Савдо-саноат палатасининг Грузиядаги вакили тайинланди

🇺🇿🇬🇪 27 октябрь куни Ўзбекистон Савдо-саноат палатаси раиси Даврон Вахабов ҳамда Мака Нацвлишвили ўртасида учрашув бўлиб ўтди. Учрашув давомида Мака Нацвлишвили Палатанинг Грузиядаги вакили этиб тайинланди ва унинг ваколатларини тасдиқловчи сертификат топширилди.

Мака Нацвлишвили — халқаро лойиҳаларни бошқариш ва инвестицияларни жалб этиш соҳасида 14 йилдан ортиқ тажрибага эга бизнес раҳбари, Business Shop LLC асосчиси ва директори, шунингдек, EurAsia Gulf халқаро бизнес платформасининг Грузия бўйича раҳбари ҳисобланади.

Мазкур тайинлов Ўзбекистон ва Грузия ишбилармон доиралари ўртасидаги алоқаларни мустаҳкамлаш, тадбиркорлар учун янги ҳамкорлик имкониятларини яратиш ҳамда маҳаллий ишлаб чиқарувчиларнинг ташқи бозорларга чиқишини қўллаб-қувватлашга хизмат қилади.

Мулоқот давомида икки мамлакат тадбиркорлари ўртасида доимий мулоқотни йўлга қўйиш, ишбилармонлик кенгаши фаолиятини тизимли ташкил этиш, шунингдек, ўзаро бизнес-миссиялар ва қўшма тадбирларни ўтказиш масалалари муҳокама қилинди.

Шунингдек, Грузия компанияларини Ўзбекистондаги халқаро кўргазма ва бизнес форумларга жалб этиш, тадбиркорлар ташаббусларини қўллаб-қувватлаш ҳамда савдо, тўқимачилик, заргарлик ва ишлаб чиқариш соҳаларида ҳамкорликни кенгайтиришга алоҳида эътибор қаратилди.

Грузиянинг қулай географик жойлашуви ва минтақавий савдо имкониятларидан самарали фойдаланиш орқали Ўзбекистон маҳсулотларини янги бозорларга олиб чиқиш истиқболлари ҳам кўриб чиқилди.

Учрашув якунида томонлар икки мамлакат тадбиркорлари ўртасидаги амалий ҳамкорликни кенгайтириш, янги бизнес алоқаларини ўрнатиш ва истиқболли қўшма лойиҳаларни илгари суриш бўйича ҳамкорликни давом эттиришга келишиб олдилар.

🕊Telegram 📱Instagram 📱Facebook 📺 Youtube