21 сентябрьдә Самардагы Үзәк бүлге хәрби мәхкәмәсендә Татарстан мөслимәләре Рания Вәисова, Альбина Валиәхмәтова һәм Алсу Фәйзрахмановага карата мәхкәмә утырышы башланган.

Бу хакта мәгълүмат мәхкәмә сәхифәсенең картотекасында барлыкка килде.

Аннан күренгәнчә, мөслимәләрне Русия Җинаять кодексының 205.5 маддә, 1 өлеше - "террорчы оешма эшчәнлеген оештыруда" гаеплиләр. Бу маддә нигезендә җәза 15 елдан 20 елга кадәр төрмә яки гомерлеккә иректән мәхрүм итү яный.

Моннан ике ел элек – 16 сентябрьдә Татарстанда Федераль иминлек хезмәте (ФСБ) хезмәткәрләре халыкара террорчы оешманың хатын-кызлар бүлекчәсендә торуда шикләнеп дүрт мөслимәне тоткарлады. Мәхкәмә 39 яшьлек Ләйсән Садыйкованы, 38 яшьлек Рания Вәисова, 37 яшьлек Алсинә Хәйруллина, 25 яшьлек Альбина Вәлиәхмәтованы сак астына алу карарын чыгарды.

Соңрак, 2025 елның җәендә Алсу Фәйзрахманова тоткарланды.

Мәхкәмә сәхифәсе мәгълүматына караганда, мөслимәләргә кагылган эшләрне икегә аерганнар. Алсинә Хәйруллина белән Ләйсән Садыйковага инде карар чыккан.
Хәйруллинага 28 майда, Садыйковага 9 июньдә җәза билгеләнгән, әмма нинди җәза чыкканы турында рәсми мәгълүмат юк. Бары Русия Җинаять кодексының 205.5 маддә, 2 өлеше - террорчы дип танылган оешма эшчәнлегендә катнашуда гаепле дип табулары язылган.

Тулырак👉 монда

@azatliqradiosi

Мәхкәмә сәяси тоткын Азат Мифтаховның хокуклары бозылган дип тапты

Кичә Лабытнанги шәһәр мәхкәмәсе сәяси тоткын математик Азат Мифтаховның хокуклары бозылган дип тапты. RusNews язуынча, мәхкәмә аның хатынын дүрт тапкыр яклаучы сыйфатында колониягә кертмәүне канун бозу дип бәяләгән. Шул ук вакытта Мифтахов тоту шартлары бозылуы өчен компенсация ала алмаган. Колония хезмәткәрләре гамәлләре дә канун бозу дип танылмаган.

Элегрәк ул колония хезмәткәренең аны көчле яңгыр вакытында ачык һавага су агызу системы булмаган җиргә чыгаруын сөйләгән иде. Мифтахов сүзләренчә, хезмәткәр аны ишегалдына чыгарып: “Йөзә беләсеңдер дип өметләнәм”, дигән. Юешләнмәс өчен, сәяси тоткынга эскәмиягә аяклары белән менеп басарга һәм камерага керткәннәрен бер сәгатьләп көтәргә туры килгән.

Мифтаховның хатынына җибәрелгән җавапта Җәзаларны үтәтү федераль хезмәте колониядәге барлык мәйданчыкларның да шундый булуын, ә Мифтаховны урамда дымлы булуы турында кисәтелгәнен белдергән. Колония җитәкчелеге белдерүенчә, хезмәткәр Азатка “йөзә белү” турында әйтмәгән.

Моңа кадәр, 22 сентябрьдә узган утырыш вакытында, Лабытнанги мәхкәмәсе хөкемдары карар кабул итү өчен залдан чыгып киткәч, видеоконференция элемтәсе өзелде. Мифтаховны яклау тарафы мондый шартларда утырышта катнашудан баш тарткан, ә Азат үзе адвокатсыз сорауларга җавап бирмәвен белдергән.

@azatliqradiosi

Коммуналь хезмәтләргә бәяләр планлаштырылганнан күбрәккә артачак

Русиядә коммуналь хезмәтләргә бәяләр моңа кадәр фаразланганнан күбрәк артырга мөмкин. Икътисад үсеш министрлыгының яңартылган макрофаразында 2027 елның 1 июленнән халыкның коммуналь хезмәтләр өчен гомуми түләве уртача 11%-ка артачак дип күрсәтелә. Элегрәк 8,7% дип фаразланган иде.

Министрлыкта моны инфляциянең көтелгәннән югарырак булуы һәм электр энергетикасындагы эре инвестиция проектлары белән аңлатканнар.

Быел 1 октябрьдән бәяләр уртача 9,9%ка артачак. Ләкин, кайбер төбәкләрдә, шул исәптән Татарстан белән Башкортстанда да уртачадан күбрәккә күтәреләчәк.

Татарстанда 1 октябрьдән коммуналь хезмәтләр өчен түләүнең уртача үсеш индексы 13,4% итеп билгеләнгән. Аерым муниципаль берәмлекләрдә рөхсәт ителгән максималь күрсәткеч - 18,2%.

Башкортстанда 1 октябрьдән коммуналь хезмәтләр өчен түләүнең республика буенча уртача үсеш индексы 10,7% тәшкил итәчәк. Аерым муниципаль берәмлекләр өчен рөхсәт ителгән үсеш - 12,8%.

"Яблоко" фиркасенең Татарстан бүлекчәсе рәисенең "Слово Председателя" Телеграм-каналында язылганча, "шаулап-гөрләп җиңү" белән тәмамланган сайлауларга бер атна да вакыт узмады. Шушы җиңү хөрмәтенә хакимият халыкны "бүләкләргә" булды һәм торак-коммуналь хезмәтләргә яңа тарифлар тәкъдим итте.

@azatliqradiosi

Дөнья татар конгрессы 2030 елгы җанисәп алдыннан Русия төбәкләрендә яшәүче татарларны берләштергән "Иж буе татарлары", "Зөя буе татарлары", "Нократ буе татарлары" конференцияләр сериясен башлап җибәргән.

"Татар-информ" мәгълүмат агентлыгында узган матбугат очрашуында оештыручылар сөйләвенчә, конгресс татарларны географик чикләр аша түгел, ә нәкъ менә тарихи елгалар буйлап берләштерүнең уникаль форматын башлап җибәрде.

"Без Удмуртия татарлары дип сөйләшәбез, чынлыкта Иж елгасы Удмуртиядә башлана, аннары Әгерҗе районына килеп керә, шунда Камага коя. Өч көнлек гамәли конференцияләр сериясен башлап җибәрдек, беренчесе – "Иж буе татарлары" булды. Беренче көнне без Ижауда, икенче көнне Әгерҗедә, өченче көнне Менделеевскида булдык.

Бераздан без «Зөя буе татарлары» дигән конференциягә чыгып китәбез, ул конференция Сембер шәһәрендә башлана. Зөя елгасы Зөябаш (Иске Тимошкино) дигән татар авылында башлана. Әлеге авыл атаклы Акчуриннарның туган авылы, аларның токымы шушы авылдан башлана. Зөя Башы авылында – Ульян, Буа һәм Кайбычта булачакбыз. Елгалар аша милләтебезне берләштерүнең юлларын эзлибез», дип сөйләгән конгресс рәисе урынбасары Ирек Шәрипов.

Мәгълүмат агентлыгы язуынча, быел тагын «Нократ буе татарлары» дип аталган конференция дә планлаштырыла. Әлеге юнәлеш Киров, Нократ Аланы һәм Мамадыш шәһәрләрен үз эченә алачак.

"Мондый елгаларыбыз – җидәү. Киләчәктә әле шундый ук «Агыйдел буе татарлары", "Чулман буе татарлары" кебек конференцияләребез булачак", дигән оештыручылар.

@azatliqradiosi

Русия Дәүләт думасына сайлау нәтиҗәләренә күрә, Татарстанның Думада булачак вәкиллеге кимегән

Бизнес Онлайн язуынча, 2011, 2016 һәм 2021 еллардагы сайлаулардан соң республикадан 15 депутат тәкъдим ителгән булса, бу юлы аларның саны 12 генә булачак.

Гәрчә Татарстан парламентының элекке рәисе Фәрит Мөхәммәтшин Думага яңа чакырылышка республикадан 14 депутат үткәрү планлаштырыла дип әйткән иде.

Башкортстанның Дәүләт Думасындагы вәкиллеге Татарстанга караганда азрак кимегән. Узган чакырылышта аларның саны 14 булса, хәзер 13 булачак.

@azatliqradiosi

Түбән Камада Русиянең Украинага каршы баскын сугышында катнашучыларга мемориал комплекс ачылды

Җиңү мәйданында урнашкан Икенче дөнья сугышы каһарманнары бюстлары янында урнашкан мемориал комплекска гранит стела, Украинага каршы баскын сугышта һәлак булганнарның исемнәре язылган дивар һәм ике сугышчының бронза сыны кергән.

Мемориалны Түбән Кама шәһәренең 60 еллыгына багышлап ачканнар. Анда премьер-министр һәм шәһәр мэры катнашкан. Мэр Радмир Беляев үз Телеграм-каналында чарадан кыска видео чыгарды.

"Бизнес Онлайн язуынча, проектның бюджеты - 50 миллион сум. Аны эшмәкәрләр, хәрбиләр шурасы, халык һәм шәһәр оешмалары җыйган. Төзелеш мартта башланган.

Шул ук вакытта бер генә медиа да диварда кешенең исеме язылганы турында ачыкламый. Азатлык Радиосының cугышта үлүчеләр хисабында Түбән Кама районыннан кимендә 684 һәлак булган сугышчы турында билгеле. Чынлыкта үлемнәр саны күпкә күбрәк була ала.

🔸Түбән Камага дроннар даими һөҗүм итә. Быел 10 августта иң үлемечле һөҗүмнәрнең берсе булды. Ул көнне 13 кеше һәлак булды, 78 кеше яраланды.

🔸Түбән Камада ТАНЕКО һәм ТАИФ-НК нефть эшкәртү ширкәтләре урнашкан. Украина нефть табышыннан кергән акчаларны Русия сугышка тота дип белдерә һәм шул сәбәпле нефть ширкәтләренә һөҗүм итә.

🔸Быел Май аенда Лаешта да Украинага каршы сугышучыларга мемориал ачылды. Анда районнан үлгән 195 исем бар

Европа татарлары форумы кысаларында фатирник узды

25 сентябрьдә Майндагы Франкфурт шәһәрендә татарча фатирник узды.

Анда Евроапаның дистәгә якын иленнән татарлар җыелды. Чараның беренче өлешендә Германиядә яшәүче җырчы-музыкантлар Әдилә Абадели, Илнар Байназаров, Динар Гарипов (баян) чыгыш ясады. Алар татар халык җырларын, легендар җырчылары Вафирә Гыйззәтуллина, Зуля Камалова репертуарындагы җырларны башкарды. Һәр җырның мәгънәсе турында сөйләделәр.

Икенче өлештә килгән кунаклар үзләре чыгыш ясады. Кемдер шигырь сөйләде, кемдер баянга кушылып җырлары, музыка коралларында уйнап күрсәтте. Алара арасында балалар да бар иде.

Фатирник Европа татарларының яңа тарихта беренче форумы кысаларында узды.

Оештыручылар хәбәр итүенчә, 26 сентябрьдә үткән җыенда эмиграциядәге татарлар тел, мәгариф, медиа, татарларның Европада киләчәк тормышы турында җитди фикер алышуларда катнашкан.

Азатлык Радиосы әлеге темага тулырак алдагы көннәрдә язачак