‏" ياللي على وجهك علامات الرضى
‏ملامحك من دون تضحك تبتسم

‏يا أكرم هبه، أغلى قدر وأجمّل قضا
‏طاغي غلاك و لك من النادر قسِم

‏معك نسيت اللي بقى واللي مضى
‏ما كنّ لي قبلك صفات ولا أسم

كنّي عقب شوفك يلوّح لي الفضا
‏قاعٍ ذبحها الدهر و احياها الوسم "

‏"قاعٍ ذبحها الدهر و احياها الوسم" الله ❤️

انتي حقيقه وانا شاعر واحب الخيال
‏واخاف احبك تمر وما تقولينها

‏مديت عمري فدا ، مدّي يدينك وصال
‏انا بوجه الليال اللي تخافينها
- أحمد البحّا

اما نفس هالفدا ولا فلا

‏تهادت من رفوف الذاكره ضحكه ودمعة عين
‏تقرّبني "هذيك" لـ ناحية "هذي" وأقرّبها

‏طواري ليلةٍ عيّت تمرْ.. وحدّتك تطرين
‏تذكّرك الزمان وقلت له: ماني مجرّبها

‏بعيد من الرضا ومن الزعل ومْن القسا واللين
‏أنا ما أحب يحزنّي أمورٍ كنت أسرّ بْها

‏تمرّ الضحكه اللي فاتت عيوني معك وتْجين
‏ولا عاد الظنون اللي تشرّقني وأغرّبها

‏أعرف الليله اللي تقسم أيام العمر نصفين
‏وأنا ساعة بكت عيني عرفت إني أمرّ بْها
- ‏ماجد النفيعي

في مرابيك لامر الحزين ( انشديه )
‏ليه الاحباب ماتو في ربوع المكان !
‏
‏من لقا الموت الاحمر في يدك ماعليه
‏كيف يربط على صدره حزام الامان؟
‏
‏كل ما مال عودك لـ الهوى ثبتيه
‏في قوامك ليان يعاند الخيزران !
‏
‏قالت ( العنفوان )اللي من الخيل فيه
‏قلت اشوفك لطيفه مدري (العنف وان)؟
‏- مطرب دحيم

اللهم صلِّ وسلم على نبينا محمد

ربي اغفر لي انا ما احب تكرار الذنوب
نفسي اشقتني وانا احارب معاها ضدها

واجعل الفردوس آخرتي وعلمني اتوب
قبل لا روحي تغادرني ولا املك صدها

مؤمنة لكن مثل غيري انا املك عيوب
واجد اللي يدعي التقوى ولا هو قدها

سيل یا دمعٍ على عيني مبينه الهبوب
الله اللي خالق الدمعة وخالق خدها

والله اللي يمتحن خلقه بتوزيع الكروب
وفي يده افراج كربتها ولا في يدها

في يدي دعوة اخبيها الى وقت الغروب
اطلبك وادري محال انك علي تردها

اغفر ذنوبي.. انا ما احب تكرار الذنوب
بس هي نفسي تصارعني واوقف ضدها
- عائشة المري

" في يدي دعوة اخبيها الى وقت الغروب
اطلبك وادري محال انك علي تردها "

يوم الحزن محتلّني جيتي على هيئة سرور
‏من يشبهك؟ يا صاحبة قلبٍ من الطهر انخلق

‏صديقتي بالشعر، بالاحساس، وبحلو الشعور
‏ما كنّك الا -نور صبحٍ - في دياجيري فلق❤️
- من مها إلى الغالية دلال :)

صديقتي و انتي حضورك غير عن كل الحضور
‏لليّ غلاها عن جميع الناس في صدري فرَق
‏ٰ
‏انتي بوجهي ، لو يضيق الحال والدنيا تدور
‏قدرك على دمّي سرى ماهو على حبر و ورق ❤️
- من الغالية دلال :)

مسّاكم الله بالخير 🤍

بين ضوّ الحياة وبين جمر الجهاد..
‏لفحة الدهر هبّت، واستشرّ الجمر..

‏وش بقى ينحرق بي؟ دام كلّي رماد
‏لو تزيد الرياح، يضيع باقي العمر

‏بي من الياس لوعة ما شفاها ضماد
‏لوعة الحرّ لا منّه تلقّى أمر!

‏لو يحدّون قلبه عالسهر والسهاد
‏كان عاف النجوم وكان ذبّ القمر..
- معاذ عبدالعزيز

‏في هدأة الصوت انتبهت لنفسك وفات الأوان
‏حسْرتك باديةٍ على وجهك ولو أخفيتها

‏ما يرتعش كفّك ولا تشعرك الأيدي بالأمان
‏أزريت تبدي حاجتك حتى الحياة أزريتها

‏بينك وبين الضحك وقفة خاطر وأرض وزمان
‏ماهيب قصة لحظةٍ ما جيت في توقيتها

‏ماهوب هذا وجهك اللي تعرفه والاتّزان
‏أرضٍ صخبك يثير عجّتها إذا مرّيتها

‏ما عاد يذعرك الجفا ولا يبكّيك الحنان
‏حتى الوجيه اللي ضحكت إلها قبل؟ بكّيتها

‏تقسى مثل من ينتقم من فكرة إنّه يوم لان
‏يا نفسك اللي كلما خمّيتها أخطيتها

‏من يورَث الضحكه إذا ما عيّنت عندك مكان
‏وأبطت تدوّر لك سبب يِضْحِك ولا خلّيتها
‏-ماجد النفيعي

‏"ما عاد يذعرك الجفا ولا يبكّيك الحنان
‏حتى الوجيه اللي ضحكت إلها قبل؟ بكّيتها"

"تمسك في يدي يا اخر بقايا عمري اللي راح
‏اشوفك والسنين بـ نظرتك ترسم لياليها

‏مثل طفلة تشوف جيوش محتل الوطن سوّاح
‏ما دام ان عادها تمسك بيدها .. خنصر أبيها"

فرَق فرَق، طعم الحياه بعدك فرق
حلو العمر ماعدت استطعم مذاقه

جيتك معي قلبٍ من الشوق احترق
ضمّيه لك يشفى من حروق اشتياقه

كان الجفا شمعة وانا كنت الورق
من يومها قلبي على ذات احتراقه

لا تتركي بيني وبينك مفترق
مدّي وصالك والزعل ارخي وثاقه

يكفي شهور البعد وش منها انسرق!
لا نرتكب في حقّ رفقتنا حماقه :(

كلّ العتاب بحضرة اشواقي شرق
ما للعتب قيمة مدام الشوق فاقه

ملّيييت وانا اطوف في رحلة أرق
ماعاد فيني للشقى شدّه وطاقه

رفيقتي .. والشوق في وجهي برق
ضمّي فؤادي والعني جرح الرفاقه
- مها

صبحكم الله بالخير 🤍

"من ليلة البارح و أنا في زحمة افكاري غريق
‏عندي سؤال إجابته في حروفها موت وحياه

‏وشلون بـ اخليك وانت اللي ليا طال الطريق
‏ايدينه حزام الامان .. وضمّته طوق النجاه ؟"