دعواتكم لبشاير المقبل

علّم اللي مشقيٍ نفسه .. بنفسٍ مستريحة
بإنّ أنا موجود فوق أرضي وتحت ظلال غصني

منشغل بأحلامي اللي دونها قومه وطيحه
أقتنص حلو الفرص ..قبل المنايا تقتنصني

ولو يحاول ينتقصني "نقص" قلت: الله يبيحه
والله انْه يزيدني رفعة لا حاول ينتقصني

ما تكدّر خاطـري .. ذمّـة خبيثين الشريـحه
وما تفرّح قلبي المدحة من اللي ما بخصني

انصَحوني "صَدّق احساسك "ولا طعت النصيحه
والله إن قلبي قبل تقرصني العقرب قرصني
- مشعل الزعبي

في عيونك موت عشاق وجفونك ضريح
‏بس فيها مصرع العاشقين أجمل مآل

‏واللثام شلون يستر ضيا الوجه الصبيح
‏دامك ان شلته قمر وان تلثمّته هلال

‏الجمال بلا نظر يفقد المعنى الصحيح
‏والله اعطاني نظر والله اعطاك الجمال

‏انت لوّ مخلوق من قبل يوسف يا مليح
‏سِلمت كفوف النساء وقِطعت كبود الرجال
- سعود مهدي

إن كان حبك تقضية وقت ومزوح
‏قلها على المكشوف واطلق سراحي
- عبدالله بن زويبن

كل مانسنس من الشرق صوتك ياجفول
ترتعش في الصدر غيمه وتضحك سنبله

ويعترك حق التراجع معَ حق الوصول
آه من حق أرجعه .. وآه من حلم أوصله
- سعد علوش

آه من وجهٍ تجهّااامه مسرّه
‏وضحكةٍ ما ودّك إلّا: تلتهمها

‏مرّةٍ تتهمه ظنوني .. ومرّه؟
‏أنقلب على ظنوني وأتّهمها
- مشاعل عبدالعزيز

مرحبا

قربي لي لين احس انك بروحي
‏لا تخافين الدجى والقرب نور

‏إلمسيني يوقف النزف بجروحي
‏كلّ جرح بلمسة ايدينك طهور

‏يا عظيمه زاد بوجودك طموحي
‏إن وصلت الغيم قلت القاع بور

‏لا تظنّين الطمع يسرق وضوحي
‏فيك حرصي ما سرق غير الغرور

‏يا ديار القلب .. ليه اعلن نزوحي
‏وانتي اهل الروح واوطان الشعور
- فيصل القاضي

اشرق النور من شفتك وفاح العبير
ردّت الروح في صدر السحاب وبرق

جيت مثل الكلام اللي يحدد مصير
یا خطا السارق اللي ما درا انه سرق

كان (قدرك كبير ) وكان (جرحك صغير)
لكن الجرح في يوم الموادع ... فرق !

جيتك اجبر كسور وطحت منك كسير
مثل من قام ينقذ له غريق وغرق !

انتهينا .. مثل دمع العيون الغزير
(اجتمع فالطلوع) .. (وفالنزول افترق)

صار بيت العمر بيت القصيد الاخير
شفت فيه السعاده والنهايه : ورق !

راسمه (فالكتاب) وحاسمه (فالضمير)
والضمير: اعتذر لي .. والكتاب: احترق
- عساف بن سعد

مجاميع خلق الله على قصرك المعمور
تهافت على ثغرك وسلهامة اهدابك

وانا اللي تجاوزت الجموع وطمرت السور
عشان انهزم لرضاك ، وافوز باعجابك

مع انك ظلام احب اشوفك بصيص النور
ومع انك ضياع احب اوقف على بابك

غب ايام ، واسابيع ، وشهور تلو شهور
ولا تشرح ظروفك .. ولا تبدي اسبابك
- فهد الحماد

جميلة جدًا

انت ياللي ضحكتك كانت على احزاني تجود
‏وفعلها يضفي على الايّام - لمسة حانية -

‏وجهك اللي مابقى لي من تفاصيله وجود
‏راح عمري من ورا فقدانه إلّا — ثانية

‏كان خفت أن "فرصة العمر الوحيدة ماتعود؟"
‏فـ أنا عندي لك فرص ،ماهو : بـ فرصة ثانية
- نوران

مرحبا

على مبدا الطريق العابر اللي يجمع الرّحال
‏وقفت وحركت سفن المشاعر من موانيها

‏من الصدمه وقو الكلمه اللي بعد كيف الحال
‏تفاديت العثور ونظرة تربك محاكيها

‏اسوق الرجل والسود النواعس تطرح الخيّال
‏وانا ، اللي ،، ماني بخيالها ماني بـ ادانيها

‏بدايات الهوى يافاتنه ماهي بـ الاستغفال
‏ولا ترضى بها اهل المعرفه عن بكرة ابيها

‏مبداينا ، عزاز ، وروسنا ، ماتقبل ، النّزال
‏ولا عز ، الرجال الطيبين ،، الا مباديها

‏لقيتك والصدف مثل البروق تهيض الوبال
‏ولا زلت بدوي ٍ كلمته ماهوب يثنيها

‏رفضت اللي طلبتي فالمكان اللي عليه اقبال
‏وقلته عن قناعه والظماير بان خافيها

‏تماديتي على روض الحشا اللي يمنع التجوال
‏وتجاهلتي قوانين التعدي ماجهلتيها

‏رغم حرصي وصدة خاطري من لابسات الشال
‏وتجربت الفراق و وجعة ماني بناسيها

‏مازلت اسمع صدا اخر كلمه وباقي معي لازال
‏ونبرت صوتك اللي كل ليل تمر و اوحيها

‏احبك كثر مامرت علي وكثر ماتنقال
‏ماحرك قلبي من اقصى ضلوعه لين قلتيها

‏كتبتيني قصيده والقصيد احيان راحة بال
‏وبعض احيان مصدر لـ الجروح وحزن راعيها

‏فمان الله ياغصن الربيع اليانع الميال
‏لو اني ما آعرف ديار ربيتي في مرابيها ):
- محسن بن مترك /عابر

احبك كثر مامرت علي وكثر ماتنقال
‏ماحرك قلبي من اقصى ضلوعه لين قلتيها

من قرا بيتين لي .. لا يعتقد بانّه قراني
ما لحرفي منتهى ومالي مثل حرفي نهايه

ودي انه يوم قفا مقفي قبل اجيه
‏قبل لا ارخص دمع عيني وخطوات قدمي

‏ماترك لي شيٍ اعلق امالي عليه
‏والندم ماعاد ينفع لو ابديت ندمي

‏ماعتذرت لسود الايام لو عذري وجيه
‏ عمريّ ياسود الايام فيني واهدمي

‏ويش عندك عقب يوم ٍ يموت الحب فيه
‏ويتساوى في عيونه وجودي وعدمي
- بندر الدويش

تداعت أحزان قلبي تالي الليل
‏ناغشتها بالقصايد والأغاني

‏هبت وصبت على صدري هماليل
‏لين اللّتطم سيلها بين المحاني

‏الدمع ما يرخصه رخص المناديل
‏الدمع فوح القلوب اللي تعاني

‏وأنا كثر ما تحملت الغرابيل
‏ما زلت بين التهاون والتفاني

‏دايم رهين المشاعر والتفاصيل
‏لي شخص ثاني ولا لي وجه ثاني

‏أحيانًا أبكي على غيب المقابيل
‏وأحيانًا أضحك على قسوة زماني

‏وأحيانًا أغيب عن مجلس رياجيل
‏وارجع وأعّين مكاني في مكاني

‏وأحيان تزعلني أصوات المواويل
‏الين ترضيني ( السبع المثاني )

‏وأحيانًا أضيق من مَدحة وتبجيل
‏وأحيان أبي كلمةً تنصف كياني

‏ وأحيانًا أحزن على بعض المداهيل
‏واقرا تجاعيدها على المباني

‏وأحيان وأحيان لا قوة ولا حيل
‏حتى الكلام يتلاشى في لساني

‏(غرابة إنسان) بين الحط والشيل
‏اللي قرا ما كتبته.. ما قراني

‏والله لولا الحيا والقال والقيل
‏لا أصيح بالصوت في كل قحطاني
- سعود بن مبارك

مرحبا