Башкортстан һәм Татарстанда «Яблоко» намзәтләрен сайлаулардан төшереп калдырды

Башкортстанда фирканең бердәнбер намзәте Нефтекама бүлгесеннән Алексей Акименко иде. Республика Югары мәхкәмәсе аның теркәлүен гамәлдән чыгарды. Мәхкәмәгә шикаятьне «Гадел Русия» намзәте Константин Шаһиморатов язган.

Имеш, Акименко «ВКонтакте»да бер төркем алып барган һәм анда Русиядә тыелган Meta-ның социаль челтәрләренә сылтама куйган. Акименко әлеге төркемне күптән сатуын турында белдерде.

Татарстанда шул ук көнне Чаллыдан Айрат Гомәрбаев сайлаудан төшерелде. Мәхкәмә моңа аның чит ил ширкәтләре хиссәләренә ия булуын сәбәп итте. Гомәрбаев аларны санкцияләр аркасында сата алмадым дип белдерде. Чаллы сайлау бүлгесеннән «Бердәм Русия» намзәте, хәзерге депутат Әлфия Когогина да бара.

Татарстанда «Яблоко»ның намзәтләре әлегә өч сайлау бүлгесендә калды.

10 августта Русия Югары мәхкәмәсе «Яблоко»ның Думага федераль исемлеген теркәүне гамәлдән чыгарды. Фирка карарларны шикаять итә.

Хәерле иртә, хөрмәтле укучыларыбыз! Бүген 2 сентябрь. Әлеге сәгатькә булган кайбер хәбәрләрне барлыйк:

🔸Сишәмбегә каршы төндә АКШ Иранга берничә һөҗүм ясады. Тәһран җавап итеп Үрдүн, Бәхрәйн һәм Күвәйттагы американ хәрби ныгытмаларына ракетлар белән һөҗүм итте. CNN хәбәр итүенчә, бер айдан артык дәвам иткән тынлыктан соң, дүшәмбегә каршы төндә ике арада тагын атышлар башланды.

🔸Русия армиясенең Одессага һөҗүмендә сигез кеше җәрәхәтләнгән. Шәһәрнең хәрби хакимияте башлыгы Сергей Лысак белдерүенчә, дрон 24 катлы торак йортка төшкән.

🔸Белгород өлкәсенә дроннар һөҗүме нәтиҗәсендә дүрт кеше яраланган. Бу хакта өлкәнең оператив штабы белдерә.

🔸Германиянең Аугсбург шәһәре үзәк вокзалында шартлау булган. Бу хакта җирле полиция хәбәр итә. Ике кеше җиңелчә яраланган. Вокзал тирәсен полиция уратып алган, әмма поездлар хәрәкәте дәвам итә.

🔸Германия хакимияте Русияне Лейпциг һава аланында дроннар кулланып диверсия ясарга омтылуда гаепләде. Моңа җавап итеп, тышкы эшләр министры Йоханн Вадефул Русиянең Бонндагы консуллыгын һәм Берлиндагы "Русия йортын" ябарга боерык бирәчәген белдерде.

🔸Мари Иленең татарлар яши торган Бәрәңге районындагы Ләшбирде авылында яңа мәчет сафка баскан. «Ислам в Марий-Эл» хәбәр итүенчә, гыйбадәт йорты 1930нчы елларда юк ителгән мәчет урынына салынган.

@azatliqradiosi

⚡️Башкортстандагы гимназиядә тугызынчы сыйныф укучысы яшьтәшен пычак белән яралаган

Башкортстанның Кушнаренко гимназиясендә дәрес вакытында тугызынчы сыйныфта укучы ике үсмер арасында низаг чыккан. Укучыларның берсе икенчесен пычак белән яралаган. Бу хакта Башкортстанның премьер-министры урынбасары Урал Килсенбаев хәбәр итте.

Зыян күрүчене район хастаханәсенә китергәннәр. Аның гомеренә куркыныч янамый, дип язган түрә.

"Осторожно Новости" Telegram каналы язуынча, яраланган үсмергә операция ясала.

Килсенбаев сүзләренчә, башлангыч мәгълүматларга караганда, низагка шәхси каршылыклар сәбәп булган.

▪️Кичә Красноярски төбәгенең Кански шәһәрендә җиденче сыйныфта укучы кыз укытучыга һөҗүм иткән иде.

@azatliqradiosi

Кушнаренкодагы һөҗүм: мәктәпләрдәге агрессиянең чираттагы очрагымы?

Башкортстандагы гимназиядә тугызынчы сыйныф укучысы яшьтәшенә пычак кадаган. Рәсми затлар үсмернең гомеренә куркыныч янамый дип белдерә, әмма зыян күрүченең әнисе сүзләренчә, аңа операция ясалган һәм ул реанимациядә ята. Бу хакта ана кеше "Осторожно, Новости" Telegram каналына белдергән.

Шулай ук ана улының Кушнаренко гимназиясенең кадет сыйныфында укуын әйткән.

Пычак кадаучы сыйныфташының артында басып торган һәм кыңгырау булгач кухня пычагы кадаган.

Укулар башлануга икенче көн генә булуга карамастан, ике көндә инде өч күңелсез очрак булды. Бүген Яңа Мәскәүдә дә бишенче сыйныфта укучы укытучыны яралаган. Сакчылар аны туктатып кала алган.

Кичә, 1 сентябрьдә Красноярски төбәгенең Кански шәһәрендә җиденче сыйныфта укучы кыз укытучыга һөҗүм иткән иде.

Элегрәк психолог (исемен әйтмәүне сорады) Азатлык Радиосына һөҗүмнәр кешеләрдә курку арту белән бәйле дип сөйләгән иде.

"Соңгы еллардагы сәяси репрессияләр, ковид, тотрыксызлык... кешеләрдә курку арта. Хәзер менә һәр йортка кагылачак сугыш. Бу депрессия генә түгел, ә кешеләр арасында психик авырулар, үз-үзенә кул салучыларны арттырачак.

Яшьләр һәм балаларга иң авыры, чөнки аларның киләчәген урладылар. Шуңа балаларга аеруча игътибарлы булу кирәк. Өлкәннәр әзме-күпме тотрыклы тормышта яшәп калды", дигән иде ул 2022 елны.

@azatliqradiosi

✈️Төркиянең Pegasus Airlines һава ширкәте бүген Антальядан Уфага һәм Уфадан Антальяга очарга тиешле ике рейсны гамәлдән чыгарды

Бүген Уфа вакыты белән 05:35 сәгатьтә Антальядан Airbus A320 очкычының килеүе көтелгән. Ә 06:50 сәгатьтә кире рейс планлаштырылган булган.

Мәгълүмат чаралары хәбәр итүенчә, Pegasus Airlines рейсларны Уфага гына түгел, Русиянең башка шәһәрләренә дә гамәлдән чыгарган. Шул ук вакытта 3 сентябрьдә башкарылырга тиешле очышлар Уфа һава аланы игъланнарында үзгәрмәгән.

Кайберәүләр очышларның гамәлдән чыгарылуын Украина президенты Владимир Зеленскиның 1 сентябрьдә Русиянең һава киңлегендә очышлар имин түгел дип белдерүе белән бәйләде.

Ул Русиягә дроннар һөҗүме артуын сәбәп итеп, чит ил һава ширкәтләрен кисәтте. Зеленский шулай ук Русия һава киңлегенең гражданлык авиациясе өчен ябылырга мөмкинлеген әйтте.

"Бүген без Русия һава киңлегеннән файдаланган һәр ширкәтне, һәр иминиятләштерүчене һәм һаман да Русиянең төп һава аланнарыннан файдаланган һәркемне кисәтергә телибез: Русия һава киңлеге тулысынча имин булмаган урынга әверелә", диде ул.
 
Шул ук вакытта Pegasus Airlines Русиягә рейслар җәдвәл буенча башкарылачак дип белдерергә ашыкты. 1нче һәм 2нче сентябрьдә рейсларның гамәлдән чыгарылуын һава аланының “техник һәм оператив сәбәпләр”е белән аңлатты.

@azatliqradiosi

Башкортстанда кадет сыйныфы укучысы яшьтәшенә пычак кадаган
Әлеге вакытка ниләр билгеле булуы турында безнең видео

Хәерле иртә, хөрмәтле укучыларыбыз! Бүген 3 сентябрь. Әлеге сәгатькә булган кайбер хәбәрләрне барлыйк:

🔷Узган төндә Русия армиясенең Днепропетровски өлкәсенә дроннар һөҗүме нәтиҗәсендә дүрт кеше һәлак булган, 13 кеше җәрәхәтләнгән. Бу хакта җирле хакимият вәкилләре хәбәр итә.

🔷Белгород өлкәсендә дроннар барлыгы 18 торак пунктка һөҗүм итүе нәтиҗәсендә кичә җиде кеше яраланган. Бу хакта төбәкнең оператив штабы хәбәр итә. Брянски өлкәсендә бер хатын-кыз җәрәхәтләнгән дип белдерде төбәк башлыгы Егор Ковальчук.

🔷Русия тышкы эшләр министры Сергей Лавров Германия хакимиятенең Берлиндагы "Русия йортын" ябу карарыннан соң Мәскәү, Петербур һәм Екатеринбурдагы Гете институты филиалларының эшен туктатачагын белдерде.

🔷Норвегия Украинаның "Нафтогаз" ширкәте таләбе нигезендә Шпицбергенда Русиянең "Профессор Молчанов" фәнни-тикшеренү корабын кулга алган.

🔷Татарстанда 2026 елда ашлык һәм кузаклы ашлык культуралары чәчү мәйданы 1,17 миллион һектарга кадәр кимегән. Бу 2025 ел белән чагыштырганда 8,4%ка азрак. Бу хакта Росстат хисабында хәбәр ителә.

@azatliqradiosi

Николай Колесов "Русия боралаклары" җитәкчесе вазифасыннан китте: элек ФБК аның байлыгы турында тикшерү чыгарган иде  
 
Казан кешесе Николай Колесов "Русия боралаклары" җитәкчесе вазифасыннан китте. Рәсми рәвештә моның сәбәпләре аңлатылмый. Әмма "Бизнес Онлайн" басмасы чыганакларына таянып язуынча, Колесовның дәүләт ширкәте эчендәге кагыйдәләрне читләтүе низагларга китергән булуы мөмкин.

Шул ук вакытта Колесов җитәкләгән чорда “Русия боралаклары” һәм Казан боралак ширкәтенең берничә зур проекты гамәлгә ашырылды. Ширкәт бурычлар проблемын хәл итә алды.
 
Ләкин соңгы елларда Колесов исеме җитештерү күрсәткечләре белән генә түгел, аның гаиләсендәге мөлкәте турында чыккан хәбәрләр белән дә танылды. 2025 елда Коррупциягә каршы көрәш фонды (ФБК) Колесов һәм аның туганнарына бәйле дип саналган активлар турында тикшерү чыгарды. Фонд мәгълүматынча, әлеге мөлкәтнең гомуми бәясе якынча 14 миллиард сум тәшкил итә. Фонд белдерүенчә, кыйммәтле күчемсез милекләр, очкычлар һәм башка байлыклар Колесов балалары, апасы һәм элекке хатыны исеменә рәсмиләштерелгән. Тикшерүдә Испания, Гарәп Әмирлекләре, Кырым һәм Мәскәү тирәсендәге йортлар телгә алына.

2026 елның мартында Испаниянең El País басмасы Майорка утравында полициянең берничә виллада тентү үткәрүе турында хәбәр итте. Басма чыганаклары сүз Колесов гаиләсе белән бәйле булырга мөмкин күчемсез милек турында баруын әйтте.

Колесовлар – Татарстанда танылган эшмәкәрләр гаиләсе булды. Николай Колесовның улы – Александр "КАН АВТО" автодилер төркеме белән, ә кызы Анастасия "Татсоцбанк" белән идарә итте. Шулай ук улы Казан шурасы, кызы Татарстан дәүләт шурасы депутаты булды.

Николай Колесов тирәсендә коррупциягә бәйле гаепләүләр дә яңгырады, ләкин шуңа да карамастан ул җитәкче вазифаларында калды.

Тулырак 👉монда укыгыз
 
 @azatliqradiosi

25 август, сишәмбе көнне ”Азатны коткару” комитеты Сен-Дени мэры Балли Багайоко белән очрашты

Мэр Азат Мифтаховка тулы теләктәшлек белдергән.

Solidarité FreeAzat хәбәр итүенчә, очрашуда LDH, Libre Pensée, Solidaires, Réseau Bastille һәм RESU оешмалары вәкилләре катнашкан. Бу оешмалар белән берлектә мэр Азат Мифтаховны яклап уздырылачак зур чараларга катнашырга әзерлеген белдергән.

Әлеге очрашу хакында мэр (фотода уңнан беренче) үзенең социаль челтәрләрендә хәбәр итте. Ул Мифтаховны бөек математик һәм сәяси тоткын дип атый, мәхкәмәләр барышында хокук бозуларга, математикны ирексезлектә җәзалауларга борчылуын белдерә. Азатны яклау максатына ирешүдә үз ярдәмен күрсәтәчәген һәм үз челтәрләрен мобилизацияләп, бу таләпнең ишетелүен тәэмин итәчәген әйтә.

▪️Инде сигез ел төрмәдә утырган татар галиме Азат Мифтаховка Франциядәге Сен-Дели шәһәренең мактаулы ватандашы исемен бирүне сораган иде.
Бу хакта Сен-Дени шәһәре башлыгы Балли Багайокога Татар Шурасы исеменнән дә хат язылды.

Фото:Facebook

@azatliqradiosi

Азат Мифтаховның камера тибындагы бүлмәдә (ПКТ) тоткарлану вакыты озайтылган

Камерадагы тузан аркасында аны хатыны белән очрашудан соң кабат камера тибындагы бүлмәдә калдырганнар, моңа кадәр аны кырыс шартлы бүлмәгә (СУС) күчерергә планлаштырган булганнар. Болар икесе дә бер кешелек камера төрләре, тик тоткынның статусы һәм туганнары белән очрашу, иректән посылка алу шартлары аерыла.

Бүгенге мәхкәмә утырышында Мифтахов видеоэлемтә аша катнашты. Моңа кадәр Мифтаховның хатыны һәм яклаучысы Елена Горбаньны апрель-май айларында ире янына кертмәүне хокуксыз дип таныган мәхкәмә бүген шул карарга дәгъва биргән прокурорны хаклы дип тапты. FREEAZAT төркеме моны кабат дәгъва итәчәген яза, Мифтаховның адвокаты аның янына хатынын кертмәүнең сәбәбе – колония хезмәткәрләре тарафыннан кыйналу эзләрен күрсәтмәскә тырышу дип саный һәм кабат тикшерү уздыруга ирешергә җыена.

Узган мәхкәмәдә Мифтаховның үзен видео аша да катнаштырмагач, аның яклаучылары Мифтаховка карата көч кулланмыймы дип инстанцияләргә мөрәҗәгать итә. Бу сорауга ”тән җәрәхәтләре һәм агулану эзләре табылмады” дигән җавап килә һәм Мифтаховны яклаучы якны сәерсендәре – моңа кадәр алына торган рәсми җавапларда агулану турында бер сүз дә әйтелми.

Мифтахов шулай ук мәхкәмәгә килүчеләргә үзе кебек камера тибындагы бүлмәдә утырган хокук яклаучы Баһром Хамроевтан сәлам җиткерә. Узган мәхкәмә утырышларының берсендә ул Хамроевның Русия ватандашлыгы тартып алынуын хәбәр иткән иде.

@azatliqradiosi

Хәерле иртә, хөрмәтле укучыларыбыз! Бүген 4 сентябрь, иртәнге сәгатьләргә булган кайбер хәбәрләрне барлыйк:

🔹Стәрлетамакка дрон һөҗүме булган. Украин телеграм-каналлары "Авангард" ширкәтендә янгын чыккан дип хәбәр итә. Русия саклану министрлыгы Башкортстан күгендә дроннар бәреп төшерелде диде, ләкин аларның төгәл кайда очулары әйтелмәде.

🔹Белгород өлкәсенә һөҗүмнәр нәтиҗәсендә дүрт кеше һәлак булган, алты кеше яраланган, дип хәбәр итте җирле хакимият.

🔹Запорожье һәм Одесса өлкәләренә Россия һөҗүмнәре нәтиҗәсендә дүрт кеше яраланган, дип хәбәр итте төбәк хакимиятләре. Шулай ук торак йортлар һәм машиналарга зыян килгән.

🔹Август аенда федераль казнаның нефть-газ керемнәре 424 миллиард сумга кадәр кимегән — бу гыйнвардан бирле иң түбән күрсәткеч, дип яза «Коммерсант» финанс министрлыгы мәгълүматларына сылтама белән. Бу июль күрсәткеченнән 55 процентка, узган елның августыннан 16 процентка кимрәк. Гыйнвар-август айларында керемнәр еллык чагыштыруда 17 процентка кимегән.

🔹Европа Берлеге русияләргә туристик визалар бирүгә һәм Русия дипломатларының хәрәкәтенә яңа чикләүләр кертү мәсьәләсен тикшерәчәк, дип хәбәр итә Bloomberg чыганакларына сылтама белән. Шулай ук «күләгә флоты» корабларына һәм Русия армиясе белән бәйле якынча 1600 кешегә һәм ширкәткә карата санкцияләр кертү мөмкинлеге дә карала.

🔹Германиядә полиция Төньяк Рейн-Вестфалиядә электр челтәрләренә диверсия ясарга омтылышны тикшерә, дип яза Bild. Дормаген шәһәрендәге подстанция янында кулдан ясалган шартлаткычка охшаган җайланма табылган. Полиция фикеренчә, кемдер кыска ялганыш китереп чыгарырга тырышкан.

🔹Непалда коткаручылар бозлык шуышканнан соң тугыз көн үткәч, исән калган ике эшчене тапкан, дип хәбәр итә Reuters. Алар Трисули елгасындагы гидроэлектр станциясе тоннелендә булган. 26 августтагы каза нәтиҗәсендә 1200дән артык кеше һәлак булды, тагын якынча 900 кеше тоннельләрдә калырга мөмкин.

Баймакта «киңкүләр чуалышлар» оештыруда гаепләнүчеләр мәхкәмә карары көтә
 
Оренбур өлкә мәхкәмәсендә 2024 елда Баймакта булган вакыйгаларда «киңкүләм тәртипсезлекләр оештыручылар» дип гаепләнгән кешеләргә карата мәхкәмә барышында тарафларның тәмамланып килә.

Гаепләнүчеләр һәм аларның адвокатлары 2024 елның 17 гыйнварындагы вакыйгаларны «оештыруда» гаепләрен танымауларын белдерде. Шул ук вакытта кайбер активистлар протестта катнашучыларны куып тараткан көч оешмалары хезмәткәрләренә карата «гомер һәм сәламәтлек өчен куркыныч булмаган көч куллануда» гаепләрен таныды.

«Idel.Реалии»ның бер чыганагы сүзләренчә, гаепләнүчеләрнең берсе Салават Елкыбаев 17 гыйнварда Баймак мәхкәмәсе бинасы янына «иманлы мөселман буларак Фаил Алсыновны якларга килүен, әмма берничек тә  «массакүләм тәртипсезлекләр» белән җитәкчелек итмәвен һәм аларны координацияләмәвен әйткән
 
Тагын бер чыганак хәбәр итүенчә, гаепләнүче Әхмәт Якупов һәм аның яклаучылары «барлык эпизодлар буенча да тулысынча аклауны таләп иткән».
— Якупов сүз эзләп кесәсенә кермәде — илдәге хакимият турында да сөйләде, аңа карата тискәре мөнәсәбәтен яшермәде, — дип сөйләгән «Idel.Реалии» әңгәмәдәше. — Ул, әлбәттә, бернинди «оештыруны» да танымады.

Мәхкәмәдә күрсәтелгән видеода да аның беренче рәтләрдә басып торуы, әмма бернәрсә дә эшләмәве ачык күренә. Ул шулай ук куәт оешмалары хезмәткәрләре аның аяк астына аткан тавышлы-гранатаны чыннан да читкә ыргытуын әйтте — куркыныч предметны халык арасыннан тизрәк читкә ташларга теләгән. Ул аны беркемгә дә төбәп атмаган, хәтта кая ыргытканын да карамаган.

«Idel.Реалии» чыганагы мәгълүматларына караганда, хөкем карары ноябрь ахыры — декабрь башында чыгарга мөмкин.

▪️Баймак вакыйгаларын «оештыручылар» дип барлыгы 10 кеше танылган. «Баймак эше» нигезендә башка тоткарланучыларга хөкем карарлары чыкты.

Җырчы Фирдүс Тямаев авылыннан Украинадагы сугышка 40ка якын кеше киткән

Бу хакта җырчы үзенең сугышта һәлак булган өчтуган энесе белән хушлашу вакытында белдерде.

Ачык чыганакларга караганда, Русиянең Украинадагы сугышында авылдан инде 9 кеше үлгән.

Түбән Норлат авылы 2001 елдан бирле район үзәге Норлатның бер өлеше санала. Районда 51 меңләп кеше яши.

«Азатлык» ачык чыганаклардан җыйган саннар, Норлат районыннан сугышта кимендә 195 кешенең һәлак булуын күрсәтә.

Җырчы Фирдүс Тямаев үзе Русия башлаган шушы сугышта катнашучылар «илне сакларга китте» ди, мәрхүм өчтуган энесен «герой» дип атый.

Моңа кадәр ул Украинада барган сугыштагы урыс илбасарлары өчен хәтта һуманитар ярдәм дә җыеп җибәрде.

Тямаевның Instagramдагы видеопосты астында аның кайгысын уртаклашу язмалары күп булса да, «Энеңез нәрсә хакына үлде?», «Ул анда кемне яклап сугышты?», «Бу — Русия сугышы, Татарстанга азатлык!» дип язучылар да шактый.

Украинадагы бу сугышны 2022 ел башында бар килешүләрне бозып Путин хакимияте башлады.

Элекке элемтә министры Николай Никифоровка Finiko эше нигезендә читтән торып гаепләү белдерелгән

Соңгы берничә көндә Finiko финанс пирамидасы белән бәйле җинаять эше тирәсендә янә шау-шу купты.

Ни булды?

4 сентябрьдә Русия эчке эшләр министрлыгының Finiko финанс пирамидасы турындагы җинаять эшендә Татарстанның һәм Русиянең элекке элемтә һәм массакүләм коммуникацияләр министры Николай Никифоровка читтән торып гаепләү белдерүе билгеле булды. Тикшерү мәгълүматынча, ул пирамида оештыручыларның берсе булган.

Коммерсантъ мәгълүматларынча, элекке министр хәзер чит илдә. Аны башта федераль, соңрак халыкара эзләүгә игълан итү ихтималы бар.

Никифоров 2018 елда министр вазифасыннан киткәннән соң күбесенчә Берләшкән Гарәп Әмирлекләрендә яшәгән һәм Русиягә вакыт-вакыт кына кайтып йөргән диелә.

Бизнес Онлайн исә, Никифиров 31 августка каршы төндә хосусый бизнес-джет белән Мәскәүнең Внуково һава аланыннан очып киткән дип яза. Шул ук көнне иртән Finiko эше нигезендә Казан янындагы Иннополис шәһәрендә дизайнер һәм архитектор Азат Төхвәтуллин тоткарланды. Басма чыганаклары Никифировны 31 август көндез тоткарларга җыенганнар дип белдергән.

Тикшерү нәрсәгә нигезләнә?

"Коммерсантъ" мәгълүматларына караганда, тикшерү Никифоровны Finikoны оештыручыларның берсе дип саный. Тикшерү мәгълүматынча, пирамида җыйган акчаларны чит илгә чыгаруда Никифоров һәм Төхвәтуллин белән бәйле "Иннополис Архитект" ширкәте кулланылган булырга мөмкин. Ширкәтнең яртысы Төхвәтуллинга, калган өлеше Никифоров белән бәйле "Развитие Иннополиса" оешмасы аша элекке министрга карый.

Finiko эше

Finiko Татарстанда барлыкка килгән финанс пирамидасы буларак билгеле. Җинаять эше 2020 ел ахырында ачылды. Тикшерү мәгълүматларына караганда, катнашучылар халыкка инвестицияләрдән югары керем вәгъдә иткән. "Коммерсантъ" язуынча, хәзерге эш кысаларында сүз якынча 8 мең зыян күрүче һәм аларга 5 млрд сум тирәсе зыян салыну турында бара.

Мәкаләне тулырак 👉 монда укыгыз.

Медиа: ISU Камилә Вәлиеваның нейтраль статусын кире алган

Халыкара тимераякта йөгерү берлеге (ISU) фигуралы шуу остасы Камилә Вәлиеваның нейтраль статусын кире алган. Бу хакта РИА «Новости»га оешмага якын чыганак хәбәр иткән.

Вәлиевага нейтраль статус 7 августта гына бирелгән иде.

Бу атнада ISU Марк Кондратюкның да нейтраль статусын кире алды. Шул сәбәпле ул Токиода узучы Kinoshita Group Cup турнирында катнаша алмады. Аны башка бер Русия фигуралы шуу остасы алыштырды.

Нейтраль статус Русия спортчыларына ISU уздырган халыкара ярышларда Русияне тәкъдим итмичә катнашырга мөмкинлек бирә.

Вәлиева допингка каршы кагыйдәләрне бозган өчен дисквалификациясен үтәгәннән соң 2025 елның октябрендә күнегүләргә кире кайткан иде.

ISU Русия фигурачыларына 2026/27 сезонында нейтраль статуста халыкара ярышларда катнашырга рөхсәт бирде. Бу сезоннан нейтраль статус һәр турнир алдыннан аерым расланачак.

Балык тоту турында ниләр беләсез?

Әйдә!Online проекты татарларның балык тотуы турында кызыклы тест әзерләгән.

Мәсәлән, "дөмбеләү" ни аңлата, "кармак" сүзе кайчан барлыкка килән, Иделдә кайсы балык иң кыйммәтле санала, ни өчен татарлар балык тотмый башлаган?

Бу сорауларга җавап таба алырсызмы?

Үзегезне сынап карагыз әле: 👉 https://www.azatliq.org/a/33842028.html (VPN кирәк булырга мөмкин)

Башкортстанда ир-атлар саны кими

Башкортстанда 2025 елның гыйнварына хатын-кызлар саны 2,14 миллион, ир-атлар саны 1,91 миллион булган. Бу хакта Росстат мәгълүматларын өйрәнгән Уфа фән һәм технологияләр университеты профессоры, икътисадчы Рөстәм Ахунов хәбәр итә.

Төбәк халкының 52,8 процентын хатын-кызлар тәшкил итә, ә ир-атлар өлеше нибары 47,2 процент.

▪️Русиянең Украинага каршы баскын сугышыннан көн саен диярлек хәрбиләрнең мәетләре кайтарыла. Сугышта иң күп үлүчеләр нәкъ менә Башкортстаннан. Сугыш республикадан кимендә 10 640 хәрбинең гомерен өзгән.

▪️Иң күп үлүчеләр – нәкъ урта яшьтәге, җиң сызганып эшли алырлык ирләр, гаилә башлыклары. Башкортстаннан Русиянең Украинага каршы баскын сугышка китеп, анда һәлак булучыларның уртача яше — 39,49

Бу күрсәткеч бик әкрен булса да, арта бара.
 
👉35-44 яшь: кимендә 2 892 кеше,

👉25-34 яшь: кимендә 1 949 кеше,

👉45-54 яшь: кимендә 1 822 кеше,

👉55+ яшь: кимендә 752 кеше,

👉18-24 яшь: кимендә 689 кеше.
 
Иң күп үлүчеләр — 1980нче елларда туучылар (2 633). Икенче һәм өченче урында 1970нче (1 719) һәм 1990нчы (1 708) елларда туучылар бара.

Бу бер ай элек Азатлык Радиосында чыккан мәгълүматлар. Барлык үлүчеләрнең яше төгәл билгеле булмау сәбәпле, хисаплау өчен яше төгәл билгеле булган кешеләрнең мәгълүматлары кулланылды.

#Башкортстан

@azatliqradiosi

📽Казанда узучы "Алтын мөнбәр" кинофестиваленең матбугат очрашуында сорауларны быел бары урыс телендә генә бирергә ярый дигәннәр.

Рүзилә/минем дөнья Telegram каналы язуынча, моны бөтен кеше аңласын өчен шулай эшләнә дигәннәр.

🔸"Алтын мөнбәр" фестивале Казанда 4-8 сентябрь көннәрендә уза. Быелгы фестивальгә 67 ил кинематографистлары үз иҗатын тәкъдим иткән. Бәйгедә 55 фильм катнаша.

🔸Милли кино бәйгесендә "Иң яхшы милли сериал" билгеләнәчәк. Анда Татарстан турында һәм республикада төшерелгән 15 иҗат эше катнаша. Алар арасында танылган режиссер Илдар Ягъфәров, журналист Рәдиф Кашапов, режиссер Булат Минкин да бар.

🔸Милли бәйгедәге фильмнарның күпчелеге бүген "Корстон"да күрсәтеләчәк.

@azatliqradiosi