مساكم الله بالخير♥️

الصدور اطرافها متراميه والليل هادي
‏لايروح الليل قبل استنطقه و اخذ جديده

‏كل ماسقت القدم بين المبادي والمبادي
‏اعترض لي طاري الشوق وخذيت الشعر بـ ايده

‏ارتجل لـ الشرّد من الصيد عن صهوة جوادي
‏واعتق اللي من سهولة صيدته كلٍ يصيده

لاخذتني غايتي و ابطيت يا غاية مرادي
‏والمسافه كايده والحب باقي له شريده

‏احتريني والبسي لي كل لون الاّ الرمادي
‏الرمادي كل ماشوفه عرفت انه مكيده

‏ودي اضحك من بعد طول المعاتب والتمادي
‏ضحكة اللي يضحك من ادناة حاجه من حفيده

زمليني.. من هواجيس الغياب اللا إرادي
‏ان ذبحني طاري الفرقا وش انتي مستفيده

‏واعبري بي لاغدي عادي و انا مانيب عادي
‏الحريص تورّده للموت غلطته الوحيده

‏ياعنيده مامعي صبرٍ مثل صبر المهادي
‏لاتعذرتي مثل عذر المعقّد بالعقيده

في رجا الله مايخليني لـ جِدّي واجتهادي
‏مارجيت الا وعده ولا خشيت الا وعيده

‏لا استوت في عيونك الثنتين قربي وابتعادي
‏والظروف اقسى من الماضي على اللي يستعيده

‏المصافح بالقلوب اصدق من مصافح لايادي
‏اسمحي لي كل يوم اصافحك وانتي بعيده

لاتحاتين الضما والجوع في رحلة جهادي
‏الحظوظ مقسمه والذيب ماياكل وليده

‏شاعرك لا هاموا اصحاب الشعر في كل وادي
‏مستعد يوقّف الدنيا على مطلع قصيده
- صالح النشيرا

يا بعد كل عنق ويا بعد كل جيد:
‏ويا بعد كل جرحٍ فـ الضماير ندب

‏سو ما ودك تسويه !! بس الاكيد:
‏سيف وصلك عدال وسيف صدك حدب

‏آتحاشى لـ جيت أوصف عيونك وأحيد:
‏يا وسيـع العـيون .. ويا طويـل الهدب

‏لو يشوفونك اللي ودهم .. بالقصيد:
‏كان فاضت مداينهم .. قصيد وأدب
- حمود سرحان

العشب أذن الثرى والغيم صوت السما
هي كلها كلمتين وكل قاع ٍ تسيل

حبيبتي كانك الما قلت كلي ظما
وإن صرتي أنتي ظما أصير أنا سلسبيل

من قال بس إن زينك فيه كن وكما
ياروحي أنتي مثال لشي ماله مثيل

ياعل عين ٍ ترف بحضرتك للعما
وياعل عز ٍ مهو ماطاك يمسي ذليل

ماشفتي النور في حضن الظلام أرتما
مثله ترى الحب في حضنك يدوّر مقيل

خليك من كل ما أين ما طالما
حتى عيون المحال تشوفك المستحيل

الزين فالناس قاع وزينك أنتي غما
وحتى على النور لك ولظل ظلك جميل

ولو مامسحتي جبين الشمس أبد ماحما
والورد إلى شم عطرك قام عوده يميل

والخلق من طين ونور ونار وأنتي بما
والا الهوى به خلق لي هالخفوق العليل

شفتي الى من كبر شوق الحبيب ونما
تلقين لمعه لدمعه في عيونه تخيل

حبيبتي كان قلبي بالضلوع احتما
لك رمش من حربته مايسلم الا قتيل

والعشب وجنة ثرى والغيم شفة سما
هي كلها بوستين وكل حبٍ يسيل
- عبدالمحسن بن سعيد

ياااه ما احلى القصيد بعد

سولفي والأهلّه تنور وتستدير
أضحكي كل غيمه تنعصر لليباس

فتحي كل نورس خطوتين ويطير
غمضي والبنفسج بيتثاوب نعاس

علمي من لمحك بقل حظ الضرير
علمي من يشم السكر من غير كاس

شرّهي ظل ظلك للنهار الفقير
خيطي برمش عينك ليلٍ أبلاه ياس

وري الطول طوله كيف يصبح قصير
أطوي الباس ضعف وفلّي الضعف باس

مدّي لضيف شعرك فوق رمشك حصير
جزّي الخافق المخضّر من غير فاس

كوني الحب الأول والغرام الأخير
كوني لكل فنّ المنتهى و الأساس

أقربي كود بعدك يقرب ويستخير
أمشي وكل ماطآ يدعي الله يداس

أنفضي بعض شالك فوق وجه الغدير
يمطر الغيم عطر وتنبت الأرض ماس

ولو تحب النجوم أصبعك بس الصغير
يمسي البحر فضّه والشواطي نحاس

أعذر السمع يظما دام صوتك خرير
ياللي الكبر لك ما هقوتي فيه باس

ساقك اللي يسوق الما بعرق الضمير
عقب ما أمسيت ميّس من حياة الغراس

وان غدا الشعر غيرك ماورا الشعر خير
يامن رضاك يسوى عندي ألفين راس
- عبدالمحسن بن سعيد

عودة برعاية عبدالمحسن بن سعيد

للطرب معنى وانا فيني طرب
للحزن دمعه وانا كلي حزين

ياعرب خلوني احيا ياعرب
عاشق والله يعين العاشقين

والظمي من همه وياسه شرب
والوفي ماغربله كود الحنين

يانخيلٍ ظامها موت الكرب
شامخه ماودك الخافي يبين

ايه اناادري بالفراق اللي قرب
وأعرفك لامن طرالك تبعدين

والشعاع اللي قبل يشرق غرب
كنه الضحكه على ثغر السجين

والرجا لامن تغافلني هرب
والرضا في عبرة الحسره دفين

والحزين اللي من الهم اغترب
يدري انك لوصدقتي تكذبين

كن قلبي طفلٍ اخطا وانضرب
وكنك الحكمه عقب طول السنين

آه لولا الدلو وش يملا القرب
وألف آه ان مارضى القاسي يلين

للطرب عبره وفي صدري طرب
للحزن نبره وانا صوتي حزييين
- عبدالمحسن بن سعيد

"كن قلبي طفلٍ اخطا وانضرب" الوصف يصيّح

الشط شبّك يدين الموج بيدينه
يارقصة العشق بين الملح والدانه

والشمع من حب دمعه شب في عينه
والليل مجنون يعشق صبحي جنانه

واللي نسى الورد عقب كفوفها لينه
منها ترى الشمس مطفيّه وخجّلانه

فرعونة الموق والغنج وسلاطينه
حوريّة الزين وبحوره وخلجانه

في خدها ناسي المخمل عناوينه
وفي فمها ناسي الرمّان رمّانه

وإن سولفت يسأل الليل القمر وينه؟
وإن سلهمت ضيّع العصفور جنحانه

تضحك ويبدا الضيا يعتق مساجينه
وإن صحصح الكحل تبقا العين نعسانه

من صافح كفوفها تزهر شرايينه
ومن شافها شاف وش عذروب خلانه

تنزل على اللي فخربه ناس راقينه
وماداسته يرتوي والأرض عطشانه

مدري هي انسان غير الناس تكوينه
وإلا انها نجم ملّ النور بأوطانه

والزين كله لها أو فوق نصفينه
والناس فيما بقى خشره وفرحانه

بس وهنا سوّر العاشق بساتينه
وطبعا كذا الملح ذاب وغاصت الدانه
- عبدالمحسن بن سعيد

"يسعد صباحك، يا بعد كل عمهوج
يسعد صباحك، لو غشا الصبح ظلما"
- مساعد الرشيدي

وراء كل مشرق شمس ومداعبة نسناس
‏على غرّةٍ محبوسه، وضحكةٍ حرّه

‏أوقّف بفوضى نفس، ومغالبة وسواس
‏وأشوف الحقيقه مرّه و وقفتي مرّه

‏يا ليت الحياه تبرّني.. برّها بـ الناس
‏ولك وجهي إن مالي سوى وجهك أبرّه

‏أنا حاشد شعورٍ حقيقي، وشِعْر، وباس
‏وراء كلمةٍ بقولها في العمر مرّه
- ماجد النفيعي

"رميت وجهي على كتفك شوي، وغفيت
والغفوة اللي ثواني فوق كتفك: عُمر

لو إنك من أول الدنيا معي، ماشكيت
" مافاتنا نستحقّه بس ما الله أمر "

لو مرّ عمري معك برد وسلام اكتفيت
هذا وجنبك ربيع العمر عيّا يمر

دامك معي، لايهمّك لو ضحكت أو بكيت
كتفك لحاله يكفّي… لين يقضي العمر"

رائعة جدًا

مساكم الله بالخير آل قصيدة
اتمنى انكم في أحسن حال

‏حقك علينا كلّنا يا فلسطين
‏ماقد نسينا القدس بس انتنيسى

‏يالله بـ صبحٍ يشبه لـ صبح (حطين)
‏قبل السماء لا تعطي الأرض عيسى
- محمد ال شواي

آمين

"جهاد الكلمة قد يكون أعظم من جهاد السلاح، ومن أعظم الجهاد اليوم؛ جهاد أعداء دين الله اليهود وإخوانهم المنافقين، فلربما كلمة أحيت أمة، ولربما كلمة أيقضت شعبا، ولربما كلمة أزالت باطلا، ولربما كلمة أرعبت كيانا فاسدا غاشما في أرض ليست له!
‏فلا تبخلُ بالكلمة"

طالما حرّموا امتلاك الخناجرْ
‏يا أولي الحقّ ناضلوا بالحناجرْ

‏وتراصّوا قصيدةً جنبَ أخرى
‏وامشوا في الأرض ثائرًا جنبَ ثائرْ

‏واخلعوا جبة المخافة عنكم
‏جوهر الشعر في اقتحام المخاطرْ

‏أحرقوا الأرض إن تعدّت عليكم
‏وامشوا فيها كالوحوش الكواسرْ
- معاذ الجهني

إصبري ياشجرة الغرقد يبي ينطق نخلنا
‏الوَعد حقٍ على الموعود والموعود صابر

‏لو تقطّعنا قطع ماينقطع بالله املنا
‏واليدين اطول من القانون واعناق المنابر

‏ماسكين العروه الوثقى وبالله اتكلنا
‏العظيم القاهر الجبّار تخشاه الجبابر

‏زايله يالزمره النجسه وكاد ولا احتملنا
‏كاشفين ان زايف الاعلام غير عْن المخابر

‏ماجهلنا خوفكم والحرب دربه ماجهلنا
‏صبركم ويصير مايُسمع من اصوات المحابر

‏وفوق دبّاباتكم بكرا يبي ياطا جملنا
‏وفوق طيّاراتكم طيرٍ من آبابيل عابر

‏وش لنا بالدين كان القدس ما اهله بـ اهلنا
‏الشَرف في عيشها و أشرف لو اسكنها مقابر

‏الوعد بالنصر والعزّه لنا والجنّه إلنا
‏وانت وجهك غابر و فالآخره لك وجه غابر
- بلَج
‏⁧ #طوفان_الأقصى⁩