تعوّدت الدروب، ولا سلا طرفي، ولا لي دار
‏بعد بدّد سكوني.. كلمةٍ ماني بـْ حاسبها

‏على ساق اِنتظاري كنْ تغريب الهوى مشوار
‏خذيته من معاقيل السّنين ومن تجاربها

‏يمرّ العمر، وعيوني بحور.. وفي يدَيني ثَار
‏وأخاف أملّ دربي قبل لا أستقصي مآربها

‏تهقويت اللّيَالي من ظمأ خاطر، وْدمٍ حار
‏وأنا اللي كلّما جادت يدي؛ شحّت مشاربها

‏لقيت إن كل قلبٍ له حبيب وكل بيت أسوار
‏ولقيت إن العيون أقوى من الشلف ومضاربها

‏قديمي وأنت غافل عن مداي ولا سردت أعذار
‏أنا كم لي أصالح ماضي أيّامك، وأحاربها؟

‏تضيع شموسك اللي دونها صوت وهوى وأسرار
‏تشعبت بـْ سماها ما لقيت إلّا مغاربها

‏أنا وإن كان خلفك شَحّ زاد.. وجفّت الآبار
‏تعمّدت الهلاك إن ما هديت العين صاحبها

‏ولاني والله بـْ مرخص عيونك عاد مهما صار؟
‏لها عندي [مكانة] لو قدرت أقسى وأعاتبها

‏تخيّر فالسنين، وفالدروب، وفالسماء، والدّار
‏أنا كل حاجةٍ ترضي غرورك قِلّ، وأجيك بها.
- محمد السلطان

"تخيّر فالسنين، وفالدروب، وفالسماء، والدّار
‏أنا كل حاجةٍ ترضي غرورك قِلّ، وأجيك بها" جميل جدًا

-غبار الحروف-

شاعره واستنطق شعوري واغنّيه بمحلّي
وانثر غبار الحروف اللي يعاتبني شغفها

كلّما اسدلت الستار وصاحت الأوجاع ملّي؟
هِلَّت حروف الشعر من ياءها حتى ألفها

في قصيدي مربط احساسي ومشكلتي وحلّي
آتداوى به، مع انه لا لقى احزاني عزفها

ماكتبت الشعر في لحظة ترف ولّا تسلّي
شاعرة وآعيش بالأبيات واهيييم بكنفها

امتلى بيتي من الزوّار واحساسي يهلّي
والبيوت اللي كتبت ازريت لا اقفّل غرفها

القصايد ليه يطرب من ألمها القارئ اللّي:
يقطف ابيات القصيده ويتبختر لا قطفها

دمعةٍ هلّيتها حزن ؟ اصبحت دمعة تجلّي
آتمكّنها واعانق جرحٍ بقلبي نزفها

آتسلّف من سنيني ضحكةٍ في وجه خلّي
واختلق له ضحكةٍ تربكْه من زايد ترفها

كلّما صدّيت اداري الحزن شكّ انّه تغلّي
خااايفه أرضي ليال العمر وارجّع سلفها

الحبيب اللي عشانه ارتحلت وجيت كلّي
آتحلوى كلّ غلطه لجل خاطرْه اقترفها

كيف اعيد ايامنا الحلوه من العمر المولّي؟
والدروب اللي تودّي له علقت بـ منتصفها

مشكلة قلبي كريم شعور، يذعره التخلّي
يعتنق كلّ المشاعر ويتعلّق في طرفها

لو ترجّيت السنين تعيد أجمل ما حصلّي
مستحيل ان الليال السود تعرب عن أسفها

‏كِل كلمة من لسان الشمْت ما هزّت مقامك
‏دامك اللي بين ضلعيني على عرشك مقيمه

‏أحسب إنّ الخيزرانه في يدْي و اثره قوامك
‏لا تثنّى قلت يمكنْه انخلق من بطن غيمه

‏آتلذذ في حرُوبك حُب ، و ارغب في سلامك
‏والصحيح إن السلامه خير ، و وصالك غنيمه

‏الحيا في وجهك البدري ، و موتي من كلامك
‏يوم قلتي لي نوايانا من الباطل سليمه

‏كل ما مالت ضلوعك من غَيا ، عيّا حزامك
‏لا تمايلتي ، تمايل كل نفسٍ مستقيمه

‏ما عشقت إلا عيونك كثر ما تَرسل سهامك
‏في فواد اللي مشرّع لك من اللهفه صميمه

‏ولا غبَطت مْن النسيج إلا خيوطٍ في لِثامك
‏ليه تاقف بيني وبينك و انا نفسي محيمه ؟

‏اسلبيني ما معي سلطه على فرض احترامك
‏اخذي اللي تستحقينه عطا ، ماهو ظليمه

‏« مستعد اقطف لك النجمه و اخليها زمامك
‏شاعرك حتى الفضاء من نشوته يقدر يهيمه » .
- فهد بن بجاد

مرحبا

عندي عتب عليكم يا آل قصيده

بعض المتذوقين هداه الله ينشر القصيدة ويحذف اسم شاعرها، اذا غايتك الحقيقة دعم الشعر والشعراء فمن الأولى نشرها بإسم شاعرها او حتى الإشاره بحسابه، هدفي من القناة حفظ الحقوق الملكيه لأصحابها، فإن لم تعرف أو لم تستطع ذكر شاعر القصيدة ضع علامه اقتباس "" لهذا الغرض وضعت العلامه، شاكره ومقدره تعاونكم.

اشوف قصايد الشعراء تُنشر بتويتر بعد نشرها هنا ويزعلني مره انها بدون اسم أو مُحرفه على هوى ناقلها! عيب والله

بعيد : من التصنع ، والتكلف ، والكلام الجاف
‏أقول اللي يجول بخاطري .. وأترجم شعوري

‏عرفت : إن الشعور أعمق وأجل من الوزن والقاف
‏ولقيت : إن صوت صدري مايشابه صوت حنجوري

‏تركت اللي يمرّه فالظلام الساري الحوّاف
‏وأخذت من النهار اللي كشف وجه الثرى ، نوري

‏تبـيّن جرتي بالوادي الموسوم .. والمشراف
‏معا سرب الطيور العابره .. ماطارت طيوري

‏ماني بمدوّر اللي يسمع بذكره ولاينشاف
‏ولاني واقفٍ في موقعٍ مايعرف حضوري

‏ورى وجه الكتاب اللي تشوفونه بدون غلاف
‏ربيع الجنة الخضرا : عسل سدر , وزهر جوري

‏لو بوّصف المشاعر .. جايز التبذير والأسراف
‏ولا من حقي أكنز جوهرة عمري وبلوري

‏كتبت أطراف صوتي في طريق العاشق الميلاف
‏وقدمت لمجاريح الليال البارده شوري

‏ورى الألقاب والنور الصناعي مارسمت أهداف
‏مع إني قد نحت صخور نجد براس باكوري

‏ولايخذلني اللي لاكتبني : يكتب إسمي حاف
‏ولايزعلني اللي في طريقي طوّفوا .. دوري

‏ماني محتاج : للتصفيق ، والتعليق ، والإنصاف
‏وأنا أحس الليالي والنجوم البيض جمهوري !
- حمد الميموني

‏أثْر انّ ما للّيل والي لا استفرد بالعليل؟
‏يحدّ نابه والبن ادم حفنة عظام ووصال

‏يا رب صبحك ما بقى فيني على هالليل حيل
‏يا رب حيلك ما بقى فيني على التمزيع حال

‏لا تحرم الواقف على بابك من شموسك فتيل
‏لو كان ما له مع صفو خلقك ولا احبابك مجال

‏أنت الكريم اللي يقولونه ولو خصمك بخيل
‏وش عاد لو خصمك كريمٍ حدّته سود الليال

‏اكرم دخيلٍ يومها بيديه ما ردّ الدّخيل
‏ما جاك عاني لو معه في نافذ قْضاك احتيال

‏لا تجبره يطلب وجيه النّاس من شح القليل
‏ولا تعلّق حاجته باللي يذلّه بالسؤال

‏لو ما بقى في متسّع ساحتْك لحصاني صهيل
‏اباترجّل وانت لك غيري صناديدٍ عتال

‏سرّح شجاعٍ ما ركع يوم انّ للوقفة سبيل
‏من قبل تفرغ بندق عزومه وترديه الرجال

‏يارب طالت فيني الرحلة ولي حمْلٍ ثقيل
‏ما مال ظهْري من ضنا شيله لَكَنّ الحظّ مال

‏ان كان كاتب لي بهذا الدرب مشوارٍ طويل
‏عطني على قد الطريق عْتاد صبْر وطول بال

‏وان كان ما في شجرة الراحة بتقسم لي مقيل
‏خذني وصيّرني لمن ذاق الشقا مثلي ظلال
- هاجر
‏⁦ @msjorim⁩

صبحكم الله بالخير

‏يا حبيبي والقصايد ما تسلّي
‏والمدى شف وجهه المرتاب ليّل
‏
‏فيه غصنٍ ذابل وشِعر وتجلّي
‏وفيه قلبٍ ما يملّ وضحك عيّل

‏للصباحات القديمة جيت كلّي
‏جيت أفتّش عن صباحٍ لي مهيّل

‏كل ما ضاقت بي الأيّام قلّي؟
‏ليه أغمض ؟ وأنطق اِسمك وأتخيّل
- محمد السلطان

البارح الروح من بعد البطى والجفاف
‏استبشرت بالهنوف ونالت مرادها

‏حفيدة الطّهر بنت الغيم روح العفاف
‏ملت طريق الغياب وفكت آحدادها

‏لدت بعين التغاضي بعد طول الخلاف
‏ورحب بها القلب قبل تشرف ابلادها

‏جتني تقود الرضى وتقدم الاعتراف
‏الشوق يحدا ضعنها والغلا قادها

‏رغم الجفى ،، في ملامحها المحبه تشاف
‏والنبره اللي يغير مودي اقنادها

‏الحسن في وجهها واقف على اخر مطاف
‏والملح مولود في تاريخ ميلادها

‏فيها من الغطرسه طيش وكبر واختلاف
‏وفيها من اللين مايطغي على عنادها

‏قالت ماتشتاق ؟ قلت اخاف قالت تخاف ؟
‏قلت ايه واعطيتها رايي ولا فادها

‏تبيني اعتاد وانا بين وقفه وقاف
‏وبعض الاماكن من الصعب اني اعتادها

‏مضحي ، وراهن ٍ عمري مابين الف گاف
‏ومجاهد ٍ نفسي اللي يصعب اجهادها

‏لي شيمه ولـ المحبه فالصدور النظاف
‏مشاعرٍ من بنود العفه امدادها

‏ان بدلت لحظة الاقبال بالانصراف
‏ماني بـ خرمان دلتها وبرادها

‏لا صار ،، مافيه ،، لـ نهاية ،، غلانا ،، زفاف
‏قبلي ،، ضحايا الهوى ،، ياكثر تعدادها

‏يكفيني اضم من بين الضلوع النحاف
‏سيرة وفاء في جبين الحشمه آسنادها
- محسن بن مترك

بدوي لا أستحى من قول أحبك
راح ينًسج لك من اللهفة قصيدة
- عويّد الحجيلان

من أجمل ما قرأت مؤخرًا

نسيت اللقا والحب والا نسيت اتحس
‏اداريك حتى من ملامي على جرحك

‏عليك الكرامه واقفه والشعور يعسّ
‏اماكن لقانا كلها ملح من ملحك
- ناصر مناحي

صبحكم الله بالخير♥️

طَـرَق صوت الهوى بابٍ على وجه السما مفتوح
‏تميّـله الهبايب والسحاب يبلل أطرافه

‏ياليته من خشب وأحط قطعه من سفينة نوح
‏لكنه : من مشاعر صافيه .. وهموم شفافه

‏بعد ماكان فيه السيل يجري والبروق تلوح
‏ويقطف سيّد الدنيا مرابيعه وميلافه

‏تولاه الغياب اللي بدون إذن ، وبلا مصلوح
‏رعى فيه الهجير وشان لونه والدهر لافه

‏بقايا أطلال وظلال وعروشٍ خاويه وصروح
‏ماعاد يبين فيها بيت راعيها ومضيافه

‏على ماها يحوم الطير الأشقر والحمام ينوح
‏متى ياواردين الما يموح الدلو غرّافه

‏تعبت من السكوت اللي يزيد من الغموض وضوح
‏لو إن عمري كتابٍ مالقى عنوان لـ غلافه

‏لو أسمح للطواري والصحيفة والقلم والبوح
‏طعن رمح الهوى شعري وسال الدم من قافه

‏نثرت الذكريات اللي ملت صدر السنين جروح
‏وشافت عيني اللي من زمان أخشاه وأخافه

‏ماعاد أدري وش أوقف على شانه ، ووين أروح
‏وأنا اللي تنحسب له خطوته ، ويشاف ميقافه

‏تجرّعت الحنين اللي يقطّع صوتي المبحوح
‏ومليّت الجبل لو برّني ظله ومشرافه

‏تباطتك الليالي والمساري ياللطيف الروح
‏وفقد طلّتك صبحٍ من جبينك ياخذ أوصافه

‏إذا جيت النهار : تزيد نوره ، والورود تفوح
‏ولـ جيت الليل : قالت لك نجومه ، عاش من شافه
- حمد الميموني

‏"لو أسمح للطواري والصحيفة والقلم والبوح
‏طعن رمح الهوى شعري وسال الدم من قافه"