#savod

Hatto prezident boʻlsang ham, xatlaringni imloviy va uslubiy xatolarsiz, oydekkina qilib yozishing kerak, Donald.

Kinoda aytilganidek, bu senga tralleval emas. Yoki Maduroni oʻgʻirlab kelish ham emas.

Yashasin grammafashistlar!

@usmonosphere

#teatr

Toshkent shahridagi davlat teatrlarining fevral oyi uchun tomoshanomasi.

Vaqtingizga qarab boringlar, fevral teatrga tushish uchun eng zoʻr oy!

P.S. tanish-bilishga yuboringiz :)

@usmonosphere

#teatr

Bunisi esa Qoraqalpogʻiston Respublikasi va viloyatlardagi teatrlarning fevral oyi uchun tomoshanomasi.

Hamma teatr Toshkentda deb bahona qilmang, vaqtingizga qarab boravering.

@usmonosphere

​“Har kim oʻz hayotini istagan joyiga tiqishi mumkin” degan aqidamga tayanib, dam olish kunlari “Octagon 84” turniridagi ba’zi janglarni koʻrdim.

Ochiq gapki, men aralash janglar boʻyicha mutaxassis yoki muxlis emasman. Ora-orada ba’zi begona joylarga koʻz tashlagim keb qoladi xolos.

Janglar haqida gapirmayman. Doimgi qonuniyat ishladi: kuchlilar gʻolib chiqdi, kuchsizlar — magʻlub. Lekin diqqatimni boshqa jihat tortdi.

Octagon asosan Markaziy Osiyo hududida mashhur liga. Asosiy jangchilar ham mintaqamiz polvonlari. Oʻzbek, tojik, qozoq va hokazo.

Mabodo birortasiga muxlis boʻlsangiz, xafa boʻlmang-u, kuzatganlarim orasida eng “past soʻrt”lari oʻzimiznikilar ekan. Eng koʻp madaniyatsizlik, ilmsizlik belgilari hamyurtlarimizda uchradi.

Birovi matbuot anjumaniga oʻxshagan suhbatda boʻrillatib kekiradi, yana qoʻshimchasiga, oʻzi toʻgʻri talaffuz qilolmaydigan ruscha soʻzlarni aytib kulgiga qoladimi-yey.

Biri basharasini tirishtirib, qoshlarini zoʻrma-zoʻraki chimirgancha kuchanib raqibining sochini gapiradimi-yey. Yana bittasi janggacha raqibining ustidan masxaralab, alaloqibat yuzi shuvut boʻlib qoladimi-yey.

Xullas, “ispancha uyat” degani gʻirt mana shu boʻladi. Qaytanga tojik, qozoq yoki boshqa millat vakillari juda oʻzini sarishta qilib olgan, til biladigan, sport etikasini tushunadiganday koʻrindi.

Toʻgʻri, biz aytayotganlar professional emas. Aksari Instagramda ishtonchan chiqib “menga jang beringlar” degani ortidan lop etib kelib qolgan. Lekin baribir hamyurtlarim beqiliq maymunday kulgi boʻlayotganiga achindim.

@usmonosphere

Modomiki hech narsa bizni oʻlimdan qutqarib qololmas ekan, hech qursa sevgi bizni yashashdan qutqarib qolishi kerak.

Pablo Neruda, shoir

@usmonosphere

Oliygoh diplomi, toʻrtta kitob, yuzlab maqola, lekin haliyam toʻgʻri oʻqishni bilmayman. Sen “xayrli tong” deb yozasan, men esa “seni sevaman” tarzida oʻqiyman.

Mahmud Darvish, shoir

@usmonosphere

* * *

agar vatan yor bo‘lganida
lablaridan
o‘pardim
ilkis

agar vatan yor bo‘lganida
sochlaridan
silardim
tinsiz

agar vatan yor bo‘lganida
to‘yib-to‘yib
hidlardim
o‘ksiz

agar vatan yor bo‘lganida
fohisha bo‘lib
ketardi
so‘zsiz

Ahror Abdumannon

@usmonosphere

#maslahat

Doʻstim, mana sizga qimmatli maslahat:

Hamma har xil kolleksiya yigʻadi. Kimdir vaqti oʻtib qadr-qiymati oshib boradigan, anchaginaga pullasa boʻladigan buyumlarni toʻplashga ishqivoz. Yana kimdir kelajakda narxi oʻsmasa ham, oʻziga yoqadigan narsalarni yigʻishdan maza qiladi.

Oxirgi paytda oʻylab qoldim. Agar imkoningiz boʻlsa, kitob kolleksiya qiling. Oʻqiysizmi, yoʻqmi baribir — olib bir chetga qoʻyavering. Muallif yo tarjimon dastxati bilan yigʻsangiz, yanayam zap ish boʻladi.

Kelajakda qaysidir bitta kitobni qimmatga sotib yuborsangiz, boshqalarining puli qaytganday boʻladi.

Masalan, talabalik yillarim kitob savdosi bilan shugʻullanardim. A. Oripov, E. Vohidov, U. Azim va hokazo shoir-yozuvchilarning eski kitoblari uchun xohlagan narxni toʻlashga tayyor odamlar boʻlardi. Shaxsiy haydovchilarini ijara uyim eshigigacha yuborishardi oʻsha kitoblar uchun.

Hatto bir noyob kitobni 500 000 soʻmga sotganimni eslayman. Abdurahmon Jomiyning “Muhabbat maxzani” nomli cheklangan nusxada chiqqan shohona kitobi edi. Agar hozirgi aqlim boʻlganida uni millionlarga ham sotmagan boʻlardim.

Xullas, hozir odatiy narxda xarid qiladigan kitobingiz vaqt oʻtib noyob durdonaga aylanishi mumkin. Faqat buning uchun vaqt va ziyraklik kerak.

Lubbaya biz xarasha!

@usmonosphere

#parcha

— Oʻzi bir martagina yashaymiz, Snupi…
— Notoʻgʻri, bir martagina oʻlamiz xolos. Biz har kuni yashaymiz!

“Bolakay va uning iti”

@usmonosphere

Ikki daho — ikki bebaho!

@usmonosphere

Doʻstlar, kimda “Yuksak ma’naviyat — yengilmas kuch” kitobi bor? Bir tanishim topib berishimni iltimos qilgandi :)

@usmonosphere

#xotira

Men juda kam yozaman. Ularni ham juda kam e’lon qilaman. Mansur akaning vafotidan keyin bitilgan she’rimni bugun — shoirning tavallud kunida qayta e’lon qilgim keldi. Oxiratingiz obod boʻlsin!

SOʻROQ

Boʻsh yelkamga bosh izlaymi,
Bosh urarga tosh izlaymi,
Tosh diydamga yosh izlaymi,
Neni izlay, onajon?

Sevgi desam, titrogʻi yoʻq,
Bahor desam, yaprogʻi yoʻq,
Gard tegmagan tuprogʻi yoʻq,
Qayga tizlay, onajon?

Bilmam, kimga oʻrni lozim,
Bilmam, kimga qorni lozim,
Kimga boʻlib koʻr mulozim,
Kimni sizlay, onajon?

Ezgin chaling, tanbur qani,
Koʻzi mungli, purnur qani,
Qani, ogʻo Mansur qani,
Qancha boʻzlay, onajon?

Savolim koʻp, javobi qarz,
Sheʼrim chala, davomi qarz,
Olovman, ki yonishim farz,
Nechun muzlay, onajon?

Shoxrux Usmonov

@usmonosphere

​Talaba va uning boʻyinbogʻi

Oxirgi kunlarda OʻzJOKUdagi mojaro hammaning e’tiborida. Men ham mavzu yuzasidan ikki ogʻiz gapirgim keldi.

Oʻzim Alisher Navoiy nomidagi ToshDOʻTAUda oʻqigan boʻlsam-da, eng koʻp doʻst-u birodarim OʻzJOKUdan. Haligacha ba’zan OʻzJOKUni tanlaganimda balki shu doʻstlarim bilan tahsil olgan boʻlardim deb oʻylab qolaman. Uka-singillarimga ham Jurnalistika universitetiga topshirishni maslahat berganman. Ammo boʻlib oʻtgan voqeadan soʻng, tavsiya qilmaganim ma’qul shekilli.

Chunki men bir-ikki marta borib koʻrgan OʻzJOKU umuman boshqa edi. Moʻjazgina, fayzli, erkin kiyinadigan tirishqoq talabalarga toʻla. U yerda oʻqigan tengdoshlarim hozir eh-he qancha joyni gullatib ishlashyapti. Eng havas qilganim, ular oʻz sohalarida oʻrnini topib ketishdi. Qancha fotomuxbir, qancha muharrir, qancha telejurnalist… Qolaversa, media, PR, marketing ichida yurgani qancha. Hatto bir yaqin oʻrtogʻim butun boshli axborot saytida bosh muharrir hozir. Universitetdagi ta’lim sifati va talabalarning salohiyatini shu misollarda bemalol koʻrish mumkin.

Ammo soʻnggi shov-shuvlar universitetning (mening tasavvurimdagi) imijiga dogʻ boʻldi. Avvalo, voqeadan batamom xabardor emasman. Ommaga ma’lum kontekstdan xulosa qilaman. Birinchidan, tarqalgan videodagi magistrant tuppa-tuzuk kiyingan edi. Uning ust-boshida hech qanaqa notoʻgʻri unsurning oʻzi yoʻq. Men yaxshi talabani shunday tasavvur qilgan boʻlardim.

Ikkinchidan, uning ravon nutqini tinglab, yetarlicha bilimi, keng dunyoqarashi borligi va oʻz haq-huquqlaridan xabardor ekanini payqaysiz. Nega kerak bilimli va iste’dodli talabadan bor-yoʻqligi dunyoni oʻzgartirmaydigan boʻyinbogʻni soʻrab?

Oʻzi umuman olganda, OʻzJOKU kabi ijodiy muhitga ega oliygohda qat’iy dress-kod talablari qoʻyilishi nima kerak? Hamma oʻziga qulay va madaniyatli kiyinib yursa boʻldi-da. Xoʻp, biror tadbir boʻlsa-ku, boshqa gap.

Men Alisher Navoiy nomidagi ToshDOʻTAUda 6 yil oʻqidim. Birinchi kursning birinchi kunida hammamiz oq koʻylakar, qora tuflilar, kostyum-shimlarda yaltirab borgandik. Keyin nima boʻldi? Rektorimiz Shuhrat Sirojiddinov domla ochilish nutqida “Hammangiz poʻrim boʻlib kelibsiz. Lekin ochiq aytaman, menga formalaringiz kerak emas. Ertadan hamma oʻziga qulay, lekin odob va madaniyatni saqlagan holda darsga kelavering. Muhimi yaxshi oʻqib, kuchli kadr boʻlishingiz. Biror kishi sizlardan galstuk yo uzumpaypoq soʻran mijgʻovlansa, meni roʻkach qilaverasizlar” degandi.

Oʻshandan keyin hamma oʻziga qulay, ammo boshqalarga xalal bermaydigan kiyimda kelaverdi. Bu bilan aqlli talabalar yoppasiga ahmoqqa aylanib qolgani yoʻq. Qaytanga talabalik yillari davomida oʻzimizni erkin his qildik, yuzaki narsalarga emas, kerakli darslarga diqqat qaratdik. Kimdir galstuk soʻrashga jazm etsa, “rektor bizga ruxsat bergan” derdik xolos. Masalan, mendan birorta oʻqituvchi boshqacha kiyinishimni, galstuk taqishimni yoki paypogʻimning qoʻnji uzun-kaltaligini soʻragani yoʻq.

Kechagi vaziyatda esa OʻzJOKU rektori Sherzodxon Qudratxoʻja “kimga yoqmasa oʻqimasin” tarzida munosabat beribdi. Kechirasiz-u, oliygohning yuzi bunaqa gapirishi imijga battar ta’sir qiladi. Yetmaganiga universitetning boshqa oʻqituvchilari intervyu bergan talabani tanqid qilib, “biz Gʻarb emasmiz, biz Sharqmiz” qabilidagi navbatchi didaktikani roʻkach qilishganiga koʻzim tushdi. Dangal aytganda, biroz uyalisham kerak.

Sizlar talabaga eng avvalo mijoz sifatida, oliygohni oliygoh qilib turgan qatlan sifatida qarang. Talabalar toʻlqini dahshatli kuch ekanini esga oling. Boʻlmasa yaqin kelajakda rivojlanadigan xususiy universitetlar bilan poygada aniq yutqazasizlar.

Shoxrux Usmonov,
sobiq talaba

@usmonosphere