‏راوديني وابشري بي ليّا حان القتال
‏القتال اهون من النيّه المتردده

‏شاعرك ما همه الموت يا بنت الحلال
‏تاركٍ روحه خلافه وقلبه في يده

‏مندفع لعيونك اللي مثل سود الليال
‏والليالي لو تبي تجحده ما تجحده

‏من يشوف الوجه هذا لو انه فـ الخيال
‏كل يومٍ يشكر الله عليه ويحمده
‏- مطحس حمد

‏على مغنّ الشمس باقي دمعتين
‏بتطيح و يقوم الضيا من مرقده

‏أنا آتحرى الفجر لي حول شهرين
‏كني عقيمٍ يحتري شوف ولده

‏يامعشر الي فوق كبدي سامرين
‏ما مرّكم صبحٍ يباريه جعده

‏هزيمتي لا مرّة و لا مرتين
‏لا قام مجدوله يمازح عسجده

‏العاتق المنتوق قبل أربع سنين
‏واعدني ب ليلة ولا اوفى بوعدهْ

‏كل المحبة نظرتين و كلمتين
‏ياقلبٍ تكذّب مناشيه رعدهْ

‏نصيبك البارح لعنةٍ الوالدين
‏و نصيبك اليوم إلتفاته و لهده

‏آحايل البسمة من الثغر الحزين
‏لاقام جمره يصطلي دون بْردهْ

‏كم لي و انا اواسيه بالعذر السمين
‏و اسهر على ناره ولا آذوق شهده

‏خلوني استنطق عيون الشعر لين
‏اقلّطه مثل الخليفة فبلده

‏في ضفّي الشعار و المتذوقين
‏مرّه تصفّق له و مره تحسده

‏تعدّ ما قدامك إلا الفرقدين
‏في واديٍ تهوي إليه الأفئدة

‏يا بِعد بيتك من ظنون الشامتين
‏قلته و لا قالو ياوجه الله عدِه

‏ليه تصدد عن بقايا الراحلين ؟
‏الموت مثل العمر مره وحّْده

‏العقلٍ ضيفٍ رايه الرأي الرزين
‏و القلبٍ ضيفٍ غدّه ولا تنشده

‏اللقمة الي دونها أنياب و عرين
‏آحلى من الي باردة و مبرّدة

‏يالله بيومٍ فرجته فرجه سجين
‏يشيّخ الايام قبله و بعده

‏يا اقسى طعوني شايبٍ سمّاك لين
‏وش عذره ان وارى طموحي فلحده

‏خلي يديني لين آشوف الدرب زين
‏انتي عذية و المسافة مجهدة

‏قلبي يقول بنلتقي لو بعد حين
‏ياوجهٍ اعرف قيمته قبل افقده

‏اقرى كلامك في وجيه العابرين
‏و اعمي عيوني قبل اترجم مقصده

‏وشلون ما اداريك وانتي ياسمين
‏أنا معك حتى السكوت افقّده

‏اغضي بسودك لين اشوف طويق طين
‏و ميِلي بعودك لين ظلّه يسنده

‏الي عظامه ما تشيله خطوتين
‏تقتاده طيوفك و يقتاد سهده

‏ان قال مابعد الحنان إلا الحنين
‏قولي بيرجع لي و يبشر بسعده

‏آنتي و أنا و الليل و الجرح الدفين
‏لحالنا يوم القلوب مجنّده

‏شوقٍ على حدّه كلامك ما يبين
‏أنا آعرف عيونك ماتقدر تجحده

‏و حبٍ تساومه الحياة بطعنتين
‏ما يملك إلا روحه الي فجسده

‏يآ اعذب قصيدي شاعرك خالي يدين
‏لو وقّف الدنيا على راحة يده
- متعب البقيلي

أنت طيّب والصباح اللي يجيبك طيّب
جعل تفداك الليال السود ، ليله ليله
- عبدالعزيز العبلان

‏وإنّ تجوّدت يا ظِلٍّ غْصونه رطيبة
‏ما تحلويت مقيالي، ولا شفّ بالي

‏ممحلٍ داخلي من صِرْف الأيّام ريبة
‏كثر ما غرّبوا نوقي.. وْشَدوا رْحالي

‏إن هدى اللّيل عوّدت الظّنون الرتيبة
‏وإن تبدّيت سلّيت السِّنين الخوالي

‏كيف أجددك يا علمٍ مع النّاس غيبه
‏وكلّما طاب جرحٍ منك؟ ما طاب فالي

‏وش مْضيق صْدور أهل الصدور الرحيبة؟
‏غير وقفة وداعٍ... ما لها منك والي

‏شبّ قلبي على عدِّك.. ولا هي غريبة
‏لو ذبحني حلاك الوِرْد من فاك حالي

‏بْدويٍّ على نجمك يسوق النجيبة
‏مرخصٍ لأجل ضحكة ليلتك كلّ غالي

‏شايفٍ فيك: دوحته القديمة، وْصَيبه
‏وعبرةٍ وش طلبها؟ غير سوْد اللّيَالي

‏ جعل دارك مْرِيف، وجعل ربعك قريبة
‏يا أوَّلٍ.. ما لقيت لـْ ضيق مسراه تالي

‏في رجاك الحقايق كلّ خطب ٍ تْجيبه
‏كيف ما جابت عيونٍ هدبها ظْلالي؟

‏والله إنك مْصيب، وْجِيتني في مصيبة
‏وأنت يفداك حالي -يا حبيبي- ومَالي

‏طالبك طلبة اللي فاريّ الوقت جَيْبه
‏لا تخليني.. أخوض المعارك لحالي.
- محمد السلطان

وادعيني وأتركيني عسى دربك سماح
القناعه كنز عند الضمير المستريح

أتركيني ضايق البال مكسور الجناح
آتثاقل قومتي وآتحالا للمطيح

ياهنوفٍ علّقت قلب شاعرها وطاح
وأحفرت له في مسابل مدامعها ضريح

تنقله من بورة اجراح إلى بورة اجراح
مثل ماينقل على متن الإسعاف الجريح

يوم قفّت ترّفع الليل وتحط الصباح
كنّها شيخٍ من الطيب مطغيه المديح

تدري أن الله وأكبر وحيّا للفلاح
لا على الدين اليهودي ولا دين المسيح

مير ذمّة شيخة الغيد سيّدة الملاح
ذمة ( أحمد نور عبدالصمد عبدالسميح )

له على كل المحاور منافذ وإنفتاح
مرّةٍ يكذب ومرّه يعلم بالصحيح

مادريت أن إجتياح المجاريح إجتياح
ياطريح ألزم فراشك وخلك ياطريح

الحياة أحلامها تذهب أدراج الرياح
توهمك بأشيا تكوّن على البال وتبيح

أعذريني يوم أقابل طعونك بإرتياح
كيف لا والجرح مملوح والجارح مليح

أعذب من النسمه اللي يمر بها الصباح
لا أستقرت في فوادٍ من الفرقى جريح
- مدغم ابو شيبه

ياحبيب الناس .. مدري يا حبيبي
لا تعدّ مْن الشعر ما لا أحبّه

الحقيقه .. قلبي الخوّاف عيبي
دارَه مْن الخوف .. ولّا عنك خبّه

ودّي اعطي حظّ عمري ما بجيبي
لجل اعيش الحبّ من بارد مهبّه

وأنت يا من ساقه الله من نصيبي
افهم اللي شاف بك جرحه وطبّه

انتبه تجحد وفاء قلبي وطيبي
وارفق بجرح الهوى الغضّ وتنبّه

مثل ما يفرق شروقي عن مغيبي
يفرق احساسي عن احساس الأحبّه

‏قناد المواعيد

‏البارحة سامرتني يا اتلع الجيد
‏بالخايع اللي موطنه في خيالي

‏قلدتك القمرا ولبستك البيد
‏وحطيت في كفّك رياض ومفالي

‏قامت تمد إلك السحايب عناقيد
‏وشفت الصباح يسيل من خد غالي

‏شمسٍ تهايق من علو الأخاديد
‏ما تدري انك مشرقٍ وسط بالي

‏ليت الهوى من يمّكم يزهم العيد
‏إلين أشوفك مرتكي في ظلالي

‏بعدك يذوب قاسيات الجلاميد
‏وشلون عاد إنسان عاش انعزالي

‏اعروق قلبي ممحلاة وجراهيد
‏صب القراح وعلّه يطيب حالي

‏مد المواصل يا قناد المواعيد
‏الارض ارضك من قديمٍ وتالي

‏يا صاحبي كل الأوادم شواهيد
‏من عقبكم ما عاد صدري شمالي

‏يا صاحبي وظلوع صدري مواقيد
‏هات البراد وهات وضح الليالي

‏مريتني عجلٍ وثارت تناهيد
‏متى الزمان يوقفك في مجالي

‏البارحة ودعتني يا اتلع الجيد
‏نفيتني عن واقعي في خيالي
- وليد بن مانع

مرحبا

لا مال غصنك ما لصبحك مداخيل
‏والحقّ واضح دون عذرِك، وظرْفه

‏علَّم عصافيْرك إليَا خيَّم الليْل
‏تستأذن اسمك بَيْن كرْسي، وشرْفه!

‏أنا أتفدَّى الناعسات المظاليْل
‏طالبك شف لي لا اِنتهى الحبّ صِرْفه

‏بعض الكلام يجيب روس الرياجيل
‏مثل الكلام اللي حبيبي يعرفه!
- محمد السلطان

أعذب من النسمه اللي يمر بها الصباح
لا أستقرت في فوادٍ من الفرقى جريح

تفاصيل، وأحداث، ومشاوير.. رايح جاي
‏تهاويل، وجروح، وطواريق.. وزياده

‏طريقي ضياع ومجرياتي قصيد وناي
‏أحاول عشان أدلّ، وأضيع كالعاده

‏أوقّف وأهدّي خاطري وأستعيد قواي
‏وأشوف الوجيه اللي تلوّن وأنا ساده

‏أنا الراي لاقالوا هل الراي، وين الراي!
‏وأنا الحرب والتاريخ والسيف وغماده

‏تكفّيني الفزعة ليا جات من يمناي
‏عن الفزعة اللي في يدّ الشعب والقاده

‏تعرف الليالي طيب راسي وطيب أباي
‏ليا سولف اللي ينسب الطيب لأجداده

‏على العز ياروسٍ تحاما على الحمّاي
‏الأيمان مدّاده والأرقاب سدّاده

‏عذلني من يقول الليالي تجيب أقصاي
‏وأنا الصامل اللي تعرفونه من عناده

‏"عشان الأمان اللي يقيّد مسير خطاي"
‏تجلّدت.. ويدين المقادير جلّاده

‏ما أعرف أتواضع عند حقي وعند عداي
‏أعرف أذبح الصيّاد وأكسّر شداده

‏عسى كلمتي ورسالتي وزعلي ورضاي
‏فدا الضحكة اللي غرّبتني ورى غاده

‏حياتي وأنا أسعى بين صوتي وبين غْناي
‏حياة الغريب اللي تغرّب عن بلاده

‏تنازلت لكن ماتنازلت عن مبداي
‏وجيه الرجال تخلّي النار وقّاده

‏ياغاده ماقصّرت الخطاوي ورى مسعاي
‏معي صبر، لكن صبر الأيام مافاده

‏لازلتي رهينة خاطري وثمرة دنياي
‏وحلمٍ تزلّ سنين، ما زلّ ميعاده

‏تغرّبت واجد عن ديارك وعن مرباي
‏جعل ماضي سنين المحبين منعاده

‏ياكبر الكلام اللي بصدري من أمس وجاي
‏على قلبي اللي نسمة الدار تقتاده
- مشاري محمد

اللهم صلِّ وسلم وبارك على نبينا محمد

"الصلاة على النبيّ -صلى الله عليه وسلم- من أصول الأذكار في الإسلام ومن أعظمها؛ فإنّ الله تعالى أمر بها المؤمنين على أبلغِ أسلوب في التأكيد، وأكملِ وجهٍ في الترغيب، وجعلها من الأذكار اليوميّة المتكررة في الصلوات!
وهي: ذكر لسانيّ؛ بتلاوة لفظها، وقلبيّ؛ بتدبّر معانيها، ومثمرة لرسوخ الإيمان، وشدّة المحبة وتمام التعظيم له ﷺ المثمرين لاتباعه، المحصّل لمحبّة الله عبده، وتلك غاية سعادة المخلوق ونهاية كماله!"

صبحكم الله بالخير

هذا رابط المجتمع في تويتر تشرفوني كلكم يا آل قصيدة الكرام ♥️

https://x.com/i/communities/1954098281711030341

ما استغني عن وجودكم ♥️

14.444 مشترك
تميّز 💘

أنا عاشق شعوري من ورق و ضلوع صدري ناي
‏اقول الشعر و ارزّ علمه و ارعی مرابیعه

‏اقول بـ كل مرّة ماني مغنّي على ليلاي
‏انا اكبر من مشاوير الغرام ومن مواضيعه

‏و اذا قام الحنين يسوق قلبي قمت اسوق خطاي
‏ادور من دروبك درب قد جيناه و اضيعه

يا كثر صورك ؟ اللي ما نساها بالي النسّاي
‏لو ان عمري معك مرّت سنينه مثل اسابيعه
‏
‏حبيبي كيف أمرّ بشارعك ماتدري اني جاي ؟
‏وانا اعرف الصباح اللي يجيبك من ذعاذيعه
‏
‏يا سحر آخر قصيدة في عيون الشاعر الغوّاي
‏يا وجه مستعد اعيش عمري في تقاطيعه

أمانه لا تغرّك مرحباي وضحكة محيّاي
‏ترى حزني مثل رمشك طويل وضيعتي ضيعه
‏
‏تركت وجيه خلاني وراي وجيتك من اقصاي
‏وانا بعض الوجيه اليا شريته ماقدر ابيعه
‏
‏أخشّ اسمك عن أطراف الحديث وتفضحه دعواي
‏وتهتف له عروق القلب وتجدّد له البيعة :(

لا تاخذك الليالي والليالي ماهي بشرواي
‏تداري خاطرك من كل تنهيده و تلويعه

يقولون ان حبيبك ما تهزه حشرجات الناي
‏واقول بصوت عاشق مابيدّه غير اصابيعه
‏
‏عفى الله عن حبيبي لو حبيبي ما هو بـ ويّاي
‏كثر ما اعاند الشوق بغيابه وارجع اطيعه
‏
‏عليه من السرور اللي ماهو في وجهي البكّاي
‏وعليه من السلام اللي ماهو في ليل توديعه
- عبدالله بن ناصر السبيعي

تجديد عهد♥️