آسفك لا تحسب انها ديّتك لازهاق روح
من متى كان الأسف يشفع لجرم الآدمي ؟

الطريق اللي خذاني في دياجيرك " ينوح "
و كلّ خطوة سيّرتني لك ثمنها -من دمي-

الندم لو له ملامح ؟ بانت فـ وجهي جروح
مثلما بانت محبتْك - فـ حلايا مبسمي -

من يصدّق بانهياري خلف هالوجه الصبوح ؟
وضحكتي تسبق بكاي وبسمتي تسكن فمي

آتصبّر و آتأسّى في نبي الله نوح
واضحك بقلبي لو الحزن بجناحي مرتمي

كنت اخاف الصمت حتى صار يقتلني الوضوح وامتنعت مْن الكتابه لين ما ضاق نْسمي

القصايد يوم كانت تشرح احساس و تبوح
آتهجاها … مَـ كنْها كتبت بـ خطّ قْلمي

انطفى وهج الأمل بـ عيوني ومات الطموح
وسيقت ايامي على الحسره وانا سقت قْدمي

آتحاشى - ذكرياتك - بالتناسي والنزوح
وآتوارى عن حقيقه قيّدت لي معصمي

كلّما عزّمت أنسى رايتي البيضا تلوح
والحلول الممكنه خلف القصايد تحتمي

مشكلة عقلي : نبيه ومشكله قلبي : سروح
و بين هذا و بين ذاك آتوه وآجن واعتمي

آه من طيش الهيام ونزوة القلب اللحوح
اكسروني ؛ كسرة الابيات بلسان اعجمي

السؤال اللي سلب لُبّ الإجابه : وين اروح ؟
و غربتي غربة مشاعر بس لقلبك تنتمي
- مها

تعبت اكتب مراسيلي عشانك والشعر ينشلّ
دخيل الله من حرفٍ تعبت اعالج كسوره

اخاف انطق لك آحبك واصرخ في وجيه الكلّ
وعصافير الهوى تصحى من الاحلام مذعوره

يكيف اقدر على حلّك اذا انت المشكه والحلّ
وحلول العاشق المُثلى تحت رحمتْك مأسوره

انا ما جيت احبك بسّ، انا جيتك بـ ليت وعلّ
لعلّ الله يكتب لي معَك في هالعمر دوره

مهاتك تحتري من جرهديّ الوقت ينبت فلّ
لو سنين العمر في غيبتك ماهيب معذوره

تمنّيتك.. وانا ياكم لي اتمنى شموسك ظلّ
وعلى رفّ الأماني باتت الاحلام مهجوره

بعد ماطارت طيور الهوى بارزاقها يا خِلّ
كبر فيني الشعور وطيّر مْن العشّ عصفوره

تهاجر لك مشاعر قلب حَبّك فارتحال وحِلّ
معَ كل انتفاضه شوق مغبونه ومقهوره

بعد ما دارت الايام..واحساس الوله ما قلّ
هنا..خلف الضلوع العوج قلبٍ تربكه صوره
- مها

ضيّعتني
والدرب توّه ما بدأ
ناديت لك ..
والصوت يجرحه المدى
هيجنت لك
لين السحاب
خان السراب
وطاح الندى
سمَعْتني ؟
غنّيت لك واوجعتني
ردّيت ؟ أو ردّ الصدى :
"عالي السكوت ، ما أسمعك"
رحت و رحل صوتي معك
يا الله فدا ..
ماهو مضايقني الرحيل
أو عتمة الدرب الطويل
ضايقني انّك يوم رحت
رحلت .. ما ودّعتني
يا الله فدا
ما عاد لـ عتابي جدا
دامك مشيت الله معك
وروحي معك
إعذرني ما راح أتبعك
والّا اقنعك
قلبي على البعد اهتدى
يا الله فدا
الذكريات اوفى من احباب العمر
دايم تمر ، وتصافح يدين القمر
لا خانت يديك اللقاء
"ما لـ الجراح الّا الصبر"
على العموم ..
ما جيت لك بـ آرجّعك
جيتك عشان آودّعك
وغنّيت لك ضيّعتني
يا الله فدا
ليه اعتذر ؟
"كان الفراق اللي تبي ؟ الله معك" !
- فيصل القاضي

ارحبي يا اللي تزاحم لك اسراب القلوب
‏كنها تزاحم الناس في مشعر مِنى
‏
‏اشكريني يوم احنّك من كبار الذنوب
‏واعذريني يوم أزيدك مع العنوة .. عنا
‏
‏الضمير الحيّ نوعٍ من أنواع الحروب
‏" يا ضمير مدور المصلحة نوم الهنا "
‏
‏ما قدر يكسب محبّتْك يا الظبي اللعوب
‏غير أنا وأعوذ بالله من كلمة أنا
‏
‏ان تركتيني قتيلٍ على مفرق دروب
‏اكتبي فتّانة العصر مرّت من هنا
‏
‏واحفري قبرك وزاني وطيحي دوب دوب
‏ودي أقابلْلك لا قمت في دار الفنا
‏
‏والله لا وجهك بعادي ولا قلبي بطوب
‏مير ميلي لين اشوف المنايا والمُنى
‏
‏لا تشكّلتي مع الريح وانسام الهبوب
‏ما لقيت مْن العبارات غير الله لنا
- جمال بندر

ما كنت اعرف ان المكان اللي يضمّك موطني
وان البلاد الخاليه منّك .." محطات انتظار " :(
- مها

صبحكم الله بالخير♥️

أنا لجل الطموح اللي يقديني اعيش الحلم
تغانمت الحياة وعشتها عن رغم ما اكره

وأنا لولا الطريق اللي سلكته في سبيل العلم
رفضت احيا على شفات الأماني احتري بكره
- مها

مرحبا آل قصيدة

اللهم صلِّ وسلم وبارك على نبينا محمد

" يا ابن آدم من بغى شيٍ وصل له
‏بالعمل والجهد ماهو بالتمني

‏تحسب ان دنياي دايم مسفهله
‏وتحسب اني مستريح وتحسب اني

‏والفضل للي مظللنا بظله
‏يقدر الواحد من الضيقه يغني !

‏فكّر بـ مستقبلك دقه وجله
‏وانتبه له واصرف التفكير عني

‏ما انت حاسدني على ما اعطاني الله
‏لو عرفت اللي خذاه الله مني ! "

مرحبا آل قصيدة

ربي اوزعني على شكر النعم صبح وعشيّه
سقت لي محبوبي وظللني بدافي ظلاله

ادري ان فيني غرور.. وصعبة و عسره وابيّه
وما قدرني غير شخصٍ اعشقه حدّ الثماله

افتخر بإنّه حبيبي وإنّ ماااا فالناس زيّه
راس مالي هو مثل ماني مُناه و راس ماله

ميّزه ربي عن الخلق بْـ صفاتٍ حاتميّه
الخلايق كلهم كفّه .. وهو كفّه لحاله

له قدر عندي وقيمه واحترام وقابليّه
طيّب المعشر كريم الخُلق محموده خصاله

ما معي غير القصيد اللي تخطّه له يديّه
بمدحه لين الحروف تشيب من زود الجزاله

قاصده حُبّه وتاخذني على الحبّ الحميّه
وادري ان الحبّ مايرحم محبينه وآله

قلت له حاول تمدّ الوصل قال انتي عصيّه
ما منعني عنك غير اني فهد وانتي غزاله

قلت له ما دام موتي فيك؟ ما خفت المنيّه
والله اللي مرحبا بالموت في رجوى وصاله

والحبيب اللي نذر ما يرتكب فيني خطيّه
غاب عنّي…كنّه مْسوي على الدنيا جماله

كم تمنيت القدر ياخذ من حظوظي شويّه
وكم دعيت الله يجمع شملنا جلَّ جلاله

والله اني آتشفّق شوفته كلّ ضحويّه
من كثر هذا الوله ما غاب عن عيني خياله

جعل تسقى ليلةٍ كانت علينا سرمديّة
ليلةٍ فيها سألت البدر عن روعة لياله

وش تغيّر من بعدها يالليال الجرهديّه!
كيف صرت انشد عن علومه ولا ادري كيف حاله!

آتوقّى عن شموس الشوق بظلاله وفيّه
ماا أبي من روعة الدنيا سوى الجلسة قباله

اجمعينا تحت ظلّك يوم يا نجد العذيّه
واتركي نسمات نسناسك تسافر بي لجاله

قد سألني عن موافقتي عليه -بطيب نيّه-
وما عطاني فرصه آفكر واجاوب عن سؤاله

قال ممكن انتظر عمرين واكثر يا بنيّه
لكن اني اتركك للحظّ ؟ والله استحااااله

والله انه اجودي وآنا بطبعي اجوديّه
من يحقق حلمنا واصير بأمر الله حلاله؟
- مها

اللهم صلِّ وسلم على نبينا محمد

يقول الحبيب ﷺ:
‏"إن من أفضل أيامكم يوم الجمعة، فأكثروا علي من الصلاة فيه، فإن صلاتكم معروضة علي" اللهم صلّ وسلم على حبيبنا وقدوتنا محمد"

تهيّيت لك منزل، وملجأ، وعد، ودار
‏وسريت اترقب ضحكة الماء على هوني

‏وش الليله اللي دونها تضحك الأقدار؟
‏إذا ما تجلت من فرح ضحكة عيوني

‏أنا وش علي إن ضاع صوت النديم البار؟
‏ومشاريهك إن ضلت عزومي، تعدوني

‏يا علّ الدروب اللي تضمك حيا، وأزهار
‏لو إنك تعيش "أيامك البيض" من دوني
- محمد السلطان