‏تلعب مهاديفي مودّه ومقدار
‏على شرف عرس الوطن سامريّه

‏وانا بدويٍ صلف واقدّر الدار
‏ولا العب سوا من فوق ظهر العبيّه

‏للشعر انا، لا طاوله كل مشوار
‏صدرٍ وسيع وفزعةٍ يعربيّه

‏يا موطني واللي خلق دمّي الحار
‏فيني على مشراف حبّك حَميّه

‏اقولها حادي وحاصد وبحّار
‏مافاح روض وماهمت عقربيّه

‏وعداد ماحوّل على العنق بتّار
‏وما صاح رمح وما اعتزت بك بنيّه

‏فيك السلام ومنك، ياشجرة الجار
‏ياوارفه يا باسقه يا ابيّه

‏ما الله خلق قاعك بساتين وازهار
‏نبتك مهار ونخلتك حاتميّه

‏ما زيّنك شيخك بلؤلؤ ومحّار
‏وبدفّة الماهود والعسجديّه

‏عقدك ثلاث قرون وشيوخ وامصار
‏وشرعٍ جويد وسنّه محمديّه

‏خطبك بالشلفا وقصّاف الاعمار
‏واعرس عليك بصملةٍ فيصليّه

‏شعبك مضاربهم على القاع مدرار
‏اعمارهم دونك غدت سرمديّه

‏من نجدك الشامخ مواريث الاحرار
‏وكر الكبار مروّضة كل هيّه

‏لحجازك المزموم عن كل الاقطار
‏مهد الرسول وبيت رب البريّه

‏لاقصى الجنوب منزّحت كل غدّار
‏جنود حدّك لا غدت عنجهيّه

‏وما لاح بطريف الوفا برق وامطار
‏وما سال مرجان الحقول النديّه

‏تقهقروا دونك مواقيد الاشرار
‏حمر الرقاب وثلّة الفارسيّه

‏ولا فاز بك غير الائمة والابرار
‏"حكّام نجد القطّع الصيرميّه"

‏تبجّحي في ظلّ سلمان يادار
‏ترثة هل العوجا رماح المنيّه

‏من دونك محمد ردع كل بيطار
‏وارسى بواخر عزّتك يا عذيّه

‏نامي قريره ما سبر حدّك اغوار
‏بشوتهم عن جمرة القيض فيّه

‏يا شامخه وان هيجنوا فيك شعّار
‏عاش المليك وموطني والحَميّه
‏-‏عامر بن مبشّر

استمتعوا بقراءه هذه الرائعة الوطنية، اطربتني جدًا

‏" قبلة قصيد "

‏بدأ وسْم الحياء ينفض غبار الغصن يا عصفور
‏بعد ما عاث به فصل الخريف وجفّف آماله
‏وبدأ عرْق الثرى يرقب رفيف البارق الممطور
‏على بِيد الظمأ جعْل النصيب يسوق همّاله
‏يسيل الصمت من غيم الكلام وحسّه المغرور
‏تحَت ليلٍ يِغَزل الحرف فوق لسان من قاله
‏على وضح النقاء زان اللقاء يا حضرة الجمهور
‏أبا أطرق كل عقل وكل قلب أبقى على باله
‏تخيّرت الوطن قبلة قصيد وغيمة من شعور
‏تحَتها الشعر يكسر دلّته ويسُوق فنجاله
‏رغم كل الظروف اللي بدت فالموطن المعمور
‏بقى ثابت على الساس القويم بهمة رجاله
‏وطن من دونه أرواح الولاء للموت بالطابور
‏عظيم ٍ ما شرى أصوات الولاء في كذْبه وماله
‏وطن يبني بميزان العدالة للحياة جسور
‏نسولف للسماء عن سيرته وتهلّ مختالة
‏كأنّ دروبه قلوب ٍعليها الناس سرْب طيور
‏يطير الطير والآمان في حِلّه وترحاله
‏وطنّا ما علينا زود فيك وما لحقنا قصور
‏يا أطهر من بنى في كلمة التوحيد منزاله
‏عدوّك يحترق ويموت في ناره وهو مقهور
‏وجاره يبكي ويلطم من الحسرة على حالة
‏نحبّك ويتفجّر حبّنا صدْق وعطاء موفور
‏وُعلى ترابك تصافحنا الحياة بأجمل إطلالة
‏بذرنا أحلامنا بَأرضك ومن خيرك نمَت بشهور
‏وطرقنا المستحيل بْعزمنا لين أشرع أقفاله
‏وش أجمل من شعور الانتماء للأرض والدستور
‏وُوش أقبح من شعور إنك تكون لموطنك عالة
‏يا رخصك يالضمير اللي تُباع وتُشترى بالدّور
‏تموت بْسجن حُـرِّيَـتْـكْ لا صادق ولا داله
‏ترى حب الوطن فطرة ولا يقبل نفاق وشور
‏ولا يمكن نموت من العطش في فيّة ظلاله
‏يطيح الشخص من عين الولاءْ ولا هو بمعذور
‏لا صار يشوف مقدار الوطن في قيمة رياله
‏نسى شمس الأمان المشرقة والبيرق المنشور
‏ونسى لذة منامه في ذراه وضحكة أطفاله
‏توسوس له شياطينه ويغرق بالجهل والزور
‏يقدّيه الوهم ومهايطه من خلْف جواله
‏عسى الله يبعد الفكر المشوّه عن بلاد النور
‏وتحَت شرع الإله يديم حكم العود وعياله
- خالد القصيّري

‏"وطن يبني بميزان العدالة للحياة جسور
‏نسولف للسماء عن سيرته وتهلّ مختالة"
الله الله الله على هالشاعرية

"غنّ ياوادي حنيفة ملى صدرك كلام
‏ذكّر الدرعية اللي مضى وقتٍ قديم"

ماشاء الله تبارك الله

سلسلوها من عقيدٍ في عقيد
من ثلاث قرون محدٍ حولها 🇸🇦

بين حي الله من جا وحي للفلاح
‏يفني الرجال حاله وماله وجهده

‏طبعنا من قبل يذن بلال ابن رباح
‏من رحل منّا يوصي على الطيب ولده

‏لابة ٍ تاريخنا من نجاح اليا نجاح
‏يزهم اطرفنا المغربل ويبشر بسعده

‏سدّنا كنه حدود الوطن ما يستباح
‏ينطق التاريخ عنا قبل لا تنشده🇸🇦
- واحد/محترم

كل يوم يعيش مُغرم ويتلاشى غريم
‏وهي مثل ماهي عذيه ومحمودة خصال

‏قد خطبها الود كل اصوكٍ شهمٍ كريم
‏وشامت لطيب المواقيف ولحسن القبال

‏من يد معزّي لـ سلمان بالثوب الحشيم
‏زفها لـ محمد " الشوق " واخذها حلال
- مزيد الوسمي