اللهم صلِّ وسلم وبارك على نبينا محمد

- معاناة الظبي -

يمّه طموحات العمر ماجت على قدّ تعبي
حلمي مثل فكرة فريدة كتبت فبيتٍ ركيك

يمّه متى تشرق لي الشمس واعرْف اللي ابي
لازلت اضيّع وجهتي ويدلّني قلبي عليك

انتي دليلة طفلتك من حاولت معْك تحبي
كيف اختلي باقِ العمر، ماعاش من خلّا يديك

يا جنة الدنيا معاناتي "معاناة الظبي"
اللي رمى احلامه وراه وحدّه الموت الوشيك

من الحزن قلت امي ادرى بي من انسان اجنبي
مدري هزمني الحزن ولا عثرة الأحلام ذيييك

امانتك لا تزعلين ان عانق الدمع هْدبي
هذي عباير طفلتك تبي تعانق راحتيك

وقولي لي ان جارت ظروف الوقت: اقري واكتبي
مْن الشعر لين الحروف من المحبّه تحتويك

خليني اشرح للورق واكتب تفاصيل سببي
عن ما جرى؛ عن حزني اللي صار لأحلامي شريك

انا دواي بكلمتينٍ شفت فيها مكسبي
ولا الحلم؟ مخلوووف دامه يبتديك وينتهيك

صبحكم الله بالخير♥️

يوم اسهب الدمع وتساقط على الخد
‏طاح المطر فديار ماهي دياري

‏احفظ قصيده مثل ما احفظ له الود
‏وادرى على قلبه من احزان داري

‏اخاف قلبه ينسرق سرق ويصد
‏وانا على رجواه طال انتظاري

‏من الوله آعد الايام وآعد
‏دقايق الوقت وثواني نهاري

‏اخترته من الناس يوم الزمن ضد
‏بس الألم ما كان ضمن اختياري :(

‏يهب الجوى والبرد معزوفة التحنان
‏وليال الشتا يستنطق الشوق هاجسها

‏ويفز الحنين مْن آخر الصمت والفقدان
‏وتهيج الجروح اللي عن الشعر حابسها

‏يا غيّاث روحي والسهر ديرة الخذلان
‏وانا حادي احزان السهارى وحارسها

‏فقدتك وفقدانك على وجه عمري بان
‏وانا اخترتك بمعشب سنيني ويابسها

‏عيون ٍ روَت وجهك عمر ما ملاها انسان
‏يغني لها الملح وترفرف نوارسها

‏يا كثرك بذاكرتي .. تمر وتسيل اشجان
‏وتفاصيلك بْكل الوجيه آتلمسها

‏يا كل السنين وضحكتي واوّل الكتمان
‏سقى الله عيون ٍ حيّرتني نواعسها

‏تمر الحياه وليت الاقدار بالامكان
‏واعَرْف الليالي وش تخفّي بواهسها

‏يا كيف اتجاوز ما مضى واقدر النسيان
‏ولك ضحكة ٍ في تربة البال غارسها
- صالح الهويملي

تجديد عهد♥️

شطر صالح الهويملي:
"وانا اخترتك بمعشب سنيني ويابسها"
ذكرني بشطر لي قلت فيه:
" أنت صحرا باختياري عشقت يباسها"

‏اخذي من الليل مايكحل عيون النهار
‏وخلي عيون القصيد اكحل لك أهدابها

‏الركب وقف وسيّرته بشعري وسار
‏وراحت مطاياه ووسومي على أرقابها

‏لقيت معهن رساله من لبيد لنوار
‏ونوار مدري وش أخطاها ووش صابها

‏الشعر يمكن قدر لكن ماهو بـ اختيار
‏حاله تصيب البشر مدري وش أسبابها

‏قالوا يدور الزمن وابطا الزمن ماستدار
‏والضحكة اللي خذاها الوقت ماجابها

‏لي حول عامين ماسقت القدم في مطار
‏وإن سقت الاقدام ترجع بي على بابها

‏وإن رحت مع ذود أبوي اتبع هوى أم الحوار
‏عنيت رجلي بممشاها لمرقابها

‏وإن سولفوا بالبياض وسولفوا بالسمار
‏شعرت بالذنب كني جالس اغتابها

‏لبستها عن عيون الناس ثوب الوقار
‏وعن ألسن الناس صادقها وكذابها

‏اسرى بها الخوف من قلب عليها يغار
‏وطارت مع الحزن ماطارت مع أسرابها

‏تخندقت مالها راي ولاتملك قرار
‏محتاج لي ريح لأجل أفرّق أحزابها

‏طلّاب وصل وغديت تقول طلاب ثار
‏يا اقرابها من كتبها لجل يقرابها

‏الشوق مايذبح ، اللي يذبح الانتظار
‏ياغيابها مالك أخر ليه ياغيابها؟

‏وش فيني أحبّها وأنسى لا أحب الديار!
‏وأنا أدري إن الديار أوفى من أصحابها

‏يمكن يجف القلم ولايفوت القطار
‏لكن الأحباب ماتسلى عن أحبابها

‏ماني بمحتاج أسف منها ورد اعتبار
‏كانت لي أم القصيد وكنت عرابها

‏الشام للحين مازالت تذكر نزار
‏وبغداد تذكر رصافيها وسيابها

‏لو لخصوني وجابوا سيرتي بـ اختصار
‏متأكد إن سطري أحمل سطر بكتابها

‏– بندر الدويش

‏"الشعر يمكن قدر لكن ماهو بـ اختيار
‏حاله تصيب البشر مدري وش أسبابها "

‏"قالوا يدور الزمن وابطا الزمن ماستدار
‏والضحكة اللي خذاها الوقت ماجابها"

الله الله الله

مساكم الله بالخير

الطيّب اليا نصوه الطيبين
‏في لازمٍ صعب..نومس لابته

‏امّا ضرب صدره بيده اليمين
‏ولا لمس خشمه بـ سبابته
- حزمي بن سعد

اللهم صلِّ وسلم وبارك على نبينا محمد

اللهم صلِّ وسلم وبارك على نبينا محمد

-الحبيب المصطفى-

اشرقت شمس النبوه وانتهى عصر الجهاله
واستنارت مع قدومه بادية شبة الجزيره

اليتيم اللي ترحّل في متاهات الكفاله
كافله ربّ البريّه بالحفظ محْيا وسيره

مصطفيه الله من اشرف منسب وأطهر سلاله
خادمين البيت.. وأشراف العرب وأكرم عشيره

تحت رحمة خالقه عاش وحفظه الله تعالى
وكمّله باحسن خلُق يشهد له اعداءه وفيره

يشبه البدر فـ ضياه اللي تلألأ من كماله
بالليال السود كان النور مرهونٍ بـ خيره

صادق المنطق، وفيّ العهد، محموده خصاله
طيّب الفال ان تكلّم طابت الدنيا بعبيره

فـ أربعينه اصطفاه الله على حمل الرساله
وشالها بيديه واخلص بالكبيره والصغيره

زوجته أول من آمن به وطمّنته بفاله
زمّلتْه وصدّقت بآي الوحي من دون حيره

هي خديجه سيدة كل النساء وآحبّ آله
رازقه ربي محبّتها وفي حبّه جديره

وصدّقه آعزّ صحبه وابتغى الجنّه مآله
الرفيق اللي صدَح بالحقّ من أوّل مسيره

يوم خلّوه القرايب ما تخلّى عن وصاله
وانتهج نهجه وصار لصاحبه ذخر وذخيره

واسلم اصحابه وصاروا درعٍ اقرب من ظلاله
وحدهم ذاقوا من التعذيب قاسيه ويسيره

ورغم ما عاشوا؛ لكلّ انسان قصّتْه ونضاله
ينصره ربّه لو ان دنياه فالسابق مريييره

والرسول اللي أمر صحبه وقومه بامتثاله
كم تأذّى في سبيل انّه يبلّغهم نذيره

صابرٍ من حرّ ما يونس دعا الله واشتكى له
وغادر دياره مهاجر طالبٍ ربّه يجيره

يوم غادرها وقَف بحدودها وعانى لحاله
مثل من عانى فـ مماته سكرة الموت الأخيرة

رغم ما مرّ بـ نبي الله من شدّة لياله
زاده الإيمان أمل لو مُجمل ايامه عسيره

وعوضه ربي بصحبٍ في وفاهم راس ماله
واصبحت يثرب بعد جيّة رسول الله مُنيرة

وقومه اللي كذّبوه وقالوا انّه في ضلاله؟
صاروا يْغبطون حتى الطير في حزّة مطيره

يوم سمْعوا نشره الدين اعلنوا قومه قتاله
شاهت وجوهٍ جعلها الكفر مفقودة بصيرة

وبعد غزوات وجهادٍ طال في نشر الرساله
انتشر دين الله المنصور من ديره لديره

وقرّت عيون النبي بالنصر وتْحقق مناله
وعْد ربي صار واقع تشهده عينٍ ضريره

ثم دخل مكّه وصوت الحقّ يصدح به رجاله
وهدّم اصنام الضلال وكبّر الله في مسيره

من معاريفه؛ عفى عن قومه بأكرم جماله
رغم ماعاشه نبي الله حفَظ طِيب السريره

وبعد عثرات انتشر دين الله اكثر من خلاله
من خلاله، اسلم مْن اعداءه جموعٍ غفيره

وغاب عنّا بدر أمتنا وهو مشغول باله
بعدما كمّل رسالته ونشرها من ضميره

والبدر ما اصعب من طْلوعه سوى لحظة زواله
انطفى النور السماوي من رحل عنّا نصيره

فارق الدنيا وخلّا قلوبنا تشقى بداله
تاركٍ درعه وراه ومفترش قطعة حصيره

الحروف الأبجدية والعمر كلّه فدا له
فدوة لعينٍ على مْراعى عباد الله سهيره

قصّته قصّة رجُل حارب بكفّين البساله
سيرةٍ عطره تناقل عهدها قلوبٍ كبيره

للحبيب المصطفى من خالقي جلَّ جلاله
حرّ شوق و وافر شعور وصلواتٍ كثيره

كم بكيت مْن اشتياقي كنّ ماغيري بكى له
يا جعل عينٍ بكت له تصبح لشوفه قريرة

جعلني يوم اكتب الشعْر ابتغي الجلسة قباله
يكتب الله لي شفاعة من مصيري في مصيره

كُتبت القصيدة في أشرف الخلق؛ رسول الله عليه أفضل الصلاة وأتم التسليم، اسأل الله ان يجعلني واياكم ممن ينال شفاعته.