السلام عليكم ورحمة الله
لكثره الطلب وبعد تفكير طويل فتحت الباب لكتابه الأبيات، وفقنا الله واياكم♥️
لطلبات الكتابه بمقابل مادي التواصل خاص @maha031

يا عظيمه كل شيٍ له حدود وله نهايه
لكن أنتِ ما وقفتي عند حدك يا عظيمه

أستلذّيتي بطعناتي وأخذتيها هوايه
كن مالك حربةٍ توجع وطعناتٍ أليمه

آه ليتك ما تماديتي بطعنات البدايه
لين صار لكل طعنه فالحشى معنى وقيمه

الله يجيبك لكن كيف وفي أغرب روايه
تكتبين الحب كذبه والهوى دقه قديمه

وأنتِ اللي كل ما لدّت عيونك في المرايه
ما لمحت إلا اليتيم اللي خذت قلبه يتيمه

واليتيمه في اليتامى مالها حق الوصايه
الوصيه عودها الغضّ ونواياها السليمه

لكن أنتِ صارلك حق الوصايه والولايه
وأستبديتي وشد البدو وأضحيتي مقيمه

ما رحلتي لين حطمتي بما فيه الكفايه
عاقلٍ حب الجنون وصوت نارك في هشيمه

أستبحتي حرمة المجنون بإدراك وعنايه
وألتفتي له بعقلك وأرتكزتي في صميمه

أمتلكتي غايته لو كان ماله فيك غايه
وأنتصرتي في عيونه وأعترف لك بالهزيمه

من كثر ما يعشقك ما قالك بالحب رايه
خايف الأيام لا تطلع عواقبها وخيمه

وفي طريقك كل ما كنّه لمس درب الهدايه
تاه ودروب الحياه المستقيمه مستقيمه

تايهٍ بصري ومن جابه لبيت الله تايه
عذر من غمض بعين وعينه الأخرى كريمه

فدوتك ما فات من الأيام واللي عاد جايّه
يا بعد عمر مخاسيره معك عندي غنيمه

أنتِ الفارع بقد وجد وأسماء وكنايه
من عشق مثلك يجوز من الهوى وشداد ريمه

ليه لا وأنتِ بحسنك في ذوات الحسن آيه
لا ذهب، لا ماس، لا ياقوت، لا أحجارٍ كريمه

شاعرٍ له مع هلّ الرايات في المرقاب رايه
كل ما هبت هبوبك فلها قدر وحشيمه

سامحك من ألف باء الذنب إلى ما لانهايه
وأستباحك عن خطاه وكل طقّه بتعليمه

ويوم قلتِ أعطني حريتي أطلق يدايه
ما ذخر عن وجهك إلا طعنتين في صميمه
-ضيدان بن قضعان

قد عصينا الوقت يوم إنّه يهددنا بسيفه
‏لو نصانا بالعلوم الوافية والطيب، طعنا

‏ عن لحوم الناس تمنعنا طبايعنا العفيفة
‏و ان نزل راع الكلام الهزل والشين، ارتفعنا
- عبدالمجيد الذيابي

‏هذا الليل كن الشعر واقف على استعداد
‏مراسيل شِيمه تاخذ الشوق وتجيبه

‏لاطال المدى وارخى ظلامه وحزني ساد
‏تذكرّت وصلٍ بارد الريح تومي به

‏رفيقي، ثلاث سنين ما لاح لي معواد
‏تغاربت روحي .. والوداعات تغريبه

‏أحب الوداع المر. حتى الوداع الحاد
‏لا صار اللقاء بعد الوداعات يا طِيبه

‏وعساني بعد ماجيت يالعارض المنقاد
‏معي ما يبّل الشوق لو طالت الغيبه

‏أجيب القصيد الي تنومس به النقاد
‏واجلس به الساحة واوقف واغني به

‏واسوقه على الي تحتريني بلا ميعاد
‏وأقرّب لها وأبعد عن الشك والريبه

‏هي الي هواها طول ليل وسهر وجهاد
‏ومعاها يروح الليل لحظة ولا ادري به

‏ليا شفتها .. ماكن لي بالبلاد بلاد
‏مظاليل رمشٍ ترمي القلب وتصيبه

‏عسى الضحكه الي كنها الموت والميلاد
‏فدا الضحكه الي ماتوديه و تجيبه

‏انا واحدٍ مختارك أنتي وأبيك عناد
‏مطاليبه أنتي كيف يترك مطاليبه

‏توهمّت قربك يوم وصلك ماهو منعاد
‏هذا قلبي الي ماتفيده تجاريبه

‏نعيش الحياه بعاد، ونموت حنا بعاد
‏ولا زلت أشوفك فرصة العمر، وقْريبه
- عبدالرحمن محمد

صبحكم الله بالخير♥️

اللهم صلِّ وسلم وبارك على نبينا محمد

يا إلهي .. لا تدع قلبي رهين ذنوبي
‏ولا تذرني فرد بين العالم المنجنه

‏ولا تكلني نفسي .. اللي ماتدل دروبي
‏كل ما ارشدها لدرب الرشد ، صدّت عنه !

‏إلطف بحالي لا حط ابليس دوبه دوبي
‏ياما صدقته و انا اكثر من تعوذ منه

‏لو اقصر بـ الفروض و لو اطوّل ثوبي ؟
‏ان نسيت النار ؟ عمري مانسيت الجنه !
- بدر بن ذنبوح

مرحبا

جعل عمرٍ راح مني يعود ولا يغيب
‏يوم تغريني قصيدة ويجذبني صدى

‏قبل أطيح من السحابة على بطن القليب
‏وأتمادى من سكوني ولا أعيّن: مدى

‏مايحرّك غافي الغصن صوت العندليب
‏ولا تريّح هجعة الليل بالٍ ما هدى

‏لو لقيت لطعنة الروح ياقلبي: طبيب
‏ما لقيت لمخطي الدرب ياعقلي: قدى
- مشاري محمد

الغياب اجزل من اعذارٍ تجيب اسمنها
خلك اللي كمل غياب .. ومكانه خالي

حاشمك من رجعةٍ ماضيك اجمل منها
من متى والغالي اللي راح يرجع غالي !
- عبدالله ال لزيوح

لا دنا الليل ودنت من ظلمته قسوْ الطواري
‏اوكِل الله روحي الوجعى عسى تلقى فرجها

‏آتضايق.. واقلب الدنيا..واعيش بْدمّ ناري
‏ما تقول إنِّي على قاعٍ موسعةٍ فججها !

‏وشهي الرُّوح الخفيفة،والحنونة،والمِداري..
‏عند روحٍ كل ماتطري علي م اونس غنجها؟
- نوف العثمان

‏أنا عهد حبّك ما ذكرته عشان أنساه!
‏هذا عذري اللي ماله أخوان كالعادة

‏مساري دروبي موحشة، والنجوم أشباه
‏تغرّبت و بطون الصواديف ولّادة

‏غدا الصبر عودٍ شِيْخته ورث من مجناه
‏ولا شافها.. لا في عياله ولا أحفاده

‏بدا الشاعر اللي قبل يبدا تقول: الله
‏جماهيره، اللي كانوا العام حسّاده

‏يعوّد مداه أقرب من يدينه لمخباه
‏لا عوّد هواه أوفى من الموت لزناده

‏ما يشبه يقينه بين مسباحه ومركاه
‏ يقينه وهو ما بين مصحف وسجّادة

‏نِديم الهوى لو ما يسرّك مسير خِطاه
‏ كثر ما تزلّ خْطاه ما زلّ ميعاده

‏ياذات القوام اللي تجيب الهبوب أقصاه
‏لا قام يتوامى عودك أوماية قلادة

‏تقولين: "قلبك" يوم صديت عن مشهاه
‏ جرحني، وأقول السيف ما يجرح غماده!

‏وصلتك غريبٍ ساد حزنه على منفاه
‏يطالع بك آخر ما تبقّى من بلاده
- متعب البقيلي

بدون ال ليش والحسرات وعتابك
فمان الله بدون الآه والتأنيب

تعدّاك الملام وشرهة احبابك
حقرتك فالردى وشلون فعل الطيب

خبيثٍ لو تحب يدين من جابك
بتبقى يالمنافق في محل الريب

تعيّبك الشيم حتى الردى عابك
وجودك في ميادين الرجوله عيب

تذكر والندامه تطرق ابوابك
انا لما نخيتك؟ استجاب الذيب
- مها

ماظن لك فرصة تقدمك الاشناب
‏الا على صْفوف المصلِّين جثه
- طلال العازمي

الملامة على الجينات ياهل الملامة
‏ لحدٍ يقول بنيان المراجل تهاوى

‏ ماورث من هله غير الصلع والرخامة
‏ وحدةٍ ماتعيب ووحدةٍ ماتداوى.
‏- بندر الدويش

كيف بستغرب رداك وكيف اعدّك
‏واحدٍ يتنومس الجمع بـ كلامه

‏شف من انت وشوف ابوك وشوف جدّك
‏والله ان مالك مصدّ من الرخامه !
- منصور السبيعي

سولف إن جا مجال الهرج دقه وجلّه
‏ساعدتك الظروف تعيش دور البطولة

‏فـ التفاصيل .. وغياب الحجج والأدلّة
‏كل من زاد فيه النقص ، يشعب ذلوله

‏ودّي إنّك تطيب وتاخذ المدح !.. كلّه
‏لكن الطيب .. شيٍ ما يجيك بـ سهولة

‏أوسع من الطريق الضيّق .. اللي تدلّه
‏وأعمق من الكلام الفاضي اللي تقوله
- عبدالله السراهيد

راس بلا نوماس ما يعتبر راس
‏كومة عظام جمعتها الرخامة
- سعيد بن راشد

صباح اليوم حافل بالهجاء
المعذره منكم