..........ትልቅ ሀገራዊ ትልም ሰንቆ በመገንባት ላይ ለሚገኘው የሰው ሰራሽ አስተውሎ (AI) ዩኒቨርሲቲ ፕሮጀክት ቦታቸውን የለቀቁ አርሶ አደሮችን ዘላቂ ተጠቃሚነት ለማረጋገጥ ታስቦ የተገነባው ፕሮጀክቱ ከመደመር ዕሳቤ የተቀዳው የአካታችነት እና የሁሉን አቀፍነት መርህ የተገለጠበት ብቻም ሳይሆን ሀገራዊ ፋይዳንና የሕዝብ ተጠቃሚነትን በአንድ ያሳካም ጭምር ነው።

መንደሩ የመኖሪያ ቤቶችን ጨምሮ የወተት ላም ሼዶች ፣ የመኖ ማቀነባበሪያ ፣ የንግድ ሱቆች፣ የምርት ማከፋፈያና መሸጫ መጋዘን ፣ ወፍጮዎች ፣ የስፖርት ሜዳዎች ፣ የሕፃናት መጫወቻና ማቆያ ማዕከል እንዲሁም የስብሰባ አዳራሽ ተሟልተውለታል።

የከተማው የስራ ባህል መገለጫ በሆነው 7/24 መርህ በአጭር ጊዜ በተገነባው በዚህ ፕሮጀክት ላይ የቦሌ ክፍለከተማ ዲዛይንና ግንባታ ፅ/ቤት በባለቤትነት በማስተባበር ፣  መስኤፍ ጠ/ስ/ተቋራጭ በስራ ተቋራጭነት እንዲሁም ኬኦን ኮንሰልቲንግ በአማካሪነት የተሳተፉበት ሲሆን ካለው ፋይዳ ባሻገር የአስተዳደሩ ፕሮጀክቶችን የመፈፀም ዓቅሙ የደረሰበት ከፍታም የታየበት ነው።

ዲዛይንና ግንባታ ስራዎች ቢሮ ጥቅምት 22/2019

የአዲስ አበባ ከተማ አንጸባራቂ ዕድገት፡ የመደመር እሳቤ ህያው ተምሳሌት!

ኢትዮጵያ የጀመረችው ጥልቅ የመደመር ስትራቴጂ፤ የከተሞችን ዕድገት ለማፋጠን፣ የተቋማትን የመፈጸም አቅም ለማገዝ፣ ሀገር በቀል ሀብቶችን አሟጦ ለመጠቀምና ለዘመናት የተንከባለሉ የከተማ ልማት ማነቆዎችን በተደራጀ፣ በተቀናጀና ዘላቂነት ባለው ሥርዓት ለመፍታት የሚያስችል ታሪካዊ አቅም ፈጥሯል።

በተለይም የኮሪደር ልማትን በስፋት በመተግበር፣ የዜጎችን የመኖሪያ ቤት ዕድል በማሳደግ፣ አካታች የሆነ የከተማ ልማትን እውን በማድረግና የኢትዮጵያን ከተሞች የኢኮኖሚ ማዕከል በማድረግ ተጨባጭ የሆነ ሀገራዊ የኢኮኖሚ ትንሳኤ ማምጣት ተችሏል።

በተለይም በመዲናችን አዲስ አበባ ከተማ እየተከናወኑ ያሉ የልማት ሥራዎች፣ ከተማዋን ለኑሮ ምቹ፣ ማራኪና ለቱሪስቶች ተመራጭ እንድትሆን አድርገዋታል። በአዲስ መልክ የተገነቡት ውብ የኮሪደር ልማቶችና ግዙፍ የኢንዱስትሪ ማምረቻዎች የከተማዋን የኢኮኖሚ የደም ዝውውር በከፍተኛ ደረጃ በማነቃቃት ለኢትዮጵያ ሁለንተናዊ ብልጽግና የጎላ ሚና እየተጫወቱ ይገኛሉ።

በመደመር እሳቤና በቅንጅታዊ አሠራር ማዕቀፍ ውስጥ፣ ለኢኮኖሚያዊ መዋቅራዊ ሽግግር መፋጠን ዋነኛው መነሻና መድረሻ ከተሜነት መሆኑ በግልጽ ተሰምሮበታል። ክቡር ጠቅላይ ሚኒስትር ዐቢይ አሕመድ (ዶ/ር) “የመደመር መንግሥት” በተሰኘው መጽሐፋቸው ይህንኑ ሐሳብ በጥልቀት ሲተነትኑ፤ በተለይም እንደ ኢትዮጵያ ላሉ ታዳጊ ሀገራት የነገ ዕጣ ፈንታቸው ያለው በከተሞቻቸው ውስጥ መሆኑን በማስገንዘብ፤ ከተሞች ለሀገራዊ ጥቅል ምርት (GDP) ያላቸውን ከፍተኛ ድርሻ አጉልተው አሳይተዋል።

የአሁኑም ሆነ የመጪው ዘመን የሀብት ማመንጫ ምንጮች ከተሞች መሆናቸውን አበክረው የገለጹት ጠቅላይ ሚኒስትሩ፤ ከተሞችን በፍጥነት ማሳደግ፣ ፈጠራን ማጎልበት፣ ተሰጥዖዎችን መሳብ፣ ምቹ የንግድ ሥነ-ምህዳርን መፍጠርና ለዘላቂ ዕድገት ወሳኝ የሆኑ መሠረተ ልማቶችን ማሟላት የኢትዮጵያን ኢኮኖሚያዊ ሽግግር እውን ለማድረግ ሞተር እንደሚሆኑ አብራርተዋል።

በከተሞች ላይ የተጠናና በዕውቀት ላይ የተመሠረተ ሙዓለ ንዋይ ማፍሰስ፣ የብልጽግናን በሮች በሰፊው ከመክፈቱም በላይ፣ አካታችና የማይበገር አቅም በመፍጠር ኢትዮጵያን ከዓለም አቀፉ የኢኮኖሚ ሥርዓት ጋር በጥብቅ እንድትተሳሰር ያደርጋታል።
የተበታተኑ አቅሞችን፣ ሐሳቦችንና ግቦችን በአንድነት በማቀናጀት የላቀ የጋራ ውጤት ለማምጣት የሚያስችለው ይህ እሳቤ፣ በአዲስ አበባ ልማት ላይ በተግባር ታይቷል።

ግዙፍ ፕሮጀክቶችን ጀምሮ በታቀደላቸው ጊዜ የማጠናቀቅ ባህል፣ ከተማዋ ለኢትዮጵያ ኢኮኖሚ እያበረከተች ያለው ጉልህ አስተዋጽዖ፣ እንዲሁም በተጨባጭ እየታየ ያለው ዘርፈ ብዙ ኢኮኖሚያዊና ማህበራዊ ለውጥ የዚህ ታላቅ እሳቤ ህያው መገለጫ ነው። በአጠቃላይ፣ የአዲስ አበባ ከተማ ሁለንተናዊ ዕድገት ኢትዮጵያ በመደመር ጎዳና የጀመረችው ጉዞ ሊቀለበስ የማይችልበት የብልጽግና ምዕራፍ ላይ መድረሱን የሚያበስር ደማቅ ማሳያ ነው።