صبحكم الله بالخير

لا تعذليني يوم أجرّ الصوت في راس الطويل
‏الليل توّه ماسرى والشمس بكره باديه

‏أنا حياتي ما بقى منها كثير ولا قليل
‏غير القصيد اللي كتبته في مرابي ناديه

‏بنتٍ تثنّى في ضواحي نجد وتفلّ الجديل
‏جيت أتداعى في مرابيها وروحي غاديه

‏واللي ورى صدري على الميعاد مايبغى دليل
‏قلب بدويٍ ما رعت به غير بنت الباديه

‏مانيب مستغرب يزلّ العمر ويخفّ الثقيل
‏الوقت حادي وأغلب العالم معه متحاديه

‏أغيب وإن شفت البروق تلوح فالطرف الكحيل!
‏أرجع على صوت العزاوي فوق ظهر العاديه

‏بين الطواري والقصيد العذب والبيت الجزيل
‏أنا أحترق من داخلي والناس حولي هاديه

‏مانيب مثلك كل ماغنّيت.. يالغصن الظليل
‏تومي بك الأنسام وتغني عليك الشاديه

‏أنا سحابٍ حنّت رعوده وحوّل فالمسيل
‏لعيون من تمشي تحت وبله وهي متهاديه
- مشاري محمد

مد صوتك يا أوّل الأحباب قبل أسريك كلي
‏ واسترد العارض المنشود لين أسرق جفافه

‏يا حبيبي كل ما اشتدّ السحاب، وسال، قلي
‏ من تحب عيونك من الناس وإلا من تعافه

‏أتمنى طلّتك، صوتك وش أحدد، وأخلي
‏الجفاف يحدّني.. والبيد زادتني صلافة

‏إن عذرت الطاري المرّار في طيّة سجلي
‏ما عذرت عيونك النجلاء على قل الكلافة

‏أتماهى مع ديارك.. فيك ترحالي، وحلّي
‏ لين أرجع سيرة العاشق ورى جسر الرصافة

‏في مقامك أنسج الغيمة على الغصن المدلي
‏ قِل لعودك: يأخذ من البارق الوسمي لحافه

‏وأنت وحدك تمنح الأشياء مقامات، وتجلي
‏ما بقى إلا ظاميٍ ما بلّت غيومك ضفافه

‏كيف عينك تقتل الرجال، ورموشك تصلي
‏ليش صوتك يجرح الأيام وأحبه، وأخافه

‏الهوى دربه طويل وحرّ شمسك جايزٍ لي
وأنت أرقّ احساس من ريح الصبا واعذب مسافه

إن قدرت اكسر جناب العطف في لحظه تغلّي
نازعتني دون كفّ الصفح لحظات ارتجافه

‏شِرَّد الأحزان..مابعد السكوت إلا التخلي
لاتقصّر في حقوق الولف وتزيد الحسافه

لك علي اوقف الدنيا وانا جالس محلّي
شاعرك لو شابت ايامه معك ما شاب قافه
- محمد السلطان

ولهت لك واشتقت واجد وحنّيت...
‏...و اقرب" سعادة في عيوني " بعيدة !

‏لو قلت احبك في أي جملة و صدّيت
‏... من طيبتي بتصير جملة مفيدة !

‏اعتبري انك " بيت " دايم وانا " بيت "
‏... يمكن يجمّعنا القدر في قصيدة
- تركي بن مطر

وش ينسّيني عبق ماضي لياليك المليحه
‏مستحيل أنسى ، لو النسيان للإنسان عاده
‏- فهد العيبان

مساكم الله بالخير

جادك الغيث يا دارٍ ربا فيك خلّي
‏كثر مَـ افشيت سرّك لـ الهبايب ، وابحته

‏رحت كلّك بلا رجعه ، وانا رحت كلّي
‏يمكن الموت لوْ قدمي يعرّض نطحته

‏عايشٍ في رجا وصلٍ ماهو حاصلٍ لي
‏مابقى باب ما طقّيته ، ولا فتحته

‏الغلا بيننا ماهوب حاجة تغلّي
‏كم خطا من قبل لا تعتذر لي دمحته

‏الأكيد انّي كنت اشعر بـ رفض ، وتخلّي
‏من كِذا رحت عنْك ، وموقفي ما شرحته

‏ليت لي حيلةٍ واحتال في طيفك اللي
‏وين ما لدّت عْيوني بـ دربي لمحته

‏ودّي انساك .. بس شلون ابنساك قلّي
‏وانت من وين مايونس خفوقي جرحته

‏هاك قلبي تقاضى منّه .. ولا تخلّي
‏حاجةٍ في ضميرك باقيه لو ذبحته

‏لا تحنّه ، ولا تاويه واخذه تسلّي
‏اضرم النار في جوفه ، وفوقه ، وتحته

‏انت لـ اشفيت غلّك كنّك اشفيت غلّي
‏استبيح الخفوق ، وعاذرك لـ استبحته
- فهد العيبان

تحديث جديد ♥️

السلام عليكم ورحمة الله
لكثره الطلب وبعد تفكير طويل فتحت الباب لكتابه الأبيات، وفقنا الله واياكم♥️
لطلبات الكتابه بمقابل مادي التواصل خاص @maha031

لمن يسأل عن قصائدي؛ كل ماهو مذيّل بإسم مها من كتابتي، بالإضافه لقناتي عبر التلقرام:

https://t.me/maha035

صبحكم الله بالخير

اللهم صلِّ وسلم وبارك على نبينا محمد

‏الليلة البال ماهو صوب ذات الخمار
‏ما كن لليل هذا في الليالي شبيه

‏ما للمواعيد يا شوق البشاير نهار
‏الصبح ماهو بعيد إلاّ على محتريه

‏خمريّة القّد صبّت لي من الغي نار
‏ومدّت لها كاس ما ذاق الكرى مشتهيه

‏كل أمنيات الهوى في قائمة الأنتظار
‏كم قلت : لا للهيام وقالت النفس : ليه ؟

‏مشاهي النفس جمّه والأماني كثار
‏النفس لو خيّروها كل شيٍ تبيه

‏غياهب التيه شتّى والحياة اختبار
‏من شِعلته نور عن درب الهُدى ما يتيه

‏بئساً للأشعار والأضواء وللأنتشار
‏ان كان مالي قصيدة في المقام النزيه

‏ما في محبتكْ يا أم المؤمنين إختيار
‏محبتك فطرة القلب السليم النبيه

‏يا أطهر نساء الأرض ما ضاهى وقارك وقار
‏الخاسر اللي طعن في عرضك وخاض فيه

‏في سورة النور جاك من السماء الإنتصار
‏من واحدٍ كل خلقه بالعفو ترتجيه

‏يا زوجة أشرف عباد الله زهاك الفخار
‏أنتِ الحبيبة وبنت أحبّ صحبه إليه

‏العمر رحلة قصيرة والليالي قصار
‏ما للبنادم حصاد إلا غرايس يديه

‏عسى شفاعة رسول الله لا سِدل الستار
‏ تشملني ان كان مالي وجه بين الوجيه
‏
‏المسلم يذود عن عرض الحبيب ويغار
‏طوبى لمن في الدجى صلّى وسلّم عليه
- سعود مهدي

صبحكم الله بالخير

هذا الليل ماهو ليل دمعة و حرّ عتاب
‏ولا قلوب مكسورة ولا عقول منجنّه

‏يهبّ الهوى من يمّ دارك علي ماهاب
‏من مواجهي يوم أطيب الخيل منعنّه

‏أفتش هواك من الهوى و الهوى غلاب
‏و آداري دموعٍ تطرق الرمش و تسنّه

‏ياعذب اللمى عذب القصايد تطير أسراب
‏على يمّتك ، يوم ازفر الشوق و اكنّه

‏ما والله تطيب جروحي و خاطري ماطاب
‏ أنا ناسي النسيان ماعرْف وش كنّه !

‏لعلّ الزمان يجود بك ، سالفة كذاب
‏يوقّف لك الدنيا و اهلها على ظنّه

‏أعديك ياعدٍ ماتروي ظما الشرّاب
‏واخيل السراب ب عين شرهه و ممتنه

‏أنا ليش أحبك؟ أنا أحبك بدون أسباب
‏لو أبدي سبب مات الهوى ماهرم سنّه

‏أشوفك قدر مطبوع في ناصية و كتاب
‏مثل موتي أقرب له كثر مانتحي عنه

‏تعالي، عزا نزفي .. لاصار ليديك خضاب
‏لك الجرح والسكين و الشكر و المنّة

‏لعلّ الزمان يجود بك ، سالفة كذاب
‏يوقّف لك الدنيا و اهلها على ظنّه
‏
‏من الخال والخلخال فال العواذل خاب
‏بتعميهم الشامة و تصعقهم الرنّة

‏تمادي علي وغلقّي دوني الأبواب
‏خذيني من يدين المقادير للجنة
- متعب البقيلي

‏الايام .. ( ظلما ) والليالي ، عديمة راي
‏مشاويرها " حرمان " .. و دروبها حرة

‏خذت مني .. أغلى ما تمنيت في دنياي
‏و خلت لي اللي ما تعوّذت !.. من شره

‏أنا بخير والله !.. لو معي ، ذاكرة نساي
‏ماهي بـ الحنين ولوعة الوجد مضطرة

‏تفاصيل ماترحم .. وقوفي ولا ممشاي
‏وجعها !.. يجي و يروح ، و يعاود الكرة

‏سلامي على المتحكمة بـ زعلي ورضاي
‏وعلى الغرة ، اللي ( طوّقتني ) على غرة

‏ولا هان عودٍ !.. شوفته ، تطلق محيّاي
‏نسيم الهبوب .. ( يداعبه ) كل ما مره

‏هذي جرته في مرتع الصدر رايح' جاي
‏من أبسط حقوق الحر ، خطواته الحرة

‏يا محبوبتي .. لا زال كوعي ، على مركاي
‏تحلويت !.. صكات الليالي ، و هي مرّة

‏أنا آجر قلبي مع طريقك .. وآجر خطاي
‏وآخاف أجرحه ويسيل دمي على الجرة

‏تغرّبت .. حتى عن ربوعي ، وعن مرباي
‏أحس الوطن .. ما فيه عارض ولا حرة

‏بعدك الليالي صوتها صوت عازف ناي
‏يهيّض جروح القلب .. ويقلّب ، صوره

‏اذا ما بقى .. ( حنيةٍ ) تستعيد ، قواي
‏حنانيك .. باللي يقطع الشوق بـ المرة

‏وقوف الحياد أستنقصه من سنين صباي
‏أشوف آهله فـ الغالب ، أصغر من الذرة

‏لا شان الزمان يضرّني واحد من عداي
‏ولا غالي !.. لا " سرّ وضعي " ولا ضرّه

‏لو الموت مرّة .. ما تعنّيت في دنياي
‏أنا آشوف لي حيّين .. ماتوا مية مرة
- عبدالله السراهيد

مساكم الله بالخير♥️

مثل من يحجب بيده عن عيونه شعاع النور
‏انا وشلون بنفي فقدك وتأثيره وجوره

‏فقدتك كني أول من فقد غالي وعاش الدور
‏ولا احدٍ قد فقد غالي قبله ويفهم شعوره

‏عبث تحضن خطاوي الدروب ودمعي المنثور
‏تطلّعه ابتسامات الرضا والحب من طوره

‏كأني وان عرفت سرور قبلك ماعرفت سرور
‏او إن القلب زهّده الحزن واستكثر سروره
‏
‏اشوفك كل ماغنى على غصن الشجر عصفور
‏ولا عاد الشجر نفسه ولا غصنه وعصفوره
‏
‏يمر بعيني اشهی ماخلق ربي بدون شعور
‏صحيح إن القلوب جنود منهيّه ومأمورة

‏حبيبي مابقی دافع وسط بالي ولا لي دور
‏والارض اصلا كذا ولا كذا بالناس معموره

‏انا لو ذكرياتك ماتعمّر بالي المهجور
‏تعدّته الطواري من فزعها وانهدم سوره

‏على وجهك تحاسيف الزمان وصوتي المكسور
‏ياضيعة جرة انسامه من الصدر ومن كسوره

‏تركت من الجفا قلبٍ يحبك راضي ومجبور
‏ولا ملّله طول البعد منْك ولا معي شوره

‏عسی الله لا يضيّع لي سنين وجعلني مأجور
‏ولو ماتدمل اعذارك جروح القلب معذوره

‏احسك اقرب من اني اقول انّا ظلال وسور
‏واحس الأرض مادارت بعد عينك ولا دوره

‏ على صوره موقفني حنيني لي ثلاث شهور
‏وعيت لاتدور الأرض مادري عيت الصوره" ):
‏– ماجد النفيعي