قصيدة تستحق هذا الصباح

القصايد اللي تغلب عليها مشاعر الأمومه دايم عذبه، ابدعت سمار جدًا الله يرزقها برّه

أنا اللي كل مادور لصمتي خطوتين وباب
‏تحاصرني رياح الذكريات وتنفض ثيابي

‏على الغيّاب تغريبة سلام وجرح أظنه طاب
‏ماعادوا يستحقون الرجوع ولاهم أحبابي
- ماجد بن مقبل

محتاج لي فرحة قصيدة تجي زي
‏مولودةٍ من عقب عقم الكتابة

‏لاجت وانا ماعدت الاول وهي هي
‏ماكنها الاالدعوة المستجابة

‏كني لها ميّت وهي دعوة الحي
‏اللي تذكر صاحبه في غيابه

‏من بذرة الدهشة نبت منّها فِي
‏ماسنبل اغصان الشغب بالرتابة
‏ -عكاش منصور

مختلف مفهوم تقديري للاشيا اللي ابيها
يشبه لطبع الكريم اللي هدا أكله و جاع

امي تقول ايّ حاجه ودّك بْها - اتركيها -
وانت شخصٍ من غلاته رحت واهديته وداع

صبحكم الله بالخير 🤍

"ما وقف دون آمنياتي لا ديار، ولا قبيلة
‏والله إن اللّي وقف لي زلةٍ هدّت صروحي

‏وجهك اللّي كل ما جاد الصَّباح، وجا يشيله؟
‏كنّ ربي كاتبه في عارض أيامي، ولوحي"

‏حيّ صوتٍ لا لفى أطلق بي عْنان القريحة
‏وهلّ بـ أبيات القصيدة مثل هلّات العباير

‏أعجم أبيات القصايد لا حوت اسمك : فصيحة
‏والغرام شعوره المفرط على مثلك : ذخاير

‏من عنى ليل الفراق اللي أبى يصبح صبيحه
‏جارت أحزانك على منهو عليه الوقت جاير

‏من يخفّف وطأة شعور الغرام ويستبيحه
‏من يريح خاطري لا بات متكدّر وحاير ؟

‏ليت عيني من سهر ليلي بدونك مستريحة
‏كل فجرٍ ما يشعشع به سناك الغضّ باير

‏و كلّ ليلٍ ما يجيبك يدفن بقلب الجريحة
‏شوق حار ودمعتين وضيق صدر وحزن غائر

‏ياحبيبي والاماني لا غدت عقبك طريحة
‏لو تمدّلها كفوفك عمّرت لـ جلك عماير

‏ولو تدوّر لـ الغرام العفّ بـ عيوني مديحة
‏كان تلقى انّ ما لغيرك وسطها خلّ وخشاير

‏أدري إنّ الدمع .. شافي لو يجرّحني مطيحة
‏وادري إنّ البوح .. يتْعب حين تكتمه الضماير

‏وتدري انّي في شعوري واضحة حيل وصريحة
‏ما أعرف اكتم شعور الشوق في صدري واساير

‏حطّني في جوف صدرك اعتق الوصل وابيحه
‏دام قلبك ماقوى لـ الهجر يوم الهجر ساير

‏والله أنّ الأرض عقبك ضيّقه لو هي فسيحة ؟
‏ولو اعد العمر دونك راحت أيّامه خساير !

‏عارفه إنّ الليالي بـ اللقا دايم شحيحة
‏وانّك تقدّس غرامي مثل تقديس الشعائر

‏وعارفه إنّك معوّد وإنّ هقْواتي صحيحة
‏وإنْك بـ تبصّر بي عيون الفرح لو هي ضرائر

‏مرحبا عدّ القلوب اللي من الفرقى كسيحة
‏وعدّ ما هلّت هماليل المزن : يا اعزّ زاير

‏جيتني جيّه عظيمة تشبه لـ جيّة نصيحة
‏ردّت المذنب عن النار وعن ذنوبٍ كبائر
- نوران

"مرحبا عدّ القلوب اللي من الفرقى كسيحة
‏وعدّ ما هلّت هماليل المزن : يا اعزّ زاير"🤍

"جيتني جيّه عظيمة تشبه لـ جيّة نصيحة
‏ردّت المذنب عن النار وعن ذنوبٍ كبائر "

القفله قصيدة ثانية

ابداع والله :)

اللهم صلِّ وسلم على نبينا محمد

يا رب و إن ضاق المدى ما معي باس
‏و ما في سماي .. إلّا مشــاريه ظِلّي

‏في وجهك من النَّاس واللي ورا النَّاس
‏ومن ضحكةٍ ما هي على وجه خِلّي !
- محمد السلطان

كم الله تكفي !؟ :(

لا يمرّ الشك قلبك .. لا يمرّ اربع جهاتي
انت وجهة عمري اللي راح عمري يحتريها
- نوره ماجد

" ان قلت ياقلب انا بالحب ماودّي
‏يقول في ذمتك ماهوب يستاهل ! "

يوووه