بعيد : من التصنع ، والتكلف ، والكلام الجاف
‏أقول اللي يجول بخاطري .. وأترجم شعوري

‏عرفت : إن الشعور أعمق وأجل من الوزن والقاف
‏ولقيت : إن صوت صدري مايشابه صوت حنجوري

‏تركت اللي يمرّه فالظلام الساري الحوّاف
‏وأخذت من النهار اللي كشف وجه الثرى ، نوري

‏تبـيّن جرتي بالوادي الموسوم .. والمشراف
‏معا سرب الطيور العابره .. ماطارت طيوري

‏ماني بمدوّر اللي يسمع بذكره ولاينشاف
‏ولاني واقفٍ في موقعٍ مايعرف حضوري

‏ورى وجه الكتاب اللي تشوفونه بدون غلاف
‏ربيع الجنة الخضرا : عسل سدر , وزهر جوري

‏لو بوّصف المشاعر .. جايز التبذير والأسراف
‏ولا من حقي أكنز جوهرة عمري وبلوري

‏كتبت أطراف صوتي في طريق العاشق الميلاف
‏وقدمت لمجاريح الليال البارده شوري

‏ورى الألقاب والنور الصناعي مارسمت أهداف
‏مع إني قد نحت صخور نجد براس باكوري

‏ولايخذلني اللي لاكتبني : يكتب إسمي حاف
‏ولايزعلني اللي في طريقي طوّفوا .. دوري

‏ماني محتاج : للتصفيق ، والتعليق ، والإنصاف
‏وأنا أحس الليالي والنجوم البيض جمهوري !
- حمد الميموني

بالي اللي كل ليله ، والطواري تستبيحه
‏لين اعاف النوم ، واسهر ليلتي ، واجفى الوساده

‏عنْك ياكم انصحوني مير ماطعت النصيحه
‏قالوا : انسه ، قلت : مامن عزم ولا من إراده

‏وش ينسّيني عبق ماضي لياليك المليحه
‏مستحيل انسى ، لوْ النسيان لـ الانسان عاده

‏من نسى مَلامحك ياجعل ما ربي يبيحه
‏ومن سلا عن جرحك الله لا يذكّرْه الشهاده
- فهد العيبان

تفل السما مجدولها ، والنجوم تنام
‏بحظن الظلام الدامس ، وتطفي القمرا

‏وتمر الليالي تسحب بدربها الاعوام
‏وقلبي على حطّة يَدْ الشوق ، والذكرى

‏وتهبْ الطواري كنّها بارد الانسام
‏على واحدٍ ودّه يجافيك .. بس ازرى

‏سرى .. وانتصف دربه ، وعوّد ولا ينلام
‏طريقٍ بدون مْسامرك .. سَرمدي مَسرى

‏مَحَد يدري انّي من فراقك غديت حْطام
‏اكابر على نفسي ، وانا ابخص بها وادرى

‏تبي الصدق لو تدري بي الناس عادي .. دام
‏كلامي معك ماله نتيجه .. وبـ الأحرى

‏تصدّق بي العَذّال ، وتفرّح النمّام
‏غريب .. وعليك افكار فـ البال ما تطرا

‏تركت اليقين ورحت لـ الشك ، والاوهام
‏وسلّمت نفسك .. حالتك حالة ( الأسرى )

‏مع انك على عِرْف بـ غلاتك ، وعلمٍ تام
‏ولكن عسى بـ مفارقي ، ذمّتك تبرا

‏مشاريه دمعاتي على مْرودن الاكمام
‏لو ان عيشتي بـ مفارقك عيشةٍ قشرا

‏يكفّيني انّك كنت يومٍ من الأيام
‏حبيبي .. ولك في قلبي جروح ما تبرى

‏لا تقبل شافعه فيني ، وعطف ، واسترحام
‏ترى الجرح من يدّينك الناعمه يشرى

‏احبّك .. وصاير منّك استعذب الألام
‏تجيني بجرح ، وكنّك تزّف لي بُشرى

‏خطاويك لامن جيتني تنقل الاقدام
‏لها جرةٍ فوق الثرا كنّها مجرى

‏مسيل المطر لـ احيا هشيم النبات .. وقام
‏ بـ امر من عَرج في خاتم الانبياء ، واسرى

‏وانا من يحبّك قبل ، والحين ، ولـ قدّام
‏إلى وقت ينزل فيه ابن مريم العذراء
- فهد العيبان

مرحبا

‏من الي علّمك وشلون تجرح ي آخر العنقود
‏قصيدي فيك ؟ ولا عادتك تجرح على فالك !

‏يا كسرة خاطري يوم الرسايل مالها مردود
‏ما يذبحني غيابك كثر ما يذبحني إهمالك

‏ليا عرّضتني درب الجفا ، درب الجفا مسدود
‏اعوّد و الحنين يطوف لك و الشوق يسعى لك

‏متى ما شفتني شفت الليال حجاجها معقود
‏مع ان أثقل مشاريهي عليك اخفّ من شالك

‏من اللهفة مثل ما يفرق الميّت عن المولود
‏هذا فرق السنين الي مضت ، عن ليلة وصالك

‏ مفاتنك تخطرى تحت هيبة رمشك المجرود
‏على مالله عطاك الأرض مدري كيف تشتالك

‏ْمجرّي الهايب لصوت الرصاص و خنّه البارود
‏يا كيف تهيّبه خنّه شذاك و صوت خلخالك

‏وصلتك و البيوت معرّبه و أنا عريب جدود
‏ابيك و رحت حتى ماقدرت انشدك عن حالك

‏يا ريمية قصيدي وش على الجاحد من المجحود
‏متى ماغبت قولي للغلا مشروب فنجالك

‏لك خيار القصيد اغلى بوااجد من خيار الذود
‏ركابٍ ما يوقفها الحنين إلا على جالك

‏عرفتيها وهي ملجاء الظنون و مزبن المضهود
‏و تركتيتها تغنّي للصدى و الريح موّالك

‏اغنّي كل ما صرتي عليّ ابعد من المنقود
‏سقى الله يوم ما بيني و بينك غير سلسالك

‏بعد قفّت ضعونك ما بقى إلا يومي الموعود
‏تقول ان العمر روّح معك ما رحتي لحالك

‏ما دامك من بنات الغيم مدري من خوات النود
‏تثنّي للضلوع الي تضمّك و آ تثنّالك

‏أنا ميّت ظما و انتي هواك العيلم المورود
‏يمرّ الموت بالي كل ما مرّ الجفا بالك

‏لا تعميك الدموع الي ما خِلقت للوساع السود
‏عسى روحي فدا واهج ثغرك و ليلك الحالك

‏على إستعداد آعيش من العمر ليلة بدون قيود
‏تلوّح لي حياتي عقبها تلويحة الهالك

‏فمان الله منّا لين تلقين السيوف ورود
‏فمان الله هذي صادقة ماهي يورّالك

‏عزيزٍ غايه مراده لو ان ذيك الليال تعود
‏لو انك كلمة تعيد الليالي ذيك ما قالك
- متعب البقيلي

استمتعوا

إنا لله وإنا إليه راجعون
‏اللهم اغفر لعبدك سعد الحريّص وارحمه واسكنه فسيح جناتك
‏عزاءنا لعائلته ومحبيه

صبحكم الله بالخير♥️

ما يصغّر همي الا صوت تكبير المساجد
‏فانتظار اللي مضى يِخلي سبيلي وآتحرّر

‏صاحبي ماعاد باقي لي سوى عض النواجد
‏لا تَعذّر لك بـ « عذرٍ » لا يِمرّ .. ولا يمَرَّر

‏اتفقنا إنّك سليل أمجاد وإنّي نسل آماجد
‏واختلفنا فـ الخطا اللي لا يِعاد ولا يبَرَّر

‏ما قدرنا نتّجه حتى لو الوجهات واجد
‏مشكلتنا في جميع الاتجاهات نتضرَّر

‏أنت غايب مستحيل إنّه مع الوقت يتواجد
‏وآنا شاعر مستحيل انّه مع الوقت يتكرَّر
- عبدالله السراهيد

تبّت يدين .. اللي حرمني من يديك
‏خذاك مني والحياة . . اخذ ، وعطا

‏من القصيد العذب كم حرفٍ يبيك ؟
‏ومن الزهر ومن المطر عقب البطا ؟

‏كل الكلام الزين .. عندي ، يحتريك
‏واخاف من جرح الكلام .. اليا سطا

‏أنا حريص .. اكثر من اللازم ، عليك
‏وحرصي عليك اكثر من اللازم خطا
- محمد شباب

مرحبا

ورا لحظةٍ جادَتْ على الخاطر الميَّال
تنادم جروحِي -كلَّما غِبت- سِكّيْنك

أنا كيف أغنَّي للمشاوِيْر.. قبل أحتال؟
وأرقّق قساوَة ليلتك، وأسكن بـ لِيْنك!

أعيش اللّيَالي بيْن مَلفى، وبيْن إهمال
وأسلَّم حياتي بيْن يسْرَاك، ويمينك!

وِش يعذر قدّك يوم هبّ النسيم ومال؟
غدى الصبح صبحك، والهبايب مساجِيْنك

ترجّلت من صهوة جوادي.. وأنا رجَّال
أشدّ الركايب.. وأتمَثنى عناوِيْنك!

عساني فدى من ذاب في مَقتِله سلسال..
قبل لا أتفدَّى (جرَّة خطاك) في طينك!

أعرف أتردَّد فـ المعاذِيْر.. والترحال:
وألوَّن حياتي.. من مِدادك، وتلوِيْنك

لَكِنّك صحَاري عاث فيها سراب اللآل
ومقاديْم بدوٍ شدَّها: البرق في عينك!

حبيبي أنا ما زلت أحبَّك رضا، وإجلال
مضى عام ما مرَّت على مسمعي «وِيْنك!»

لو إنّك رغم كلّ الحقايق شحيح وِصال!
أمانتك لا ترحل قبل وَقتك، وْحِيْنك..

خذ آخر تبارِيْح السهر، عاشقك ما زال:
على حطّة يدين المقاديْر.. ويدينك!

أعرفك سحابٍ! شوف بَرْقه، يشدّ البال:
غريبة لو يمرّ الظمأ.. بيني وبينك!
- محمد السلطان

صبحكم الله بالخير

اللهم صلِّ وسلم وبارك على نبينا محمد

یارب ابي منك العزيمة والصلابة والثبات
في قلبي .. بوجه الذنوب كبيرها وصغيرها

يارب عبدك هزّته سود الليال العابسات
ولا لقى له واحدٍ غيرك يعدل سيرها

انا الغريق اللي رماه الموج بين المغريات
أغفرلي ذنوبي وساعدني على تغييرها ..

تعبت اكون الغصن قدام الهبوب الذاريات
لا ضاعت الخطوه وضاع الدرب من تقصيرها

خايف من المجهول بوجيه السنين المقبلات
ولا قدرت ألمح من الدنيا سوی تکشیرها

ومدري متى بـ اوادع اللي فات و ألمّ الشتات
وانا لا جيت افارق جروحي .. تجيني غيرها

مکسور خاطر.. و اطلبك طول الرضا والأمنيات
اللي بدونك بـ انتهي قبل ارتوي من بيرها
- العنود

‏"يزهمني الحلم لا هودل حمام الصباح
‏والأرض تغري خْطاي وتبسط كفوفها

‏إنسان صالح، ومالي فالاوادم صلاح
‏وكل "أُمنية مستحيلة" كنّي أشوفها"
‏- خالد القصيِّري

من هيبتك ماهو من المسمار
‏يتفتّت ، ويتصدّع الأسمنت

‏كل ما اعلّق صورتك فـ ْجدار
‏تطيح ، وألقف صورتك لاهنت

‏ماعاد تفرق لو خسرت الدار
‏أنت العمر ، وانا خسرتك أنت

‏-فهد العيبان

تحاورك السنين ووحدتك مابين شين وكاف
ولا مليت وعيون المدى تترقب حتوفك

مشيت ولامعك غير القصيد وقلبك الخواف
وكلامٍ لو تقوله سارت الركبان عن خوفك

تساقيت المرارة، ليلٍ أدلم مالقيت انصاف
وقبل لايرتعش كف المساري يرتعش جوفك

شحب وجهك وهبت من شمال وحكيك الشفاف
خذته الريح ليدين القلق حتى قصر شوفك

حبيبي وإن سكبتك لـ التناسي ماعلي خلاف
أنا كيف أسكب الذكرى بعدك ووجه معروفك

نزعت القلب من عوج الحنايا لِين واستِعطاف
وعنيّت الجيوش وقِدم وجهي مشهر سيوفك؟

تبعتك مركبٍ فج البحور ولا لقيت ضفاف
وأنا وإن طالت الأيام ما يردعني نْكوفك

تمر البال؛ لك غيمٍ كثيف وبارقٍ خطاف
تبلل كل جارد من جديد، وتحيي طيوفك

وتشعل في ثرى صمتي غصن سدرة هزيل وجاف
وأفك لك الضلوع اليابسة وأساقي شْفوفك

وأخيط لْك المساعي لاترجل كل طرق وقاف
وألحفك القصايد لين تدفى بارد كتوفك

"أنا ما جيت أبي منّك حياتك والسنين عجاف"
أنا جيت وحياتي في يدي تستأمن كْفوفك

إذا مريتك بْـ عيني مساري؛ والدروب سهاف
ترى هذي مشاريه الضيوف وسنّع ضيوفك.
- محمد السلطان