер ететін реформаларға азаматтық қоғамның өз сөзін айтуы.

20 өңірден келген азаматтық альянстардың көшбасшылары, ҮЕҰ өкілдері, Қоғамдық кеңес мүшелері, сарапшылар бір алаңда бас қосты. Бір сұрақтың айналасында: Конституциялық өзгерістер қалай жүзеге асады, қоғам бұл үдеріске қалай ықпал етеді?

Талқылау ашық болды. Өткір болды. Ең бастысы — формализмсіз өтті. Азаматтық қоғам реформаларды сырттай бақылаушы емес, оның белсенді қатысушысы болуы керек деген ұстаным нақты айтылды. Мемлекеттік органдармен диалог, қоғамдық бақылау, ұсыныстардың ескерілуі — бәрі күн тәртібіне шықты.

Отырыс қорытындысында Қазақстанның Азаматтық альянсы конституциялық реформаны ресми түрде қолдайтынын мәлімдеді. Бұл — саяси жүйені жаңғыртуға, билік пен қоғам арасындағы тепе-теңдікті қайта құруға жасалған саналы қадам ретінде бағаланды.

Қысқасы, Конституция жай ғана заң емес екені тағы бір дәлелденді. Ол — елдің тарихи таңдауы. Ал сол таңдауға қоғам үн қоса бастады. Міне, дәл осы — нағыз өзгерістің белгісі деп санасақ болады.

https://t.me/civilalliancekz/6200

САУАП

Нұрлан Сабуров дейтін әзілкеш жігіт бар. Ұлты - қазақ. Тілі - ресейлік. Ресейде нәпақа тауып жүрген жігіт. Үй-жайы, дүние-мүлкі сол Ресейде.

Ресейлік БАҚ бүгін ұлардай шулап: "Сабуровқа Ресейге кіруге 50 жылға тыйым салынды", - деп жазып жатыр. Нұрланның Ресейде 60 млн рубльға тең мал-мүлкі қалыпты.

Шешім «ұлттық қауіпсіздік мүддесі үшін», сондай-ақ заң талаптарын сақтауға және «дәстүрлі рухани-адамгершілік құндылықтарды қорғауға» байланысты қабылданған деген болжам бар.

БАҚ-тағы деректерге көз салсақ: Сабуров 6 ақпанда Мәскеуге Дубайдан ұшып жетсе, әуежайдан кіргізбей қойған көрінеді.

Ресейдің қазақтары бізге қаншалықты жақын? Біраз бұрын осы тақырыпта мақала жазған едік.

Ресейде аты танымал сайқымазақ Азамат Мұсағалиев деген бар. Ол Ресейде туып-өскен, солардың астамшылық идеологиясы санасына мықтап сіңіп, әбден зомбиланған адам. Ресейдің толық қанды азаматы. Оны қазақ екен деп босқа арамтер болу адасқандық. Ол қазақ тілінен мүлдем мақұрым.

Осы Мұсағалиев пен Нұрлан Сабуров бір жолы қазақ тілін «курлы-мурлы» деп, ашықтан-ашық мазақ еткені бар. Ресейдегі мол дүниені қимай Сабуров сандалып Ресейде күні бүгінге дейін жүрді...

Ендігі күйі мынау: Бұған бір ғана сөз - САУАП БОПТЫ дейміз...

ГЕНЕРАЛДЫҢ АҚЫРЫ...

Бұл суреттегі РФ Қорғаныс министрлігінің генерал-лейтенанты Владимир Алексеев деген адам.

Бүгін ол таңғы уақытта өз үйінен шығып, қызметтік көлігіне отыра бергенде белгісіз біреу әуелі пышақтап, артынан атып кеткен. Оқиға Мәскеуде, Волоколамскі күре жолының бойында орналасқан үйдің ауласында болған.

Қазір Алексеевтің жағдайы ауыр дейді.

Бұл Украинаның тумасы. Винница облысында туған. 2011 жылдан бері РФ ҚМ Барлау басқармасы бастығының орынбасары болып жүр.

Белгілісі - бұл Алексеев Ресейдегі барлық "еріктілер жасақтарына", оларды құруға және Украинаға қарсы соғысқа жіберуге жауапты адам.

2023 жылы Пригожин бүлігі кезінде Пригожинмен келіссөзге қатыстын да осы Алексеев.

ЕО Ресейге қарсы санкциялардың 20-шы пакетін таныстырды:

Бұл жолы ЕО Ресейдің шикі мұнайын теңіз жолдары арқылы тасымалдауға тыйым салмақ. Сонымен қатар, тағы 43 танкер "қара тізімге" енгізілмек. Сөйтіп, санкцияланған танкерлердің саны 640-қа жетпек.

Иран мен АҚШ келіссөздері сәтсіз өтуде…

Бұл туралы The Wall Street Journal жазады. Басылым дерегінше, Иран өзіндегі уран байыту құқын бөлісуден бас тартқан.

Десе де, Иран СІМ-і Аббас Аракчи: “Келіссөздер жақсы өтті”, - деген еді.

Келіссөздер тағы бірнеше күнге созылмақ…