💔 «Не разбураць ні муры, ні турмы». Гісторыя кахання і змагання сям'і палітвязняў Бірулёў

Сям’ю Алеся і Таццяну Бірулёў затрымалі ў адзін дзень і разлучылі на некалькі гадоў. Яны прайшлі праз ШІЗА, цяжкія ўмовы працы, пазбаўленне сувязі і шантаж уласнай дачкой. За час зняволення ў Алеся памерлі яго бацькі і брат, а непаўналетняга сына зрабілі сіратой пры жывых бацьках.

«Мяне адразу пачалі збіваць, – згадвае Алесь першыя гадзіны пасля затрымання. – Я казаў мясцовым аперам, што нічога не ведаю. За гэта мяне збівалі дубінкамі і нагамі па галаве, па целе. Пагражалі: "Не будзеш гаварыць, мы зараз правады ад акумулятара на цябе накінем".

Экс-палітвязні Таццяна і Алесь Бірулі распавялі "Вясне", як ім удалося захаваць сям'ю пасля больш чым 5 гадоў у жорсткіх беларускіх калоніях, як яны пакідалі адно аднаму пяшчотныя пасланні ў дворыках СІЗА і чаму турэмныя муры аказаліся слабейшымі за каханне.

Чытаць па спасылцы 👉 https://spring96.org/be/news/120788

🌿 Чытаць з Беларусі праз сайт-люстэрка

Вярхоўны Суд разгледзіць апеляцыю па справе сям'і Корсакавых

28 жніўня калегія Вярхоўнага Суда разгледзіць апеляцыйную скаргу на завочны прысуд Пелагеі Корсакавай, асуджанай паводле ч. 1 арт. 356 КК (здрада дзяржаве).

Па гэтай справе таксама праходзяць бацькі жанчыны — Дзмітрый і Таццяна Корсакавы. Іх абвінавацілі паводле ч. 1 арт. 356 КК (здрада дзяржаве), ч. 4 арт. 295 КК (незаконныя дзеянні ў адносінах да агнястрэльнай зброі, боепрыпасаў і выбуховых рэчываў) і ч. 3 арт. 333-1 КК (незаконнае перамяшчэнне праз мяжу атрутных рэчываў, зброі і боепрыпасаў).

Раней Мінскі гарадскі суд прызначыў Пелагеі завочна 11 гадоў пазбаўлення волі, Дзмітрыю і Таццяне прысудзілі 14 і 12 гадоў зняволення адпаведна, а таксама штраф у памеры 50 тысяч рублёў.

📍Праваабаронцы заклікаюць дакументаваць факты катаванняў і парушэнняў правоў чалавека ў Беларусі

У Беларусі працягваюцца масавыя катаванні і збіванні, утрыманне ў нечалавечых умовах у ізалятарах. Мы разумеем, што праз страх і рызыкі пераследу людзі баяцца звяртацца да праваабаронцаў для дакументавання гэтых фактаў. Але мы заклікаем з дапамогай фота і відэа самім фіксаваць сляды катаванняў і збіванняў. Акрамя гэтага, звяртайцеся да лекараў, каб зафіксаваць траўмы і захаваць медыцынскія дакументы. Гэта дапаможа ў будучыні прыцягнуць да адказнасці ўсіх датычных да рэпрэсій.

✍️Вы можаце самастойна задакументаваць ваш выпадак, дзякуючы «Практычнаму дапаможніку для пацярпелых»

🔹Калі вы пацярпелі ад катаванняў з боку сілавікоў ці сутыкнуліся з бесчалавечным і жорсткім абыходжаннем у месцах зняволення, парушэннем правоў чалавека — калі ласка, пішыце @ViasnaDOC ці viasnadoc@spring96.org

🗣 «Надаела гэтае беззаконне». Як звычайная сям'я з Салігорска пачала змагацца з сістэмай

Да падзей 2020 года Бірулі жылі звычайным жыццём у Салігорску: Таццяна працавала ў сетцы рэстаранаў хуткага харчавання, а Алесь — спачатку працаваў на будоўлі як падрадчык на аб'ектах “Беларуськалія”, але з часам звольніўся і пайшоў працаваць грузчыкам і прадаўцом на рынак.

«Мы сям'я простая. Я сама з вёскі, з Салігорскага раёна, — згадвае Таццяна. — Але ў 2020-м проста надаела гэтае беззаконне. Надаела глядзець на разруху: як фермы пазакрывалі, сады павырубалі, школы з беларускай мовай пачалі закрываць. А потым пачаліся пратэсты. І мы з першага дня пайшлі на маршы».

Мірных маршаў хутка стала недастаткова, і сужэнцы далучыліся да актыўнага супраціву: распаўсюджвалі незалежныя газеты «Сумленная газета» і «Гомельскі веснік», расклейвалі ўлёткі, падтрымлівалі палітвязняў. Калі судзілі мясцовага актывіста Руслана Акостку, яны зрабілі і вывесілі расцяжку: «Руслан Акостка — наш герой». Акрамя гэтага, сям’я малявала БЧБ-сцягі і пісала пратэсныя лозунгі па ўсім горадзе.

У траўні 2021 года сужэнцы набылі прыватны дом у вёсцы Пагост. Напярэдадні зімовых святаў Таццяна павесіла на вокнах гірлянды: белую, чырвоную і белую. Гірлянды прагарэлі толькі адну ноч — на наступны дзень Алеся і Таццяну затрымалі.

Чытаць па спасылцы 👉 https://spring96.org/be/news/120788

🌿 Чытаць з Беларусі праз сайт-люстэрка

🌿«Голас пакалення свабоды»: абвешчаны другі сезон прэміі для выбітных беларусаў 65+

Прэмія створана для ўшанавання жыццёвых дасягненняў і праваабарончай дзейнасці выдатных асобаў беларускай праваабарончай, літаратарскай і журналісцкай супольнасці ва ўзросце 65+, якія былі вымушаны эміграваць праз пераслед пасля 2020 года.

Намінаваць можна да 31 ліпеня 2026 года ўключна. Вылучыць кандыдатаў/кандыдатак на прэмію можна праз зварот да арганізацый-партнёраў:

• Беларускі ПЭН svaboda@penbelarus.org
• Беларуская асацыяцыя журналістаў padtrymka60@baj.media
• Праваабарончы цэнтр «Вясна» viasna@spring96.org
• Прэс-клуб Беларусь pressclub@solidarityby.eu
• Фонд «Свабодная прэса для Усходняй Еўропы» info@fpee.eu

Чытаць па спасылцы 👉 https://spring96.org/be/news/120732

🌿Чытаць з Беларусі праз сайт-люстэрка

🖼️ У межах выставы ў Швецыі прадстаўлены новыя нататкі Алеся Бяляцкага пра жыццё ў зняволенні

Старшыня Праваабарончага цэнтра "Вясна" і лаўрэат Нобелеўскай прэміі міру Алесь Бяляцкі прыняў удзел у мерапрыемстве "Bok & Vandring" (Швецыя), у межах якога быў эксклюзіўна апублікаваны раздзел яго будучай кнігі на шведскай мове пад назвай "Алесь".

Тэкст быў прадстаўлены грамадскасці ў сувязі з правядзеннем выставы "Кніга і вандроўка ў Еквіку / Егелукаце" (Bok & Vandring i Jäckvik / Jäggeluaktta).

Кніга "Алесь" была ўпершыню апублікавана яшчэ падчас знаходжання праваабаронцы ў зняволенні. Публікацыя адлюстроўвае досвед Бяляцкага ў беларускай турме, які ён апісвае як стан поўнай несвабоды і пастаяннай маральнай напругі.

Чытаць па спасылцы 👉 https://spring96.org/be/news/120792

🌿 Чытаць з Беларусі праз сайт-люстэрка

Расійскую рэкламшчыцу з Мсціслава асудзілі за «садзейнічанне экстрэмізму»

Ірыне Дундуковай 39 гадоў. Яна родам з Мсціслава, але значную частку жыцця правяла ў Маскве, дзе ў 2011 годзе скончыла Маскоўскую фінансава-юрыдычную акадэмію па спецыяльнасці «рэклама». Жанчына жыла ў Падмаскоўі, працавала дыстанцыйна і перыядычна прыязджала ў Беларусь да бацькоў.

Паводле інфармацыі «Нашай Нівы», Ірыну, імаверна, затрымалі падчас адной з такіх паездак дадому.

Магілёўскі абласны суд прызнаў жанчыну вінаватай паводле ч. 1 і ч. 2 арт. 361-4 КК (садзейнічанне экстрэмісцкай дзейнасці) і прысудзіў ёй, верагодна, абмежаванне волі без накіравання ў папраўчую ўстанову адкрытага тыпу («хатнюю хімію»).

🔎Шукаем людзей, якія ведаюць пра пераслед слонімскіх грамадскіх актывістаў

Паводле інфармацыі «Вясны», напрыканцы красавіка 2026 года ў Слоніме былі затрыманыя мясцовыя грамадскія актывісты: сябра БХД Алесь Масюк, актывісты партыі БНФ Павел Севасцьян і Віктар Марчык.

На сённяшні момант дакладнай інфармацыі пра іх месцазнаходжанне і працэсуальны статус няма.

✍️Калі вам штосьці вядома пра лёс альбо месцазнаходжання актывістаў, калі ласка, паведамляйце праваабаронцам на @Viasnainfo

«Мой прысуд — гэта чарговы прыклад рэпрэсій». Павел Міцкевіч пракаментаваў свой завочны прысуд у Беларусі

Кіраўнік польскага фонду «Okno na Wschód» Павел Міцкевіч, якога днямі завочна асудзілі да 5 гадоў калоніі і штрафу, адрэагаваў на рашэнне беларускіх уладаў.

Нагадаем, грамадзяніна Польшчы, які ўжо больш за 20 гадоў жыве за межамі Беларусі, прызналі «вінаватым» у «дыскрэдытацыі РБ» (арт. 369-1 КК) і «садзейнічанні экстрэмісцкай дзейнасці» (ч. 2 арт. 361-4 КК).

Павел заявіў, што катэгарычна не згаджаецца з абвінавачаннямі і прысудам.

«Ніколі не вёў экстрэмісцкай дзейнасці, не падтрымліваў яе і не рабіў нічога для дыскрэдытацыі Рэспублікі Беларусь. Гадамі сваё прафесійнае жыццё я прысвячаю дапамозе грамадзянам Беларусі, якія былі вымушаныя пакінуць сваю краіну і знайсці прытулак у Польшчы.

Мае дзеянні заўсёды грунтуюцца на каштоўнасцях дэмакратыі, свабоды і павагі да правоў чалавека. На жаль, у Беларусі грамадская дзейнасць і дапамога людзям могуць стаць прычынай пераследу. Многае з таго, што адбываецца, і мой прысуд — гэта чарговы таму прыклад».

Фонд «Okno na Wschód» працягвае сваю працу па падтрымцы і інтэграцыі перасяленцаў з Беларусі і іншых краін у Беластоку.

Беларускі рэжысёр Андрэй Кудзіненка расказаў падрабязнасці ўцёкаў з Беларусі і ператрусаў

Дырэктар прыватнай кінашколы «КінаКалайдар» у размове з «Белсатам» згадаў, як да яго ўварваліся сілавікі раніцай 22 ліпеня.

«Ты спіш, і пачынаюць біць у дзверы. Не званіць – адразу біць і раўці. Я нічога не зразумеў спрасонку. Паглядзеў у вочка, а там мне свецяць у вочы, напісана «АМАП», крычаць: «Міліцыя»», – расказаў ён.

У кватэру ўварваліся восем амапаўцаў і двое супрацоўнікаў КДБ.

«Заляцелі, пасадзілі мяне, быў у трусах, надзелі кайданкі. Паўдня быў голы, пакуль не павезлі ў офіс. Не еў, не піў».

Сілавікі шукалі «экстрэмісцкія дакументы» ды сімволіку і распытвалі пра фінансаванне школы з-за мяжы. Пасля ператрусу ў кватэры яго павезлі ў кінашколу — агулам ператрусы доўжыліся каля 15 гадзін. У рэжысёра канфіскавалі пашпарт і тэлефон.

Пра тое, што рэжысёр вымушаны быў пакінуць краіну, напярэдадні паведаміў ягоны сябар Януш Гаўрылюк. Ён таксама папярэдзіў, што ўсе мэсэнджары і акаўнты Андрэя Кудзіненкі ў сацыяльных сетках цяпер знаходзяцца пад кантролем КДБ.

Рэжысёр таксама назваў прозвішчы двух супрацоўнікаў КДБ, якія, паводле яго, удзельнічалі ў ператрусах: Лапацін і Белаванаў. Кудзіненка сцвярджае, што яны мелі званні старшых лейтэнантаў.

Сёння завочна пачынаюць судзіць легендарнага музыку Сяргея Міхалка

Ягоную справу пачынае разглядаць Мінскі гарадскі суд.

54-гадоваму Сяргею інкрымінаваныя ч. 1 арт. 130 КК (распальванне варожасці) і ч. 1 арт. 368 КК (абраза Лукашэнкі).

🗣 Паведамляйце праваабаронцам пра сваіх родных, якія ўтрымліваюцца за кратамі па палітычных матывах

Па стане на сёння ў Беларусі прызнаныя палітычнымі вязнямі 863 чалавекі, агулам жа праваабаронцам вядома пра больш за 10000 фігурантаў крымінальных палітычных справаў з 2020-га году. Відавочна, што гэта далёка не ўсе людзі, якія сутыкнуліся з палітычным пераследам у Беларусі за апошнія гады.

❗️Калі нехта з вашых блізкіх ці знаёмых апынуўся за кратамі, але пра іх лёс нічога невядома праваабаронцам, калі ласка, паведамляйце пра гэта «Вясне»: @ViasnaSOS, @Viasnainfo

📱У мэтах бяспекі, вы можаце перадаць такую інфармацыю праз знаёмых, што знаходзяцца за мяжой.

✍️ Дапамажыце зафіксаваць усе факты рэпрэсій, каб паказаць свету маштаб катастрофы з правамі чалавека ў Беларусі!

Супрацоўніка сталічнага агенцтва нерухомасці асудзілі па палітычнай справе

Мікіту Ломскаму 28 гадоў. Хлопец жыў у Мінску, да свайго затрымання працаваў памочнікам маркетолага ў агенцтве «Авангард-нерухомасць».

Паводле звестак "Нашай Нівы" Мікіту затрымлівалі і змяшчалі ў СІЗА. Яго асудзілі ў Мінскім гарадскім судзе паводле частак 1 і 2 артыкула 361‑4 КК — «садзейнічанне экстрэмісцкай дзейнасці».

Хлопцу, верагодна, прысудзілі "хатнюю хімію".

❗️ «Вызваліць з магчымасцю застацца ў Беларусі». З якімі абмежаваннямі сутыкаюцца былыя палітвязні пасля памілавання

Пасля памілавання былыя палітвязні ў Беларусі працягваюць сутыкацца з сур'ёзнымі абмежаваннямі, якія закранаюць іх паўсядзённае жыццё. Ануляваныя пашпарты, прафілактычны ўлік, рызыка новага крымінальнага пераследу і перашкоды для працаўладкавання — пра такую практыку "Вясне" распавёў былы палітвязень.

Праваабаронца "Вясны" Уладзь Лабковіч патлумачыў, чаму значная частка гэтых практык не мае прававых падстаў і фактычна з'яўляецца працягам рэпрэсій пасля вызвалення.

«Без пашпарту ты нават не маеш магчымасці фармальна пацвердзіць сваю асобу пры адкрыцці рахунку, у лякарні, табе не могуць аказваць медыцынскую дапамогу, ты нават не можаш распараджацца сваёй нерухомасцю. Чалавек абсалютна выпадае з соцыума. Людзі, якія не маюць пашпарту, фактычна прыраўноўваюцца да асобаў, якія знаходзяцца ў краіне нелегальна».

Чытаць па спасылцы 👉 https://spring96.org/be/news/120797

🌿 Чытаць з Беларусі праз сайт-люстэрка

Сям'я Біруляў пра затрыманне, збіццё, здзекі і сіроцтва пры жывых бацьках

Раніцай 13 снежня 2021 года сілавікі прыехалі да Таццяны на працу, а потым накіраваліся ў дом сям'і. Вобшук быў брутальным: у хаце перавярнулі ўсё і знайшлі схаваныя пратэсныя газеты. Іх дачку Ганну пачалі выклікаць на допыты і пагражаць турмой, а Алеся і Таццяну ў той жа дзень змясцілі ў ізалятар.

«Мяне адразу пачалі збіваць, — згадвае Алесь першыя гадзіны пасля затрымання. — Мясцовыя оперы збівалі дубінкамі і нагамі па галаве, па целе. Пагражалі: "Не будзеш гаварыць, мы зараз правады ад акумулятара на цябе накінем". Мяне спецыяльна трымалі 10 дзён у ІЧУ, каб сінякі трохі сышлі, перад тым як пераводзіць у СІЗА».

Здзекі працягваліся і на этапах: калі Алеся перавозілі ў Жодзіна, канваір завёў яго, закаванага ў кайданкі, у пусты аўтазак і пачаў біць са словамі: «Чаго ты ў Польшчу не з'ехаў?». Таццяну ж на дзве гадзіны пакінулі ў камеры з кайданкамі за спінай, каб яна не магла нават легчы.

Абышоўшыся жорстка з бацькамі, сістэма ўдарыла і па іх 15-гадовым сыне, які застаўся адзін.

Чытаць па спасылцы 👉 https://spring96.org/be/news/120788

🌿 Чытаць з Беларусі праз сайт-люстэрка

Брэсцкая пракуратура працягвае маштабную зачыстку інтэрнэт-рэсурсаў

117 заяў за паўгода. Менавіта столькі матэрыялаў пра прызнанне інфармацыйных рэсурсаў «экстрэмісцкімі» накіравалі ў суды пракуратуры Брэсцкай вобласці за першыя шэсць месяцаў 2026 года.

Паводле гэтых заяў, у «Рэспубліканскі спіс экстрэмісцкіх матэрыялаў» трапілі дзясяткі старонак і акаўнтаў у Instagram, TikTok, Threads, Facebook, YouTube, Telegram, X, «УКантакце», а таксама сайты і мабільныя дадаткі.

Сярод прызнаных «экстрэмісцкімі» — Instagram-акаўнт незалежнага медыя KYKY.оrg, TikTok-акаўнты «Пояс Белавежы», «Па першае, я з Пінска», а таксама іншыя інтэрнэт-рэсурсы.

Акрамя таго, пракуратура Брэсцкай вобласці дамаглася абмежавання доступу да сайта «Зялёнага тэлефона» — экалагічнай ініцыятывы, якая кансультавала па пытаннях аховы навакольнага асяроддзя.

Пры гэтым у пракуратуры паведамілі, што яшчэ 10 інфармацыйных рэсурсаў ужо накіраваныя на экспертызу. Пасля яе завяршэння будзе вырашана пытанне аб звароце ў суд з новымі заявамі.

📍Паведамляйце «Вясне» пра затрыманні, ператрусы і «выклікі на размову»

Мы збіраем і захоўваем факты пераследу, што асабліва важна ў цяперашніх умовах.

Па жаданні, ваша інфармацыя можа застацца непублічнай. Вы таксама можаце перадаць такія звесткі праз вашых сяброў, што жывуць за мяжой.

@ViasnaSOS | @viasnainfo | @viasna_bot