ضحكات الأيام لـ إلحاح الرجاء عين
‏لا الأرض أرضي ولا صدر السماء كوني

‏ما عادني بـ الحشيم الهادي الليّن
‏أركى علي الزمان و ثقلت متوني

‏يا رب هذا الحزن بالوجه لا يبيّن
‏وش عذري من الشموخ ليا أنخطف لوني ؟!
‏
‏و أنا إن شكى لي صديقي همه الهين
‏بانت على حد رمشي دمعة عيوني
- عبدالله فرحان

‏الليل حالك والمساري موحشة والدرب خوف
‏والذكريات أشياء يستعصي عليّ إتلافها

‏أثر الأماني وارفات ظْلال دانية القطوف
‏والأمنيات أكثر ما يخشى الحالمين ! إسرافها

‏على رصيف الصبر ملّ المنتظر طول الوقوف
‏وين الحياة ؟ اللي تخيّلت ! ولمحت أوصافها

‏ حسبي على من دمّر آمالي وأنا عيوني تشوف
‏كم بسمة ٍ كانت طمأنينة وصرت أخافها

‏رُحماك يا غفّار يا ملجأ عبادك يا رؤوف
‏يا مجري الأقدار هبني من لدنْك ألطافها

‏أنا رواية حلم منسيّة على غبار الرفوف
‏أنا قضيّة تطلب مْن أهل العقول إنصافها

‏أنا قصيدة عشق ما مرّت على قلب العيوف
‏أنا أراضي جِرد ما غاث السحاب أطرافها

‏لي روح تبحث عن سكينتها من إرهاق الشفوف
‏يا مِثقلين اللوم روحي فاقده ميلافها

‏لي قلب ما عادت تسلّيه إبتسامات الهنوف
‏ولا القدود المترفات المايسات أعطافها

‏ياللي تزعّلك المواعيد وتراضيك الصدوف
‏وش يرضي اللي جاته الحاجة بعد ما عافها ؟

‏لا تبتئس لا خانك الواقع وعادتك الظروف
‏الناس من عاشر رماديها ظلم شفّافها

‏كم زلةٍ من صاحبٍ طافت !! لو إنها ما تطوف
‏وكم هقوةٍ كبّرتها راحت !! مراح أسلافها

‏شفت الحقيقة يوم حطّيت النقط فوق الحروف
‏بعض الحقايق ! ودّك إنْ المنصدم ؟ ما شافها

‏لحدٍ يعاتبني ويا معاتبني إنْ عاتبت ! روف
‏مشاعر الجافين ما أحب أكسب استعطافها
- سعود مهدي

بنت الشعر يا سلسبيل الحسن وايات الجمال
لدّي عيونك وانثري من مترف احساسك شعر

حيكي جراحك بالقصايد تبرى ياعين الغزال
لا تتركين بداخلك احساس ينهش بالصدر

وانا اعتذر عن كلّ جرحٍ كانت آلامه جزال
خلّا قلمْك -ينوح حزنه- للملا بْليّا ستر

عدّي قصيده من هجا ولا عتب ولا جدال
استرسلي تبرى الجراح وينبت فـ قلبك زهر

منتي من اللي يكتب ابيات القصايد باعتلال
مسترسله، ابعد من الشعر الثقيل المنكسر

كنّ الحروف تراقص يْدينك وتُكتب باعتدال
تخاف لا توطى على اطراف الشعور المنتثر

عدّي قصيدك واسرفي بالقول يا أصعب منال
مابي أفوّت من ثوان العمر -ساعه- واخسر

حتى سكوتك .. لو تحاليتيه واسرفتي الدلال
-لجلك فقط- قادر اعيش العمر كلّه انتظر

يا مذهله، لو غايتك ابعد من شعور انذهال
الناس تسأل كيف قمرا تكتب احساس البدر؟

سبحان من جمّع مزايا الخلق في أكمل مثال
اعجوبةٍ فالحسن والمنطوق واعجوبة فكر

يانجمةٍ جارت على الصبح وتجلّت باختيال
قولي لنور الشمس لا يقهر عصافير الفجر

زال الضيا ومشراق وجهك غير قابل للزوال
ثابت مثل دهشة قصيدة كتبت لاخر شطر

يانجمةٍ شعشع سناها وابلجت منها الليال
جودي لسمّار الليالي من تعاليل السمر

لدّي النظر يام العيون اللي نهايتها احتلال
ملامحك لا شافها المخطي يبادر بالعذر

انتي اليقين الراسخ اللي ما يشوبه احتمال
وانتي الثواب اللي تجلّى لي بعد شدّة صبر

من حقّق الله حلمه ونالك رغم أنف المحال
يستاهل يعيش الحياه وبداخله نشوة نصر

يامترفه، كلّ الكلام اللي على البال.. ارتجال
ما ضاعت علومي، ولكن يوم شفتك؟ انهمر

في ذمّتك انتي قصيدة صافحت كفّ الخيال؟
ولّا قصيدة صادقة خلقت على هيئة بشر؟

منطوقك العذب المعتّق فيه من وجهك خصال
كنّ القصيد مقاسمك نصف العذوبة والسحر

وجهك غواية للهدى؟ مدري هداية للضلال!
محتار فيك انسان ما قد حار بين أمر وأمر!

يا غاية السائل ويا أعذب إجابات السؤال
تدرين بانّ الشعر في حضرة جنابك منتصر؟
- مها

والله يا آل قصيدة احبكم جدًا ♥️♥️♥️

مساكم الله بالخير♥️

ميّلت بك ذاريات الريح يالغصن المدلّي
وأنت غصن يمرّك الطرقي ويشره ويتشرّه

ولا أنا قد مرّني عمري وأنا جالس محلّي
ألعب الطاروق، وأعدّ النجوم من المجرّة

لا توصيني على اللي فات يالعمر المولّي
السنين تدور، والأحداث ما هي مستمرّه

أتداعى، لا هدأ روعي ولا عيّنت خلّي
وأفهق شماغي ، وأجرّ الصوت، وأفك الأزرّه

ما تنسّيني وجيه العابرين الغايب اللّي
باقيٍ في عيني طيوفه وفي قلبي مقرّه

وش عليه إن غرّه المحبوب وأغراه التغلّي
ذاخرٍ له من سنيني عقد ، ومن الأرض درّه

لي على الأطلال وقفة خاطر ولحظة تجلّي
وشرهةٍ كم ضيعتها الفاتنة، في كل مرّه

أتطوى بين طيات الغلا، وأضيع كلّي
وأتجرع سكرة العشاق، لين أموت حرّة

للجديل اللي يحجب الشمس، ترحالي وحلّي
سرمديٍ كل ما فل المساء.. لله دُرّه

لا تزعلك الليال السود يالريم المفلّي
أضحك أنت، وتضحك الأيام وتعود المسرّة

إن فقدتك في مشاوير السنين البرق، من لي؟
وإن ذكرتك ما علي من الزمن، خيره وشرّه
- مشاري محمد

جميلة جدًااا

حبيبة عيوني، وأول الدرب والمشوار
معك يا حلو دربي ويا خفّ خطواتي

على كثر ما أخاف النهايات بإستمرار
أنا مؤمن أنك باقية في نهاياتي

أشوف الوجيه العابره مع طريق المار
ولا زال وجهك في جميع إتجاهاتي

وش البال؟ لو مافيه طاري ولا تذكار
وش الحب؟ لو ماكنتي أول علاقاتي

بعدك السماء والأرض والدار وأهل الدار
مجرد فراغ يمرني في فراغاتي

ماعادت طواريق القصيدة محط أنظار
بعد غابت عيونك عن آخر كتاباتي

تركتك على مَرْأىً من الحظ والأقدار
ولا جابتك "صدفة لقى" في محطاتي

أحبك جنون، ومرحلة طيش، وإستهتار
وأشوفك سوالف عزلتي وإهتماماتي

لو إن الليالي جارحة، والزمن دوّار
يصبّرني أنك، فرحتي وإبتساماتي

تخيّرني دروب المساري، عشان أختار
وأنا ما بغيت الّا دروبك.. يا مولاتي

أخاف إنهزامي في حياتي وأخاف النار
وأشوف إنهزامي معك مثل إنتصاراتي

وأعاف العيون الناعسه، وأكره التكرار
وأعرف أنك آخر ما بقى من خياراتي

عليك المشاعر صادقة، والغلا مدرار
وعلي أكتبك في كل بيتٍ من أبياتي
- مشاري محمد

صبحكم الله بالخير♥️

نامت عيون الخلق وانا كل برق آخايله
على رجا سحابة مدري متى وسميّها

واللي جمع بك غيهب الظلما وشمس القايله
الروح قبلتها فياض رياضك وواديّها

من شاف عودك والغصون الثابته والمايله
ماهو بحاجة شجرة الوادي ولا قمريّها

للحسن هيبه تتعب اللي يتعبون الطايله
لوما على اهله تاج مُلْك ولا على كرسيّها

عليك عينٍ تجرح العاشق وعين تحايله
مابين ساحل واقع عيونك وغبة غيّها

كم مرةٍ جيتي وفي صدري كلام ٍشايله
لكن لاجت عينك بعيني قلت : يالله حيّها

وكم مرةٍ جيتك وانا اللي ماعرف وش جاي له
وليه اعرف دام القطوف الدانيه في فيّها

اليا ابتسمتي ما انشد الايام وش هي قايله
واليا تضايقتي لابو الدنيا ولا ابو حيّها

يا اغلى متاع النفس من كل الحياه الزايله
يالجانب المشرق ويا ملح الحياه وضيّها

احبك : اصغر من شعورٍ بالضمير اشايله
عجزت لا أصل له بفصحاها ولا شعبيّها

غيرك كثيره عندنا مثله مثل قلايله
والا انتي اللي دون واجدها يسد شويّها

يا سالفة كل البنات وكل جلسة عايله
تغار منها البنت والرجال يبغى زيّها
- سلطان بن بتلاء

يا قلبٍ عثا فيك الزمان .. وطواك الياس
لا تبدي ملام .. ألا على وضعك الحالي

تشوف المحبة شي اساسي على أي أساس
ما دام المحبة ... تدبل الكبد ، من تالي

تحدك على الضيق وتحدك على الهوجاس
وأنا كل ... ( داعي شوق ) يثّر على حالي

يهوّن عليّ الشعر ... لا انفضوا الجلاس
يضمّد جروحي و يتطمّن على أحوالي

ياشين القصيد ان صار خالي من الاحساس
يمر ( المسامع ) عجل ، ويموت طوالي

إذا ... ما تحرّك منه قلب و تمايل راس
ما يطري على مهموم ... ولا على سالي

يقوله من استولى على القصر والحراس
قبل يصدر المرسوم في حضرة الوالي

عطاه الله من الشعر ما يحبس الانفاس
يسولف على الشعار من برجه العالي

أحسب إني أسلا كل ما ذعذع النسناس
تعبت أبتسم وأرجع على نفس موالي

أثر ما يسليني كلامٍ ما بين ( أقواس )
عن الصورة ... اللي ما تخليني لحالي

عليك السلام الوافر اللي بدون قياس
ياا عنقٍ عليه ... ( معلّقٍ ) باقي أمالي

مع إنك بعيد وطرقتك تتعب العساس
أنا أشوف حلّي فيك .. وأشوف ترحالي

إذا ما بقى لي عودك المبري المياس
من أحلام عمري ما اعرف وش تبقالي

يطلّ القمر ولا يغيب القمر .. لا باس
الأغلى تهون بـ حضرته ، قيمة الغالي

عن الطلة اللي تنتظرها جميع الناس
أنا في انتظار ... الطلة ، اللي على بالي
- عبدالله السراهيد

رائعة.. للغاايه

اللهم صلِّ وسلم وبارك على نبينا محمد

يارب غصنٍ بـ صدري لو لمسته وقع
‏أرسل لي مْن الغمايم ما يبلّه وأعيش..
‏ٓ
‏وأزرع بصوتي سوالف ما سقاها وجع
‏من ضحكة الغيم، والا من حمامٍ وريش
‏ٓ
‏لو يلمح الصبح دمعٍ في كلامي، رجع.
‏لو يرجع النور، ليلٍ في خيالي يطيش!
- بدور

يا ريح.. وش قلتي على قلبي الهش
حتى مسح في ثوبك الدمْع مني

لي عام لا سيّل شعيبي ولا نَش
متماهيٍ بين الهنا و التهني

هي روّحت حلو الليالي على وش؟
زيدي عليّ مْن اللواهيب، غني

ودي أصيح بكل ما أشعره: اششش
أنا تعبت أجاهد الشعر عني

وتعبت اخيله كل ما بارقه بش
في عاذقٍ كبّ النخيل وسكنني

والشعر هذا الشعر حبلٍ من القش
موتي وميلادي وخوفي وظني

ابكتبه: دمعٍ عصيٍّ على المش
وابطلقه من كل قيدٍ سجنني

يا ريح كفّي.. ما مضى منك طش
غيمٍ علق بين الجفا والتثني

اليوم راجع تارك العش للعش
في مشهدٍ ما يشبه إلا التمني
- محمد الطريسي

"والشعر هذا الشعر حبلٍ من القش
موتي وميلادي وخوفي وظني" :(

اللهم صلِّ وسلم وبارك على نبينا محمد