#savol

Agar, menga biror obrazni gavdalantirish imkoniyati berilganda, ikkilanmasdan Dorian Greyning portretidagi Lord Genrini tanlagan bo’lardim.

Sizchi ?

Terabitiya mamlakati sari/Annasofiya Robb - birinchi ehtiros, birinchi ruhiy zarba. Men uni hayotdan emas, filmdan qabul qilganman.

@vasilbro

Umid haqidagi qoralamalarim

• Kutish va umid, kamdan-kam hollarda o'zini oqlaydi.

• Umid eng ohirida o'lmaydi, aksincha istalgan lahzada paydo bo'ladi.

• Umid faqatgina yoqimli so'z bo'lib qolmay, vayronkor xususiyatga ham ega, u sizni sindiradi.

• Umid qilib yashash, halokatli bo’lsa-da, u bilan yashash osonroq. Nimagadir suyanish yoki aybdor sanash, inson tabiatiga xos narsa. Taqdir buncha ko’p yukni o’zi ko’tara olmaydi.

Slavoy Jijek hazillari (18+)

III. Birinchi kosmonavt Yuriy Gagarin koinotga parvozidan so’ng dunyo bo’ylab katta mashhurlikka erishdi. Kunlarning birida uni Kommunistik partiyaning Bosh kotibi Nikita Xrushchev qabul qiladi, Gagarin unga sirli ravishda shunday deydi:
- Bilasizmi, janob, men osmonda Xudo, farishtalar va jannnatni ko’rdim - Nasroniylik haq !
Xrushchev unga pichirlaydi:
- Bilaman, bilaman, lekin damingni chiqarma, buni hech kimga aytma !
Keyingi hafta Gagarin Vatikanda papa mehmoni bo'ladi va unga shunday deydi:
- Bilasizmi, ota, men koinotda bo’ldim, ammo u yerda Xudo yoki farishtalar yo'q edi !
Pontifik Yuriyga pichirlaydi:
- Bilaman, bilaman, tinchlikni saqlang, buni hech kimga aytmang !

Ma’lumot uchun: Kommunistik partiyaning ateizmni targ’ib qilgani hech kimga sir emas, Vatikan esa 1992 yilga kelibgina Galiley haq bo’lganligini tan olgan.

IV. Istalgan kishi bir soat ichida mazali sho'rva tayyorlashi mumkin: Barcha kerakli masalliqlarni tayyorlab oling, sabzavotlarni maydalang, suvni qaynating. So’ngra masalliqlarni qozonga soling, vaqti-vaqti bilan aralashtirib, yarim soat qaynating. 45 daqiqa o’tgach sho'rva ta’msiz va rasvo ekanligini payqaysiz, uni tashlab yuboring, yaxshi sho'rva bankasini oching va tezda mikroto'lqinli pechda qizdiring. Shunday qilib, sho’rva tayyor.

@vasilbro

Dekabr uchun rejalar: Tartib bo’yicha

The Lord of The Rings: The Rings of Power - serialni qaytadan ko’rib chiqish.
Hobbit - trilogiyani qaytadan ko’rib chiqish.
The Lord of The Rings - trilogiyani qaytadan ko’rib chiqish.
The Lord of The Rings - o’qib chiqish.

Odatga ko'ra Rouling kuz uchun, Tolkinni esa qishga olib qo'yaman.

@vasilbro

Joriy yilning eng ko’p kutilayotgan premyeralaridan biri shubhasiz – Napoleon. Nodir bro o’z youtube sahifasida ushbu film haqida ko’plab ma’lumotlarni ulashgan. Ko’rib qo’yish joiz.

Hozir, Antuan Frayvoga xarbiy yurishlarda xizmat qilgan sovutni ko’rib turibsiz. U aynan Napoleonning otliq askarlari tarkibida bo’lgan. Ha, azizlar, 22-noyabr kuni bizni muhtasham film kutib turibdi. O’ylashimcha Xoakin Feniks yana bir bor Oskar uchun kurashadi.

@vasilbro

Tanishish fursati.

Ko’pchilik shisha bino orqali biladi. Ismim Vasil, yoshim 23 da. Adabiyot, san’at yoki kino sohasida faoliyat olib bormayman. Jizzaxda istiqomat qilaman va hech qanday ilmiy darajam yo’q. Hozirda bino va inshootlar qurilishi yo’nalishida tahsil olmoqdaman, tushunganingizdek loyihachiman, bu sohada 5 yildan beri faoliyat yuritib kelaman. Ikkala kanalda ham o’zimning subyektiv fikrlarimni ulashib boraman, boshqa book-blogger yoki kinomanlardan ehtimol yaxshiroq rasmga olishim bilan ajralib tursam kerak.

Filmlardan ko’ra ko’proq seriallar ma’qul. Cinemaphileman - kuniga hech bo’lmaganda bitta film ko’raman va manzur topganimni kanalda ulashib ketaman. Blog yurtishni shunchaki hayotdan chalg’ish bilan bog’layman.

Vinoni yoqtiraman, biroz takabburman, shaxmatni o’lgudek yaxshi ko’raman. Kitoblar hayotimda bir, ikki yoki uchinchi darajali ham emas. Ular boshqa inson hayotida yashash, reallikdan uzoqlashish, zavq uchun kerak. Motivatsion kitoblardan ikki ko’cha narida yuraman.

#parcha

Café de la Régence

Rejans kafesi. Bu joyni ko’rganda qaysi bir shaxmatchi hayajonlanmaydi ?! Ulug’ zotlarning shu kichkina makoni shaxmat tarixida, umuman, inson madaniyati tarixida katta ahamiyatga ega bo’lgan. Ko’rinishidan oddiy bu binoda qanchadan-qancha ajoyib fikrlar tug’ulgan. Rotonda yoki Mulen-Ruj kafelari yozuvchi va rassomlar uchun qanchalik muqaddas bo’lsa, shaxmatchilar uchun bu joy ham shunchalar aziz, unga jahon ahli ta’zim qilsa arziydi. Agar Rejans kafesiga kiruvchilarning oltin kitobi bitilganda, jahonning juda ko’p mashhur kishilari ro’yhatdan joy olgan bo’lar edi. Volter, Russo va Didro bo’sh vaqtlarini ana shu oromgohda shaxmat taxtasi ustida o’tkazishardi. Gertsog Rishelie, marshal Saks va Benjamin Franklin ham bu yerga kelib turishardi. Uzoq Rossiyadan kelgan Turgenev bu kafeda o’tkazilgan qizg’in shaxmat janglarida ko’p martalab g’olib chiqqan.

Shaxmatchilarni-ku, aytmasa ham bo’ladi. Jahonda Rejans kafesini ko’rmagan birorta ham mashhur shaxmatchi bo’lmasa kerak. Paul Morfi atoqli yevropa shaxmatchilarining homiysiz shohlariga shu yerda zarba bergan, Vilgelm Steynits pozitsion o’yin haqidagi o’z ta’limotini shu yerda himoya qilgan. Dilrabo kuylar muallifi hamda jahonning birinchi g’ayri rasmiy chempioni Fransua Flidor: “Piyodalar - pozitsyaning joni” degan shiorni shu yerda o’rtaga tashlagan. Sevimli kafeda Andersen, Chigorin, Mak Donnel va Lyaburdonelar shaxmat o’ynashga o’tirganlarida oqshom tunga ulanib ketardi. Emmanuel Lasker, Kapablanka Parijga kelishlari bilanoq, Rejans tomon ravona bo’lishardi.

Alexin kafega kirdi. U darhol g’alati joyga kelib qolganini angladi. Garderob yonidagi peshtaxtada shisha quticha turar, uning ichida shaxmat taxtasi bo’lib, unga o’yma naqshli donalar terib qo’yilgan edi. Bitta oq ot chetda yiqilib yotibdi. “Napaleonning yiqilgan oti”, o’yladi u. Xo’jayin shaxmat yordamida o’z kafesining obrusini oshirish maqsadida, buyuk lashkarboshining jangovar hayotini tasvirlagan edi.

Napoleon Bonapart imperator bo’lmasdan oldin Rejansda ko’p shaxmat o’ynardi. O’yinning boshida u xatolarga yo’l qo’yar, dastlabki yurishlari hayotidagi kabi dadil va ishonchli bo’lmasdi. Raqib ko’p o’ylab qolsa, Napoleon toqatsizlanar, labini burar va barmoqlari bilan taxta chetini taqillatishga tushardi. Natijada donalar o’rnidan qo’zg’alar, taxtadagi vaziyat buzilar edi. Lekin haqiqiy falokat u yutqazganda ro’y berardi. Shuxratparast general stolga mushtlar, taxtadagi donalar har tomonga sochilib ketar edi.

Parijda joylashgan Rejans kafesi 18-19 asrlarda Yevropaning muhim shaxmat markazi bo’lgan. U yerda o’sha davrning barcha muhim shaxmat ustalari dona surishgan.

@vasilbro

O’zimni chaqirishga qaror qildim😁

O'yin esa 2017 yilgi Norway Chess turniridagi Nakamura va Magnus partiyasining o’zginasi. O’tgan yili Louis Vuitton modalar uyi ham Messi va Ronalduni xuddi shu partiya ustida birlashtirolgan edi. O’ylaganimdek chiqmagan bo’lsa-da, yomon deb ham bo'lmaydi.

P.s: medium bodied red wine🍷

@vasilbro

#bolalik

Chumchuqlar

Bolalikdan eslayman, chumchuqlar juda ko’p bo’lar edi. Uyimiz yaqinida katta stadion bo’lib, bolaligim shu stadionda to’p tepish bilan o’tgan. Kechga borib, quyosh botar mahalda osmonda gala-gala chumchuqlarni parvozini kuzatardim. G’ayritabiiy va yoqimli manzara, ayniqsa yuzlab qushlar bir oqimda harakat qilib, turli shakllarni paydo qilishi, galaning parvozidan chiqayotgan zalvorli tovush, to’g’ri, ularning tumshug’idan chiqayotgan chirildoq ovozni yoqimli, edi deyolmayman, biroq bu qushlarni yoqtirardim. Bobom Toshkentda ishlaganliklari bois aylanganni ko’p borib turardik. Bir necha soatlik yo’l, ikki yong keng dala, singillarim bilan manzilgacha laylak uyalari, otlar, sigirlarni sanab ketardik. Dalalarda g’uj-g’uj bo’lib turgan chumchuqlar ko’p uchrardi, mashinaning siginalidan cho’chib, osmonga butun gala ko’tarilardi, biz uni ko’rib zavqlanar, bola edikda xullas.

Zerikib, wikenigmani titkilab o’tirar ekanman, chumchuqlar haqidagi maqola chiqib qoldi. Unda chumchuqlarning kamayib borayotganligi, ammo buning biror ilmiy asosi yo’qligi yozilgan. Birdan, boshimda chiroq yonganday bo’ldi: ohirgi marta bu galaning parvozini qachon kuzatdim o’zi ?

Bir, ikki yoki besh yil avval ? Miyam g’ovlab ketdi, eslolmadim ochig’i. Maqolani o’qir ekanman, bunga iqlimning o’zgarib borishi, daraxtlar o’rnini egallayotgan baland binolar, turli gazlardan tortib, chumchuqlar oziqlanadigan dala maydonlarini turli zararkunalardan tozalash uchun foydalanadigan kimyoviy dorilar sabab bo’layotgan bo’lishi mumkinligi aytilgan. Ammo, aniq bir ilmiy dalil yo’q, hatto chumchuqlar keskin kamayib ketayotganligi sababli Buyuk Britaniyaning The Independent gazetasi ushbu hodisani ilmiy asoslab berolgan insonga 5.000 dollarlik mukofot puli joriy qilgan ekan.

G’alati hissiyot. Yana nimalarni o’tkazib yubordim, bu haqida o’ylab ko’rishim kerak.

@vasilbro

Hayratlanarli uyg’unlik

@vasilbro

#mutolaada

Lermontov. Iblis poemasi

Kartinada ham aynan Tamara va Demon tasvirlangan.

Nima o'qiyapsiz/ko'ryapsiz ?

The midnight club

Serialga juda tez singib ketdim. O’limni bo’yniga olgan bir gurux o’smirlar, har kechda kutubxonaga yig’ilib, gulxan yorug’ida navbatma-navbat hikoyalar aytishar, vino ichishar, ko’ngil yozishardi. Kitoblar, jumboqlar, xullas yoqimli atmosfera. Hatto, Tristan vafot etganda, oq sh’erga o’xshash nimadir yozdim;

O'likka o'xshamasdi, qo'llarin tutdim-u tushundim nogoh.
U mensiz ketgandi, baridan yiroq.
Yuzida tabassum, ko'zida umid, qotib qolgandi najot.
U aytgandi, yerdamiz, unitma oshna, ohiri tugamas hech qachon baxtli,
o'lim muqarrar.
Yig'lashadi, gullar qo'yilar sening boshinga,
kelishadi-ketishadi, shu bilan o'tadi yillar.
Faqat qo'rqaman xotiralar, o'sha tuyg'ular, kechinmalar qolib ketsa,
shu sovuq tanada, chirisa suyaklar bilan yolg'iz qabrda.

Serialni aynan ushbu ma’lumot uchun ko’rishni boshlagandim, ammo, afsuslar bo’lsinkim, navbat qo’rquv va adrenalinga kelganda, aytarli hech narsa his qilmadim. Hatto, serial personajlaridan biri Natsuki hikoyasini aytayotganda, Spenser uni to’xtatib, qichqiriq - bu xaltura, sen istalgan odamingni baqirib qo’rqitishing mumkin, ammo bu biz bilgan qo’rquv emas, deydi. Serial ijodkorlari o’zlari bilmagan holatda, o’zlarining ustidan kulib qo’yishgan. Ssenariy diniy kultlar va mistika kabi foydalansa bo’ladigan boy ma’dan ustiga qurilgan bo’lsada, muhit nom va kanonga nisbatan anchayin yorqin.

Loyiha ko’proq jumboqliligi, reallik va xayoliyot aralashib ketganligi, chigalligi bilan yoqdi. Ammo, 8 qismga kelganda ko’rishni to’xtatdim. Bildimki, serial yopilgan, ikkinchi mavsum rasman bo’lmaydi. Tan olish kerakki, umidlar kutilgandek oqlanmagan. Yakunlanmagan narsani ko’rishdan esa foyda yo’q. Xullas, Netflix qabristonida yana bir qabr paydo bo’ldi.

@vasilbro

Kamina nazdidagi eng yaxshi horrorlar

Get out (2017)
The Conjuring (2013)
The Conjuring 2 (2016)
The VVitch (2015)
The ring (2002)
The rings (2017)
It (2017)
Annabelle: Creation (2017)
Insidious (2010)
Insidious 2 (2013)
Insidious 3 (2015)
It follows (2014)
Us (2019)

@vasilbro

Oldin xabar qilganimdek, kecha “Usher uyining qulashi” mini serialining premyerasi bo’lib o’tdi. Bugungi kunga qadar natijalari yomon emas:

IMDB: 7.8/10
Rotten tomatoes: 90 %
Google foydalanuvchilari: 87 %

Bugungi tun Po tomonidan band qilindi.

@vasilbro

Turkiy tilda ming yillik tarixga ega boy klassik adabiyot mavjud. Ammo bugun biz klassikadan ham qadimgi adabiyot haqida gaplashmoqchimiz. Uzoq oʻtmishda, islom turkiylar orasida yoyilishidan oldin adabiyot boʻlganmi? U nega unutilib ketgan? Bu savollarga javob topish uchun biz yana bir bor turkolog, folklorshunos olim, falsafa doktori, dotsent Nodirbek Joʻraqoʻziyevni taklif qildik.

https://www.youtube.com/watch?v=_EaymRbBkGE

@insusambil

#film

Tolkien

Barchaga ma’lumki, “Taxtlar o’yini” seriali J.R.R. Martinning “Muz va olov qo’shig’i” asarlari turkumiga asoslanadi. Martin, Tolkienni hurmat qilsada, uni baz’i javhalarda tanqid ham qilgan. Bir gal Dublindagi nutqida;

Shubhasiz, Tolkien asarlari 20-asrning muhim va ajoyib asarlaridan biri, ammo bu men uni muakammal, deb hisoblayman degani emas. Men professor bilan uning asarlaridagi ayrim jihatlar xususida bahslashishni xohlardim. Masalan Aragorn taxtga o’tirgach, bir asr davomida, dono va adolatli hukmronlik qilganini olaylik. Bunday jumlani yozish oson, ammo bilishni istardimki, bu yillar davomida, Aragornning soliq siyosati qanday bo’lgan, mamlakatda ocharchilik boshlanganda u nima qilgan ? Ma’lumki, hali juda ko’p orklar tirik edi, urushda mag’lub bo’lishgach tog’larga chekinishdi. Shu yuz yillik farovon shohlik davrida, Aragorn muntazam ork genotsidi siyosatini qo’llab kelganmi ? Bilishni istardim.

Taxtlar o’yinining oltin qoidasi shuki, Martin yaratgan biror personajga muhabbat qo’yib bo’lmaydi. U istalgan daqiqada vafot etishi yoki siz o’ylagan inson bo’lib chiqmasligi mumkin. Voqealar shunchalar keskin burilishlarga boyki, oldindan biror fikr bildirish qiyin. Bu esa uning asarlarini reallik bilan tutashtiradi, muhit bizning hayotimiz, siyosiy o’yinlarga o’xshash manzara hosil qilgan. Martin aynan shu pozitsiyadan olib qaraganda Tolkien bilan hamfikr emas, ya’ni professor yaratgan personajlar, birodarlikning doimiy g’alabasi Martinga yoqmagan.

Filmni ko’rib tushundimki, Tolkienda buning uchun yetarli asoslar bo’lgan. Yozuvchi do’stlari, Rob Gilson, Bach Smit, Kristofer Visemanlar bilan birgalikda T.C.B.S nomli maxfiy birodarlik jamiyati tuzishadi. Albatta, maxfiy jamiyat dunyoni bosib olish yoki katta qudratga ega qurol ustida ishlash uchun emas edi, o’smirlar real hayotdan chekinib, doimiy yig’ilib turadigan bu makon, turli adabiy kechalar, she’rxonliklarga guvoh bo’lgan, hatto Tolkien aynan shu yerda, do’stlariga o’zi yaratgan hikoyalarini so’zlab bergan.

I-jahon urushi oqibatida, jamiyat xuvillab qoladi, ko’p a’zolar bilan bir qatorda, Tolkien do’stlari Rob Gilson va Bach Smitdan ayriladi, faqatgina Kristofer urushdan tirik qaytadi. Bu esa yozuvchiga qattiq ta’sir qiladi. Angladimki, professor jajji va kuchsiz hobbitlarini aynan shu sabab ham tirik qoldirgan, aynan ular orklar hujumidan, Sauron sehridan omon qolib, hech kim uddalay olmagan topshiriqni uddasidan chiqishgan. Tolkien buni do’stlari xotirasiga bag’ishlagan bo’lishi mumkin - birodarlik g’alabasi.

Bundan tashqari flmdan yana ko’plab qiziqarli narsalarni topdim, Tolkien olami shakillanishida onasi har kechda o’qib beradigan asarlar, uzuklar g’oyasi tug’ilishiga olmonlarning qadim afsonasi sabab bo’lgani, professor yaratgan elf tili va fin tili o’xshashligi, sehrli o’rmonlaridagi muhitni barpo bo’lishida, Bermingam daraxtzorlari, Mordor shakllanishida, yozuvchining urushdan ko’rgan daxshatari turtki bo’lganini payqadim.

Tolkienshunoslarga tavsiya qilaman.

@vasilbro