انا لا اخطا رفيقي احتمل واصبر على عجفاه
لعل يْتنبه في مقابيله ويسحبها

اعذره دامني خابر طبوعه وعارفٍ مبداه
واعديها لو انه ماكنٍ فالصدر مضربها

حلات الرجل مع ربعه صبورٍ مايجيب اقصاه
سوى لاعوّدت عند الحقوق وعند مضربها

مانيب اللي ليا من كبْرت الدعوى تضيع ارياه
اعرف المقدية والمخطية وادرى عواقبها

مناهيج الصداقة دربها عسرٍ لمن يبغاه
تبي رجلٍ ليا انفلتت حبال الحق يقضبها

وانا هالدرب جربته مابين رجال وبين اشباه
وعطتني دنيتي درس اعتبره اقسى تجاربها

مانيب اللي يدق بخوّة الرجال لاخاواه
ولانيب الذي لا اقفى من الاصحاب خربها

احبس السر في صدري واقول اني لزوم انساه
واعده مثل كبواتٍ مضت مانيب احسبها

كثير اللي عرفت وكل رجل تقلّطه يمناه
وانا والحمد لله هقوتي فالطيب اكسبها

رفيقي لافهمني قلت ياجعل الردي يفداه
وانا ذخره ليا من صكت ظروفه حواجبها

اقدر من يقدرني ويلقاني مثل ما القاه
واجلّس كل لحيه في المكان اللي يناسبها

وكلمة -والنعم- لو هي تناقلها كثير افواه
لو انها بتحكي؟ ماكل من قيلت له اعجبها

ويبقى الطيب هاجس كل رجل ومن يبي مرقاه
يحث النفس ويسوق القدم يمه ويتعبها

اعرف اللي يسدّ اللازم واذا احتجت له انصاه
وكثيرين الحكي هذّارة المجلس اجنّبها

احشم الطيّب ولو كان من فقره شكى مخباه
ولا اسمع هرج طرّاد العلوم اللي يقلّبها

ولا اتبع خطوة الشيطان لا منّا ولا منّاه
اهذّب ما خفى بالنفس وعين الله اراقبها

كلامٍ ماذكرته لجل ينشر لي هنا وهناه
ولكنّ المواقف تجبر الانسان يكتبها
- سعد الودعاني رحمه الله

"رفيقي لافهمني قلت ياجعل الردي يفداه
وانا ذخره ليا من صكت ظروفه حواجبها"🤍

"وكلمة -والنعم- لو هي تناقلها كثير افواه
لو انها بتحكي؟ ماكل من قيلت له اعجبها"
عز الله

وش الومك عليه؟ وخاطري دون الملامة طاب
ياوجهٍ يوم اشوفه كنت اشوفه وجهي (الثاني)

كذا استكثرتي الراحة على قلبي بدون أسباب!
كذا ترضين لي عصف الشتات بعز خذلاني

مثل ماكنت اشوف إنك حقيقة في زمن مرتاب
لقيتك زيفٍ يشكك عدوي كل ماجاني

ذخرتك طلقةٍ ترمى بصدر الصاحب الكذاب
لعل سلاحي موجّه على صدري وشرياني

وقفتي وقفةٍ صلبة، بعد ماصفّوا الأغراب
وجابوا لك حطب صدري وشعمتي موقد أحزاني

و أنا ورب الفلق، والناس، والأحقاف، والأحزاب
ماكنت أحسب حساب لساعةٍ يُربط بها لساني

أعاتب مين؟ والدنيا بخطاها ماعليها عتاب
مثل ماجابني درب الزعل.. لهناك ودّاني

هناك لوين مدري بس أعرف إن الطريق غياب
غيابٍ كل ماطال الطريق تخف نيراني

كسرت الباب (أبو مزلاج حزن) ولا بقى لي باب
ودانيت الجفا حتى لو إنّي كنت ما اداني

فمان الله، واللي بيننا يبقى ليوم حساب
أخاف أسامحك يوم الحساب و انجرح ثاني
-فارس فايح

" وأنا ورب الفلق، والناس، والأحقاف، والأحزاب
ماكنت أحسب حساب لساعةٍ يُربط بها لساني

أعاتب مين؟ والدنيا بخطاها ماعليها عتاب
مثل ماجابني درب الزعل.. لهناك ودّاني" آخ :(

عذبة جدًا

فيه بعد قصيدة مجهوله الهويه لكن بخليها لوقت ثاني :)

مساكم الله بالخير🤍

لا مرّ طاري الموت يغشاني من الخوف السكوت ..
‏والدمعة تْطيّحني .. ولو كان ما طيّحتها

‏الحزن موت، الشوق موت، الفقر موت، الظلم موت ..
‏وأمواتنا اللي فوق الأرض أكثر من اللي تحتها !
- مشعل الزعبي

اللهم صلِّ وسلم على نبينا محمد

اللهم أنر قبور موتانا و موتى المسلمين وإجعل ملائكة الرحمه تطوف عليهم من كل جانب اللهم ارحمهم في باطن الأرض واسترهم في يوم العرض يارب أنت خلقتهم و أنت أخذتهم وأنت الرحيم فليس غيرك ارحم بهم و اغفر لهم واجعل قبرهم روضه من رياض الجنة ، يارب اجبر هذا الكسر باللقاء في الجنة .

يامرحبا 🤍

‏راكب اللي كن محركها يولّد من حنيني
‏لـ اقلعت تستنزف احساسي وتجرح في صميمه

‏ولـ استوت فوق السما كنها على راحة يميني
‏يستوي معها مزاج اللي طواريقه عديمه

‏ياحبيبة شاعرك قومي تباهي واطربيني
‏واتركي شعري معا طيفك يلاعبه ويهيمه

‏القصيدة فوق الارض الواسعة عيت تجيني
‏من علوّك مارضت تكتب لك الا فوق غيمة

‏تحتريني ليه ما يحتاج والله تحتريني
‏دام باقي لك وسط لندن صدى ضحكه قديمه

‏العظيمه تصغر بعيني ليا لديت عيني
‏الا انتي تكبرين اكثر بعيني يا عظيمه

‏والصباح ان طال ما والله يقدر ينتهيني
‏لكن ان جا الليل يكسرني ليا ذعذع نسيمه

‏وتصبح الليله عليّ اطول بواجد من سنيني
‏واتمسك في عواقبها ولو كانت وخيمة

‏في رجا ليله تجيبك لي وتملا لي يديني
‏مثل ليله جابتك عندي وانا اعرفها عقيمه

‏واساليني ليه غبت ودون اجابه سامحيني
‏سبة اغيابي لو انها الموت في حقك ظليمه

‏مايعذرني عن غيابي ليا منك تبيني
‏غير هقوات الرجال اللي نواياها سليمه

‏و اهزميني بالتغلي دام سيّرني حنيني
‏والله ان الشوق ما خلا لـ نفسي اي قيمة

‏طاح دمعة يوم جيت وشفت خوفك تفقديني
‏ورحت عنك وماقدرت اخلي الدمعه يتيمه

‏اهزميني لو بقى لي قدر عندك ' اهزميني
‏والله ان فوزي عليك اقسى علي من الهزيمه
- عبدالله بن محمد

"سبة غيابي لو انها الموت في حقك ظليمه "

"اهزميني لو بقى لي قدر عندك، اهزميني
‏والله ان فوزي عليك اقسى علي من الهزيمه"

جميلة جدًا

بحكمته .. ساق درب رضاك للتّايه
‏وبقدرته .. قال: كُوني فتنة. وكنتي

‏وشلون أبجحد؟ وله في كلّ شي آية
‏موج البحر، والسحايب، والسما، وأنتي 🤍
- مشعل الزعبي

مرحبا بآل قصيدة 🤍

آل قصيدة يهمني رايكم جدًا واحب اشاوركم ونتناقش لكن وبعدها لكن ثانيه وثالثه، الأدب والاحترام اساس المحادثة قلة الأدب والميانه اللي مدري وش تبي، كلها نتيجتها حظر وطرد من بيتنا، لا تضيقوني ارجوكم ياخي