#hikoya

Hali yoz uzoq, hikoyalar ham koʻp. Demak, chellenjimiz davom etadi.

Bugun oʻzbek adabiyotiga yuzlanamiz. Zamonaviy nasrimizning ulkan namoyandasi Nazar Eshonqul qalamiga mansub “Qoʻl” hikoyasi mutolaa uchun tanlandi.

Mening nazdimda, bu hikoyaning tagidagi maʼno siyosat bilan bogʻliqday. Ammo sizning taassurotingiz ham qiziq. Shunday ekan, oʻqing, mulohaza qiling va albatta oʻz fikringizni biz bilan baham koʻring.

Marhamat, hikoya havolasi:
👉🏿 https://ziyouz.uz/ozbek-nasri/nazar-eshonqul/nazar-eshonqul-qol-hikoya/

@usmonosphere

#vakansiya

🎨 Isteʼdodli rassom-illyustrator qidirilmoqda!

Doʻstlar, nashriyotimizga yaxshi rassom kerak. Biz kitoblarga bir-biridan chiroyli, rang-barang illyustratsiyalar chiza oladigan rassom qidiryapmiz!

Agar oʻziga ishongan, ijodkor illyustrator boʻlsangiz, biz bilan bogʻlaning va chizgan asarlaringizdan namunalar yuboring.

Yoki bu xabarni illyustrator tanishingizga joʻnatib qoʻying.

💰 Nomzodlar @otabek2198 ga murojaat qilishlari soʻraladi.

P.S: illyustratsiyalarni raqamli tarzda, planshetda chizishingiz kerak boʻladi :)

@usmonosphere

​#ajabtovur

🐈 Adabiyot olamida mashhur mushuklar

Badiiy asarning obyekti faqat inson boʻlmaydi. Koʻpincha mushuk, it, ot va hokazo hayvonlar ham asarda asosiy rol oʻynashi tabiiy. Bugun sizlarni jahon adabiyotida mashhur mushuk obrazlari bilan tanishtiraman.

Cheshir mushugi ​​— Lyuis Kerollning “Alisa moʻjizalar mamlakatida” asari qahramoni, ulkan ola mushuk.

Minush ​​— Anni Shmidtning “Mushuklar malikasi Minush” asari bosh qahramoni, u xonaki mushukdan inson qiyofasiga oʻtib qoladi.

Begemot ​​— ulugʻ adib Mixail Bulgakovning “Usta va Margarita” asaridagi mushuk personaji. “Dostoyevskiy abadiy!” jumlasi unga tegishli.

Mimi ​​— Murakamining “Kafka sohilda” asaridagi xonaki siam mushugi. Asar davomida u Kavamura va Nakataning oʻrtasida tilmochlik qiladi.

Jiji ​​— yapon adibasi Eiko Kadono qalamiga mansub “Kikining eltuv xizmati” asaridagi mushuk obrazi. Ushbu asar asosida anime ham olingan.

Pluton ​​— Edgar Poning “Qora mushuk” hikoyasidagi eponimik qahramon. Garchi asar avvalida Pluton neytral qahramon sifatida gavdalansa-da, roviy piyonistaga aylangach, mushuk uning koʻziga antogonist sifatida gavdalanadi.

Umuman olganda, jahon adabiyotida mushuk obrazi qatnashgan asarlar talaygina. J. Joys (“Mushuklar va iblislar”, “Kopengagen mushuklari”), E. Heminguey (“Yomgʻirda qolgan mushuk”), T. Kapot (“Tiffaninikida nonushta”), Dr. Syuss (“Shlyapali mushuk”) kabi koʻplab ijodkorlarning ham asarlarida mushuklar obrazi uchraydi. Qolaversa, T.S. Eliotning “Old Possum's Book of Practical Cats” nomli asarida ham bir necha mushuklar bilan tanishib olsangiz boʻladi.

Mavzuga doir: ilgari ham mushuksevar kitobxonlar uchun post qoʻygan ekanman.

@usmonosphere

#donat

Aytgancha, kecha oyning 11-sanasi, yaʼni Usmonipni qoʻllab-quvvatlash kuni edi. Qariyb oʻzimning ham esimdan chiqibdi, hozir qarasam sirli obunachilarimdan biri eslatib, donat ham qilibdi.

Katta rahmat, juda xursand boʻldim. Donat qilish sanasini eslab qoladigan va kartasidagi oxirgi pulini ham tortiq qiladigan doʻstlarim borligidan mamnunman.

Siz ham Usmonipni ruhan, maʼnan va moddiyan qoʻllashingiz mumkin:
👉🏿 8600570466868337
👉🏿 https://tirikchilik.uz/usmonip

P.S: moddiy qoʻllov 100% ixtiyoriy va tushgan donatlar sahifa rivoji uchun sarflanadi.

@usmonosphere

#hikoya

Eh, hikoyalar chellenji boʻladi-yu, Chexovdan oʻqimay boʻlarkanmi? “Hikoya” soʻzi bir joyda “Chexov” familiyasi kelmasa, gunoh-ku!

Mayli, burungʻi aybimiz yuvmoq uchun bugungi mutolaa jarayonida ulkan hikoyanavis Anton Chexov ijodiga yuzlanamiz.

Quyida muallifning menga eng yoqqan “Latta” nomli hikoyasini eʼtiboringizga havola etaman. Oʻqing va albatta oʻz fikrlaringizni bildiring.

Marhamat, hikoya havolasi:
👉🏿 https://ziyouz.uz/jahon-nasri/anton-chexov/anton-chexov-latta-hikoya/

@usmonosphere

Aslida har bir kishi daho! Ammo baliqni daraxtga chiqish qobiliyatiga qarab baholaydigan boʻlsangiz, u butun umr ahmoqligiga ishonib oʻtadi.

Albert Eynshteyn

@sanduvoch_uz

Oʻylab qarasam, imi-jimida yangi avlod inflyuenserlari yetishib chiqyapti ekan. Men tanigan, bilgan kishilar asta-sekin bir necha minglab kuzatuvchiga ega boʻlib boryapti. Shu jumladan, oʻzimda ham hozir 2K dan oshiq auditoriya bor.

Bundan keyin mana shu oʻsib kelayotgan fikr egalari tengdosh yoki kichikroq avlodga maʼlum darajada taʼsir oʻtkazadi. Ortidan ergashtiradi. Bu ham katta masʼuliyat. Buni yelkada koʻtarish ham oson emas.

“Kimnidir tanqid qilsang, oʻrinli tanqid qilishing lozim; kimnidir maqtasang, xolis maqtashing shart. Endi tanish-bilishlaring emas, koʻproq odam seni kuzatadi. Ularning sarflaydigan vaqtini behuda isrof qilish toʻgʻri ish emas...”

Shular haqida bosh qotiryapman. Sizlar bilan eng yaxshi deb topganlarimni boʻlishmoqchiman. Tishim oʻtgan mavzularda (adabiyot, sanʼat, tarjima, tahrir va hokazo) muntazam yozib bormoqchiman. Toki menga ham, sizga ham foydali boʻlsin.

Endi 2 mingta doʻstim borligidan faxrlansam arziydi!

(Foto muallifi: Joau Paulu Koshta)

@usmonosphere

Otashqalb sanʼatkor Ahmet Kayadan eshitsak, kunimiz toʻkis boʻladi :)

@usmonosphere

Yozish boshqacha zavqli. U xoh reklama matni boʻlsin, xoh sheʼr, xoh maqola. Marhamat, maza qilib yozgan yangi tahlilimni maza qilib oʻqing

Kuchli isyonga vazmin ifoda...

...Ahamiyatli jihati bu sheʼr nihoyalanayotgan muhabbat haqida. Ikki oshiqning xayrlashuvi va ayriliqning boshlanishi haqida. Lekin sheʼrda na muhabbat, na ayriliq soʻzi ishlatilgan. Sheʼrni birinchi marta oʻqigan odam undagi chiroyli manzarani koʻradi, xolos. Lekin soʻzlardagi mahzunlik odamni soʻzlarga chuqurroq kirishga undaydi. Shunda ijodkorning sheʼr yozilayotgan paytidagi kayfiyatini sezgandek boʻlasiz.

Maqolani toʻliq oʻqish: https://telegra.ph/Kuchli-isyonga-vazmin-ifoda-07-14

@kumush_odina

Bugun menga katta ishonch bildirishdi, qanot bagʻishlashdi. Osmon seniki, uch deyishdi.

Endi parvozni baland olsak boʻladi!

@usmonosphere #live

Hozir xayolimda rejalar, gʻoyalar, kanal uchun oʻylangan postlar koʻp. Undan tashqari ham bir nimalarni oʻylayapman.

Ammo bugun biron nima yozishga ulgurolmadim. Mayli, buning oʻrnini gurung bilan qoplaymiz!

Marhamat, tortinmay yozavering :)

@usmonosphere

​#mulohaza

Kechadan beri tarmoqda bukblogerlar va adabiyotshunoslar haqida postlar, raddiyalar, fikrlar aylanib yuribdi. Shu mavzuda men ham fikrlarimni bildirsam degandim.

Avvalo, bukbloger ham, adabiyotshunos ham oʻz zimmasidagi vazifani toʻgʻri bajarsa boʻlgani. Ikkalovi bir-biri bilan poygalashadigan, yoʻlini toʻsadigan, nimadir talashadigan raqib emas.

Men tanigan bukblogerlar aksari diplomi boʻyicha adabiyot yoki filologiya sohalarida oliy tahsil olgan. Aksari boshqa sohalarda oʻqigan, ammo kitobga mehri sabab oʻz fikrlarini ommaga yetkazib boradi.

Adabiyotshunoslar esa (bu yerda haqiqiy ilm egalarini nazarda tutyapman) blog yoki sayt yuritish bilan shugʻullanmaydi xolos. Gazeta va jurnallarda ularning yangi kitoblar haqida fikrlari, tahlillarini koʻrish mumkin. Agar katta adabiyotshunoslar oʻz sahifalarini yuritishsa (yoki kimdir yuritsa) shu vaqtgacha yozgan va bundan keyin yozadigan maqola va tezislari kamida bir yilga yetadigan kontent boʻlishi aniq.

Aslida, adabiyotshunoslarda yetarli auditoriya bor. Masalan, yaqinda Nurboy Jabborov oʻzining telegramdagi blogini ochdi. Koʻp oʻtmay kanalda ikki mingdan oshiq obunachi yigʻildi. Koʻrish mumkinki, ularni kuzatishga, yozganlarini oʻqib borishga ishtiyoqmand auditoriya shundogʻam bor, faqat bir joyga yigʻilmagan xolos.

Endi bu masalani Venn diagrammasi koʻrinishida tasavvur qiling. Bitta dumaloq “adabiyotshunos”, ikkinchi dumaloq “bukbloger” deb nomlansin. Agar adabiyotshunos blog ochib, kitob va kitobga oid turli mavzularda yozib borsa, u ham bukbloger hisoblanadi. Agar bukbloger (deylik, filologiya yoki yondosh sohada oʻqigan boʻlsin) biror kitob haqida yozgan postini kengaytirib, ilmiy tus berib, badiiy tahlil qilib maqola yozsa, u ham adabiyotshunoslikka daʼvo qilishi mumkin.

Ammo adabiyotshunos oʻz nomi bilan adabiyotshunos. Uning ishi kitoblarga chuqurroq, ilmiy tus berib, badiiy tahlil metodlaridan foydalanib xulosalarini yetkazish. Bukbloger oʻz nomi bilan bukbloger, uning ishi oʻqigan kitobi haqida xohlagan formatida subyektuv fikrlarini ifodalash. Ikkalasi ham oʻz vazifasini bajarsa, olam guliston. Toʻgʻri, baʼzi tuzuk-quruq taqriz yozolmaydiganlar ham hozir bukblogerman deydi. Yoki kallasida alif boʻlmasayam ilmiy daraja koʻtarib yurgan, koʻzboylogʻich adabiyotchilar ham topiladi. Shu sababdan umumlashtirib fikr bildirishga qarshiman.

Taʼsir doirasiga kelsak, Salimovning fikrlariga qisman qoʻshilaman. Ammo bugungi oʻquvchini biz ergashtiryapmiz, deyolmayman. Hali bironta tanqidiy post ortidan qaysidir nashriyot yo kitobga boykot eʼlon qilinganini koʻrmadim. Yoki biror ijobiy taqriz sabab qaysidir kitobning yoppasiga sotilib ketgani, qayta-qayta chop etilganini ham koʻrmadim. Taʼsir doiramiz haminqadar xolos. Shu qatorida, qaysidir adabiyotshunosning ham kitobxonlarga katta taʼsir oʻtkazganini koʻrmaganmiz.

Chunki bizni oʻzimiz kabi kitobxonlar kuzatadi. Ular bizning tavsiyamizsiz ham kitob oʻqishni biladi. Hatto kitobni yaxshi farqlaydigan, muntazam mutolaa qiladigan, adabiy bilimlari keng, lekin sahifa yuritmaydigan obunachilarni taniyman.

Biroq umid qilamanki, kelgusida taʼsir doirasi kengayadi. Adabiyotshunoslar keng omma uchun ham koʻproq yoza boshlaydi, bukblogerlar esa yozish koʻnikmalarini yana-da shakllantirib, ommabopdan ilmiy-ommabop darajaga koʻtarilishiga, subyektiv qarashlar bilan cheklanmaydigan qalami oʻtkir tahlilchilarga aylanishadi.

Hozircha esa ikki tomonni bir-biriga qarshi koʻrishdan, biri ikkinchisining oʻrnini egallayapti deyishdan biror naf yoʻq. Hech kim bir-birining dumini bosmayapti va bosmasa ham kerak.

Shohrux Usmonov

@usmonosphere

#ajabtovur

Muqova dizayni degani shunaqa boʻlsa ekan-a? Goʻzalligini qarang!

“Seeing the things” nomli bolalar uchun fotografiya haqidagi kitob ekan. Juda yoqdi menga. Ichida mashhur fotolar jamlangan va ularning oʻziga xosliklari yoritilgan.

Manba: counterprintbooks (#)

@usmonosphere

​#iqtibos

TEXNOLOGIYA HECH VAQO EMAS ​​— Stiv Jobsdan iqtiboslar

• Biznesda ulkan ishlarni hech qachon bir kishi qilmaydi. Bunday ishlar jamoa bilan amalga oshiriladi.

• Hayotda men yoqtiradigan narsalarni pulga chaqib boʻlmaydi. Maʼlumki, barchamizda mavjud eng qimmatbaho narsa bu ​​— vaqt.

• Baʼzida nimadir kashf etarkansiz, albatta, xato qilasiz. Yaxshisi, bu xatolarni tezda tan olish va boshqa kashfiyotlaringizni takomillashtirishda davom etish kerak.

• Qabristonda yotganlar ichida eng boy odam boʻlish men uchun muhim emas. Kechasi uxlashga yotishdan oldin bugun ajoyib ish qildik deya olishim muhim.

• Shunchaki mijozlardan nima xohlashlarini soʻrab, shuni berishga urinish yaramaydi. To siz ular xohlaganini yasaguncha, ular boshqa narsani xohlab qolishadi.

• Odamlar diqqat deganda faqat diqqat qaratishing shart boʻlgan narsaga eʼtiboringni yoʻnaltirish deb tushunadilar. Aslida bu boshqa yuzlab yaxshi gʻoyalaringga diqqatingni qaratmaslik degani.

• Hech kim oʻlishni istamaydi. Hatto jannatga tushishni orzu qiladiganlar ham oʻlishni xohlamaydi. Biroq oʻlim barchamizning soʻnggi umumiy manzilimizdir.

• Texnologiya hech vaqo emas. Muhimi, insonlarga ishonish, ularning iqtidoriga, qoʻllariga biror uskunani tutqazsang, gʻaroyib ishlarni amalga oshirishlariga ishonishdir.

• Oʻylashimcha, pul juda gʻaroyib narsa, chunki u imkoniyatlarni kengaytiradi. Masalan, pul boʻlsa, foydasi tez orada qaytmaydigan gʻoyalarga ham sarmoya kiritish mumkin.

Usmonip tarjimasi

@usmonosphere

Doʻstlar, xabaringiz boʻlsa, City Mallʼda “Jadidlar: Turkistonga maktublar” nomli multimedia koʻrgazmasi boʻlyapti ekan.

Esingizda boʻlsa, kanaldagi obunachilarim bilan yuzma-yuz koʻrishishni reja qilgandim. Mana ajoyib imkoniyat!

Kimlar bormoqchi boʻlsa, izohlar qismiga yozing. Barchaga qulay kunni tanlab, koʻrgazmaga oʻtardik.

Hali bu yuzma-yuz muloqotlarning boshlanishi boʻladi, nasib.

P.S: izohlarda yozish noqulay boʻlsa, @munshaotbot ga yozishingiz mumkin :)

@usmonosphere