Assalomu alaykum, universitetimizning hurmatli hamda qadrli professor va o‘qituvchilari, xodimlari, aziz hamkasblar!

Hammalaringizga eng ulug‘ va eng aziz bayramimiz bo‘lmish O‘zbekiston Respublikasi davlat mustaqilligining 34-yilligi muborak bo‘lsin!
Jonajon Vatanimizda hamisha tinchlik va barqarorlik hukm sursin, yurtimiz tinch, xalqimiz farovon, kelajak avlodimiz baxtli va saodatli bo‘lsin!

Mustaqillik xalqimizning eng katta boyligi, mustabid tuzum davrida hayot kechirgan ajdodlarimizning asriy orzusi, bugungi taraqqiyotimiz omili, buyuk kelajagimiz mustahkam poydevori hisoblanadi. Bu bayramni el-u yurtimiz bu yil “Vatan uchun, millat uchun, xalq uchun!” degan ezgu shior ostida nishonlayapti. Istiqlol bizga qanday ulkan imkoniyatlar yaratib berganini bugun butun dunyo ko‘rib, bilib, havas qilib turibdi.
Mustaqillikning keyingi yillarida bitiruvchilarimizning 42 foizi oliy ta’lim olish imkoniga ega bo‘lgani bu sohadagi keng qamrovli islohotlarning shirin mevasi hisoblanadi. Muhtaram Prezidentimiz Shavkat Mirziyoyev to‘g‘ri ta’kidlaganidek, ilm-ma’rifat va innovatsiya yurt taraqqiyotining bosh mezoniga aylanib ulgurdi.

Butun dunyoda xususiy ta’lim o‘zining munosib o‘rnini egallab bo‘lgan. Mamlakatimizda nodavlat oliy ta’lim tashkilotlari faoliyatiga keng yo‘l ochilgani oliy ta’lim sohasidagi islohotlarning muhim jihatlaridan biri bo‘ldi. Qisqa fursatda biz mehnat qilayotgan Toshkent amaliy fanlar universiteti oliy ta’lim tizimida muayyan o‘rin va mavqega ega bo‘ldi. Hozirgacha 35 ta davlat bilan hamkorlik o‘rnatdik. Ilmiy ishlar hajmi bo‘yicha O‘zbekiston oliy ta’lim tizimida 5-o‘rinni ishg‘ol etdik.

2024/25 o‘quv yilida birinchi qaldirg‘ochlarimiz oliy ma’lumotga ega bo‘lib, turli mutaxassisliklar bo‘yicha ish boshladi. Bunda sidqidildan mehnat qilayotgan, pedagogik va ilmiy faoliyat olib borayotgan jamoamiz – professor va o‘qituvchilarimiz hamda xodimlarimizning alohida hissasi bor, albatta. Universitetimizning oliy ta’lim tizimida munosib natijalarni qo‘lga kiritayotgani, xalqaro maydonda ham tan olina boshlayotganimiz, nufuzli reytinglarda sezilarli o‘rinlarni egallayotganimiz Sizlarning fidokorona mehnatingiz, sadoqatingiz va yuksak mas’uliyatingiz samarasi hisoblanadi.

Universitetimizning tez orada mamlakatimiz eng nufuzli oliy ta’lim dargohlari qatoridan munosib o‘rin egallashiga ishonchimiz komil.
Vatan ravnaqi, yurt tinchligi va xalq farovonligiga erishish, Uchinchi Renessans asoslarini yaratish yo‘lida hammalaringizga uzoq umr, kuch-quvvat, sog‘liq-salomatlik, baxt-saodat, g‘ayrat-shijoat va ulkan yutuqlar tilayman.
Istiqlol bayrami barchalaringizga muborak bo‘lsin!

Hurmat va ehtirom bilan,
Abdusalom UMAROV - Toshkent amaliy fanlar universiteti rektori

Telegram | Instagram | Veb-sayt

📚 Darslar boshlanmoqda

Aziz talabalar!
Toshkent amaliy fanlar universitetida yangi o‘quv yili boshlanmoqda. Bu yil sizni bilim, tajriba va yutuqlarga to‘la safar kutmoqda.

🗓 Darslar boshlanish sanalari:

2, 3 va 4-kurs kunduzgi talabalari uchun darslar 8-sentabrdan boshlanadi.

1-kurs bakalavriat talabalari uchun darslar 29-sentabrdan start oladi.

Magistratura 1-kurs talabalari uchun darslar 29-sentabrdan boshlanadi.

🔔 Yangi o‘quv yili barchamizga omad va katta zafarlar olib kelsin!

Telegram | Instagram | Veb-sayt