KOʻRGAZMAGA MARHAMAT!!!

Fotografiya/Fotojurnalistikaga befarq boʻlmaganlarni yilning eng oʻziga xos fotokoʻrgazmasiga taklif etamiz.

"Bir maktab – turfa nigoh" nomli ushbu koʻrgazma ʼʼUstoz-Shogirdʼʼ anʼanasiga asoslangan boʻlib, unda fotorassom va fotojurnalist Husniddin Atoning shogirdlari — Dilruh Isomiddinova, Madina A'zam, Xolida Musulmon, Kamron Hasanov, Ezoza Umr, Fazilat Soib, Mumtozbegim, Marvarida Isroil, shuningdek eshitish imkoniyati cheklangan fotosuratchilar— Murod Yusuf, Gulnoza Adham hamda
Mariya Malinovskayalarning turli yoʻnalishdagi sara foto asarlari, shuningdek, Husniddin Atoning Parij 24 Paralimpiya o‘yinlaridagi eng sara asarlari oʻrin olgan.

Fotoko'rgazmada koʻrishguncha.

📆 Sana: 11-dekabr, 2024-yil;
⏰ Vaqt: 17:00 (ochilish marosimi)
📍 Manzil: Toshkent Fotosuratlar uyi.

Lokatsiya!

Barchangizni taklif etamiz!

@Xolida_Musulmon

#tavsiya

Qish ayni kitob mutolaasiga shoʻngʻiydigan fasl. Buning uchun sizga issiqqina oʻrindiq, kitoblar, qahva hamda bukblogerlarning kanallari zarur boʻladi.

Qolgan narsalarni oʻzingiz tashkil qiling, men sizga oxirgisini ilindim:

Bukblogerlarning Telegramdagi sahifalariga ulanib oling

Yil boshida sahifamdagi obunachilarim sonini uch mingtaga yetkizaman, deb niyat qilgandim. Xo‘sh, sizningcha yangi yil kirguncha buning uddasidan chiqamizmi?

Yana olti yuz kishi yetmayapti ekan :)

@usmonosphere

#Nobel

Kecha 10-dekabr kuni 2024-yilgi Nobel mukofoti sovrindorlariga mukofotlar topshirildi.

Bu yilgi nomzodlar va ularning olamshumul ishlari haqida maqola tayyorladim. Oyina saytida oʻqishingiz mumkin:

👉🏿 https://oyina.uz/uz/article/3282

@usmonosphere

#fotografiya

Bugun Toshkent fotolar uyida Husniddin Ato va shogirdlarining “Bir maktab ​​— turfa nigoh” nomli fotokoʻrgazmasi ochildi.

Kamron Hasanov, Xolida Musulmon, Madina Aʼzam, Dilruh Isomiddinova, Eʼzoza Umrzoqova, Fazilat Soib, Murod Yusuf kabi yosh fotograflarning ham ishlari namoyish etildi.

Barcha asarlar orasida Fazilat Soibning “Kelajakka suiqasd” nomli surati koʻproq yoqdi. Avvaliga suratdagi qizchaga uzoq termulib oʻtiribman, qani bu yerda suiqasd deganday. Keyin bilsam, suratning jon tomiri orqa fondagi havoga zahar purkayotgan zavod minorasi ekan. Goʻzal kompozitsiya chiqqan.

Dilruh Isomiddinovaning “Estetika”, “Nuqtayi nazar”, “Hukmdor”; Mumtozbegimning “Sevgi”; Xolida Musulmonning “Bobomning qishlogʻi”; Murod Yusuf olgan qushlar suratlari manzur boʻldi.

Vaqt topsangiz, borib koʻring. Koʻrgazma 18-dekabrgacha davom etadi.

@usmonosphere

#iqtibos

Odamlar nega meni yaxshi koʻrishadi, hayronman. Koʻplariga maʼqul boʻlaman, koʻplari menga mehr qoʻyib qolishadi, biroq yoʻlimiz tezda boshqa-boshqa tomonga burilib ketishidan afsuslanaman.

Gyote, “Yosh Verterning iztiroblari”

@usmonosphere

#tanqid

Hozir “Yosh Verterning iztiroblari” asarini qayta oʻqiyapman. Rosti, ilgari menga u qadar oʻrnashmagan edi bu kitob. Ammo hozir gap bu haqida emas.

Asarning eng boshidanoq imlo xatolari uchraganidan ularni raqamlab ketishni oʻyladim. Avvaliga har nechadir betda bir-ikkita uchrab turgan imlo xatolar suratdagi sahifaga yetganda yomgʻirdan keyin chiqqan qoʻziqorinday urchib ketgan ekan.

Aftidan, kirill yozuvdagi matnni lotinchaga oʻgirishgan va tuzukroq koʻzdan kechirishmagan. Mayli, qaysi nashriyot ekanini aytmayman. Oʻzingiz payqab olarsiz :)

@usmonosphere

🌟 Reverietour bilan xayolingizdagi manzaralarni haqiqatga aylantiring

Sana: 15-dekabr, 2024

🦌 Deer hills (Ertaklardagi Bembini ovqatlantirib, u bilan suratga tushamiz);

🏔 Chimyon (ballon, kvadratsikl, kanatka)

🚠 Amirsoy (Kanatka, snowboarding, ot minish, chang‘i)

Narx o‘z ichiga oladi:
📷 Professional fotosessiya;
🚌 Qulay borib kelish transport xizmati;
💵 Kiyik Fermaga kirish to‘lovi;
🤹🏻‍♂ Quvnoq va energiyaga to’la jamoa

Joylar atiga 22 ta. Shoshiling. Joy band qilish uchun @thewakh ga yozing

...............................................

P.S: turni oʻzimning qadrdon ukam tashkillashtiryapti, narxi ham juda arzon, boringiz, doʻstlar :)

@usmonosphere

​#kundalikdan

Kulgili odam

Meni xo‘mraygan holda ko‘rmaysiz hisobi. Doim jilmayib yuraman. Nuqul og‘zim qulog‘imda. O‘tgan-ketganga kulib gapiraman. Bisyor hazillashaman. Yengilroq, albatta. Me’yorini bilibgina. Suhbatdosh yor-u birodarning kayfiyati ko‘tarilsin deyman. Birovga salbiy taassurot yuqtirgim yo‘q. Odamlar xushchaqchaq va dimog‘i choq yursa ko‘nglim uncha-muncha ko‘tariladi.

Shu sababdan atrofimdagilar meni boqi beg‘am deb o‘ylashadi. Bo‘lsa bordir. Do‘stlarim men bilan gaplashib ruhi ko‘tarilishini aytadi. Ba’zilari esa meni ko‘rganda beixtiyor kulgisi qistashini ta’kidlagan. Qiziq-a? Har gal shunga o‘xshash gapni eshitsam ham xursand, ham hayron bo‘laman. Tavba, nimam kulgili ekan? Yo‘qsa, onam meni hiringlab tug‘magandir, hamma xotinlar qatori dod-voylab tuqqan. Qasamki, bu xil gaplardan biror marta ranjimaganman. Mayli, dunyoga kulgili odamlar ham asqatadi.

Lekin so‘nggi paytlar tirjaygan aft-angorimning salbiy jihatlari birma-bir namoyon bo‘layotir. Deylik, suhbatdoshlar meni jiddiy qabul qilmaydigan, har qaysi gapimni ham yolg‘on-u hazil deb hisoblaydigan odat chiqargan. Birovga yurak yutib gapirsang-u, aytganingni mutoyibaga yo‘yishsa-ya. Ye sadqayi suxan ketgurlar, adolatdanmi shu? Ana endi ko‘rasanlar, dedim ichimda.

Avvaliga iljaygan yuzimga hissiz tus berishga urindim. Yigit kishi vazmin, dag‘al, lablari mudom qimtilgan, qoshlari mardona chimirilgan bo‘lishi lozim, deydi eskilar. Shu eskilar bir nimani bilmasa gapirmas. Afsus, o‘xshamadi. Bu savil basharani har qancha ta’mir etmang, ko‘z o‘lgur sotib qo‘yarkan. Ko‘z kuldimi, lab ham yoyili-i-ib boshlaydi-da, boshqa nima qilsin.

So‘ng aql kirdi. Birovlarning munosabati sabab o‘zimni har ko‘yga solaveramanmi dedim-da, yana avvalgidek shiqshayib yuraverdim. Ammo ba’zi-ba’zida ko‘nglim bir o‘rtanib qo‘yadi. Bo‘ladigan gapni gapirsam ham, “iye, qo‘ysangiz-chi”dan oladiganlar bor. Vey baraka topgur, sizlarga lof aytib kallamda shox chiqarmidi? Yo biror kishi olqishlarmidiki, aldashga buncha ishqiboz bo‘lsam?

Xullas, gapning po‘skallasi shu. Kaminani jiddiy odam o‘rnida ko‘rmaydigan birodarlar, hazilkashlik va jiddiylik bir-biriga zinhor teskari tushunchalar emas. (Axborot o‘rnida: “jiddiy”ning antonimi “bachkana” bo‘ladi!) Men-ku sizni majburlashdan, gapimga ishontirishdan bir chaqirim yiroqman. Muhimi, hayotga qarashim, insonlarga munosabatim, maqsadlarim va tutumimda hazil yo‘q. Biroq ogohlantirib qo‘yganim yaxshi, nazdingizda toabad kuldirgich kimsa bo‘lib qolishni istamayman. Qachondir paymonam to‘ladi. Shunda kim bo‘lsangiz ham ko‘zingizga qarab: “Men sizlarning hayotingizda masxaraboz rolini o‘ynashdan charchadim” deyman-u, shartta sizlarni o‘zimdan itaraman. Zora, nariroqdan boqsangiz jiddiy ko‘rinarman-a?

Hurmat bilan, kulgili Usmonip :)

@usmonosphere