مرحبا

ولدت حرف و مادت الأرض قرطاس
مشيت نص وقالت المفردة ضِل

مالي طلل و أبكي من الفقد و الياس
عدى الطريق اللي وطى كتفه الكِل

وبعد "التقطني" عابر "التقط" الانفاس
اعقد حبال الصوت عبرات و احل

(سموني) اللي ماعرفهم " قوي باس "
وقالوا إذا شحت دواة اللغة ، قِل:

يبه.. طردت اسمك من التيه عساس
يمه.. رجيت إنك تقولين لي… دِل

بلغت "أشد" الحزن والماضي عماس
ماينطرد لو أوقد .. الليل وآزِل

دمعٍ حبسته في رجاء صادق إحساس
وحبرٍ شربته كلمةٍ كاسها غِل

جف المدى و حلوق الآمال يبَّاس
وخايف لا أوردها على الموت و تعل

مرت سنين من العمر مالها ساس
وأنا على روحي من.. جروحي آطل

ما أرتبت من كلمة ترى العرق دساس
وأنا وريث الأرض و لي السماء حِل

يارب عبدك و إن بدى خالي أوناس
مؤمن رضى حكمك من الدِّق للجِل

طالبك ظللني بظلك عن الناس
يارب أنا من شَجْرةٍ مالها ظِلْ
- شاهر اللغبة

قصيدة موجعه للغايه

هالقصيده بكتني والله، مؤلمه جدًا

مرحبا

‏على كثر الشعور اللي ذبح صدري عجزت أبوح
‏ياليت الشعر يستلّ الشعور اللي ذبح صدري

‏أنا روحٍ غدت في غيهب الدنيا تدور روح
‏وأنا دوحٍ تشفق للرِشاش و نايح الكدري

‏أدوّر بين كوم الذكريات الأولات مزوح
‏عساي ألقى بها ما ينتعش منها ورق سدري

‏و أجي و أروح في دربي ولا أدري ليه أجي و أروح
‏مثل ما ارسم حروفك في ضباب الجام دون ادري

‏بعيدي وأنت كنت الأوضح لعيني و الأكثر ضوح
‏والأقرب لي من قلوب الاوادم فوقي و حدري

‏والأبعد من ظنون السو و الأعلى في حشاي صروح
‏والأطيب من شذا النوّار و أنقا من ضيا بدري

‏قبل تستبدل ايدين الغرام الحانية بجروح
‏و تستسهل مدا صبري الحليم و تشتهي غدري

‏فقدتك صح لكن ما ترك لي جرحك المفتوح
‏حنين إلا يوريني مساومته على قدري

‏ملام عيوني أكبر من ملامة حرفي المذبوح
‏لو إن اللوم كله لي على إسرافي لك و هدري

‏بتفقدني ليا من بلّ دمعك شالك المطروح
‏ولا عيّنت حولك من يحنّ النعس الخدري

‏وترجع لي تشيلك حسرتك شيل البحر للوح
‏وأغني لك وأنا مشتاق لك ماعاد به بدري

‏ما والله تدخل لقلبي لو إن قلبي سفينة نوح
‏عقب ما جاك مصفيه الهيام و صرت له جدري

‏تهنى فالحياة الناقصة يالناقص المملوح
‏عليك أنت و على الأيام يا كثري و يا ندري
- سلطان الحوالي

عذبه للغاية وكل بيت تستعذبه اكثر ماشاء الله

ياراسي تطيح من الثريّا على المشراف
هذي طيحتك لاطاح كلٍ بـ منزاله

تحسّفت ولا ماتحسّفت شي وطاف
عش اليوم واترك ماضي الوقت في فاله

حديث النفوس اللي تبرّت من الاعراف
يخلّي قلوب القوم رجلي وخياله

طبيعي يعيش الادمي عيشة الخوّاف
الايام هذي صارت تخوّف الداله

ياوجدي لو أحثّ الركايب على المنكاف
واشوف الديار وكل شيءٍ على حاله

قطعت الدروب المجدبه والسنين عجاف
ورا ضوح برقٍ ماغسل كبدي خياله

على يمّة احلامٍ قديمه ووزن وقاف
يجرّيني اللي يرهن الشوق معداله

على بالي اني ماخذٍ قلبه الميلاف
وأثرني خذيت آخر لياليه ورساله

ترددت في مرواحي وخاطره شفّاف
ياخوفي لو ان عنده كلامٍ ولا قاله

سنينه شهر ، وسنين غيره ثلاث أضعاف
عسى بعده اقصر بعد فـ عيون عذاله

وش العذر عند الناحل ، المايس ، الهيّاف
إذا مايرد ايامي البيض في باله

تذكّر ؟ نسا ؟ مرّ القصايد ؟ وش اللي شاف ؟
حلالاه لو طاروقي العذب يحلا له
- محمد بن فضاء

‏هِزِّي إليكِ العُود يتساقط تناهيد وغرام
‏على شجون الكُرْد هِزِّي العُود مَرَّة ثانية

‏ما يصلح لهذا المقام إلا مثل هذا المقام
‏غَنِّي لنا "يا مْصَبِّر المَوعود" مرة ثانية

‏إذا نزل صوتك على جِدْب المشاعر يا سلام
‏تصير نبضات القلوب وْرود مرة ثانية

‏وإذا انحنَى عُودك على عُودك خَلَص كل الكلام
‏أحسّ بِإنّ الله بَعَث داوود مرة ثانية

‏تمايلي والليل تَوّه ليه أنام؟ وكيف أنام؟
‏جُودي على روحي من الموجود مرة ثانية

‏الحين حتى لو يروح الليل ما راح الظلام
‏مدري متى لون الحياة يْعود مرة ثانية

‏تقدَّم الساحر مكان الراهب ومات الغُلام
‏وأصحاب الأخدود اِحفرَوا الأخدود مرة ثانية

‏تمايلي يا أم العيون السود وإن قالوا حرام
‏تمايلي يا أم العيون السود .. مرة ثانية
- مشعل الزعبي

مرحبا

اللهم صلِّ وسلم وبارك على نبينا محمد

صبحكم الله بالخير

لولاي احبك وأحب أحب يا خلي
ما اهملت مصلاحي وبدّيت مصلاحك

يوميًا أرقب سحابك ويغفى ظلّي
والغيم ما جاد بك والبرق ما لاحك

وانا ادري ان الوصل ماهوب حاصل لي
لو اني اتبع مساريّك و مسراحك

وين انت يا خصرٍ اليا مال ما خِلّي
من ميّلك صوب شرهاتي ؟ ومن زاحك ؟

الي نهارين ماني بالحبيب اللي
لا اجتاحه الليل الأدلم عوّد اجتاحك

ماعاد بقول لا شان المسا طلّي
والورْق ناح القلوب الخضر ما ناحك

يا جعل يسقي الزمن ترحالي وحلّي
من راح كف العذاب المر لا راحك

يوم اني اقول لصدوف الزمن ولّي
متحلويٍ مر تعذيبك ومرتاحك

إن جيتني بإلتفاتة جيت لك كلي
فدا الغلا المنتبه والمبسم الضاحك
-أحمد تركي

مرحبا

- عذبة أطباع -

عذبة اطباع تستعذب زعلها ونكدها
لو تهلّ المدامع فالليال السعيده

تختلق من شقى الايام ضحكة لـ غدها
ضحكة القلب فنّ وكلّ فنٍ تجيده

هي حبيبة نسانيس الصباح وسعدها
كنّها ما تهبّ الا عليها وحيده

مشرق الشمس مايطلع لوجهٍ بعدها
لا غفت ما بقى للصبح مشهد يعيده

تفتقدها الاماكن و الجماد افتقدها
ولو نشدت الأوادم قالوا انها فقيده

القبول يتجلّى دون حاجة جهدها
تكسب قلوب خلق الله على ما تريده

عاطفتها تعمّ وما تكفّي بلدها
ولينها تستره خلف الظروف العنيده

القمر ما تساويه النجوم بعددها
تشبهه فالسناء والحسن وانها بعيده

الهلال السماوي مثل أهلّه جسدها
خصرها المنحني معروف بأنّه مكيده

والشعور الحقيقي يوم ذاب فشهدها
كنّها من عذوبه حكيها تستعيده

تكتب الشعر يوم الشعر يُكتب بيدها
لو تعدّ القصايد تدري انها -قصيدة-

صبحكم الله بالخير ♥️

‏حبيب الليال الساريه .. و اول المشوار
‏و قصيدٍ على وجهك تغنّى طواريقه

‏معي ما يباعد خطوتي بين دار و دار
‏ومعك مايقرّب حلم عمري لـ تحقيقه

‏شعور السكينه في حضورك شعور البار
‏ليا مازح امه وضحكت له بعد ضيقه
- فهد بن بجاد

قبلة احساس القصيد ! ( ووجهه وميلافه ! )
‏من بعد غبتي .. وانا الصبر الجميل وشاحي !

‏كنّ ورا صدري ' يويق الطير " من مشرافه "
‏ما لصوته غير ( نسناس الهبوب ) ملاحي

‏ما حسدت الطير في مرواحه / ومنكافه !
‏قد فلج صدر السماء ( منكافي ومرواحي )

‏كل ما هبت عليّ .. " النسمه الهفهافه"
‏(ضاع قلبي مثل ضيعة طيري وملواحي)

‏لا تلومين المشعّف ' لو يزود أشعافه
‏لاقيً له عنق ( ريميّه ) وعين ( وضاحي )

‏وجهه اليـك ، و" تباريح الحياه " ، خلافه
‏والله ان قلبه خَبل .. لكن "عقله صاحي"

‏مع مرور اللي يذوب الليل بين اكنافه
‏خلّي الصبح يتنفّس واجلسي وارتاحي !

‏في لواحظ عينك يدف الظلام أكتافه
‏الظلام اللي تقدّى به ، ضيا مصباحي !! )

‏ادفنيني تحت وبل الغيمة الشفاّاافة ..!
‏بين خمريّك .. ولمعة ثوبك التفاّحي

‏كن خصرك يوم يبسط للهبوب .. اطرافه
‏تارك(ن)له فرجة(ن) يلعب بها مسباحي

‏تشبهين الشعر حتى في ( عذوبة قافه )
‏كنّك اصبوحة بداها ناصر اِبن مناحي !!

‏ادري ان الفقد موجع وادري الحبّ آفة
‏ما أخبر انه مرنّـي .. ( تيارّه الاصلاحي )

‏وإن هلك طراد شفّه دون سعي اهدافه ..!
‏الصبر منجاي 'والعزم المكين سلاحي

‏يتعب المبدع ما يلقى فـ الحياه انصافه
‏ولّا انا قد جزت عن شفّي وجمع ارباحي ! )

‏ان خفضت جناحي يحجب القمر مهيافه
‏وان رفعت جناحي يضيق المدى بجناحي
- تركي العطاوي

يا الله جميله جدًا جدًا
ماشاء الله تبارك الله