Sanduvochning Instagram sahifasi uchun iqtibosli videolar qoʻyishni boshladim. Sizlar ham kirib koʻring, yoqsa layk bosib va obuna boʻlib qoʻyarsiz :)

Havola: https://www.instagram.com/reel/C9swau8o6Gh/?igsh=NXprYzZra3BxeWI2

@usmonosphere × @sanduvoch_uz

​#ajabtovur

🐶 ADABIYOT OLAMIDA MASHHUR ITLAR

O‘tgan gal mushuksevarlarni xursand qilgandik, endi navbat o‘zim kabi kuchuksevarlarga keldi! Adabiyot olamida faqat yoqimtoy mushukchalar emas, vafodor itlarning ham o‘rni bor. Quyida ular bilan birma-bir tanishamiz:

Argus – bu ro‘yxatni aynan Argus bilan boshlamasak bo‘lmaydi, chunki u it obrazlari ichida eng qadimiysi bo‘lsa, ajabmas. U “Odisseya” dostonida bosh qahramon Odisseyning iti va do‘sti bo‘ladi.

“Argus nomli it eshitib ular sasin, quloq chimirdi,
Bosh ko‘tarib; ilgari u Odisseyning ko‘ppagi edi;
Shohning o‘zi boqib katta qilgan bo‘lsa hamki Argusni,
Hech shikorga chiqmagandi. Chunki suzib ketgan edi u…”
(“Odisseya”, Gomer)

Toto – L. Frenk Baum qalamiga mansub “Oz mamlakati sehrgari” asarining kino talqinini deyarli hamma ko‘rgan. Demak, asarda Toto laqabli it ham qatnashganidan xabardorsiz. U kitobga ham, filmga ham o‘ziga xos joziba qo‘shgan obraz hisoblanadi.

Dogmatiks – bu obrazni shunchaki “kuchukcha” nomi bilan eslab qolgan bo‘lishingiz ham mumkin. Lekin uning asl nomi Dogmatiks bo‘lib, Asteriks va Obeliks komikslar turkumining eng asosiy qahramonlaridan biri hamda fransuz bolalar adabiyotidagi eng mashhur kuchuk obrazidir. Ma’lumot uchun, siz multfilmi va filmlarini miriqib ko‘radigan “Asteriks va Obeliks” dastlab komiks sifatida nashr etilgan. Asar mualliflari Rene Gosinni va Albert Uderzo hisoblanadi.

Klifford – 1963-yilda ilk bor nashr etilgan “Klifford – ulkan qizil it” nomli asarda qizaloq Emili Elizabet va uning bahaybat, yunglari qip-qizil iti Kliffordning sarguzashtlari hikoya qilinadi. Avvaliga asar muallifi Norman Briduell itga “Tayni” laqabini bermoqchi bo‘ladi, ammo rafiqasining maslahati sabab bugun amerika bolalar adabiyotida Klifford laqabli qahramon it misli ko‘rilmagan mashhurlikka erishganini ko‘rish mumkin.

Nana – J.M. Barrisning “Piter Pen” asarida ko‘p bor tilga olingan ushbu personaj, ehtimol, ingliz adabiyoti tarixidagi eng mashhur it bo‘lsa, ajabmas.

So‘yloq – “Garri Potter” asarlari turkumidagi Hagridning bahaybat itini eslasangiz kerak-a? Neapolitan mastiff zotiga mansub deya ta’riflangan mazkur ko‘ppak Hagridning sodiq qo‘riqchisi bo‘lgan.

Snupi – aytishlaricha, “Yeryong‘oqlar” (“Peanuts”) asari muallifi Charlz Shults bosh qahramon Charli Braun obrazida o‘zini gavdalantirgan ekan. Snupi obrazi uchun ham bolalikdagi iti Spaykni prototip qilib olgani ajablanarli emas. Asar ilk bor 1950-yil 4-oktyabrda dunyo yuzini ko‘rgan bo‘lsa-da, Snupi hali hamon mashhurlik shohsupasidan tushmay kelayotir.

Kashtanka va Mumu ​​— rus adabiyotining ikki yirik namoyandalari Chexov va Turgenevning hikoyalarida asosiy oʻrin tutgan ikki it. Ularga ortiqcha taʼrif shart emas, menimcha.

Sharik — yana bir buyuk rus adibi Mixail Bulgakovning “Ityurak” asari qahramoni. U asar avvalida it sifatida ishtirok etsa, keyin odamga aylanadi va oʻziga “Poligraf Poligrafovich Sharikov” degan nom tanlab oladi!

O‘zbek adabiyotida ham yuqoridagi kabi obrazlar topiladi. Masalan, Said Ahmadning “Qorako‘z majnun” hikoyasini eslang. Shuningdek, Ma’mura Zohidovaning “Sadoqat” qissasida ham it obrazi asosiy o‘rin tutadi.

P.S: ham adabiyotni, ham itlarni yoqtiradigan tanishingizga yuboring :)

@usmonosphere

#gʻoya

Turib-turib kallamga olamshumul gʻoya kelib qoldi! Bitta dahshat brend ochish kerak.

Mana “Apple” bor, toʻgʻrimi? Toʻgʻri! Gadjetlarlar ishlab chiqaradimi? Chiqaradi! Logotipidagi olma tishlanganmi? Tishlangan!

Demak, “Bite” yoki oʻzbekchasiga “Tishlam” degan brend ochish kerak. U “Apple” mahsulotlariga aksessuarlar, qoʻshimchalar ishlab chiqaradi yoki shunchaki borini sotadi. Logotipida ham oʻsha olmaning oʻzini emas, tishlangan qismini tasvirlash kerak. Goʻyoki bu “Tishlam” “Olma”ning kemtigini toʻldiradi.

Mana zoʻr biznes gʻoya, mana goʻzal neyming. Shartta loyihani boshlab soqqani bosish qoldi xolos.

Hazil hazil bilan-u, lekin kimdir telefon va noutbuklar uchun aksessuarlar sotadigan doʻkon qilmoqchi boʻlsa, bajonidil mana shu gʻoyani boʻlishishim mumkin.

@usmonosphere

Inglizcha kitob (sovgʻa qilsam ham) oʻqiyverasizlarmi?

@usmonosphere

#tanlov

Xullas, qaysidir obunachimga inglizcha kitob sovgʻa qilmoqchiman. Albatta, men uchun har bir obunachim qadrli va teng. Shu sababdan sovgʻani olish uchun qiziq shart oʻylab qoʻydim!

Ertaga soat 17:00 da kanalda adabiyot va kitoblarga oid quiz boʻladi. Xavotir olmang, savol koʻp emas, bitta xolos.

Shartlar esa:
• @usmonosphere va @sanduvoch_uz ga obuna boʻlish;
• berilgan savolga birinchi va aniq javob berish;
• bu xabarni tanish-bilish va hokazolarga yuborish

Demak, ertaga 17:00 da savol joylayman. Eng birinchi va bexato javob yozgan kishi kitobli boʻladi.

(Iltimos, javobingizda imlo xato boʻlsa ham tahrirlamang, tahrirlangan javoblar toʻgʻri deb qabul qilinmaydi)

P.S: kitob qaysiligini aytmayman, sirli boʻlaqolsin :)
P.S.S: eksperiment oʻxshasa, shunday quizlarni koʻpaytiramiz :)

@usmonosphere

#diqqat

Quiz boshlanishiga 10 daqiqa qoldi! Esingizdan chiqmasin-a! Doʻstlaringizga ham ulashing bu xabarni.

@usmonosphere

#quiz

Mashrab Boboyev X ga maktub yozadi. Maktubida M. Boboyev va X ilk bor uchrashishganida, X aktyor boʻlib yurgani aytilgan. Qolaversa, Mashrab Boboyev X ni “Siz adabiyotimizga osmondan tushgansiz” deya taʼriflaydi.

Savol: X kim? (ism-familiyasini yozing)

P.S: javoblaringizni izohlarda qoldiring, tahrirlangan javoblar hisobga olinmaydi.

@usmonosphere

Javob: Sharof Boshbekov.
Gʻolib: Husniya

🔥 Gʻolibni tabriklaymiz!

@usmonosphere

#quiz

Payhon qilar odamni ekin,
tasbih nadur, dalalarning oʻzi biy.
Choʻllar uni quvlab boradi,
yo rabbiy.

Odam ketib borar,
xudolarga yetmaydi dodi.
“X” ga uni yozmoqqa esa
yoʻq ekinning savodi.

Savol: Shoir Faxriyor yuqoridagi sheʼrida X deb nimani aytgan? Ikki soʻzda yozib bering.

@usmonosphere

Javob: Qizil kitob
Gʻolib: Abdurahmon

🔥 Gʻolibni tabriklaymiz!

@usmonosphere

#quiz

Doʻstlar, bugungi savol-javoblarda qatnashgan barchaga rahmat. Gʻoliblar bilan bogʻlandim, yaqin kunlarda kitoblarini yetkizaman.

Nasib qilsa, kelasi hafta yana kviz oʻtkizamiz va yana kitob yutib olishingiz mumkin boʻladi. Ungacha uzoqlashib ketmang, yaqinlaringizniyam safimizga chaqiring.

@usmonosphere

Tarjimon eng avvalo o‘z tilini puxta o‘zlashtirishi kerak. Shunda uning o‘giradigan asarlari asliyatdagi ma’nosini kamroq yo‘qotadi. O‘zining tilini bilmaydigan odam boshqa tillardagi so‘zlarni yo buzib talqin etadi yoki badiiyatdan uzoq so‘zlar bilan tarjima qilinayotgan asarga nisbatan o‘quvchining muhabbatini o‘ldiradi. Yosh, ammo o‘zbek tiliga mahorat bilan tarjima qiladigan tarjimon, muharrir Shohrux Usmonov bilan suhbatlarimizning birida aytilganidek

“zo‘rma-zo‘raki tarjimani muharrir nari-beri asar qiloladi, tushunarli tarjimani yaxshi asar holiga keltiradi, yaxshi tarjimadan esa mukammal asar yana bir tilda yaraladi.”

#hikoya

Hikoya oʻqimay qoʻydik-a orada? Mayli, bugun shu xatoni tuzatamiz. Siz bilan zamonaviy oʻzbek nasrining vakillaridan biri Bobo Ravshan qalamiga mansub “Kalsiy” nomli hikoyasini oʻqiymiz va tahlil qilamiz.

Menimcha, kalsiy hamma narsada, hamma joyda bor. Daraxt barglarida, gulning tikanida, o‘rgimchak va kapalakda – hamma-hammasida. Shuning uchun daraxtlar dovulda sinib ketmaydi, gulning tikani qattiq bo‘ladi, o‘rgimchakning oyoqlari baquvvat, kapalak esa bemalol uchib yuradi. Chunki ularda kalsiy ko‘p. Lekin nega bizda, shalpangquloqda, baqaloqda va shifoxonadagi boshqa bolalarda kam?!

Marhamat, hikoya havolasi:
👉🏿 https://yoshlikjurnali.uz/nasr/kalsiy-hikoya/

@usmonosphere

#ajabtovur

Kecha yoʻlda ketayotib ikkita qariyaning kelin-kuyovlarga oʻxshab yasanib ketayotganini koʻrgandim. Ularni koʻrib qarsak chalsam, menga ergashib hamma olqishladi. Keyin bilsam yonida tasvirchisi ham bor ekan ularning.

Bugun qarasam, bir tanishim video joʻnatgan. Ne koʻz bilan koʻrayki, “tilbizirga chiqib ketippan”...

@usmonosphere

​#mulohaza

Qizlarga qanot bering

Kecha Olimpiada oʻyinlarida Diyora Keldiyorova Oʻzbekiston uchun ilk oltin medalni qoʻlga kiritdi. Hamma bundan xursand, hamma faxrlanib, koʻzlari porlab gapiryapti. Unda oldin esa Rayyona Ibrohimova nemis tili boʻyicha butunjahon olimpiadasida birinchi oʻrinni qoʻlga kiritganidan quvondik.

Tarmoqda Rayyonani ham Diyora kabi ragʻbtlantirish kerak, ilm bilan sport teng boʻlsin, deyapti faollar. Mayli, men ham ilm qadrlanishini istardim.

Lekin bugun boshqa jihat koʻnglim koʻtaryapti. Diyora Keldiyorova oilali ekan. Turmush oʻrtogʻi ham oʻzi kabi sportchi. Ikkovi bir-birini qoʻllab-quvvatlab, qancha yoʻlni birga bosib oʻtgani, mushtarak maqsadlar qoʻyishgani, qiyinchiliklardan birga oʻtishgani juda quvonarli. Umid qilamanki, Olimpiada gʻolibligi oilaning oxirgi yutugʻi boʻlmaydi.

Butun Oʻzbekiston boʻylab qanchadan qancha iqtidorli qizlar oilasining qarshiligi sabab sportni tashlayotgan, kechalari sport anjomlarini quchoqlab pinhona yigʻlayotgan paytda Diyoraning turmush oʻrtogʻi qolganlarga haqiqiy oʻrnak boʻldi.

Rayyona esa hali yosh qizaloq. Minglab tengdoshlari ota-onasi, aka-ukasi yoki jamiyatning bosimlari, taqiqlari yoki moliyaviy tanglik vajidan ilm oʻrganolmayotgan, orzulari asta-sekin sarobga aylanayotgan bir paytda uning yaqinlari har qancha olqishga, mukofot va maqtovlarga loyiq.

Mabodo kimdir rahmat aytmoqchi boʻlsa, rahmatini Diyoraning va Rayyonaning yaqinlariga ham aytsin. Kimdir yangi maqolasi uchun “zamonamiz qahramoni”ni qidirayotgan boʻlsa, ularni eng koʻp qoʻllab-quvvatlagan insonlari haqida yozsin.

Chunki ular qiziga, xotiniga, keliniga, singlisiga imkoniyat berish, ishonch bildirish mumkinligini, qizlarning qanotini qirqmasangiz, ular olis osmonlarni zabt eta olishini amalda koʻrsatishdi. Shaxsan men uchun Diyora, Rayyona va boshqa qizlar qatori ularning ortida turgan suyanchiqlari ham qahramon!

@usmonosphere

Toʻgʻri-da, onasini emsin...

Koʻchalarda mana shunaqa reklama matnlari paydo boʻlibdi. Avvaliga koʻpchilik biroz yoqa ushladi: “Vay toʻba, soʻkinish soʻzniyam reklama taxtasiga yozib chiqadimi?”

Keyin maʼlum boʻlishicha, bu har yili 1-7-avgust kunlari dunyo boʻylab oʻtkaziladigan goʻdaklarni koʻkrak suti bilan boqishni qoʻllab-quvvatlaydigan haftalik doirasida tayyorlangan ekan.

Yaʼni hech kim hech kimni soʻkayotgani yoʻq (aslida, buni soʻkinish deb ham boʻlmaydi), qaytanga toʻgʻri maʼnoda bola oʻz onasini emsin, shoʻrlikni shirkanak qilmanglar, degani ekan.

Matnni kim yozgan bilmadim-u, kopirayterning kallasiga qoyil! Ikkita soʻz bilan ham shov-shuv koʻtardi, ham kerakli messejni yetkazdi, ham xalqqa juda yaqin iboradan unumli foydalandi. Menga qolsa, shu kopirayterni qoʻshimcha taqdirlashsin mutasaddilar.

Onasini emsin!

@usmonosphere