لو علمتم ما توَّرثه الحوقلة من الفتوح والتياسير والبركة، ما فترت ألسنتكم منها

((لا حول ولا قوَّة إلا بالله))

" جعل نصري بآخر المشوار يركز في الثريّا
لو ثلاث أرباع عمري الأوله .. راحت هزايم " آمين

" ان مارقيت بكف يمناك السحاب
محدٍ على متنه يشيلك للسماء "

‏" و شلون أخاف الحياة تشتت أحلامي ؟
‏و أنا أدري ان أُمنياتي في يدين الله ! "

" الأماني لو هي بعيدة ماااا على ربك مُحال "

عن مطارد الأحلام :
‏" طموحي سرابٍ جاني الموت قبل اجيه
‏وعزمي عزم من جمرة القيض محرقته

‏تقولون دام انه سراب ؟ ولحقته ليه !
‏ترا متعتي في شوفه وفي ملاحقته

‏شعوري ورا حلمي وانا اصايده واخطيه
‏اخاف انه احلى من شعوري لا حققته "

صبحكم الله بالخير

*بدون قلب

من يصدّق بانهياري خلف هالوجه الصبوح ؟
وضحكتي تسبق بكاي وبسمتي تسكن فمي

اذا تحبّ اشياء لا تدري الناس
كل الذي تقدر تخبّيه - خبّه -

‏خبّ البشر خبّ القصص خبّ الاحساس
خبّ اي شي تحسّ فيه وتحبّه

‏بعض البشر لا شافك بخير يحتاس
خطوى حسود ٍكلّ عود ٍ يشبّه

‏حتى لو تخلّيه تاجٍ على الراس
تتعب ولا انت بعارف ٍويش طبّه

زرع الصبَخ منقود يا باذر الياس
‏لو بالعسل تسقي ثراه وتصبّه

قبل يربي قلبك الضيق والباس
‏قلبك على مكتوب الأيام ربّه

‏ من لا يحبك لا تحبه على ساس
‏ إنه بعد فترة بيهديك حبّه

‏احرص تحب اللي يحبّك من إحساس
‏ هذا الذي يستاهل إنك تحبّه
- سعد المطرفي

" خبّ اي شي تحسّ فيه وتحبّه "

‏يا صاحبي ماني مثل غيري ولاهم يحزنون
‏أنا : يتيم الشعر ، مالي فيه ند ولا شبيه

‏انا اختلف عن نفسي وهم كلهم يتشابهون
‏واجملهم اللي فيه شي منّي .. ولا لي شي فيه

‏أنا اكتب أشيا تختلف عن كل ماهم يكتبون
‏وهم يكتبون اشياء تلمس بعضي وما تحتويه

‏مثل ( الملامح ) لو تشابه بالصور ولا العيون
‏ما يعني هذا ان التشابه وارد ٍ بين ( الوجيه )

‏ما دار في خلدي أكون اللي تبون أو ما أكون
‏أهم شي الكل يعرف : كيف جيت ؟ وجيت ليه ؟

‏علّقت سحري بين جال الحكمه وسفح الجنون
‏حتى بقت خطوه .. واقول اللي زماني ما يعيه

‏ولو ماي اخاف ان الخلايق من كلامي يُفتنون
‏كان ابتكر لغه جديده ما عرفها ( سيبويه )

‏ياوادي الأصوات : صنّفني مع اصواتك (بدون)
‏صوت ٍ : يراوده الضياع ، وصرخته منْه وإليه

‏منصوبٍ بجرحه ، ولا تركد على حرفه سكون
‏ولا له بجيلانك ( صدى ) يملك ثمنه ويشتريه

‏في بحّته : قوافل الحرمان حُبلى بالشجون
‏وفي لكنته : نفح الشمال و كبريا رجلٍ وجيه

‏وحده جمع بين السلاطين ومظاليم السجون
‏على بساط الشعر ، وتساوت منازل معجبيه

‏يا مرجهنّ الوجد صب بصدري : اطياف ومزون
‏واختم على صبح الورق ، واصهل ، وسو اللي تبيه

‏وامطر تجاعيدي وجع ، عيدي مدام انك تمون
‏ولا تبطي بحزني ترى رمد النواظر تحتريه

‏وخطيّ لا تسقي القصايد كل همي لا تهون
‏خوف الحروف تموت من زود الجزع يوم احكيه

‏انا : اخر اطلال الحزن ، وانا : اكبر آثام الظنون
‏وانا : سجود السهو في غفلة زمان الكابريه

‏وانا : الظلال اللي انخلق من غير نور ولا غصون
‏وانا : انتصار الجوع في دنيا الثراء وطالبيه

‏وانا : حكايه لو تسولفها المحاجر للجفون
‏بالله لا دمع ٍ تمل ، ولا منام ٍ تشتهيه

‏شايب ولكني طفل قاسي ولكني حنون
‏مليون مره طحت بس اطيح واقف ، وش عليه

‏من طول خذلاني بخلاني ومن كثر الطعون
‏قلت : آه يا قل الوفا حولي ويا كثر الوجيه !
- خلف الكريع

منصوبٍ بجرحه ، ولا تركد على حرفه سكون

يا لطيف على الوصف الآسر

" آه يا قل الوفا حولي ويا كثر الوجيه ! " ألف مره

عن التعريف الذاتي :
" انا : الظلال اللي انخلق من غير نور ولا غصون
‏وانا : انتصار الجوع في دنيا الثراء وطالبيه "

اشتقت لهذا النوع من القصايد ، اشتقت للارتواء الشعري هذا جدًا ❤️‍🩹

آل قصيدة الغالين اذا ماعليكم أمر انشروها 🤍

" ترى الكرم والجود يعرف محله
ما ينتسب له كل هافي وسياب "

صبحكم الله بالخير 🤍