خلّها على التحايا، وضحكات السنون
‏يوم صمتي في محلّه، وسرّي معْقله

‏أنت والله خاطرك غالي ودايم تمون
‏تطلْق سبوق البشاير، وهمّي تعْقِله

‏والله إن ماهوب حملٍ تضيق بْه المتون
‏أو بعض حكيٍ أقوله؛ لا قالوا لي: قِله

‏واحدٍ يدري وش أسباب ضيقاته يهون
‏البلا في اللي ما يدري وش اللي مِثْقله
- ماجد النفيعي

مثل ما مرَّت عيونك عليّ، مرَّت عليّ أحداث؛
‏لا زادت نورك بْظلمة سماي ولا إخفتت نورك

‏كثر ما اشتبهت الأحلام في عيني رؤى واضغاث؟
‏كثر ما اشتقت اعلمك بْظروفي، وآخذ بْشورك :(
‏- صالح بن حمد

العام يا ام سعود كان الحزن ضيف
واليوم دق اوتاده الحزن فينا

الحزن غيمه غيبت نجمة الصيف
وباسباب جوره ياجواهر شكينا

غاب الحبيب ولا بقى للهنا طيف
والآه يانوره تهاوت علينا

كن الظهر ياسعود فيه انغمد سيف
والصدر صار لكل الاوجاع مينا

اقول يا محمد متى فارق وكيف
واصيح ياسارة متى هو بيجينا

يانوف من عقبه ترى بسمتي زيف
جف الفرح من حولنا وانطفينا

أبوك يانواف ماله تواصيف
وانشد مشاعل كان مثله لقينا

والكون ياهيفا بلا ظله مخيف
واعذر بكانا يافهد لو بكينا

كان القمر، كان البحر، والمجاديف
كان الحنان اللي بحضنه دفينا

وكان الملاذ لشاكي الضيم والحيف
كم شال عنا وكم خذا عن يدينا

والله لو كان المقدر على الكيف
ماغبت يا نايف ولا احنا ظمينا

كل مارخيت الجفن جدت عواصيف
والشوق ثار وفارقتني السكينه

وشفتك مثل شمسٍ بروس المشاريف
نورك يناديني وانا اقول وينه؟

والقاك واصحى والمحك راقي النيف
حيٍّ ولو صلت عليك المدينه

أحسك بجنبي ماهي تخاريف
ياساكن عيون المهاة الحزينه

في ذا جلسنا بين صمت وسواليف
وفي ذا الممر اثنينا كم مشينا

وفي هالزوايا كم جمعنا مواليف
وياما على ذيك المرايا ضوينا

عشره عمر ماتنتهي بالصواديف
وذكرى تبي تحيا ولو مابقينا

الموت يانايف كتاب وتصاريف
وحنا بحكم اللي خلقنا رضينا
- مها السديري في رثاء زوجها الأمير نايف

"ياساكن عيون المهاة الحزينه" :( يووه

"كن الظهر ياسعود فيه انغمد سيف
والصدر صار لكل الاوجاع مينا " :(

صبحكم الله بالخير 🤍

مسند ذراعي وملجاي وأماني
والذرى اللي فـ كْنفه كنت آتفيا

هنا لاشمس تشرق،لاقمـر،لانـور،لامصباح
‏سـبوع،بلا ربووع،بلا أحـدْ لاسبت لاجَمعـه

‏شجبت البرد،واشعلت الملام،لـغيبة الاصباح
‏عسى الله يلعن خيوط الظلام،ويلعن الشمعه
- عادل الذيابي

علقتني فيك . .. رغبة نفسي الأماره
ولا أنا ماني بصوبك وانت ما انت بصوبي

قد سمحت من الزمان و مجريات اقداره
لين مالله عاضني عن شفي ومطلوبي

يفرض الواقع علينا الحب - مانختاره
وأنا ما أكذب عليك إني معك يادوبي

اخذني تفدا خطاك ، الخطوه المحتاره
معك يا ماعذب مشاويري وحلو دروبي

فإن تقاسمنا الغلا عشنا على تذكاره
وإن تبدّل ثوبك .. الله لا يبدل ثوبي

حاسب حساب الجفا منافعه .. وأضراره
وأدري إن ماهوب يسوى توبتي بذنوبي

لاتصدق بي كلام مدروين الشاره
وأنت ماحبيت فيني شي كثر عيوبي

السهر يفقد بريقه .. لا فقد سمّاره
والليال تغيّر المحبوب يا محبوبي

لو تعرف القلب وش يحملك من اسراره؟
كان ياللي جيتيني تختال ، جيت تحوبي
- عبدالعزيز العبلان

"السهر يفقد بريقه .. لا فقد سمّاره
والليال تغيّر المحبوب يا محبوبي" :(

عذوبه طاغيه

يا رقيقة مدّي الحسْن وتمادي
‏واشرحي لليل مفهوم الوسامه

‏وافتحي شبّاك تفكيري ونادي
‏كل نجم اخايله تارك علامه

‏اضحكي للغيم دام الجو هادي
‏مثلك انتي ؟ له غلاه وله مقامه

‏رافقتْك الشمس يا قمرة فوادي
‏لو تدور الارض ، عدّتك الملامه

‏القصايد مالها موقف حِيادي
‏في عيونك يعلن الشعر انهزامه
- أحمد صالح البحّا

ليه أحس إني أشوفك في جميع الأرجاء
‏في ضياء قمرا سماي وفي ورق كرّاسي

‏ من بعد ما غبت مدري من رحل أو من جاء ؟
‏شافعي لا جاء النهار وفي المساء نوّاسي

‏يالله بوجهك ولا لي غير وجهك ملجاء
‏دولة الأيام دارت في بلاط احساسي

‏مالقت بيض أمنياتي من حظوظي منجاء
‏أمنياتي من أميّه و البخت عبّاسي
- سعود مهدي

"المصيبة عظيمة جدًا والعطاء في هذا الوقت عظيم الأجر والفائدة، طُرق الدفع سهلة والمنصة رسمية، ساهم ولو بالنشر"

آل قصيدة ساهموا لو بالقليل وانشروها الله يعافيكم

وصلت التبرعات لـ78 مليون
"أحب المسلمين وتراحمهم، أحب قوتهم وفزعتهم، في مثل هذه اللحظات أتذكر قول النبي ﷺ ( مثل المسلمين في توادهم وتراحمهم وتعاطفهم كمثل الجسد إذا اشتكى منه عضو تداعى له سائر الجسد بالسهر والحمى ) إي والله ألم أخواننا يؤلمنا ومصابنا واحد وكلمة التوحيد تجمعنا"

اللهم صلِّ وسلم على نبينا محمد

وكيفَ ننسى بتلك َ الدار لمتنا
‏وهل بمأساتنا يحيى بِنا املُ؟ 💔

حياتي.. صيّرتني معدمة إحساس
مثل دَكّ الأراضي: دَكّت شعوري

بعد ماطاحت الأنقاض فوق الراس
تحت جنح الأخوّه عاش عصفوري

وروحي عالقه بين الرجا والياس..
تلاشت روعة الدنيا وطفى نوري

أنا، مات اكثري من كلمة اللا باس
معاذ الله من اوجاعي ومن جوري

رسمت ايامنا الحلوه بلا كرّاس
لعلّ الحلم ينقذ باقي كسوري

لو لأحلام عمري دوره ومقياس؟
قضيت العمر كلّه احتري دوري

انا، بنت المكان الهالك المنداس
تحت جنح الحروب انداست زهوري

ياكيف اشرح معاناة الوطن للناس؟
اذا ذنب البنادم عِرقه السوري :(
- مها