«Футболда ғалаба қозониш жуда қийин. Шунинг учун жараённинг ўзини ҳам қадрлаш керак, чунки ғолиб фақат битта жамоа бўлади. Биз ҳам Испанияга қарши финалда, шунингдек, 2014 йилда Германияга қарши ҳал қилувчи баҳсда мағлуб бўлганмиз (0:1).

Шу боис рақобатбардош бўлиш ва ғалаба учун қўлдан келган барча ишни қилиш муҳим. Ҳатто якунда ғалаба қозона олмасангиз ҳам.

Энг муҳими, охиригача курашиш ва натижадан қатъи назар, бор кучингизни сарфлаганингиздан мамнун бўлиш».

«Ўйлайманки, сўнгги пайтларда ишларимиз кўнгилдагидек кечмаяпти — бу айни ҳақиқат.

Ҳозир нималарни бошдан кечираётганимизни тўлиқ тушуниб турибман. Бунгача бизда нисбатан муваффақиятли ўтган беш ойлик давр бўлди ва ўшанда кўп нарсалар мени қувонтирганди.

Сўнгги вақтларда етарлича яхши ўйнамаяпмиз. «Комо»га қарши ўйин (1:4) омадсиз келди. Кўп сабабларга кўра бу ёмон бўлди — бу жуда оғриқли эди. Биз қандай ўйнаётганимизни ва ўйин қандай кечаётганини кузатиш менга азоб берди.

Ўша ўйинда қандай ҳаракат қилганимиз ва ўзимизни қандай тутганимиз — мутлақо қабул қилиб бўлмайдиган ҳолат. Мухлислар — клубнинг энг муҳим қисми. Одамлар бизни қўллаб-қувватлаш учун вақти, куч-ғайрати ва пулларини сарфлаб келганини, якунда эса ўйиндан кейин биз ҳис қилган туйғуларни улар ҳам бошдан кечирганини англаш — бу жуда оғир лаҳзалар.

Менинг вазифам — майдонга ушбу клуб ва унинг мухлисларининг юзи бўла оладиган, ўзимиз намойиш этаётган ўйин услуби орқали улар фахрлана оладиган жамоани олиб тушишдир.

Охирги пайтларда баъзи ўйинларда бу тамойилдан чекиндик. Мен буни жуда яхши тушуниб турибман ва вазиятни ўнглаш учун, албатта, чоралар кўряпман. Фикримча, буни барчамиз англаб етишимиз муҳим.

Мухлисларимиз мен учун ва бутун футбол клуби учун бениҳоя қадрли. Биз мавсумнинг дастлабки беш ойида — йил бошида бўлган ҳолатимизни: ўшанда барчамиз ҳис қилган муҳитни, яқин алоқани, ақл бовар қилмас энергия, интенсивлик, қувонч ва иштиёқни қайтаришимиз зарур. Биз бунга албатта қайтамиз — мен бунга қатъий ишонаман. Аммо шу билан бирга, сўнгги вақтларда буни уддалай олмаётганимизни ҳам тан олиш муҳимдир.

Клуб пойдевори ва унинг қадриятлари бундан кўп-кўп йиллар олдин яратилган ва мустаҳкамланган. Мен буларнинг барчасини жуда яхши тушунаман ва ҳар бир тамойилни тўлиқ қўллаб-қувватлайман.

Ҳаммаси камтарликка, камтарин бўлиб қола билишга, меҳнатсеварликка — ўз тинимсиз меҳнатидан чинакамига фахрланишга ва ўз қадриятларига мос бўлишга бориб тақалади.

Бу клубга жуда узоқ вақтдан бери намойиш этиб келаётган матонат хосдир. Қийинчиликларни енгиб ўтишми, иродали ғалабаларми, сўнгги дақиқалардаги голларми, муваффақиятга эришиш ёки уни сақлаб қолишми — бу клубда жуда чуқур, фундаментал матонат мужассам.

Мен буни ўз кўзим билан кўрганман, ўзимда ҳис қилганман. Бу тарихда муҳим роль ўйнаган инсонларни танийман — уларни жуда яқиндан биламан.

«Манчестер Юнайтед» ҳар доим ҳар қандай алоҳида шахсдан устун бўлган, шундай бўлиб қолмоқда ва шундай бўлади ҳам. У мендан ҳам, ҳар қандай футболчидан ҳам буюкроқдир — бу доим шундай бўлган», — деди Майкл Кэррик.