عصي البوح شيمتك السكوت وطبعك الكتمان
تحاصرك الطواري و الهواجس حارمتك النوم

يبكيك المطر ومداعب النسمات للأغصان
وفي صدرك كلام وفي عيونك لا أبتسمت علوم

تداري عن عيون اللي يشوفك ندبة الحرمان
وللحرمان في وجهٍ يصد مْن العيون وسوم

خذلك الظن يا موهوم لا تشره على الخلان
غفت عين العتب من بعد ما سالت دموع اللوم

هي الأيام ، هذا طبعها من سالف الأزمان
من المؤسف بعد رغد الطموح تدوّر المقسوم

یا ندمان السهر: ما فيه كاس ينسي الندمان!
قصيدة! سالفة! بُشرى تسلي خاطر المهموم

يداويني كلام وفي مُراعاة الشعور إحسان
عسى بعض الكلام اللي على هيئة حياة يدوم

تبي مني شْفوفي ما يبي كسرى من النعمان
عزيز النفس عن دربٍ يورده الهوان يشوم

وش مخليك تستحوذ علي! ياللي هواك إدمان
تجيني ذكرياتك جيّة الحاجة على المعدوم

عليك أنت البنفسج صار قطعًا سيد الألوان
طبيعي إن المكان اللي تمره دايمًا مزحوم

لك الحق تدلل في الهوى ويكون لك سلطان
شروط المنتصر ما تعرف الرأفة على المهزوم

قوامك آسر ورمشك عذاب ومبسمك فتّان
أحقيّتك في عرش الحسن موضوعها محسوم

اسود الشعر لجلك مثل ما سادوا بني مروان
معي ثروة قصايد فوق ما تملك بني مخزوم

عليك أملت قلبي و أمتلى قلبي بعدك احزان
و أنا من أيام عمري كنت أبي منك السعادة يوم

حبيبي صارت أيامي معاك أيام للنسيان
خيالك عن جحيم الواقع أضحى جنة المحروم
- سعود مهدي

كيف باسلاك وأنا مـ افقد بشر .. أفقد بلاد !
والحياه رغم اتساع الأرض يخنقني نسمها

مرحبا♥️

حطين بابل إرم وشيوخ نجد وسبأ
قريت عنهم بعينك يوم كحلك يسيل

وحلفت بأن الشعر في وصف غيرك غبأ
وبأن أكبر الناس حظ اللي بحبك قتيل

إن قالوا الشمس فيها منك قلت تهبا
ولو مانشمك قبل تاصل بليله قليل

ياحبي اللي غرامك في عروقي دبا
كريم انا بس مهما قلت أحبك بخيل

الصبح والليل ومسيان منك تعبا
إن جيت ضاعوا وصار الوقت طرفٍ كحيل

كم حاش رمشك وأستبد وسبا
وكم خلفت بسمتك مجنون عاشق عليل

وكم طفل باسك بحلمه وأستدار وحبا
وكم شايب أمسا شباب وجاك يصهل صهيل

مالومهن لو يغارن منك كل الضبا
مزيون فتان مترف ذرب هرج وطويل

الله ياجرحي اللي من زمان الصبا
القلب راوي غلا والجسم ضامر نحيل

حطين بابل إرم وشيوخ نجد وسبا
تاريخ أخونه وأكون لطرف عينك عميل
- عبدالمحسن بن سعيد

حطين بابل إرم وشيوخ نجد وسبا
تاريخ أخونه وأكون لطرف عينك عميل
- تعريف آخر للخفة :)

جميلة والله

"إن قالوا الشمس فيها منك قلت تهبا" اختيار هالمفردة تحديدًا للإنكار آسر جدًا!♥️

عفرى تقول مضايقتها الجدايل
قولوا لعفرى لاتقص الجديله

والنظره اللي راح فيها قبايل
هذا وهي طرقة غطاها ثقيله

وإلا ثغرها مكنز ٍ للهوايل
مايلحق يرد الشهاده قتيله

تجلس ونلقا عن قمرنا بدايل
تاقف ويكره كل خل ٍ خليله

عفرى وترتج الكبار الثقايل
والنور يرجع للسراب ويشيله

عفرى وتبدي من دلعها خصايل
ورد ٍ جمع قطر الندى في شليله

عفرى واشوف الفجر راح يتمايل
والليل راح بسكرته يرتكيله

عفرى واشوف طويق ذايب وسايل
والرمّه موقف يبيها تجيله

عفرى وينعس جفن رفحا وحايل
ويجي لهامة نجد قصه طويله

والحب مابه عند عفرى جمايل
ياوالله اللي شوف عفرى جميله

وعفرى تقول أحلى بدون الجدايل
قولوا لعفرى تنقض (أم) الجديله :)
- عبدالمحسن بن سعيد

ندااء خاص لـ عفراء

مساكم الله بالخير♥️

لو قلت ،بالنجم اهتدى من تاه و أعياه السهاد
البارحة والريح ما تبّت عن اطرافي يدا

من يهتدي يا سيّدة للضوّ من تحت الرماد؟
من يستمع صوتي؟ ومن يحبس عن الصوت الصدى؟

يا آهتي جيتي تعريني من ثياب الحداد؟!
أنا الحداد اللي على وجهي من غيابك ، بدا

جيتي مطر يستغفر الرحمن عن ذنْب العباد
وانتي ذنوب عباد ما مرّوا على درب الهدى

جيتي من اقصى حنجرة فلاح في موسم حصاد
اعياد شكر و ذكر و خشوع و تناهيد و حدا

فدا ، يغني ما غدا للطير ؟ في يوم المعاد
ان عاد ؟ ما له غير أغنّي له، على عيني فدا

جيتي غرور ام بـ طفل يكره يحاصره المهاد
كانت تغنّي له عشان يدوزن الخطوة ( هدا

هدا )، وثارت، ما هدا باله من الدنيا ..عناد
استقبل الشمس وحذف بـ عيونها (سن) و عدا!

لليل؟ للمجهول؟ للبرد؟ لـ عيونك؟ للبعاد؟
للضفّة اللي ما لعابرها من الضفّة جدا؟

والله تشتّتّ اجمعك منّك وفي الظلما بلاد
مافيه للظامي بها ليلة يبلله الندى

أنا اشتهيتك ( غطرفة) تفهق عن الليل السواد
آه اشتهيتك ( رقص ) يتسلطن على أكباد العدا

أولاد ابعتقهم معك لله عن ظلم القياد
يمكن تكون أيامهم ، وجهك و صوتي و المدى

لله أنا ، من ينزع اطرافي من اطراف البراد؟
النجم تاه وتاه من بالنجم يا رب اهتدى !

أنا (انطفيت) وما بقى تحت الرماد الا رماد
أنا (انتهيت) وما على شفاهي حبيبي ، ماعدا

يارب ، عطني من تطرف ليلتي (ساعة حياد)
ما انتظر فيها ولا أفقد من الدنيا ، حدا
- عبدالله الكايد

في هالقصيدة دهشة منقطعه النظير

شكر خاص لنجود اللي تشاركني دهشتها دائمًا♥️

استمتعوا

"يارب عطني من تطرف ليلتي (ساعة حياد)
ما انتظر فيها ولا أفقد من الدنيا ، حدا" :(
يااا الله

من غيبتك وآنا على حطة يديك
لا الصدّ نسّاني ولا الحبّ انعدم

خذني من يدين الحنين لراحتيك
واستوقف اللحظات يا أعذب ندم

من مطلع الشمس لتواريها احتريك
والشوق ولّع جوف صدري واحتدم

الخطوة اللي تاخذ العاشق إليك؟
يااااكم رجيت اترك بها جرة قدم

وان ظلت دروبي؟ ابرجع واهتديك
ما زلّ قلبٍ في مداهيلك صدم

آنا على بهجة محيّاك افتديك
وابيع شاريني واصلّح ما انهدم

جيتك لجل ابداك ماجيت انتهيك
لولا الغلا ماجيت صوبك من عدم

خسارتي لك من قبل ما افوز فيك
-ماقيّد الحرّه سوى هذا الندم-
- مها

"قول وش يرضيك يا ملح الدلال وعنفوانه
‏أنت لو تطلب محلّ البدر، جلستك محلّه"

حبيبة خاطري، ماعادنا حيّيين
‏بعد مات الشعر متوسّد ضلوعك

‏انا ذاك الشعور المرهق المسكين
‏تعبت اضماك واترجّاك وآجوعك

‏انا ماخاف عذري كان ما ترضين
‏انا خايف على خدّك من دموعك
- أحمد البحّا

اللهم صلِّ وسلم على نبينا محمد