👩🏻‍🎓🧑🏻‍🎓Грант иегерлерінің тізімі 3 тамызда жарияланады

Конкурстық ірiктеудiң қорытындысы ҚР Ғылым және жоғары білім министрлігінің ресми сайтында және Telegram арнасында 3 тамыз күні сағат 11.00-де жарияланады, сондай-ақ Ұлттық тестілеу орталығының Telegram арнасы мен студенттерге арналған ақпараттық анықтамалық портал mapp.kz сайтында орналастырылады.

▪️Ал жоғары оқу орындарына құжаттарды қабылдау 25 тамызда аяқталады.

Ақмола облысында бүтін бір отбасы суға батып кетті

Қайғылы оқиға Аршалы ауданы Арнасай ауылынан 2 шақырым жердегі Астана су қоймасында болған.

Ақмола облысы ТЖД мәліметінше, суға батқан 4 адам – бір отбасының мүшелері.

«Куәгерлер 1980 жылы туған әйел мен 2001 жылы туған қыздың денелерін тапты. 1977 және 2000 жылы туған екі ер адамның денесін Ақмола облысы және Астана қаласының ТЖД құтқарушылары іздеп жатыр», - деп жазылған хабарламада.

Мамандардың айтуынша, отбасы мүшелері суға түсуге тыйым салынған жерде шомылған.

Еліміздегі ірі әуежайлар мен теміржол вокзалдарына қытайша білетін мамандар керек

2025 жылы болатын Қытайдың Қазақстандағы туризм жылына дайындық басталды.

Бүгін Астанада Көлік министрі Марат Қарабаевтың төрағалығымен Қытайдың Қазақстандағы туризм жылына дайындықты бастау бойынша жиналыс өтті.

Министрлік мәліметінше, онда Индустрия және туризм комитетінің төрағасы былтыр ҚХР-дан елімізге келген туристердің саны 367 мың адамға жеткенін айтқан. Бұл 2022 жылмен салыстырғанда 21 есе көп.

Жиынның қорытындысы бойынша министр құзырлы ведомстволарға келесі жылға дайындықты бастауды тапсырды:
- Туристерге арналған тіркеу орындарын санын арттыру қажет;
- Ірі әуежайлар мен теміржол вокзалдарына қытай тілін меңгерген қосымша мамандар тартылуға тиіс;
- Арнайы брошюраларды шығару және тағы басқа.

Назым Қызайбай қола жүлдегер атанды

Париж Олимпиадасында Назым Қызайбай жартылай финалда қытайлық бокшыға есе жіберді.

Қазақстандық қарсыласы Ю Вудан 4:1 есебімен жеңіліп, қола медаль иегері атанды.

Қарағандыда студент 7,5 жылға сотталды

Қарағандыда есірткі жасырумен айналысқан коллежд студентіне сот үкімі шықты.

Жоғарғы соттың дерегінше, айыпталушы қаладағы политехникалық колледжде 3-курста оқыған. 2023 жылғы сәуірде 17 жастағы студент интернеттен «курьер керек» деген хабарландыруды көрген.

Ол телефон нөміріне қоңырау шалып, жұмыстың қиын емес екенін, жалақының жоғары болатынын білген. Осылайша, ол курьер болып жұмыс істеп, жеңіл ақша табуға кіріскен.

Әрбір жасырған есірткі үшін айыпталушының банк картасына 2,5 мың теңге аударылған. Оны сотталушы өз қажетіне жұмсаған.

Былтыр қарашада полиция студентті ұстады. Жасөспірімнің сөмкесі мен қалтасын тінту барысында 11 орама табылды. Онда мефедрон есірткісі болған. Оған Қылмыстық кодекстің 297-бабы 3-бөлігі 1, 3, 5 тармақшалары бойынша айып тағылды. Сотта айыпталушының кінәсі дәлелденді.

Соттың үкімімен студент 7,5 жылға бас бостандығынан айырылды. Судья оның кәмелетке толмағанын ескерді.

Үкім заңды күшіне енді.

СІМ қазақстандықтарды Бангладешке бармауға шақырды

Сыртқы істер министрлігі СІМ Бангладештегі жағдайға байланысты Қазақстан азаматтарын ахуал тұрақталғанға дейін сол елге бармай, қоя тұруды ұсынды.

«Қазір Бангладеште жүрген қазақстандықтардан аса қажет болмаса, үйден шықпауды, қауіпсіздік шараларын барынша күшейтуді, сақ және қырағы болуды, жаңалықтарды қадағалауды және биліктің ұсынымдарын орындауды, сондай-ақ Сыртқы істер министрлігі мен Бангладеш Халық Республикасындағы қызметін қоса атқарушы Қазақстанның Үндістандағы елшілігімен тұрақты байланыста болуды сұраймыз», - деп жазылған СІМ таратқан хабарламада.

Қосымша және жедел ақпарат алу үшін Бангладештегі қазақстандықтар мен олардың Қазақстандағы туыстары төмендегі байланыс нөмірлерге шұғыл хабарласа алады:

• +7 (7172) 720111 (кезекші дипломат);
• +7 705 443 33 32 (ұялы телефон, WhatsApp).

Қазақстанның Үндістандағы елшілігінің байланыс нөмірі:
• +91 1145 555 106;
• +91 9667 118 363.

12 жасында босанған қызға қандай көмек көрсетіліп жатыр?

Павлодар әкімдігінің кәмелетке толмағандардың істері және олардың құқығын қорғау жөніндегі комиссияда 12 жастағы босанған қыздың мәселесі қаралды.

Павлодар облысының әкімі Асайын Байхановтың шешімімен отбасыға басқа ауылдан үй берілді. Меценаттар үйге қажет барлық затты алып берген.

🥈 Париж Олимпиадасы: Демеу Жадыраев күміс медальға ие болды

Парижде грек-рим күресінен 77 келіде бақ сынаған балуан Демеу Жадыраев финалда 23 жастағы жапониялық Нао Кусакадан 2:5 есебімен жеңіліп, күміс жүлдегер атанды.

🥈Қазақстан қоржынына тағы 1 күміс медаль түсті

Париж Олимпиадасында 80 келіде жұдырықтасқан боксшы Нұрбек Оралбай күміс медальға ие болды.

Ол украиндық Александр Хижнякке есе жіберді.

3 өңірде терроризмді насихаттаған қылмыстық топ ұсталды

Биыл шілде-тамыз аралығында ҰҚК Астана қаласында, Алматы және Батыс Қазақстан облыстарында арнайы операция жүргізіп, 5 қазақстандықты ұстады. Олар сот санкциясымен қамауға алынды.

Ұсталғандар теракт ұйымдастыру үшін терроризмді насихаттауға, діни алауыздықты қоздыруға және адамдарды тартуға қатысқан. Тұрғылықты жерлерін тінту кезінде олардан қару-жарақ, оқ-дәрілер, діни әдебиеттер және өзге де заттай дәлелдемелер тәркіленді, – деп жазылған хабарламада.

Сондай-ақ ұсталғандардың екеуі бұған дейін кісі өлтіру, тонау және бұзақылық жасағаны үшін істі болған. Тағы бір күдікті шетелде дайындықтан өтіп, лаңкестермен бірге қарулы қақтығыстарға қатысқан.

Фото: ҰҚК баспасөз қызметі

⚡️Бұрынғы министр Тұрғымбаев 5 жылға шартты түрде сотталды

Астана сотында бұрынғы ішкі істер министрі Ерлан Тұрғымбаевтың ісі қаралды.

Сот отырысы жабық өтті.

Экс-министрге ауыр зардаптарға әкеп соққан билікті асыра пайдаланды деген айып тағылды.

Соттың үкімімен Ерлан Тұрғымбаев кінәлі деп танылып, 5 жылға бас бостандығынан шартты түрде айырылды.

Сондай-ақ ол 10 жылға белгілі бір лауазымды атқару құқығынан айырылды.

Жапония премьер-министрі Қазақстанға келмейді

Жапония елшілігінің хабарлауынша, елдегі жер сілкінісіне байланысты премьер-министр Фумио Кишиданың Қазақстанға ресми сапарын өткізуден бас тарту туралы шешім қабылданды.

Ақпаратты Қазақстанның Сыртқы істер министрі растады.

Фото: GettyImages