የወንጀል ስጋትን ለመቆጣጠር ህብረተሰቡን የፀጥታው ባለቤት በማድረግ እየተሰራ ያለው ተግባር ተጠናክሮ መቀጠል እንዳለበት ተገለፀ
***
አዲስ አበባ፤ ጥቅምት 20 ቀን 2019 ዓ/ም (አዲስ ፖሊስ)፦ በለሚ ኩራ ክፍለ ከተማ ፖሊስ ዋና መምሪያ ከማዕከል እና ከሌሎች ክፍለ ከተማ ፖሊስ ዋና መምሪያዎችና መምሪያዎች ተዛውረው በተለያዩ የስራ ክፍሎች ላይ ተመድበው ለመጡ ከፍተኛና መካከለኛ አመራሮች የስራ መመሪያ ተሰጥቷል።

የዋና መምሪያው አዛዥ ምክትል ኮሚሽነር ሽመልስ ሽፈራው እንደተናገሩት የአዲስ አበባ ፖሊስ ዋና ጠቅላይ መምሪያ ዋና ተልዕኮና አላማ አድርጎ የተነሳው ወንጀል ከመፈፀሙ አስቀድሞ በመከላከል ተፈፅሞ ሲገኝም ፈፃሚዎችን በመለየት የዜጎችን ሠላምና ደህንነት ማረጋገጥ በመሆኑና ይህንኑ ተልዕኮ ልዩ ትኩረት ሰጥቶ የቀጠለበት ጉዳይ ነው በማለት ተቋሙ በሪፎርም ትግበራው ሰው ተኮር ስራዎችን እየሰራ ይገኛልም ብለዋል፡፡ የፖሊስ አመራርና አባላት በከተማዋ በሁሉም ቦታ ተንቀሳቅሰው ሊሰሩ የሚገባ በመሆኑ የድልድል ስራው ትልቅ ኃላፊነት በመሆኑ እጅ ለእጅ በመቀናጀት የህዝብን ሠላም ማረጋገጥ ይገባል ብለዋል።

ም/ኮሚሽነር ሽመልስ ሽፈራው አክለውም የክፍለ ከተማውን ተጨባጭ የፀጥታ ሁኔታ በመግለፅ በስራቸው ላይ ተፅኖ የሚያሳድሩ አካላት ሊኖሩ እንደሚችሉ በመረዳት በንቃት እና በቁርጠኝነት ሠላም ወዳዱን ነዋሪ በመያዝ የወንጀል ስጋት መቆጣጠር እንዳለባቸው ገልፀው፤ የአዲስ አበባ ፖሊስ ዋና ጠቅላይ መምሪያ በሁሉ አቀፍ የለውጥ ትግበራው በሰው ኃይል፣ በቴክኖሎጂ የታገዘ የወንጀል መከላከል ተግባር፣ በሎጀስቲክስ እና የአባላቱን ኑሮ የተሻለ ለማድረግ በትኩረት እየሰራ ይገኛል ብለዋል፡፡

የውይይቱ ተሳታፊዎች በበኩላቸው ዋና ጠቅላይ መምሪያው የጀመረው የለውጥ ትግበራ የተሻለ ተቋምን ለመገንባትና የህዝብን ሠላምና ደህንነት ይበልጥ በማስጠበቅ ለወንጀል ፈፃሚዎች የማትመች ከተማን እውን ለማድረግ በተመደቡበት የስራ መደብ በቁርጠኝነት እንደሚሰሩ በመግለፅ ህብረተሰቡም የተለመደ ትብብሩን አጠናክሮ ሊቀጥል ይገባል ሲሉ መልዕክታቸውን አስተላልፈዋል።
*
ዘገባ፦ዋና ሣጅን አዳነ ደስታ
ፎቶ፦ረ/ኢንስፔክተር ሀቢብ ሻሚል
*
ለፖሊሳዊ መረጃዎቻችን፦
በፌስቡክ :- https://www.facebook.com/Addisababapolice
በቲክቶክ ፦https://www.tiktok.com/@addisababapoliceofficial?
በቴሌግራም:- https://t.me/addispolice
በዩትዩብ፦ https://www.youtube.com/c/AddisAbabaPoliceCommission
በትዊተር፦Twitter https://twitter.com/AddisPolice
ድረ ገጽ፦ web https://www.addispolice.gov.et/
በጀግንነት መጠበቅ ፤ በሰብዓዊነት ማገልገል!
Protect with Courage, Serve with Compassion!
🇪🇹 🏵💐🏵 🇪🇹

ለማዕረግ ሽግግር በስልጠና ላይ ለሚገኙ ሴት የፖሊስ አመራሮች የጤና አጠባበቅ ስልጠና ተሰጠ
***
አዲስ አበባ፤ ጥቅምት 20 ቀን 2019 ዓ/ም (አዲስ ፖሊስ)፦ በቢሾፍቱ ኮማንዶ እና አየር ወለድ ማሰልጠኛ በስልጠና ላይ የሚገኙ የአዲስ አበባ ፖሊስ ዋና ጠቅላይ መምሪያ ሴት ፖሊስ አመራሮችን በመጎብኘት የንፅህና መጠበቂያ ድጋፍ እና አጭር የጤና አጠባበቅ ግንዛቤ ማስጨበጫ ተሰጥቷል።

የንፅህና መጠበቂያ፣ የምክርና ክትትል ድጋፍ መደረጉ አመራሮቹን ይበልጥ የሚያበረታታ እና የሚያተጋ እንደሆነ የአዲስ አበባ ፖሊስ ዋና ጠቅላይ መምሪያ የሴቶችና ህፃናት ጉዳይ መምሪያ ኃላፊ ኮማንደር ራሄል ዳዊት ገልፀው አመራሮቹ ከኢንስፔክተር ወደ ዋና ኢንስፔክተር ማዕረግ የሚያሸጋግረውን ስልጠና በብቃት አጠናቀው መጨረስ እንዳለባቸው አሳስበዋል።

በዕለቱም የዋና ጠቅላይ መምሪያው ጤና አገልግሎት መምሪያ ኃላፊ ኮማንደር ትዕግስት ወርቁ ለሠልጣኞቹ በማህፀን በር ካንሰርና የጡት ካንሰር በሽታዎችን በመከላከል ዙሪያ ሊደረግ ስለሚገባው ቅድመ ጥንቃቄ ግንዛቤ ሰጥተዋል። ሴት የፖሊስ አመራርና አባላት ጤንነት የተጠበቀ እንዲሆን መደገፍ ለተቋሙ የማስፈፀም አቅም መጠናከር ከፍተኛ አስተዋፅኦ እንዳለው ኃላፊዋ ገልፀዋል።

ሠልጣኞቹ በበኩላቸው ከዚህ በፊት በመልካም አስተዳደር ችግር የማዕረግ ማግኛ ጊዜያቸው እንዳለፈባቸው ገልፀው፤ አሁን ላይ ያሉት ከፍተኛ አመራሮች ችግሩን መርምረው እንደፈቱላቸው እና በተሰጣቸው ፈጣን መፍትሔ ለሕዝብ የተሻለ አገልግሎት ለመስጠት ይበልጥ እንዳነሳሳቸው ተናግረዋል። ለተደረገላቸው ድጋፍም ምስጋናቸውን አቅርበዋል።
*
ዘገባ፦ ዋና ሳጅን አምሳሉ መብራቴ
*
ለፖሊሳዊ መረጃዎቻችን፦
በፌስቡክ :- https://www.facebook.com/Addisababapolice
በቲክቶክ ፦https://www.tiktok.com/@addisababapoliceofficial?
በቴሌግራም:- https://t.me/addispolice
በዩትዩብ፦ https://www.youtube.com/c/AddisAbabaPoliceCommission
በትዊተር፦Twitter https://twitter.com/AddisPolice
ድረ ገጽ፦ web https://www.addispolice.gov.et/
በጀግንነት መጠበቅ ፤ በሰብዓዊነት ማገልገል!
Protect with Courage, Serve with Compassion!
🇪🇹 🏵💐🏵 🇪🇹

የትራንስፖርት ተቆጣጣሪ በመምሰል አንዲትን ሴት አሽከርካሪ ለማገት የሞከረ ግለሰብ በቁጥጥር ስር ዋለ
***
አዲስ አበባ፤ ጥቅምት 20 ቀን 2019 ዓ/ም (አዲስ ፖሊስ)፦ ተገኝ መውደድ የተባለ ተጠርጣሪ ወንጀሉን የፈፀመው ጥቅምት 17 ቀን 2019 ዓ.ም በኮልፌ ቀራንዮ ክ/ከተማ ወረዳ 7 ልዩ ቦታው አንፎ ኬላ አካባቢ በግምት ከጠዋቱ 2፡30 ሰዓት ገደማ ነው።

የግል ተበዳይ የሰሌዳ ቁጥር ኮድ3-07482 ሱ/ማ የሆነ መኪና እያሽከረከሩ በነበረበት ወቅት ግለሰቡ አንፀባራቂ ልብስ ለብሶ የትራንስፖርት ተቆጣጣሪ ነኝ በማለት የግል ተበዳይን አስቁሞ የትራፊክ ደንብ ጥሰሻል በሚል የመንጃ ፍቃዳቸውን ከተቀበለ በኃላ ወደ ቢሮ ትሄጃለሽ በማለት መኪናው ውስጥ ገብቶ እንቅስቃሴ ይጀምራሉ።

የተወሰነ መንገድ እንደተጓዙም ከዚህ ሰዓት ጀምሮ ታግተሻል እኔ ወደ ምልሽ ቦታ መኪናውን አሽከርካሪ በማለት ሽጉጥ አውጥቶ ያስፈራራቸዋል።

የግል ተበዳይ ለጊዜው ሽጉጡን ሲያዩ ቢደናገጡም መኪናውን እያሽከረክሩ የፖሊስ አባላትን ሲመለከቱ ባሰሙት የድረሱልኝ ጥሪ ግለሰቡ ወደ ሰማይ አንድ ጥይት ተኩሶ ለማምለጥ ቢሞክርም በቁጥጥር ስር መዋሉን የክፍለ ከተማው ፖሊስ ዋና መምሪያ አስታውቋል።

ተጠርጣሪው በቁጥጥር ስር ከዋለ በኋላ የፍርድ ቤት መበርበሪያ ትዕዛዝ በማውጣት የመኖሪያ ቤቱ ሲፈተሽ ለወንጀል መፈፀሚያ የሚጠቀምበት 1 ቱርክ ሰራሽ ሽጉጥ ከመሰል 14 ጥይት ጋር፣ አንፀባራቂ ልብስና 1 ሳንጃ እንዲሁም ብዛት ያላቸው የተሰረቁ የኤሌክትሪክ ገመዶች በተጨማሪ መገኘቱን ፖሊስ ገልጿል።

አንፀባራቂ ልብስ በመልበስና ህጋዊ በመምሰል ወንጀል የሚፈፅሙ ግለሰቦችን ለመከላከል ህጋዊነታቸውን የሚገልጽ መታወቂያና ባጅ እንዳላቸው ህብረተሰቡ ማረጋገጥ ይኖርበታል ያለው የአዲስ አበባ ፖሊስ ዋና ጠቅላይ መምሪያ ወንጀል ከተፈፀመም በአፋጣኝ ለፖሊስ ማሳወቅ እንደሚገባ መልዕክቱን አስተላልፏል።
*
ዘገባ፦ ረ/ኢንስፔክተር ዘላለም አበበ
*
ለፖሊሳዊ መረጃዎቻችን፦
በፌስቡክ :- https://www.facebook.com/Addisababapolice
በቲክቶክ ፦https://www.tiktok.com/@addisababapoliceofficial?
በቴሌግራም:- https://t.me/addispolice
በዩትዩብ፦ https://www.youtube.com/c/AddisAbabaPoliceCommission
በትዊተር፦Twitter https://twitter.com/AddisPolice
ድረ ገጽ፦ web https://www.addispolice.gov.et/
በጀግንነት መጠበቅ ፤ በሰብዓዊነት ማገልገል!
Protect with Courage, Serve with Compassion!
🇪🇹 🏵💐🏵 🇪🇹