Хәерле иртә, хөрмәтле укучылар. Бүген 6 гыйнвар, сишәмбе. Әлегә булган кыскача яңалыклар. Алар нигездә төнлә булган дроннар һөҗүме турында.

🔹Сишәмбегә каршы төндә Башкортстанда алты, Татарстанда бер дрон бәреп төшерелгән. Бу хакта Русия саклану министрлыгы хәбәр итә.

🔹Төнлә Татарстан һәм Башкортстанда дроннар һөҗүме куркынычы тәртибе гамәлгә кертелде. Казан һәм Түбән Кама, шулай ук Уфа һава аланнары вакытлыча эшләми. Аэропортлар очкычларны кабул итми һәм җибәрми. Уфада юлчыларга һава аланына юл алганчы, рейслар статусын тикшерү киңәш ителгән.

🔹Башкортстанның Стәрлетамак шәһәрендә шартлаулар тавышы ишетелгән дип яза ASTRA телеграм каналы. Шәһәрдә нефтехимия ширкәте урнашкан һәм анда һөҗүмнәр элек дә булды.

🔹Тверь өлкәсендә дрон торак йортка бәрелү нәтиҗәсендә бер кеше һәлак булган, ике кеше яраланган. Әлеге йорт Тверь вагон төзелеше ширкәтеннән бер чакрым гына ераклыкта урнашкан һәм һөҗүмнең максаты шул ширкәт була ала дип яза ASTRA. Бу Русиядә тимер юл өчен вагоннар җитештерүче иң алдынгы ширкәт санала.

🔹Липецки өлкәсендәге Усман бүлгесендә дә сәнәгать корылмасына дрон төшкәннән соң янгын башланган. Өлкә губернаторы сүзләренчә, зыян күрүчеләр юк. Җирле халык чатларда язуынча, сүз нефтебазага һөҗүм турында бара ала.

🔹Пензада да төнлә шартлау тавышлары ишетелгән дип яза ASTRA телеграм каналы. Дрон "2нче йөк автотранспорты ширкәтенә" (ГАТП-2) эләккән булуы ихтимал. Әлеге ширкәт башка төрле оешмаларга арендага биналар бирү белән шөгыльләнә. Дронның нәкъ кайсы бинага эләгүе билгеле түгел.

❗️Казан һава аланы янә эшли башлады

Барлык чикләүләр алынган.

Бизнес Онлайн хәбәр итүенчә, Казан һава аланы ябык булганда өч очкыч башка аэродромнарга җибәрелгән. Гомумән барлыгы Казаннан китү һәм килүгә 30 рейс тоткарлана.

▪️Русия саклану министрлыгы элегрәк Татарстан күгендә бер дрон бәреп төшерелүен хәбәр итте.

@azatliqradiosi

Азатлык Радиосы төрекмән редакциясе журналистлары югалган блогер Дидар Амансәхатовның каберен тапкан.

34 яшьлек Амонсәхатов социаль челтәрләрдә Хитровский тәхәллүсе белән язган. Ул TikTokта Төркмәнстан хакимиятен, илдәге икътисади хәлне һәм азык-төлек бәяләренең югары булуын тәнкыйтьләгән. Амонсәхатов 2025 елның ноябрь ахырында кинәт югалган.

18 декабрьдә Азатлык Радиосының төрекмән хезмәте журналистлары үз чыганакларыннан Амонсәхатовның Төрекмәнстан куәт оешмасы хезмәткәрләре тарафыннан тоткарлануы һәм аларның газаплаулары аркасында һәлак булуы турында белгән. Әмма хакимият блогерның кайда булуын да, аны тоткарлау сәбәпләрен дә рәсми рәвештә шәрехләмәде.

Исемен атамауны сораган төрекмәнстанлы Азатлык Радиосына сөйләвенчә, Хитровскийның битендә блогерның үлеме уңаеннан кайгы уртаклашуыннан соң, аны да сорау алуга алып киткәннәр. Төрекмәнстан дәүләт иминлеге хезмәте эшчесе ир-атка янап, блогерның язмышы Төрекмәнстан хакимиятен тәнкыйтьләүчеләрнең һәркайсы өчен сабак булырга тиеш дип белдергән.

Мәскәүдәге интеллектуаль хокуклар мәхкәмәсе «Национальные игрушки» ширкәтенә Шүрәле исемен үзләштерүгә рөхсәт бирмәде.

Мәхкәмә моны намуссыз көндәшлек дип тапкан. Бу хакта Татарстанның монополиягә каршы көрәш хезмәте сәхифәсе хәбәр итә.

Шулай итеп мәхкәмә монополиягә каршы көрәш хезмәтенең карарын яклаган. Элегрәк хезмәт «Национальные игрушки» ширкәтен «Көндәшлекне яклау турында» федераль канунны бозган дип таныды.

Ширкәт Шүрәлене тауар билгесе буларак теркәп, аны куллану өчен компенсация таләп иткән иде. Татарстанның монополиягә каршы көрәш хезмәте бу республика мәдәни мирасына яный һәм креатив индустриия үсешен чикли дип саный.

👉2024 елда «Национальные игрушки» «Су анасы», «Камыр батыр», «Шүрәле» тамга билгеләрен патентлап, «Әкият»тән ике тапкыр 500 мең сум сорады. Спектакльләрдә бу персонажлар телгә алынган саен – 1 сум таләп ителде.

Азатлык бу хакта язган иде кереп укыгыз.

@azatliqradiosi

Русиянең Кырымны басып алуыннан бирле язмышы турында бернинди дә мәгълүмат булмаган 31 кеше хәбәрсез югалган дип исәпләнә.

Аларның күпчелеге —кырымтатарлар. Бу хакта Кырымтатар ресурс үзәге хәбәр итә.

"Безнең мәгълүматларга күрә, Кырымда югалган дип саналучылар арасында Ризван Абдураманов, Арсен Алиев, Сервер Алиев, Марсель Аляутдинов, Эскендер Апселямов, Шевкет Арипов, Мухтар Арисланов, Арсен Суюнов, Марат Батыров, Иван Бондарец, Валерий Ващук, Руслан Ганиев, Сергей Грищенков, Ислям Джеппаров, Андрей Дубущак, Сейран Зинедин, Эрвин Ибрагимов, Джевдет Ислямов, Сусанна Исмаилова, Максим Каплиенко, Екатерина Клапова, Анатолий Кобзарь, Федор Костенко, Саха Мангуби, Олег Платонов, Наталья Полюх, Фархад Солиев, Арлен Терехов, Василий Черныш, Тимур Шаймарданов, Марлен Шевкетов бар", дип белдерә үзәк.

Хокук яклаучылар ассызыклавынча, Кремль билгеләгән Кырым хакимиятләре әлеге югалуларны тикшерүне бары тик күз буяу өчен генә алып бара. Шул ук вакытта, БМО Баш Җыены резолюциясе нигезендә, бу җирлектә кеше хокукларының үтәлеше өчен тулы җаваплылык басып алучы дәүләт буларак Русиягә йөкләнгән.

«Без Кырымда асаба кырымтатар халкына һәм Украина яклы активистларга басым ясау, куркыту чарасы буларак кулланылган кулга алуларны, тоткарлауларны һәм кешеләрне урлау очракларын кискен рәвештә хөкем итәбез», дип белдерделәр Кырымтатар ресурс үзәгендә.

Үзәк белгечләре шулай ук кешенең югалуыннан соң беренче сәгатьләрдә мәгълүматны мөмкин кадәр киң тарату тормышны саклап калуда аеруча мөһим фактор булуын билгеләп үтте.

«Бу — теләктәшлек күрсәтү генә түгел, ә реаль йогынты ясау коралы да», диделәр оешмада һәм халыкара җәмәгатьчелекне Русия хакимиятенә карата басымны көчәйтергә чакырдылар.

▪️Украина президентының Кырым вәкиллеге хәбәр итүенчә, 2025 елның 8 декабренә булган мәгълүматлага күрә, Русия тарафыннан аннексияләнгән Кырымда сәяси сәбәпләр белән кимендә 224 кеше ирегеннән мәхрүм ителгән. Аларның 133е — кырымтатар халкы вәкилләре.

@azatliqradiosi

Ике елда Башкортстанда туучы балалар саны 22%ка кимегән.

Бер елда - 16%ка дип яза "Идел.Реалии".

2025 елны Башкортстанда 27 574 бала туган. Бу хакта республика сәламәтлек саклау министры Айрат Рәхмәтуллин белдерде.

Элегрәк Азатлык Радиосы Башкортстанстатка сылтанып 2024 елны 32 968 бала тууы турында язган иде.

Шулай итеп бер елда яңа туган балалар саны 16,4%ка кимегән, ә ике елда (2023 елда 35 388 бала туган) - 22,1%ка.

Ни сәбәпле дип уйлысыз?

Элегрәк Ракша Башкортстанда халык саны нык кимиячәк, Татарстанда миграция хисабына сакланачак, дип белдергән иде.

@azatliqradiosi

Хәерле иртә, хөрмәтле укучылар. 7 гыйнвар иртәсенә булган кыскача яңалыклар.

🔸Украинага ярдәм итүче «Теләүчеләр коалициясе»нә кергән Европа илләре җитәкчеләре 6 гыйнварда солых урнаштыру тәртибен тәэмин итү өчен Украинада 15–20 мең хәрби урнаштыру мөмкинлеге турында фикер алышкан. Саммит 6 гыйнварда Парижда узды, анда шулай ук АКШ президенты Доналд Трамп вәкилләре Стив Уиткофф белән Джаред Кушнер да катнашты.

🔸Украина дроннары Белгород өлкәсе Иске Оскол бүлгесе нефть базасына һөҗүм иткән. Губернатор Вячеслав Гладков сүзләренчә, берничә мичкәдә ут чыккан. Беренчел мәгълүматларга күрә, зыян күрүчеләр юк.

🔸2026 елны Русиядә акча күчерүләр һәм дигиталь түләүләргә дәүләт контроле көчәйтеләчәк дип көтелә. Яңа үзгәрешләрнең төп максаты — финанс агымнарының ачыклыгын арттыру һәм күзәтүче оешмалар арасында мәгълүмат алмашуны тизләтү. Бу хакта Газета.ру яза.

🔸Бүген Керәшен татарлары Раштуаны бәйрәм итә. Аларны Казанны Тихвин чиркәве атакае Алексий Колчерин бәйрәм белән татар телендә котлады.

@azatliqradiosi

Көн язмасы: 2025 ел сугыш өчен иң канкоешлы ел булдымы? Татарстан һәм Башкортстан югалтулары

2025 ел – Русиянең Украинага каршы алып барылган сугышның дүртенче елы. 24 февраль көнне сугыш башлануга 4 ел тулачак. Ел дәвамында АКШ президенты Доналд Трампның сугышны туктату омтылышы күзәтелде, Америка рәсмиләре даими рәвештә Русия һәм Украина җитәкчелеге белән очрашып торды, тынычлыкны якынайтырга тырышты.

Икенче яктан, бу омтылышлар Русия җитәкчелегенең максатларына каршы килде. Русия саклану министрлыгы коллегиясендә ел йомгакларын барлаганда, ил президенты Владимир Путин һәм Саклану министры Андрей Белоусов чыгышларыннан шунысы аңлашылды: Русия армиясен сугышны озак алып баруга әзерлиләр, дип саный журналистлар.

Путин белән Белоусов үз чыгышларында күп саннар китерде, әмма Русия ягыннан күпме кеше һәлак булганы, күпме кешенең хәбәрсез югалуы турында берни әйтмәде. Рәсмиләрдән бернинди мәгълүмат булмагач, сугышта югалтулар, аларның географиясе һәм демографиясе турында журналистлар өйрәнергә һәм сөйләргә мәҗбүр.

2025 ел дәвамында да Азатлык Радиосы "Сугышта югалтулар" хисабын алып баруны дәвам итте. Бу хисапта без ачык чыганаклардан Татарстан һәм Башкортстаннан үлгән хәрбиләр исемлеген барлыйбыз. Бүген бу исемлек һәм андагы саннар турында тәфсиллерәк яздык.

Тулырак 👉монда укыгыз.

@azatliqradiosi

АКШ Венесуэла хакимиятеннән Русия, Куба, Кытай һәм Иран киңәшчеләрен илдән чыгаруны таләп итә.

The New York Times АКШ рәсми затларга сылтанып язуынча, бу хакта дүшәмбе көнне АКШ канун чыгаручылар белән очрашу вакытында илнең дәүләт сәркатибе Марко Рубио белдергән.

Рубио Венесуэланың яңа лидеры Делси Родригеска берничә таләп куйган. Алар арасында әлеге дүрт илдән килгән һәм киңәшче вә башка вазифаларда эшләүче буларак хезмәт иткән күзләү хезмәткәрләрен һәм хәрбиләрне илдән җибәрү таләбе дә бар. Делси Родригес бу таләпләр белән килешкән.

Газета язуынча, әлеге дүрт илдән килгән дипломатларның бер өлешенә Венесуэлада калырга рөхсәт ителәчәк. Чит ил хәрби киңәшчеләрен һәм махсус хезмәтләр вәкилләрен илдән чыгару Венесуэла хакимиятләре өчен сизелерлек булырга мөмкин, чөнки Куба киңәшчеләре илнең иминлек оешмаларында мөһим роль уйнаганы билгеле. Николас Мадуроның шәхси сакчылары буларак та кубалылар хезмәт иткән. Аларның кимендә 30ы Мадуроны тоткарлау чарасы вакытында үтерелгән.

Тулырак 👉монда укыгыз.

@azatliqradiosi

Иранда протестчылар илнең көнбатышында, Гыйрак чигенә якын урнашкан Абданан һәм Малекшаһи шәһәрләрен үз контроленә алган.

Бу хакта Иранның каршылык милли шурасына сылтама белән Fox News хәбәр итә.

Социаль челтәрләрдә Абдананда төшерелгән видеолардан күренгәнчә, демонстрантлар Иранның югары рухание — аятулла Али Хаменеига каршы шигарләр кычкыра: "Хаменеига үлем!" һәм "Бу ел — кан елы, Али Хаменеи бәреп төшереләчәк", ди алар. Видеоларның берсендә бинаның түбәсендә торган иран полиция хезмәткәрләренең протестта катнашучыларга кул болгап, аларны алкышлавы күренә.

"Бүген Иранның көнбатышындагы ике шәһәрдә мөһим вакыйга булды, алар, асылда, протестчылар кулына күчте һәм кешеләр урамнарда бәйрәм итә", дип белдерә Fox News-ка Иранның каршылык милли шурасының тышкы эшләр комиссиясе әгъзасы Али Сафави.

Шәһәрләрнең протестчылар кулына күчүе рәсми расланмаган.

▪️Иранда хөкүмәткә каршы протест чаралары узган ел ахырыннан бирле дәвам итә. Аларның сәбәбе — санкцияләр һәм Израиль белән сугыш нәтиҗәсендә иран реалының нык арзанаюы һәм инфляциянең якынча 50 процентка җитүе тора.

Тулырак👉 монда укыгыз.

@azatliqradiosi

АКШ хәрбиләре Bella-1 танкерын тоткарлау турында белдерде

АКШның Европа кораллы көчләре идарәсе твиттерда язуынча, Bella-1 АКШ санкцияләрен бозган өчен тоткарланган. Кораб АКШ федераль мәхкәмәсе биргән ордер нигезендә кулга алынган.

АКШ хәрбиләре куу барышында танкер үз исемен Marinera дип үзгәрткән һәм Русиянеке итеп теркәгән, әмма АКШ хакимиятләре капитанга туктарга дигән беренче боерыкны яңадан теркәлүгә кадәр үк бирелгәнен ассызыклый. Шуңа алар әлеге чараны Русия корабына һөҗүм дип санарга ярамый, дип белдерә.

▪️Элек Bella1 дип аталган һәм Панама байрагы астында йөргән кораб, Иран нефтен ташыган өчен, АКШның санкцияләр исемлегендә булган. Декабрь ахырында ул Венесуэла портына керә алмаган. Шуннан соң экипаж АКШ яр буе сакчыларын бортка кертергә рөхсәт итмәгән, һәм Америка хәрбиләре танкерны эзәрлекли башлаган.

Күп тә үтми экипаж корабка Русия байрагы сурәтен төшергән, ә танкер исеме Marinera дип яңадан теркәлгән һәм Русия диңгез кораблары исемлегенә кертелгән.

@azatliqradiosi

7 гыйнвар көнне күренекле язучы Гомәр Бәшировның тууына 125 ел.

Бүген сезне Әйдә!Online татар телен өйрәтү проекты әзерләгән Гомәр Бәшировның “Туган ягым – яшел бишек” повестеннән өзек тыңларга чакырабыз.

➡️Текст һәм аудио

@azatliqradiosi

Хәерле иртә, хөрмәтле укучылар. 8 гыйнвар иртәсенә булган кайбер хәбәрләр.

🔸Миннеаполиста АКШның миграция полициясе (ICE) хезмәткәрләре бер хатын-кызны атып үтергән. Эчке иминлек министрлыгы фикеренчә, ул үз автомобиле белән ICE хезмәткәрләрен таптатырга омтылган. Шәһәрдә протест чаралары башланган.

🔸АКШ президенты Доналд Трамп Русиягә каршы яңа санкцияләр кертү турындагы канун өлгесен хуплаган. Бу хакта Х социаль челтәрендә сенатор Линдси Грэм язды. Канун өлгесе Русиядән арзан нефть сатып алучы илләрне җәзага тарту мөмкинлеге бирәчәк.

🔸Германиядә билгесез кешеләр Эркрат шәһәрендә электр полстанциясенә ут төртергә тырышкан. Җаваплылыкны Kommando Angry Birds төркеме үз өстенә алган. Әлеге төркем 2025 елның җәендә шундый ук диверсияләр кылган иде.

🔸АКШның Сота-Лейк-Сити шәһәрендә чиркәү янындагы атышта ике кеше һәлак булган, тагын ким дигәндә алты кеше яраланган. Salt Lake Tribune газеты язуынча, атыш чиркәү янындагы машина кую урынында булган. Җирле полиция хезмәткәре Глен Миллс сүзләренчә, чиркәүдә ул вакытта җеназа барган. Парковкада низаг чыккан, шуннан соң ут ачу тавышлары ишетелгән.

@azatliqradiosi

2025 ел дәвамында Азатлык Радиосы сугышта үлгән хәрбиләр исемлегенә Башкортстан һәм Татарстаннан 8 368 сугышчы исеме өстәде

Бу барысы да 2025 елда үлгәннәр түгел, 2024 елны һәлак булганнар да күп, шулай ук 2023 һәм хәтта 2022 елда үлүчеләр дә һаман очрый.

Әмма бу безнең бер ел элек ясаган тезисны дәлилли: ел саен сугышта үлгән кешеләр саны арта гына. Иң күп кеше Башкортстан һәм Татарстаннан үлә.

Бу хакта тулырак 👉 безнең мәкаләдә укыгыз.

@azatliqradiosi

АКШ Дәүләт департаменты турист яки эш визаларына гариза биргәндә йолым (залог) кертү таләп ителә торган илләр исемлеген киңәйтте.

6 гыйнварда әлеге исемлеккә 25 ил өстәлде. Алар арасында Ангола, Җәзаир, Фиджи, Бангладеш, Куба, Нигерия, Непал, Венесуэла, шулай ук Кыргызстан һәм Таҗикстан да бар. Яңа таләпләр 2026 елның 21 гыйнварыннан гамәлгә керәчәк, дип хәбәр итә "Настоящее Время".

Хәзер исемлектә барлыгы 38 ил бар, моңа кадәр аңа Төркмәнстан да кертелгән иде. Бу илләрнең ватандашлары 5 мең, 10 мең яки 15 мең доллар күләмендә йолым (залог) кертергә тиеш булачак. Акча күләме визага әңгәмә вакытында билгеләнәчәк. Шул ук вакытта, йолым кертү виза бирелүен гарантияләми. Виза шартлары үтәлгән очракта яки виза бирүдән баш тартканда, акчалар кире кайтарылачак.

Виза алган кешеләр АКШка керүне һәм илдән чыгуны бары тик өч халыкара һава аланы аша гына башкарырга тиеш булачак: Логан (Бостон), Кеннеди (Нью-Йорк) һәм Даллес (Вашингтон). Әлеге таләп үтәлмәгән очракта, АКШка кертүдән баш тарту яки илдән чыгуның тиешенчә теркәлмәве ихтимал, дип белдерде АКШ Дәүләт департаменты.

Илдән чыгуны Эчке иминлек министрлыгы теркәячәк. Әгәр виза иясе виза шартларын бозган дип табылса, аның мәгълүматлары тикшерү өчен АКШның Ватандашлык һәм миграция хезмәтенә (USCIS) тапшырылачак.

▪️АКШ керү визаларын йолым белән бирү сынау програмын 2025 елның августында башлап җибәрде. Америка хакимияте фикеренчә, хәзер йолым таләп ителә торган илләр ватандашлары еш кына АКШка кергәннән соң калу өчен рөхсәт ителгән тору вакытын арттыра.

@azatliqradiosi

7 гыйнварда интернет-платформаларда Алсу һәм AY YOLA башкорт төркеме җырчылары башкаруында «Ay, bylbylym» җыры премьерасы булды.

Җыр трендларга эләккән.

"Башинформ" хәбәр итүенчә, клипны 14-16 декабрь көнне Башкортстанда төшергәннәр. Алсу һәм AY YOLA төркеме җырчылары кышкы урманда, шулай ук тау буенда һәм елга янында җыр башкара. Клипны бурят режиссеры Баяр Барадиев төшергән.

▪️2025 елны Ay Yola төркеменең “Һомай” җыры дөнья чартларының югары урыннарына менде, бөтен диярлек социаль челтәрләрне камап алды.

@azatliqradiosi

"Ай, былбылым" татар-башкорт халык җыры булып санала.

Аны бик күп җырчылар башкара.

Аерым алганда Илһам Шакиров, Вафирә Гыйзәтуллина, Хәния Фәрхи һәм Ренат Ибраһимов, Зөлфия Камалова һәм башкалар.

Җырны башкаручылар арасында татар-башкорт булмаган җырчылар да бар. Мисал өчен Премьер-Министр, Jukebox Trio, Алена Ланская (беларус җырчысы), ә 2021 елны аны Гарик Сукачев җырлады.

Бу хакта Әйдә!Online татар телен өйрәтү проекты язды. Шунда ук "Ай, былбылым"ны төрле җырчылар башкаруында тыңларга була.

@azatliqradiosi

Бүгенге көндә Азатлык хисабында Башкортстан һәм Татарстаннан һәлак булган 16 044 сугышчы исеме бар.

2 гыйнварга без Татарстаннан кимендә 7 358 кеше үлеме турында мәгълүмат таба алдык. Башкортстан исемлегендә кимендә 8 686 үлгән хәрби исеме бар.

Чагыштыру өчен: 2024 елның ахырына (30 декабрь) хисапта ике республикадан 7 676 һәлак булган хәрби исеме булды (Татарстаннан – 3 674, Башкортстаннан – 4002). Димәк, 2025 ел дәвамында исемлеккә Башкортстан һәм Татарстаннан 8 368 сугышчы исеме өстәлде.

Бу барысы да 2025 елда үлгәннәр түгел, 2024 ел өчен саннар күп, шулай ук 2023 һәм хәтта 2022 елда үлүчеләр дә һаман очрый. Әмма бу безнең бер ел элек ясаган тезисны дәлилли: ел саен сугышта үлгән кешеләр саны арта гына, һәм аларда иң күп кеше Башкортстан һәм Татарстаннан үлә.

Исемлеккә үлгән кешеләр исемнәре кайчан өстәлде? Тенденция кыска исемлектән ачык күренә:

👉2022 елда Азатлык Радиосы ике республикадан 500 үлүче турында мәгълүмат таба алган иде.
👉2023 елда Татарстан һәм Башкортстаннан хисапка 1 640 кеше өстәлде.
👉2024 елда тагын 5 452 кеше исеме өстәлде.
👉2025 елда Азатлык хисабында тагын 8 452 кеше үлеме теркәлде.

Кабатлап узыйк, беренчедән бу – без тапкан исемнәр генә, чынлыкта аларның саны күбрәк. Икенчедән, бу кешеләрнең төгәл шушы елда үлгән дигәнне аңлатмый, сүз шул елда табылган һәм расланган үлемнәр турында бара, алар арасында узган елларда үлгән сугышчылар да бар.

@azatliqradiosi

9 гыйнварга каршы төндә Русия армиясе Украина башкаласы Киев шәһәренә дроннар, канатлы һәм баллистик ракетлар белән һөҗүм итте.

Хәзерге вакытка билгеле булганча, ким дигәндә 4 кеше һәлак булган, 24 кеше яраланган, 14 кеше хастаханәгә салынган. Шул исәптән бер медицина хезмәткәре үлгән, аның дүрт хезмәттәше яраланган. Алар җәрәхәтләнүчеләргә ярдәм күрсәтергә килгәч, Русия хәрбиләре ул урынга икенче тапкыр һөҗүм иткән.

Шәһәр мэры Виталий Кличко мәгълүматынча, дүрт районда торак йортлар, сәүдә үзәкләре, шифаханә, гаражлар зыян күргән. Берничә янгын чыккан. Шулай ук инфраструктура корылмалары да зыян күргән, кайбер районнарда су вә җылылык белән тәэмин итүдә тоткарлыклар бар.

Киев өлкәсе Броварски районында коткаручылар җимерекләр арасыннан бер гаиләне - ата-ана, биш яшьлек бала һәм әбиләрен коткарган. Алар хастаханәгә җибәрелгән.

Коткару хезмәте Киев өлкәсе Броварски, Обуховски һәм Бориспольски районнарында 11 җирдә янгын сүндергән.

@azatliqradiosi