Йеменнің заңды үкіметі хуситтерге қарсы «Йемен таңы» операциясын бастады...

Йеменнің халықаралық деңгейде танылған заңды үкіметі «Йемен таңы» деп аталатын ауқымды әскери операцияны бастады.

Операция барысында үкімет жасақтары айтарлықтай стратегиялық табыстарға жетіп, Мариб ауданын толықтай өз бақылауына алды, сондай-ақ маңызды инфрақұрылымдық нысан саналатын Дубаб әуежайын басып алды.

Эр-Рияд бастаған коалиция күштері үкімет әскеріне ауқымды әуе қолдауын көрсетіп жатыр.

ЖАПАРОВ ЖӘНЕ ҚОС ГЕНЕРАЛ...

Қырғызстанда 2027 жылдың 27 қаңтарында президент сайлауы өтеді. Қырғыз ОСК-сі өтінімдер қабылдауды бастап кеткен. Бірақ, қазірге дейін бірде-бір ресми өтінім түспеген.

Өтінімдерді қабылдау қарашаның бел ортасына дейін жалғасады (13 қарашаға дейін).

Қазірге президент Садыр Жапаров сайлауға түсетінін ашық айтты.

Онымен қатар, қос бірдей генерал сайлауға түсетіндерін мәлімдеп үлгерді. Олар:

1) Өмірбек Сұбаналиев - Қырғыз ІІМ бұрынғы бастығы. Генерал-майор. Қарағанды ІІМ мектебінің түлегі.

2) Сыймық Жапыкеев - Қырғыз Қаржы полициясының бұрынғы бастығы. Генерал-майор.

Ер-Риядта Саудия, Түркия мен Пәкістанның үшжақты кездесуі өтті…

Онда “Мекке келісімі” бойынша ұжымдық қорғаныс мәселесі күн тәртібіне шығарылып, аймақтағы қазіргі ахуалдарға байланысты Түркия мен Пәкістан Саудия жеріне әскери контингент жіберетін болды.

“Осы үш елдің қай-қайсына да ұжымдық қорғаныс келісімі жүреді”, - деді үш тарап бірлесіп.

‼Редакциядан: Қазіргі таңда Қазақстан армиясын реформалау деген мәселе күн тәртібінде. Президент пәрмен беріп, Қазақстан армиясын реформалау ісі қолға алынды. ҚР Қорғаныс министрлігінің басшылық құрамындағы ауыс-түйістер мен Президенттің: «Біздің армия өткен ғасырда қалып қойған», - деген өткір сыны бұл салаға күрделі өзгерістер қажет екенін айғақтайды.

Осы ретте редакциямызға доғарыстағы полковник, әскери сарапшы Дархан Данияров мырза Қазақстанның әскери авиациясы саласындағы өзгерістер жайлы талдау мақаласын жолдапты. Біздің әскерде қандай ұшақтар бар? Әскери-әуе-транспорттық салада қандай өзгерістер орын алуда? Тап осы мақалада егжей-тегжейлі баяндалады.

⬇Толық: https://abai.kz/post/223808

Теңіз әскерінің бұрынғы басшысы Ниязбеков ұсталды!

Әскери-теңіз күштерінің бұрынғы бас қолбасшысы Қанат Ниязбеков ұсталды.

«ІІМ Әскери-тергеу бөлімшесі Каспий теңізіндегі оқу-жаттығу кезінде әскери қызметшілердің қаза табу фактісі бойынша қозғалған қылмыстық іс шеңберінде қызметке салғырт қарағаны үшін Әскери-теңіз күштерінің бұрынғы бас қолбасшысы, 1-ранжирлі капитанды ұстап, уақытша ұстау оқшаулағышына жапты», – деп хабарлады ҚР ІІМ.

Еске салсақ, Ниязбеков 2025 жылғы 15 тамызда ҚР Қарулы Күштері Әскери-теңіз күштерінің бас қолбасшысы лауазымына тағайындалған болатын, алайда Каспий теңізіндегі оқу-жаттығуда орын алған қайғылы оқиғадан кейін, 2026 жылғы 3 қазанда бұл қызметінен босатылды.

Министр: Қазақстан Ормуздағы жағдайдан пайда көріп отыр!

Соңғы уақытта Таяу Шығыстағы геосаяси жағдайдың ушығуы әлемдік энергетикалық нарыққа айтарлықтай ықпал етуде.

Әсіресе, мұнай тасымалының негізгі күретамыры саналатын Ормуз бұғазы маңындағы шиеленіс қара алтын бағасының шарықтауына түрткі болып, Қазақстан сияқты экспортер елдерге қосымша экономикалық дивидендтер әкелуде.

Қазақстан Республикасының Энергетика вице-министрі Ерлан Ақкенженов Оман сұлтаны Хайсам бен Тарик Әл Саидпен өткен кездесудің кулуарында журналистерге берген сұхбатында қазіргі нарықтық конъюнктураға баға берді.

«Оман туралы айтсақ, біздің мұнай бағыттарымыз қиылыспайды. Десе де, әлемдегі геосаяси ахуал мен Ормуз бұғазы маңындағы жағдай мұнай бағасының өсуіне тікелей ықпал етуде. Әрине, Қазақстан бұдан қосымша пайда көріп отыр, бұл – даусыз факт», – деп атап өтті Ерлан Ақкенженов.

Германия: Ресей КСРО-ны қайта құрғысы келеді!

Германия СІМ басшысы Ресей КСРО шекарасын қалпына келтіруге ұмтылады деп есептейді.

Йоханн Вадефуль Путиннің КСРО-ның ыдырауын «XX ғасырдағы ең үлкен апат» деп атағанын, сондықтан бұрынғы шекараларды қайтадан қалпына келтіргісі келетінін мәлімдеді.

Министрдің пікірінше, бұл жерде сөз ең алдымен Украина, Грузия, Молдова және Балтық жағалауы елдері туралы болып отыр.

Қара теңізде Румыния жағалауына таяу жерде шетелдік жүк кемесі шабуылға ұшырады. Салдарынан оның капитаны – Әзербайжан азаматы қаза тапты. Бұл туралы Әзербайжан Сыртқы істер министрлігі хабарлады.

БАҚ бұл кемеге Ресей шабуыл жасағанын жазды...

Қазақстанда 16 жасқа толмаған балалардың әлеуметтік желідегі аккаунттары бұғатталуы мүмкін!

Дәл солай. Қазақстан билігі 16 жасқа дейінгі жасөспірімдердің әлеуметтік желілердегі әрекеттегі аккаунттарын уақытша тоқтата тұру мәселесі қарастырылып жатыр. Бұл туралы Премьер-министр Олжас Бектеновтің өзі мәлімдеді.

Бектеновтің айтуынша, заңнамаға тиісті түзетулер әзірленіп, қазіргі уақытта депутаттардың қарауына ұсынылған. Заң қабылданғаннан кейін пайдаланушылардың жасын растаудың арнайы ережелері әзірленеді. Бұл іске Мәдениет және ақпарат министрлігі мен Жасанды интеллект және цифрлық даму министрлігі жауапты болады.

Ал енді жасты анықтау қалай жүзеге асады дегенге келсек:

Біріншіден - ЖИ мүмкіндіктері кеңінен қолданылмақ.

Сосын - Face ID технологиясына ұқсас биометриялық аутентификация әдістері жасалады.

Тұздық: Есімізде, ол кезде Жұлдыз Сүлейменова Мәжілісте депутат еді (қазіргі Оқу-ағарту министрі).

«Мен ұстаз ретінде, ана ретінде, депутат ретінде айтамын – мемлекет пен қоғам әлеуметтік желілер мен мессенджерлерден таралып жатқан ақпаратқа бақылауды күшейтуін талап етуі керек деп санаймын. Таралып жатқан заңсыз, зиянды, бүлдіршіндердің санасын улайтын жүктемелерге бақылауды оқыс күшейтуді қатаң талап ету керек», - деп дабыл қағып, балалардың әлеуметтік желі қолдануын шектеуді талап еткен.

Бұл 2024 жыл еді. Сол жылы «Көк Кит» деген пәле шығып, жасөспірімдердің өз-өзіне қол салуы көп тіркелді.

Әрірек барайық, 2016 жыл. Қазақстанда мектеп жасындағы 31 247 баланың «ВКонтакте» әлеуметтік желісіндегі порнографиялық мазмұндағы парақшаларға тіркелгені туралы ақпарат шықты.

Балаларымыздың психологиясын, рухани болмысын улап, бұзып жатқан әлеуметтік желінің кесірі туралы сол кезде «Білесізбе, «вконтакте» балаңызды «бұзып» бітті?!» деген мақала жазған едім...

50 миллиондық аудиторияны жаулап алу үшін радиоға 38, телеарнаға 13 жыл қажет болса, ғаламтор аталған межені төрт-ақ сағатта бағындырады екен. Біз болсақ, балаларымыздың төрт-ақ сағатта дүниені дүрбелеңге салып, асты-үстіне түсіретін сол ғаламторды игергеніне мәзбіз. Олар өрмекшінің торындай шырмалған интернеттен нені тамашалап, нені көріп жүр? Осы сұраққа жауап іздеп көрдік пе? Жауабын тапсаңыз жаға ұстайсыз. Анығы - дабыл қағар едіңіз, бірден.

Адамзат қоғамы жаңа ғасырдың табалдырығын аттаған бетте ғаламтор дәуірінің құрығына ілінді. Соңғы жылдары интернет әлемі үлкендер ғана емес жасөспірімдер үшін де өте қол жетімді болып қалды. 2000 жылдан кейін туған жастар мен жасөспірімдерді инетернеттің «табиғи тұрғындары» деуге де болады. Ғаламтор жалпыласқан ортада туып-өскен бүгінгі ұрпақ компьютер мен смартфондардың құлына айналды.

Мектеп оқушылары күнделікті білім алу, үй тапсырмасын орындау, материал іздеуде инернет желісінен қол үзе алмайтын дәрежеге жетті. Статистика бойынша бүгінде мектеп оқушыларына интернеттің қол жетімділігі 60-70%-ға дейін жеткен.

Қазіргі таңда оқушыларды ата-аналары мен мектептің бақылауда ұстап отыруы мүмкін емес. Осыдан барып ғаламтор әлеміндегі екі тізгін бір шылбыр өз қолына тиген оқушы қолындағы смартфоннан жасына лайық емес ақпараттар алып, лас әлемнің құйына батуда. Жасөспірімдердің бұрыс жолға бет бұруына біздің елде еш шектеусіз жұмыс істейтін түрлі әлеуметтік желілер де әсер етуде. Бұл да дау тудырмайтын сөз.

Ендеше, 16 жасқа дейінгі шектеу аса қажет шара деп есептеймін!

Нұргелді Әбдіғаниұлы