يالله بصوتٍ يغيث السمع ، والكبد يْغسلها
‏فوق الارض المجرهدّه ، كنّه الوسم المبكّر

‏علمّوا بنت السحاب اللي تمادت في زعلها
‏الاوادم طبعها تصطاد فـ الماي المعكّر

‏لا تطوّل في معاندها ، وياخذها جهلها
‏اعرفها زين لا منْها استضاقت ماتفكّر

‏وانا لو شيصير مادوّر مع العالم بدلها
‏ولو يطول البعد ماخون الغلا ، ولا اتنكّر

‏كيف اخون اللي لها فـ الصدر قاعٍ مانزلها
‏غيرها .. ولا رعى فيها المؤنّث ، والمذكّر

‏مستحيل اني اخيّب ظنّها فيني ، واملها
‏عاد مايخفى عليها شيْ .. لْكن حبّيت اذكّر

‏امتشفّق لـ الليال اللي مضت .. والنفس ولهى
‏لـ الكلام اللي يجي من ريقها مليان سكّر

‏ودّي ان كل الدروب تْمر شارع بيت اهلها
‏وكل شبّاكٍ عدا شبّاك غرفتها يْسكّر
- فهد العيبان

مرّت ثلاث شهور مامريت في بال القصيد
‏وما لاح برق .. ولا على الوارف من غْصوني سجع

‏قلبٍ ليا غنّى الحمام اللي على خضر الجريد
‏خطرٍ عليه انه ليا طوّل سْكاته ينفجع

‏فارقتك ، وحسّيت ماني من فراقك مستفيد
‏و رجعت لك ، والقلب دوب انّه ورا ضْلوعي هجع

‏على الصعيد النفسي الليله انا جدًا سعيد
‏مَكذب عليك انّي تخطّيت الكثير مْن الوجع

‏توّي بديت احب ، مدري .. صرت احبك من جديد
‏حتى الشعور اللي فقدته معْك احس انّه رجع
- فهد العيبان

للمكان اللي تحفوى بالليال المدلهمّه
سارت اقدامي ونفسي تاقت لرؤية أثرها

غرفةٍ اهرب إليها كلّما لاقيت غمّه
علمتني صاحبتها كيف تستقبل كدرها

تحمد الله واتّباشر بالصبر يبلغ متمّه
لو غيوم الحزن سالت ! فكّت يْديها لمطرها

خلّدت سيرة واثر ما تلحق الراحل مذمّه
اسمها احيا الديار وذكرها الطيّب عمرها

للموادع إنكساره ؛ مثلما للقبْر ضمّه
والمواجع تتبع المحزون لو قلبه دحرها

من كثر جيّات حزني احسبوني بنت عمّه
كلّما جاني قلط فالغرفة اللي ما هجرها

عادتي اكرام ضيفي لو نفث فالروح سمّه
البلا انه مـ استحى من جود يمناي وبترها

مابقى لي غير ثوبٍ لا طغى شوقي اشمّه
فيه ريحة ذكرياتٍ ما تسنّى لي زهرها

احسب ان الوقت لملم ما عجز قلبي يلمّه
والمشاعر دفنت بليله محد غيري سهرها

لين ما طاح نْظري عالدفتر وناديت : يمّه
مادريت الا وانا آصيييح واعانق صورها
- مها

اشتقت لها💔
غفر الله لموتانا وموتاكم وموتى المسلمين

كلّ حلمٍ فاتني بالأمس وصّل له سلامي
ما على الفايت حسايف والندم قصة قديمه

ادري ان الحلم لا منّي عطيته إهتمامي
صار حلمٍ للجميع وصار له معنى وقيمه

الخساير في حياتي ما تنزّل من مقامي
انخلقت بقلب طير و روح ما ترضى الهزيمة

مؤسف إني كنت اداري قلب يسعى لانهزامي
ماهقيت ان النديم بيوم يرضاها لنديمه

بترك الدنيا واهلها واسكن بغيهب ظلامي
طبت من عالم حسدها يقتل النفس الكريمه

كلّ شيٍّ صار يجرح خاطري مدري علامي
والله انْ حتى الهوى يجرحني ان ذعذع نسيمه

اغتراب الروح بان فنظرتي ..صوتي ..كلامي
حالها حال اغتراب الدار عاقبته وخيمه

العوض بالجاي يا حزنٍ تجلّى فابتسامي
الحياة دروس وآنا فدرسها -قصّة أليمة-
- مها

^القصيدة بحلّة جديدة منقحه

مساكم الله بالخير♥️

‏على الله والقصيد اللي يردّ الناحل الميّاد
‏تسرّيه الهبايب من فمي وتغنّي طروقه

‏عسى داره ومفلى فاطره للرايح الرعّاد
‏إلين الريح تثني خاطره وتشدّ معلوقه

‏على كثر المرابي والقراح العذب والميراد
‏مايشعى نوقي الّا المارد اللي تارده نوقه

‏أنا أول من وقف يوم الركايب مالها ردّاد
‏وأنا آخر من جلس يوم العباد تشيل طاروقه

‏لقيت إن القصيد أبلغ لغة وأحلى من الميعاد
‏على قلبٍ يشوف العافية في شوف معشوقه

‏تعلّقه الظنون السارية والشكّ والمرقاد
‏وتغريه العيون الناعسة ويموت من شوقه

‏أقوله فالحجر ويصير كبر العارض المنقاد
‏وأقوله فالكبود البارده وتصير محروقه

‏لو انّه ضاع قلبي بين طيّات الشعر ، وش عاد!
‏لا زلت العاقل اللي ما أختلف عقله ومنطوقه

‏حبيبي جعل باقي للسنين الماضية معواد
‏لو انها فكرةٍ في حاضرك ماهيب مطروقه

‏إذا انّه يزعجك بيت القصيد الدارج المعتاد
‏أنا أكثر من يشوف إن الشعر حقٍ من حقوقه

‏كثر ماكانت أوقات الغرام العفّ ، ماتنعاد
‏كثر ماكانت أصوات الرجاء باليأس مخنوقه

‏خذ اللي ودك انك تاخذه ، وأنا على إستعداد
‏أجيب الضحكة اللي من يدين الحزن مسروقه
- مشاري محمد

بسمتك يا مايس القدّ سرّاقة قلوب
‏يسفهل القلب لامن سناها لاح له

‏ابتسم ..، ويرف برّاق في عرض النصوب
‏له تساق الروح فـ الدرب سوق الراحله

‏من شماليّ الجزيره ليا حدّ الجنوب
‏مابقى وادي سناوي ..، ولا ارضٍ قاحله

‏الفياض الخاليه من منابيت العشوب
‏والغصون اللي من اوّل يباس ، وناحله

‏ارتوت .. ما كنها غير عودك ..، والهبوب
‏تطرقه بشويش ، وتداعبه ، وتساحله

‏يا حبيبٍ شبّ في صدر من حبه شبوب
‏كمّ قصيدٍ قد رقى له ..، ودمعٍ طاح له

‏قول احبك يزهر العمر ..، وتهون الخطوب
‏انت ريقك كنه الشهد من مناحله

‏رحت عنّي ، وانت متكدّر ، و وجهك شحوب
‏والله ان ماني براضي ، ولا مرتاح له !

‏كنّ لونه مثل لون الشّفق حزّة غروب
‏لا اختلط في زرقة البحر ، وادمى ساحله

‏جيتك من البعد برضاي .. ماني بـ مغصوب
‏قلبي اللي بين الاضلاع قال ارواح له

‏بتبعك لو دونك التيه ، وطوال الدروب
‏جعل رجّالٍ ما يتبعك يِكسر كاحله
- فهد العيبان

صبحكم الله بالخير ♥️

اللهم صلِّ وسلم وبارك على نبينا محمد

قال ابن القيم: الصدقة في يوم الجمعة بالنسبة إلى سائر أيام الأسبوع كالصدقة في شهر رمضان بالنسبة إلى سائر الشهور وعن كعب قال : الصدقة يوم الجمعة أعظم من الصدقة في سائر الأيام.

من طيب راسك يا يبه طاب الثنا وطاب القصيد
من وقّف التاريخ له يستاهل انه ينذكر

يختال شعري لا ذكرتك به وحرفي بك يشيد
ولا من تهيّيت الكتابه جاتني الفكره بكر

من (آل ……) جعلهم للزود والعيش الرغيد
سلالةٍ ما تنجب الا رجال واعجوبه فكر

حتى جمايلها الكثيره في القريب وفي البعيد
ما تنحسب بالكمّ، كنّ الطيب فيكم منحكر

من سيرتك يابوي صارت سيرتي نهار عيد
انا وريثه أبّ لا منْه انذكر؟ طاب الذكر

يحق لي افخر لأنك قمة المجد التليد
واجب على اللي انت ابوه يقوم ويصلّي شكر
- مها

مساكم الله بالخير

طاول الغيم يا راسٍ .. شموخك جبلّة
‏واترك القاع ، ما لك فيه صولة وجولة

‏الشيَم واعتزاز النفس .. مذهب وملّة
‏من تمسّك بها ، يمسك زمام الرجولة

‏النزيه ( يتسامى ) ويتوكّل .. على الله
‏ما يخيب الرجا ، في حيل ربي وحوله

‏والخبيث ( يتلوّن ) كل فترة .. بـ حلّة
‏حسب ما تقتضيه المصلحة والسيولة

‏الرجال افلحوا .. واللي ، يراوح محلّه
‏تتبعه معطيات الشك وتحوم حوله

‏يا رهين الشقا .. من زاد حسده وغلّه
‏يشرب من البحر ويقيس عرضه وطوله

‏سولف إن جاء مجال الهرج دقه وجلّه
‏ساعدتك الظروف تعيش دور البطولة

‏فـ التفاصيل .. وغياب الحجج والأدلّة
‏كل من زاد فيه النقص ، يشعب ذلوله

‏ودّي إنّك تطيب وتاخذ المدح !.. كلّه
‏لكن الطيب .. شيٍ ما يجيك بـ سهولة

‏أوسع من الطريق الضيّق .. اللي تدلّه
‏وأعمق من الكلام الفاضي اللي تقوله
- عبدالله السراهيد